Read Nzema Mɛla 22 Bible Online

Mɛla 22 - Nzema bible

Mɛla 22

¹ “Saa ɛnwu kɛ ɛ diema bie ɛnlankɛ anzɛɛ boane ɛde ɛlɛkɔ a, mmayɛ kɛ asɛɛ ɔnvane ɛ nwo la. Fa ɛnlankɛ ne anzɛɛ boane ne sia kɔmaa ɔ menle.

²Saa ɛleka mɔɔ ɔvi yera la wale, anzɛɛ ɛnze ɔ menle a, fa ye sie wɔ tunli ne anu, wɔ wɔ sua nu ɛkɛ ne maa ɔwoa ɛ nwo ɛkɛ ne toonwo ɔhɔdwu kɛ ɔ menle kɛra ye ɛkpondɛlɛ la na fa ye debie maa ye.

³Zɔhane ala yɛɛ fa yɛ ɛ gɔnwo asoaso, ye tɛladeɛ nee ye debie biala mɔɔ kɛminli la a. Ɔnle kɛ ɛtɛnla ɛkɛ ne ɛyɛ kɛ wɔannwu ye na ɛmaa deɛ ne minli.

⁴“Saa ɛnwu kɛ ɛ diema bie asoaso anzɛɛ ɛnlankɛ ɛdɔ aze wɔ adevinli a, ɔnle kɛ ɛpɛ nu ɛkɔ. Ɔwɔ kɛ ɛsɔ ɛ diema ne nu ɛmaa ɔdwazo ye asoaso ne anzɛɛ ɛnlankɛ ne.

⁵“Ɔnle kɛ raalɛ wula nrenya tɛladeɛ, yɛɛ ɔnle kɛ nrenya keda raalɛ ɛdanlɛ. Ɛdɛnkɛma bɛ Nyamenle ne kyi menli mɔɔ yɛ ninyɛne ɛhye mɔ la.

⁶“Saa ɛkɔto anloma sane wɔ azɛlɛ nwo anzɛɛ baka bie azo, na aholonvia wɔ nu anzɛɛ nloma mralɛ wɔ nu na bɛ nli butu bɛ nwo zo a, ɔnle kɛ ɛkye bɛ nli ɛboka ɔ mra ne mɔ.

⁷Gyakyi bɛ nli ne maa ɔhɔ na sesa ɔ mra ne mɔ kɔzie, amaa wɔanyi wɔahyɛ na wɔ ɛbɛla ayɛ boɛ amaa wɔ.

⁸“Saa ɛsi wɔ sua a, bɔ mɔdenle die bane wɔ ɔ ti zo, amaa saa awie vi zolɛ tɔ aze na ɔwu a, wɔanli fɔlɛ kɛ ɛdawɔ a ɛhunle ye a.

⁹ “Ɔnle kɛ ɛdua ma ngakyile bieko wɔ wɔ vanye egyinli nu. Saa ɛyɛ ye zɔhane a, bɛbasisi ɛ nwo zo, na egyinli ne nee nuhua ma ne amuala bayɛ ɛleka nwuanzanwuanza ne ɛdeɛ.

¹⁰“Mmafa asoaso nee ɛnlankɛ ɛkenda bɛ ko kɛ ɛfa wɔazo ɛya anzɛɛ wɔavunduvundu wɔ ɛya nu azɛlɛ.

¹¹“Mmawula tɛladeɛ anzɛɛ mmakeda ɛdanlɛ mɔɔ bɛva boane enrinli nee bolɔfodɔ mɔleɛ bɛnwo la.

¹² “Wɔ ɛdanlɛ ne mɔɔ ɛfa ɛgua ɛ nwo la, nwo nyɛma sosɔkpɔɔ ɔ ti nna ne amuala.

¹³“Saa nrenya gya raalɛ, ɔ nee ye kɔda na nzinlii ɔngulo ye la ati

¹⁴ɔto ye ɛzonle, ɔgua ɔ nyunlu aze kɛ ɔnle belamunli, na awie vale ɔ nwo hanle ye kolaa na yeara ye sua nu a,

¹⁵raalɛ ne ɔ ze nee ɔ nli ɛva bɛ ra raalɛ ne nee ɛkpa zo ɛdanlɛ ne mɔɔ kakula raalɛ ne nee ɔ hu bɛlumuale bɛlale zolɛ la nee nuhua mogya ne ɛhɔ anlenkɛ kpole ne anloa, ɛleka mɔɔ mgbanyima ne mɔ di edwɛkɛ la.

¹⁶Saa bɛkɔ a, selɛ ne ɛze mgbanyima ne mɔ kɛ, ‘Menvale me ra raalɛ ye memanle nrenya ɛhye gyale ye, na kɛkala, ɔse akee ɔngulo ye.

