Read Nzema Mɛla 2 Bible Online

Mɛla 2 - Nzema bible

Mɛla 2

¹akee yɛhakyile yɛ nwo na yɛrale ɛsɛlɛ ne azo, na yɛvale yɛ ti yɛzule Akaba Ebolo ne,[1] kɛmɔ Ɛdɛnkɛma zele me la, na yɛhɔluoluale Yidɔm awoka ne mɔ anu yɛhyɛle kpalɛ.

²“Akee Ɛdɛnkɛma zele me kɛ,

³‘Bɛkpɔsa maanle ye anu awoka ne mɔ avinli bɛhyɛ bie ala. Bɛhakyi bɛ nye bɛbɔ bɛ ti ɛbɔ nu afoa nu.

⁴Na se menli ne kɛ bɛlɛdua bɛ mediema Yisɔ abo zo amra ne mɔɔ de Yidɔm la maanle nu. Menli ne bazulo bɛ, yemɔti bɛnlea boɛ.

⁵Bɛmmafa konle biala bɛtoa bɛ, ɔluakɛ menrɛva bɛ azɛlɛ ne bie menrɛmaa bɛ. Bɛ azɛlɛ ne ekyi mɔɔ le kɛ egyakɛ ko abo zo bɔbɔ la, bɛnrɛnyia ye, ɔboalekɛ meva Yidɔm maanle ne memaa Yisɔ nee ɔ bo zo amra kɛ bɛ ɛdeɛ ɔ.

⁶Ɔwɔ kɛ bɛtɔ aleɛ bɛfi bɛ ɛkɛ na bɛali, yɛɛ ɔwɔ kɛ bɛtɔ nzule na bɛanlo.’

⁷“Ɛdɛnkɛma bɛ Nyamenle ne ɛyila bɛ ɛmaa bɛ sa anloa gyima ɛyɛ boɛ ɛmaa bɛ. Ɔze bɛ ɛhɔlɛ nu nee kɛ bɛzi bɛkpɔsa fienemgbole ye anu la. Yenlea bɛ nwo zo gyɛlɛɛnye wɔ ɛvolɛ abulanla ye anu, yɛɛ bɛtɛkyianle debie biala anwo.

⁸“Yemɔti yɛhɔle yɛ nyunlu na yɛbule yɛhoanenle yɛ mediema Yisɔ abo zo amra ne mɔ mɔɔ de Yidɔm la. Yɛanva adenle ne mɔɔ kɔ Yilate, Yizeɔngibɛ nee Nyevile Wulera ne anloa la, na yɛbɔle yɛ ti ɛbɔ nu wɔ aduduleɛ afoa nu kɛ yɛkɔ Mowabe fienemgbole nu.

⁹Ɛdɛnkɛma zele me kɛ, ‘Bɛmmagyegye Mowabema yɛɛ bɛmmafa konle bɛtoa bɛ. Ɔluakɛ menrɛva bɛ azɛlɛ ne bie menrɛmaa bɛ kɛ bɛdɛnla zolɛ, ɔboalekɛ meva suakpole Aale memaa Lɔɔto abo zo amra kɛ bɛ ɛdeɛ ɔ.’ ”

¹⁰(Ɛnee menli kakanyinlima bie mɔɔ bɛfɛlɛ bɛ Yimemma la a de Aale a. Bɛwowale, bɛ nwo zonle kɛ Anakema la.

¹¹Eza bɛfɛlɛ bɛ Rilipeeyemma, kɛmɔ ɛnee ɔyɛ a bɛfɛlɛ Anakema la. Noko Mowabema fɛlɛ bɛ Yimemma.

¹²Anrɛɛ menli mɔɔ vi Hɔɔ la de Yidɔm maanle nu, na Yisɔ abo zo amra ne dule bɛ, bɛhunle bɛ, na bɛdɛnlanle azɛlɛ ne azo. Zɔhane ala yɛɛ Yizilayɛma yɛle na bɛvale azɛlɛ ne mɔɔ Ɛdɛnkɛma bɛ Nyamenle ne vale manle bɛ la a.)

