Read Nzema Mɛla 19 Bible Online

Mɛla 19 - Nzema bible

Mɛla 19

¹“Saa Ɛdɛnkɛma bɛ Nyamenle ne bɔ maanlema mɔɔ wɔ azɛlɛ ne mɔɔ ɔbava yeamaa bɛ la abo zo, na bɛfa bɛ azuamgbole ne mɔ na bɛtɛnla bɛ azua ne mɔ anu a,

²bɛhyɛ maanle ne anu nsa, na ko biala ɛnyia suakpole ko mɔɔ zolɛ ɛhɔlɛ ɛnyɛ se la, amaa saa awie ku sonla a yeanriandi yeahɔvea ɛkɛ.

⁴Saa awie anzuzu na ɔku awie mɔɔ ɔ nee ye ɛnlɛ bie dɛba la a, ɔkola ɔnriandi ɔkɔfea ɛkɛ ɔdie ɔdaye ye ngoane.

⁵Yemɔ a le kɛ, saa awie nee ɔ gɔnwo kɔ ɛbɔ nu kɛ bɛkapɛ baka, na baka ne ɛpɛlɛ nu ye akuma ne ati tu kɔbɔ ɔ gɔnwo ne maa ɔwu a, ɔkola ɔnriandi ɔkɔfea azuamgbole ɛhye mɔ ko azo na ɔdie ye ngoane.

⁶Saa tɛ ye zɔ a, anrɛɛ kɛmɔ adenle ne wale la, sonla ne mɔɔ di nzenralɛ ne la bahola avoa ahenle mɔɔ hunle ye la toonwo yeahɔhye ye adenle nu, yeava ɛya yeahu ye yeazie ɔ bo zo, wɔ mekɛ mɔɔ ahenle mɔɔ hunle ye la ɛnli fɔlɛ la. Ɔnle kɛ bɛku ye bɛsie ɔ bo zo, ɔboalekɛ ɛnee ɔ nee ye ɛnlɛ bie dɛba yɛɛ yeanzuzu.

⁷Zɔhane ati mese bɛ kɛ bɛva azuamgbole nsa bɛzie ahane bɛyɛ ɛvealeka.

⁸“Saa Ɛdɛnkɛma bɛ Nyamenle ne maa bɛ azɛlɛ ne tɛlɛ, kɛmɔ yeva yebɔ bɛ nlenya mɔ ɛwɔkɛ la, na ɔfa azɛlɛ ne amuala ɔmaa bɛ a,

⁹eza bɛva azuamgbole nsa bɛboka azuamgbole nsa dɛba ne anwo. (Saa bɛdi mɛla ɛhye mɔ mɔɔ melɛfa meamaa bɛ ɛnɛ la azo, na bɛkulo Ɛdɛnkɛma bɛ Nyamenle ne, bɛdua ye ndenle ne mɔ anu, bɛdi ye ngilehilelɛ zo a, ɔbava azɛlɛ ne amuala yeamaa bɛ).

¹⁰Bɛyɛ ye zɔhane, amaa bɛanga mogya mɔɔ ɛnli fɔlɛ la bɛangua mgbane wɔ bɛ azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ la azo, na eza bɛanli fɔlɛ kɛ bɛha mogya mɔɔ ɛnli fɔlɛ la bɛgua a.

¹¹“Na saa awie kpɔ ɔ gɔnwo na ɔsia ye adenle nu, ɔboda ye kpole bie ɔmaa ɔwu, na ahenle mɔɔ hunle ye la nriandi kɔ ɛvealeka azuamgbole ɛhye mɔ biala azo a,

¹²ɔwɔ kɛ ye sua ne azo mgbanyima soa maa bɛkɔfa ye bɛfi ɛvealeka ne bɛba na bɛye ye bɛwula ahenle mɔɔ di nzenralɛ ne la asa anu, na ɔku ye ɔsie ɔ bo zo.

¹³Ɔnle kɛ bɛse ye anwunvɔne. Bɛye kɔdiawu ɛhye bɛvi Yizilayɛ, amaa kpalɛ adoa kpalɛ.

¹⁴“Ɛweɛne ne mɔ mɔɔ mɔmoane amra ne gyigyale wɔ azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ la azo la, anrɛɛ bɛmmakakyihakyi bɛ. Bɛmaa bɛdeda bɛ nee bɛ gɔnwo mɔ avinli zɔhane ala.

¹⁵ “Saa bɛse awie ɛvo, anzɛɛ ɛdo mɛla bie anzɛɛ ɛyɛ nyɛleɛ ɛtane bie na dasevolɛ kokye ala a wɔ nwolɛ a, ɔnle kɛ bɛbua ahenle mɔɔ bɛdo ye ɛzonle ne la fɔlɛ. Saa menli nwiɔ anzɛɛ nsa di daselɛ tia ye a, ɛnee ɛzonle ne ɛli munli.

¹⁶Saa awie di awie anwo dasewia kɛ ahenle ne ɛyɛ ɛtane bie a,

¹⁷bɛva menli nwiɔ ne mɔɔ edwɛkɛ ne ɛdɔ bɛ avinli la bɛvinde Ɛdɛnkɛma anyunlu bɛmaa sɛlɛvolɛma nee ndɛnebuavolɛma ne mɔ mɔɔ yɛ gyima mekɛ ne anu la ɛli.

¹⁸Ndɛnebuavolɛma ne banleɛnlea edwɛkɛ ne anu kpalɛ, na saa bɛnwu kɛ dasevolɛ ne ɛli dasewia a,

¹⁹bɛva mɔɔ anrɛɛ ɔkulo kɛ ɔfa ɔyɛ ɔ gɔnwo ne la bɛyɛ ye, amaa bɛaye munzule ɛbɛla ɛhye mɔ bɛavi bɛ avinli.

²⁰Ɔba ye zɛhae a, menli mɔɔ ɛha la bade, bɛbazulo, na bɛambɔ munzule ɛbɛla zɛhae bieko wɔ bɛ avinli.

²¹ Bɛmmase awie biala anwunvɔne. Awie mɔɔ kɛhu sonla la, bɛhu ye, ɔtu ɛnyelɛ a, bɛdu ɔ nye, ɔtu egyele a, bɛdu ɔ gye, ɔpɛ ɛsalɛ a, bɛpɛ ɔ sa, yɛɛ ɔbu egyakɛ a, bɛbu ɔ gyakɛ.