¹⁷Yedo ye ɛzonle yegua ɔ nyunlu aze kɛ me ra raalɛ ne nwunle nrenya kolaa na yeahɔ ye sua nu. Na saa ɔle zɔ o, ɔnle zɔ o, daselɛ ye a le ɛkpa zo ɛdanlɛ ye mɔɔ bɛlumuale bɛlale zolɛ la.’ Na akee ɔdɛlɛ ɛdanlɛ ne anu wɔ mgbanyima ne mɔ anyunlu, ɔmaa bɛnwu mogya ne.

¹⁸Saa ɔba ye zɛhae a, mgbanyima ne mɔ ɛmaa bɛbila nrenya ne empele

¹⁹na bɛlie dwɛtɛ fufule ɛya ko wɔ ye ɛkɛ bɛmaa kakula raalɛ ne ɔ ze, ɔboalekɛ yebɔ Yizilayɛ belamunli raalɛ anyiemgba. Na akee bɛmaa ɔzia ɔyɛ raalɛ ne ɔ hu. Ɔnle kɛ ɔbɔ ye ewole ɛlɛ na ɔdaye nrenya ne yeawu.

²⁰“Na saa bɛneɛnlea nu na ɛzonle ne mɔɔ nrenya ne ɛdo raalɛ ne la le nɔhalɛ, na bɛannwu debie biala mɔɔ di daselɛ kɛ ɛnee raalɛ ne le belamunli kolaa na yeara ɔ hu sua nu a,

²¹ɛnee bɛva raalɛ ne bɛvinde bɛhɔ ɔ ze anuhɔlɛ lɔ na mrenya mɔɔ wɔ suakpole ne azo la ɛzi ye awolɛ ɛhu ye, ɔboalekɛ yebɔ anyiemgba ɛbɛla wɔ Yizilayɛ, ɔbɔle adwɔmane wɔ ɔ ze sua nu kolaa na bɛagya ye. Bɛyɛ ye zɔhane bɛva bɛdu munzule biala abo.

²²“Saa bɛkɔkye nrenya kɛ ɔlɛfa awie aye a, bɛhu bɛ mu nwiɔ, nrenya ne mɔɔ ɛlɛfa raalɛ ne la yɛɛ awuvolɛ raalɛ ne. Bɛyɛ ye zɔhane bɛdu munzule ne abo.

²³“Saa raalɛ bie wɔ ɛkɛ na bɛyia ye kɛ bɛbagya ye, na nrenya fɛlɛ ye wɔ suakpole ne azo na ɔfa ye a,

²⁴bɛva bɛ mu nwiɔ bɛvinde suakpole ne anlenkɛ kpole ne anzi lɔ na bɛzi bɛ awolɛ bɛhu bɛ. Bɛzi raalɛ ne awolɛ bɛhu ye, ɔboalekɛ ɔwɔ sua zo noko yeandeɛdea nu yeanvɛlɛ kɛ awie ɛraboa ye. Bɛhu nrenya ne noko, ɔboalekɛ yeva kakula raalɛ mɔɔ awie ɛyia ye kɛ ɔgya ye la. Bɛyɛ ye zɔhane bɛva bɛdu munzule ne abo.

²⁵“Na saa nrenya nee raalɛ mɔɔ bɛyia ye la yia kpɔkɛ bie anu na ɔkye ye mianleranu ɔfa ye a, bɛhu nrenya ne angome.

²⁶Raalɛ ne ɛdeɛ, bɛgyakyi ye, ɔboalekɛ ɔtɛyɛle ɛtane mɔɔ fɛta ewule a. Ɔluakɛ edwɛkɛ ɛhye le kɛ awie mɔɔ ɛzia ɔ gɔnwo ɛhu ye la,

²⁷ɔboalekɛ ɔholole kakula raalɛ ne anwo zo wɔ ɛbɔ nu. Saa raalɛ ne mɔɔ awie ɛyia ye la deɛdeanle nuhua bɔbɔ a, anrɛɛ awie ɛnle ɛkɛ ne mɔɔ die ye a.

²⁸ “Saa nrenya nee raalɛ mɔɔ ɛnze nrenya na bɛtɛyiale ye la yia na ɔkye ye mianleranu ɔ nee ye da na bɛkye bɛ a,

²⁹ɔwɔ kɛ nrenya ne mɔɔ nee raalɛ ne lale la tua asoa ezukoa dwɛtɛ fufule abulanlu maa kakula raalɛ ne ɔ ze na ɔfa raalɛ ne ɔyɛ ɔ ye, ɔboalekɛ ɔhyele ye mianleranu a ɔvale ye a. Ɔngola ɔmbɔ ye ewole ɛlɛ wɔ mekɛ mɔɔ ɔdaye nrenya ne ɔde ngoane nu la.

³⁰“Ɔnle kɛ nrenya biala fa ɔ ze aye anzɛɛ ye ɔ ze anwo bɔ ye anyiemgba.