Read Nzema Mɛla 18 Bible Online

Mɛla 18 - Nzema bible

Mɛla 18

¹“Ɔnle kɛ Livae abusua ekpunli ne anu amra mɔɔ le sɛlɛvolɛma la nyia Yizilayɛ azɛlɛ ne bie. Bɛmɛ, ninyɛne mɔɔ bɛkɛva bɛkɛrabɔ ɛyelalɛ azu bɛkɛmaa Ɛdɛnkɛma la bie yɛɛ bɛbado bɛali a, yɛɛ azubɔlɛ ninyɛne ngakyile ne mɔ kɔsɔɔti le bɛ ɛdeɛ.

²Ɔnle kɛ bɛnyia agyadeɛ mɔɔ le kɛ azɛlɛ la biala kɛ bɛ mediema mbusua ekpunli ekpunli ɛhendeɛ ne mɔ anu amra la. Bɛ afoa nu ɛdeɛ a le Ɛdɛnkɛma, kɛmɔ ɔdaye ɔvale ɔbɔle bɛ ɛwɔkɛ la.

³“Zɔhane ati awie biala mɔɔ kɛrabɔ azu la, saa ɛnlankɛ o, boane o, bɛku ye a ɔ kɔme zo ne, ye awudwɛlɛ ne, yɛɛ ɔ kunlu ninyɛne ne le sɛlɛvolɛma ne ɛdeɛ.

⁴Akee bɛ ma mɔɔ bɛkɛlumua bɛkɛde, bɛ nwanye nee nwole mɔɔ bɛkɛlumua bɛkɛyɛ, yɛɛ bɛ mboane ne mɔ amra mɔɔ bɛkɛlumua bɛkɛwo bɛ la, ɔwɔ kɛ bɛfa bɛmaa bɛ.

⁵Ɔluakɛ Ɛdɛnkɛma bɛ Nyamenle ne ɛnlea nu ɛye bɛmɛ wɔ mbusua ekpunli ekpunli ne mɔ anu kɛ bɛ nee bɛ mra bɛyɛ ye sɛlɛvolɛma bɛzonle ye dahuu.

⁶“Saa Livaenli bie wɔ Yizilayɛ sua bie azo na ɔyɛ ye adwenle kɛ ɔba ɛleka mɔɔ Ɛdɛnkɛma se bɛzonle ye la a, ɔkola ɔba.

⁷Ɔba a ɔwɔ kɛ ɔsonle wɔ Ɛdɛnkɛma ye Nyamenle ne duma nu, kɛmɔ ɔ gɔnwo mɔ Livaema ne yɛ ye la.

⁸Mekɛ mɔɔ ɔkɛze kɛ ɔyɛ ye gyima ne la, ɔwɔ kɛ ɔnyia debie biala mɔɔ bɛ nee ye kɛra la bie, kɛmɔ sɛlɛvolɛma mɔɔ ɛha la nyia ye ala la. Debie biala mɔɔ ye sua nu amra kɛva kɛnwa ye la ɔkola ɔfa ɔsie.

⁹“Saa bɛdwu azɛlɛ ne mɔɔ Ɛdɛnkɛma bɛ Nyamenle ne bava amaa bɛ la azo a, bɛmmasukoa bɛyɛ bɛkyi ninyɛne ne mɔ mɔɔ maanle maanle ne mɔ yɛ la bie.

¹⁰ Bɛmmayela bɛ mra mraalɛ anzɛɛ mrenya bɛbɔ azu. Bɛ nuhua biala mmayɛ sunsum nu debie biala mɔɔ kile kɛ ɔbiza awie anwo edwɛkɛ, anzɛɛ ɔbɔ awie munzule, anzɛɛ ɔye ngonyia,

¹¹anzɛɛ ɔkye awie mɔ sili, anzɛɛ ɔtendɛ nwomenle nloa azo, anzɛɛ ɔbɔ bayivolɛ ɛbɛla.

¹²Awie biala mɔɔ yɛ ninyɛne ɛhye mɔ la bɔ munzule wɔ Ɛdɛnkɛma anyunlu. Na ɔlua bɛkyi nyɛleɛ ɛhye mɔ ati yɛɛ Ɛdɛnkɛma bɛ Nyamenle ne ɛlɛfoa menli zɔhane mɔ avi bɛ nye zo a.

¹³ Bɛli nɔhalɛ bɛmaa Ɛdɛnkɛma bɛ Nyamenle ne.”

¹⁴Akee Mosisi zele bɛ kɛ, “Maanlema ɛhye mɔ mɔɔ bɛbahɔ bɛahɔdu bɛ la tie ngonyiama nee menli mɔɔ biza bɔ awie munzule la edwɛkɛ, na bɛmɛ, Ɛdɛnkɛma bɛ Nyamenle ne ɛmkpondɛ kɛ bɛyɛ ɛhye bie.

¹⁵ Ɛdɛnkɛma bɛ Nyamenle ne bamaa ye kpɔmanvolɛ mɔɔ le kɛ medame la avinde bɛ avinli. Ɔbaye ye yeavi bɛdabɛ bɛ mediema ne mɔ avinli, na yemɔ yɛɛ ɔwɔ kɛ bɛtie ye a.

¹⁶“Mekɛ mɔɔ bɛyiale nu wɔ Saenae Boka la, bɛzɛlɛle kɛ Ɛdɛnkɛma bɛ Nyamenle ne mmatendɛ maa bɛte ɔ ne bieko anzɛɛ bɛnwu ye senle hulenyihulenyi ne bieko, ɔboalekɛ ɛnee bɛsulo kɛ bɛkɛwu.

¹⁷Na Ɛdɛnkɛma zele me kɛ, ‘Mɔɔ bɛha la le fɔɔnwo.

¹⁸Yemɔti mebamaa Nyamenle kpɔmanvolɛ avinde bɛdabɛ bɛ avinli. Mebava me edwɛkɛ meadua ɔ nloa na yeaha mɔɔ menwɔze ye la yeahile bɛ.

¹⁹Na mɔɔ andie edwɛkɛ ne mɔɔ ɔkɛlua me duma nu ɔkɛha la, medame me nee ye bali.

²⁰Zɔhane ala yɛɛ Nyamenle kpɔmanvolɛ ko biala mɔɔ kɛbɔ ɔ ti anu kɛva me duma kɛha edwɛkɛ biala mɔɔ tɛ medame a menzele ye anzɛɛ kɛdendɛ nyamenle gyɛne bie mɔ anloa azo la bawu a.’

²¹“Bɛ adwenle nu bayɛ bɛ kesee kɛ, ‘Kɛ ɔkɛyɛ na yɛanwu kɛ edwɛkɛ ɛhye vi Ɛdɛnkɛma ɛkɛ ne ɛ?’

²²Saa Nyamenle kpɔmanvolɛ biala fa Ɛdɛnkɛma duma ka edwɛkɛ na edwɛkɛ ne anyɛ zɔhane anzɛɛ anyɛ nɔhalɛ a, ɛnee ɔnle edwɛkɛ mɔɔ Ɛdɛnkɛma a ɛha a, Nyamenle kpɔmanvolɛ ne ɔdaye a yebɔ ɔ ti anu yeha a. Bɛmmasulo kpɔmanvolɛ zɔhane.