¹³“Na kɛmɔ Ɛdɛnkɛma zele yɛ ala la, yɛpɛle yɛhɔle Azudenle Zilɛde ne anzi lɔ.

¹⁴Ɔvi mekɛ mɔɔ yɛvile Keedɛhye Baanɛya toonwo mɔɔ yɛpɛle Azudenle Zilɛde la le ɛvolɛ abulasa nee mɔtwɛ. Menli ɛlɔnwɔne zɔhane mɔɔ ɛnee ze konle nye zo kpalɛ wɔ yɛ nu la amuala wule, kɛmɔ Ɛdɛnkɛma ndane ne mɔɔ ɔhanle ɔhilele bɛ la se la.

¹⁵Nɔhalɛ, Ɛdɛnkɛma angulo bɛ edwɛkɛ, yɛɛ yeangulo bɛ toonwo ɔhɔdwule kɛ ɔzɛkyele bɛ kɔsɔɔti ɔvile yɛ avinli la.

¹⁶“Yemɔti mɔɔ bɛ muala bɛwiele wu bɔkɔɔ la,

¹⁷Ɛdɛnkɛma zele me kɛ,

¹⁸‘Ɛnɛ kenle ye, ɔwɔ kɛ bɛdua Aale na bɛpɛ nu wɔ Mowabe azɛlɛ zo,

¹⁹na saa bɛdwu Amɔnoma ɛweɛne zo a anrɛɛ bɛmmafa konle bɛtoa bɛ anzɛɛ bɛmmagyegye bɛ, ɔluakɛ menrɛva bɛ azɛlɛ ne bie menrɛmaa bɛ, ɔboalekɛ meva ɛkɛ ne azɛlɛ ne memaa Lɔɔto abo zo amra kɛ bɛ ɛdeɛ ɔ.’ ”

²⁰(Maanle ɛhye noko eza bɛfɛlɛ ye Rilipeeyemma maanle. Menli mɔɔ ɛnee de azɛlɛ ne azo la duma a le Rilipeeyem, noko ɛnee Amɔnoma fɛlɛ bɛ Zamezɛmemma.

²¹Bɛ somaa nee bɛ ndendenle nee bɛ mgbole le kɛ Anakema la, noko Ɛdɛnkɛma manle Lɔɔto abo zo amra ne hunle bɛ, bɔle bɛ bo zo na bɛvale azɛlɛ ne bɛdɛnlanle zolɛ.

²²Zɔhane ala yɛɛ ɔyɛle ɔmanle Yisɔ abo zo amra ne mɔɔ de Yidɔm la a, ɔbɔle menli mɔɔ ɛnee de Hɔɔ la abo zo, na bɛdɛnla azɛlɛ ne azo toonwo a yeradwu ɛnɛ a.

²³Menli mɔɔ vi Kiliti la rabɔle Avemma mɔɔ ɛnee de Mɛdetɛlenia Nyevile ne anloa la abo zo na bɛdabɛ noko bɛvale bɛ azɛlɛ ne toonwo bɛhɔdwule azɛlɛ ne nyiakɛ nehane, wɔ Gaza, na bɛdɛnlanle zolɛ.)

²⁴“Akee mɔɔ yɛpɛle nu Mowabe azɛlɛ zo la, Ɛdɛnkɛma zele me kɛ, ‘Bɛdwazo bɛzɔ bɛ adendulɛ ne azo na bɛhɔva bɔnza ne anu bɛpɛ Azule Anɔn ne. Meva Amɔle Belemgbunli Saehɔn mɔɔ de Hɛhyebɔn la nee ye azɛlɛ ne amuala memaa bɛ. Bɛbɔ ɔ bo kɛ bɛfa azɛlɛ ne, na bɛva konle bɛdoa ye.

