Read Nzema Mɛla 21 Bible Online

Mɛla 21 - Nzema bible

Mɛla 21

¹“Saa bɛnwu kɛ bɛhu awie bɛdo kpɔkɛ bie anu, wɔ azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ la azo na bɛngola bɛnnwu ahenle mɔɔ hunle ye la a,

²bɛ mgbanyima ne nee bɛ ndɛnebuavolɛma ne mɔ ɛhɔ na bɛhɔzuzu, ɔvi ahenle mɔɔ ɛwu la anwo ɛkɛ mɔɔ kɔ azuamgbole mɔɔ zuozua ɛkɛ ne la,

³na bɛnwu suakpole mɔɔ bikye ye la. Saa bɛnwu ye a, mgbanyima mɔɔ wɔ suakpole zɔhane azo la ɛva ɛnlankɛ ralɛ mɔɔ bɛtɛfale bɛtɛyɛle gyima ɛlɛ la,

⁴na bɛva bɛhɔ bɔnza mɔɔ azule mɔɔ se la wɔ nu na bɛtɛsonle nuhua ɛya ɛlɛ la anu, na bɛbu ɛnlankɛ ne akɔme wɔ ɛkɛ.

⁵Ɔwɔ kɛ sɛlɛvolɛma ne, mɔɔ le Livae abo zo amra ne kɔ bie, ɔluakɛ bɛmɛ yɛɛ Ɛdɛnkɛma ɛye bɛ kɛ bɛzonle ye na bɛva ye duma bɛyila menli ne a. Edwɛkɛ biala mɔɔ bɛkɛha wɔ edwɛkɛ mɔɔ ɛbɔ kpolera la anwo anzɛɛ ndɛne biala mɔɔ bɛkɛbua wɔ konle biala anwo la ɛnee ɔdaye ne ala ɛne.

⁶Akee mgbanyima ne mɔ banrinzi bɛ sa anwo agua ɛnlankɛ ralɛ ne mɔɔ bɛbu ɔ kɔme wɔ bɔnza ne anu la anwo

⁷na bɛaha kɛ, ‘Tɛ yɛmɛ yɛɛ yɛhunle ahenle ne a, yɛɛ yɛannwu ahenle mɔɔ hunle ye la.

⁸O Ɛdɛnkɛma, fa wɔ menli Yizilayɛma mɔɔ wɔlie bɛ la ɛtane kyɛ bɛ, na mmafa sonla ne mogya ne mɔɔ bɛha bɛgua la anwo ɛzonle ɛsoa bɛ. Fa ɛhunlɛ ne anwo fɔlɛlilɛ biala kyɛ bɛ.’

⁹Yemɔti, saa bɛyɛ mɔɔ Ɛdɛnkɛma kpondɛ la a, ɛnee bɛye ɛzonlelilɛ ne bɛvi bɛ nwo zo.

¹⁰“Saa Ɛdɛnkɛma bɛ Nyamenle ne maa bɛdi konim wɔ konle nu na menli mɔɔ bɛkɛhye bɛ nuokɛ la,

¹¹saa raalɛ bie mɔɔ anwo yɛ fɛ la wɔ nu na ɛkulo ye, ɛkpondɛ kɛ ɛfa ye ɛyɛ ɛye a,

¹²ɛnee fa ye kɔ sua nu, maa ɔkpa ɔ ti na ɔpepɛ ɔ sa nee ɔ gyakɛ ati.

¹³Akee maa ɔye ye nuokɛ tɛladeɛ ne ɔgua, na ɔdɛnla wɔ sua nu ɛkɛ ne ɔzu ɔ ze nee ɔ nli dedee siane ko. Saa ɔwie a akee ɛkola ɛ nee ye da na ɛyɛ ɔ hu, ɔdaye noko ɔyɛ ɛ ye.

¹⁴Nzinlii saa akee ɛ nye ɛnlie ɔ nwo ko a, gyakyi ye maa ɔhɔ ɛleka biala mɔɔ ɔdaye ɔkulo la. Ɔnle kɛ ɛtɔne ye ɛdie ezukoa, yɛɛ ɔnle kɛ ɛyɛ ye kɛ asɛɛ ɔle kanranli, ɔboalekɛ ɛ nee ye bɛyɛ nrenya nee raalɛ.

¹⁵“Saa nrenya bie gya mraalɛ nwiɔ, ɔkulo ko na ɔngulo ko, na bɛdabɛ mraalɛ nwiɔ ne bɛ nee ye wo mralɛ, na saa ralɛ nrenya kpanyinli ne kɔyɛ raalɛ ne mɔɔ ɔngulo ye la ara a,

¹⁶kenle mɔɔ selɛ ne kyɛ ye ninyɛne nu kɛ ɔ mra mrenya ne mɔ agyadeɛ la, ɔnle kɛ ɔyɛ kɛ asɛɛ raalɛ ne mɔɔ ɔkulo ye la ara ɛdeɛ ne a le kpanyinli a.

¹⁷Ɔwɔ kɛ ɔfa raalɛ ne mɔɔ ɔngulo ye la ara nrenya ne kpanyinli ne ɔmaa ye, na ɔmaa ye ninyɛne ɛdeɛ ne yɛ mɔnwo tɛla ekyi ne ɛdeɛ ne. Ɔwɔ kɛ nrenya biala die ɔ ra nrenya kpanyinli ne gyinlabelɛ ne to nu, ɔboalekɛ yemɔ yɛɛ ɔlumuale ɔwole ye a. Kpanyinli gyinlabelɛ ne le ye ɛdeɛ.

¹⁸“Saa awie lɛ ɔ ra nrenya bie mɔɔ anzo yɛ se na ɔte atua, na ɔnyɛ tieyɛ ɔmmaa ɔ ze anzɛɛ ɔ nli, mɔɔ saa bɛtea ye bɔbɔ a ɔnvane ɔ nwo la a,

¹⁹ɔ ze nee ɔ nli ɛzɔ ye nu, ɛye ye ɛvi ɛleka mɔɔ ɔde la, na bɛva ye bɛrɛla sua ne azo mgbanyima ne mɔ anyunlu,

²⁰na bɛze mgbanyima ne mɔ kɛ, ‘Yɛ ra ɛhye anzo yɛ se, ɔte atua. Ɔndie yɛ ne, ɔle aleɛkpole yɛɛ eza ɔle nzanli.’

²¹Saa ɔba ye zɛhae a, bɛdabɛ mɔɔ bɛwɔ suakpole ne azo la ɛrazi ye awolɛ ɛhu ye, amaa bɛakpa munzule bɛavi sua ne azo. Yizilayɛma kɔsɔɔti bade na bɛazulo.

²²“Saa awie to mɛla bie mɔɔ ɔfɛta ɛhunlɛ la na bɛkenda ye bɛku ye a,

²³ ɔnle kɛ bɛmaa ye funli ne kenda baka ne azo aledwolɛ ne amuala. Ɔwɔ kɛ bɛye ye bɛsie ye kenle ko ne ala. Ɔluakɛ awie mɔɔ bɛkɛhenda ye bɛkɛhu ye la ɛbɔ Nyamenle anwo ebele na yeva munzule yeha azɛlɛ ne. Ɔnle kɛ bɛmaa ɔkenda ɛkɛ ne ɔsɛkye azɛlɛ ne mɔɔ Ɛdɛnkɛma bɛ Nyamenle ne bava amaa bɛ kɛ bɛ ɛdeɛ ɔ la.