Read Nzema Mɛla 23 Bible Online

Mɛla 23 - Nzema bible

Mɛla 23

¹“Ɔnle kɛ nrenya biala mɔɔ bɛza ye[8] anzɛɛ bɛdu ye mrenyanu la tɛnla Ɛdɛnkɛma menli ne avinli.

²“Ɔnle kɛ belazinli ralɛ biala tɛnla Ɛdɛnkɛma menli ne avinli. Ɔ bo zo amra bɔbɔ, toonwo mɔɔ kɔdwu awolɛndoazo bulu ne azo la, ɔnle kɛ bɛ nuhua biala wolo Ɛdɛnkɛma menli ne avinli.

³“Ɔnle kɛ Amɔnonli anzɛɛ Mowabenli biala wolo Ɛdɛnkɛma menli ne avinli. Ɔ bo zo amra, toonwo mɔɔ badwu awolɛndoazo bulu ne azo bɔbɔ la, bɛye bɛ bɛvi Ɛdɛnkɛma menli ne avinli bɔkɔɔ,

⁴ɔboalekɛ mekɛ mɔɔ bɛvi Yigyibiti bɛba la, bɛammaa bɛ aleɛ a bɛammaa bɛ nzule. Eza bɛbɔle Biyɔ ara nrenya Beelam, mɔɔ vi suakpole Pitɔ mɔɔ wɔ Mɛsɔpɔteemea la ɛkpa kɛ ɔwa bɛ amonle.

⁵Noko Ɛdɛnkɛma bɛ Nyamenle ne andie Beelam ane; Ɛdɛnkɛma bɛ Nyamenle ne hakyile amowa ne manle ɔyɛle nyilalɛ ɔmanle bɛ, ɔluakɛ Ɛdɛnkɛma bɛ Nyamenle ne hulole bɛ.

⁶Mekɛ tendenle biala mɔɔ bɛde ngoane nu la, bɛmmamaa menli zɔhane nyia anzonudwolɛ yɛɛ bɛmmamaa bɛkpazi ɛlɛ.

⁷“Bɛmmakpo Yidɔmenli, ɔluakɛ ɔle bɛ diema; bɛmmakpo Yigyibitinli, ɔluakɛ ɛnee bɛle nyɛvolɛ wɔ ye maanle nu.

⁸Ɔvi awolɛndoazo nsa ne azo mɔɔ kɔ la, bɛmaa bɛ bo zo amra adenle bɛmaa bɛwolo Ɛdɛnkɛma menli ne avinli.

⁹“Saa bɛkɔ kɛ bɛ nee bɛ kpɔvolɛma kaho na bɛyɛ bɛ azokoɛleɛ a, anrɛɛ bɛhwe bɛ nwo bɛvi ninyɛne ɛtane ɛtane ɛyɛlɛ nwo.

¹⁰Saa bɛ nuhua bie anla boɛ aledwolɛ ne anu la ati ɔ nwo ɛnde a, ɔhɔ azokoɛleɛ ne kandiba, ɔmmaba azokoɛleɛ ne.

¹¹Na saa aleɛ ɛlɛdwo a, ɔwɔ kɛ ɔbia ɔ nwo, na saa sɛnzɛne ne tɔ a yeara azokoɛleɛ ne.

¹²“Ɔwɔ kɛ bɛyɛ ɛleka wɔ azokoɛleɛ ne mɔɔ bɛkɔ bakazo ɛkɛ ne a.

¹³Ɔwɔ kɛ bɛnyia amgbɔma ko bɛboka bɛ konle ninyɛne ne anwo, amaa saa bɛfinde kɛ bɛkazɔho bɛ gyakɛ a bɛava bɛawɔ, bɛwie a bɛahakyi bɛ nwo bɛadua ye.

¹⁴Ɔboalekɛ Ɛdɛnkɛma bɛ Nyamenle ne luolua bɛ azokoɛleɛ ne kɛ ɔbalie bɛ na yeaye bɛ kpɔvolɛma ne yeamaa bɛ. Ɛhye ati ɔwɔ kɛ azokoɛleɛ ɛkɛ ne te, amaa yeannwu debie ɛtane biala wɔ ɛkɛ ne na yeahakyi ɔ nwo yeahɔ.

¹⁵“Saa kanranli bie nriandi batane bɛ a, bɛmmaye ye bɛmaa ɔ menle.

¹⁶Bɛmaa ɔdɛnla bɛ avinli, wɔ sua ko mɔɔ ɔkulo zo nee ɛleka holɛ ko mɔɔ ɔdaye ɔkulo kɛ ɔtɛnla la. Ɔnle kɛ bɛsisi ye bɛyɛ ye mgbane mgbane.

¹⁷“Ɔnle kɛ Yizilayɛ nrenya anzɛɛ raalɛ biala bɔ tuutuu ɛbɛla biala wɔ awozonle ɛzonlenlɛ sua biala anwo.

¹⁸Ezukoa biala noko mɔɔ bɛkɛnyia ye wɔ tuutuulilɛ nu la, bɛmmafa bɛbatua ɛwɔkɛ, yɛɛ bɛmmafa bɛbɛlɛ Ɛdɛnkɛma bɛ Nyamenle ne. Ɔluakɛ Ɛdɛnkɛma bɛ Nyamenle ne kyi ninyɛne ɛhye mɔ.

¹⁹“Bɛmmabɔ bɛ mediema ne mɔ bosea na bɛdie nwolɛ nzinwo, meka ezukoa, aleɛ, anzɛɛ debie biala mɔɔ ɛfa ɛfɛne awie na ɛdie nwolɛ nzinwo a ɔyɛ boɛ la.

²⁰Saa ahenle le ɛyɛvolɛ a, yemɔ bɛkola bɛdie. Na bɛ mediema ne mɔ ɛdeɛ bɛmmadie, amaa Ɛdɛnkɛma bɛ Nyamenle ne ayila bɛ wɔ debie biala anu wɔ azɛlɛ ne mɔɔ bɛlɛkɔ bɛahɔva bɛayɛ bɛ ɛdeɛ la azo.

²¹ “Saa bɛbɔ Ɛdɛnkɛma bɛ Nyamenle ne ɛwɔkɛ a, bɛmmatwenlehwenle bɛ bo aze wɔ ye ɛdualɛ nu, ɔluakɛ kɛ ɔkɛyɛ biala la, Ɛdɛnkɛma bɛ Nyamenle ne balie avi bɛ ɛkɛ, yɛɛ eza ɔle ɛtane bɔbɔ ɔmaa bɛ.

²²Na saa wɔambɔ ɛwɔkɛ fee a ɔnle ɛtane ɔmmaa wɔ.

²³Ɔwɔ kɛ bɛnea boɛ na bɛyɛ debie biala mɔɔ vi bɛ nloa anu kɛvinde la. Ɔluakɛ bɛdabɛ bɛ kunlu fufule yɛɛ bɛbɔle Ɛdɛnkɛma bɛ Nyamenle ne ɛwɔkɛ ne a. Yemɔti ɔwɔ kɛ bɛdi zolɛ.

²⁴“Saa ɛkɔ ɛ diema bie vanye egyinli nu a, ɛkola ɛdi ma ne bie kpalɛ ɛmaa ɛ ko yi, dodo biala mɔɔ ɛkulo la, ɛkola ɛdi. Noko mmafa bie ɛto wɔ bondo nu ɛkɔ.

²⁵Ɛkɔ ɛ gɔnwo bie awule ɛya nu a, ɛkola ɛfa ɛ sa ɛte bie, na ɔnle kɛ ɛfa ɛdedadeɛ ɛka ye awule ne.