²⁵Ɔvi ɛnɛ kenle ye mebabɔ ɔ bo kɛ memaa bɛ nwo ayɛ awie biala mɔɔ wɔ aleɛabo la ɛzulolɛ. Biala mɔɔ kɛde bɛ nganeɛ la anwo bawozo ye na ɔ rɛle abɔ.’

²⁶“Yemɔti menzoanle menli wɔ mekɛ mɔɔ ɛnee yɛwɔ Kidɛmo fienemgbole ne anu lɔ la memanle bɛvale anzonudwolɛ nrɛlaleɛ bɛhɔmanle Belemgbunli Saehɔn, wɔ Hɛhyebɔn kɛ,

²⁷‘Maa me nee me menli ne yɛrapɛ nu wɔ wɔ azɛlɛ ne azo. Yɛbava adenle ne azo ala yɛahɔ. Yɛnrɛmakyi bɛne zo anzɛɛ fema zo.

²⁸Aleɛ biala mɔɔ bɛbali la yɛbadɔ yeadua. Wɔmɔ maa yɛ adenle maa yɛze wɔ azɛlɛ ne azo ala,

²⁹kɛmɔ Yisɔ abo zo amra mɔɔ wɔ Yidɔm nee Mowabema mɔɔ wɔ Aale la yɛle manle yɛ la. Mɔɔ yɛkpondɛ la a le kɛ yɛkɛpɛ nu yɛkɛhɔ Azule Dwɔdan ne anzi lɔ azɛlɛ ne mɔɔ Ɛdɛnkɛma yɛ Nyamenle ne ɛva ɛmaa yɛ la azo.’

³⁰“Na Hɛhyebɔn Belemgbunli Saehɔn amkponle kɛ ɔkɛmaa yɛkɛze ye azɛlɛ ne azo. Ɔluakɛ ɛnee Ɛdɛnkɛma bɛ Nyamenle ne ɛmaa yɛsolo na yeyɛ dapele, amaa yeaye ye yeamaa bɛ, kɛmɔ ɔde kɛkala la.

³¹“Na Ɛdɛnkɛma zele me kɛ, ‘Meye Belemgbunli Saehɔn nee ye azɛlɛ ne memaa bɛ. Bɛbɔ ɔ bo kɛ bɛfa azɛlɛ ne bɛadɛnla zolɛ.’

³²Belemgbunli Saehɔn vale ye ɛlɔnema rale kɛ bɛbazi yɛ aze, na bɛ nee ye bɔle ye zo wɔ Gyeehaze.

³³Na Ɛdɛnkɛma yɛ Nyamenle ne yele ye manle yɛ. Yɛlile ɔ nwo zo konim, yɛlile ɔ mra nee ye menli ne amuala anwo zo konim.

³⁴Yɛhonle yɛvale ye azuamgbole ne mɔ amuala, wɔ mekɛ ne anu na yɛbɔle suakpole biala, yɛhunle menli mɔɔ wɔ zolɛ la, mrenya, mraalɛ, nee ngakula kɔsɔɔti. Yɛangyakyi ko bɔbɔ.

³⁵Yɛvale bɛ nlankɛ ne mɔ na yɛvenle bɛ nwo ninyɛne kɔsɔɔti mɔɔ wɔ bɛ azua ne mɔ azo la.

³⁶Ɔvi Alowɛ mɔɔ wɔ Azule Anɔn ne bɔnza ne anloa, nee suakpole ne mɔɔ wɔ bɔnza ne avinli la azo toonwo mɔɔ kɔdwu Geleade la, suakpole biala ɛnle ɛkɛ ne mɔɔ holale yɛ nyunlu gyinla a. Ɛdɛnkɛma yɛ Nyamenle ne yele bɛ muala manle yɛ.

³⁷Noko akee yɛangɔ Amɔnoma azɛlɛ ne azo. Eza yɛangɔ azɛlɛ mɔɔ la Azule Gyeebɔko ne anloa la nee azuamgbole mɔɔ wɔ awoka ne mɔ azo nee ɛleka biala mɔɔ Ɛdɛnkɛma zele yɛ kɛ yɛmmakɔ la.