Read Nzema Mɛla 20 Bible Online

Mɛla 20 - Nzema bible

Mɛla 20

¹“Saa bɛkɔ konle nloa kɛ bɛ nee bɛ kpɔvolɛma kaho, na bɛnwu kɛ kpɔvolɛma ɛlɔnema ne anwo zonle tɛla bɛ na bɛlɛ mgbɔnwɔ nee konle ehwili dɔɔnwo a, bɛmmasulo bɛ, ɔluakɛ Ɛdɛnkɛma bɛ Nyamenle ne mɔɔ nee bɛ vi Yigyibiti rale la nee bɛ a lua a.

²Saa bɛdwu konle ne anloa a, bɛmaa sɛlɛvolɛma ne ɛpɛ ɛli bɛ nyunlu na bɛ nee ɛlɔnema ne ɛdendɛ na bɛze bɛ kɛ,

³‘Yizilayɛma, bɛdie! Ɛnɛ kenle ye bɛra kɛ bɛ nee bɛ kpɔvolɛma baho. Bɛmmamaa bɛ ahonle tu, bɛmmasulo anzɛɛ bɛmmamaa bɛ nwo wozo bɛ bɛmaa bɛ kpɔvolɛma ne anwo yɛ ɛzulolɛ.

⁴Ɔluakɛ Ɛdɛnkɛma bɛ Nyamenle ne, yemɔ yɛɛ ɔ nee bɛ kɔ ɔ nee bɛ kpɔvolɛma ne ahɔho na yeamaa bɛali konim a.’

⁵“Akee mgbanyima mɔɔ wɔ nu la noko badendɛ ahile ɛlɔnema ne kɛ, ‘Nwane a ɛzi sua fofolɛ mɔɔ ɔtɛbukele a? Ɔzia ɔhɔ sua nu na wɔannea a ɔkɛwu konle ye anu na awie gyɛne ava ye sua ne abuke ala nu.

⁶Nwane a ɛlua ye vanye egyinli na ɔtɛdile nuhua ma ne bie a? Ɔzia ɔhɔ sua nu na wɔannea a ɔkɛwu konle ye anu na awie gyɛne ali ye vanye egyinli ne anu ma ne.

⁷Yɛɛ nrenya boni a wɔ ɛke mɔɔ ɛyia raalɛ na ɔ nee ye ɛtɛkɔle sua nu a? Ɔzia ɔhɔ na ɔhɔva ɔ ye ne ɔhɔ ye sua nu na wɔannea a ɔkɛwu konle ye anu na awie gyɛne ava ɔ ye ne.’

⁸“Akee mgbanyima ne mɔ ɛze menli ne mɔ bieko kɛ, ‘Nwane a sulo na ye ahonle ɛdu a? Ɔzia ɔhɔ sua nu na anrɛɛ ɔkɛmaa ɔ gɔnwo mɔ ahonle kɛdu kɛ ye ɛdeɛ ne la.’

⁹Saa mgbanyima ne mɔ tendɛ kile ɛlɔnema ne na bɛwie a, akee bɛyeye safohyenlema bɛmaa bɛli menli ne ati.

¹⁰“Saa bɛkɔ bɛahɔteta suakpole biala kɛ bɛ nee zolɛ amra kaho a, bɛlumua bɛ nee bɛ ɛha anzonudwolɛ nwo edwɛkɛ kɛ menli ne kɛlie kɛdo nu kɛ bɛwɔ bɛ bo.

¹¹Saa menli mɔɔ wɔ suakpole ne azo la die to nu na bɛfa bɛ nwo bɛmaa bɛ a, bɛmaa awie biala mɔɔ wɔ suakpole ne azo la ɛyɛ gyima ɛsesebɛ na ɔzonle bɛ.

¹²Na saa bɛanlie bɛando nuhua na bɛfa konle bɛyia bɛ a, bɛbɛnra bɛyia suakpole ne,

¹³na saa Ɛdɛnkɛma bɛ Nyamenle ne fa suakpole ne maa bɛ ɔmaa bɛdi bɛ nwo zo konim a, bɛhu mrenya mɔɔ wɔ zolɛ la amuala,

¹⁴na bɛva ngakula, mraalɛ, nlankɛ, nee debie biala mɔɔ bɛkɛnyia ye wɔ suakpole ne azo la. Debie biala mɔɔ le bɛ kpɔvolɛma ne ɛdeɛ la, bɛva, ɔluakɛ Ɛdɛnkɛma bɛ Nyamenle ne a ɛva ɛmaa bɛ a.

¹⁵Zɛhae debie yɛɛ ɔwɔ kɛ bɛfa bɛyɛ azuamgbole mɔɔ wɔ moa mɔɔ ɛmboka bɛ maanle ne anwo la a.

¹⁶“Na azuamgbole ne mɔ mɔɔ wɔ azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ la azo la, saa bɛko bɛfa bie a, bɛhu debie biala mɔɔ die ɛnwomenle mɔɔ wɔ zolɛ la.

¹⁷Bɛzɛkye debie biala: bɛbɔ Hɛtema, Amɔlema, Keenama, Pɛlɛzema, Haevaema, yɛɛ Gyibɛsema amuala abo zo, kɛmɔ Ɛdɛnkɛma bɛ Nyamenle ne ɛze bɛ la.

¹⁸Bɛhu bɛ muala, amaa menli zɔhane mɔ angilehile bɛ bɛammaa bɛanyɛ bɛ bɛkyi ninyɛne ne mɔ mɔɔ bɛyɛ wɔ bɛ awozonle ne mɔ ɛzonlenlɛ nu la bie, na bɛayɛ ɛtane bɛatia Ɛdɛnkɛma bɛ Nyamenle ne.

¹⁹“Saa bɛbɛnra bɛyia suakpole bie kɛ bɛ nee zolɛ amra kaho bɛava suakpole ne na bɛhye nwolɛ a, bɛmmafa akuma bɛka mbaka mɔɔ wɔ ɛkɛ ne afoa nu la bɛsɛkye bɛ. Bɛli zolɛ aleɛ ne bie na bɛmmabubu bɛ bɛgua, ɔluakɛ mbaka ne mɔ ɛnle menli na bɛava bɛ konle bɛadoa bɛ.

²⁰Saa bɛsɛkye mbaka a, bɛzɛkye mbaka mɔɔ ɛnzo ma mɔɔ bɛdi la na bɛva bɛ mbaka azinli ne mɔ bɛdua suakpole ne azo amra adenle mɔɔ bɛnvinde a, kɔkpula kɛ suakpole ne azo amra kɛmaa bɛ sa zo la.