Read Nzema Mɛla 24 Bible Online

Mɛla 24 - Nzema bible

Mɛla 24

¹ “Saa nrenya gya raalɛ na nzinlii ɔnwu kɛ raalɛ ne ɛnli ɔ nwo eni a, ɔhɛlɛ ewolebɔlɛ kɛlata ɔwula ɔ sa nu na ɔye ye ali wɔ ye sua nu ɛkɛ.

²Saa ɔkɔ na nrenya fofolɛ gya ye,

³na nzinlii ye subane ɛtane ne ati nrenya ne kɛlɛ kɛlata wula ɔ sa nu bɔ ye ewole, anzɛɛ saa nrenya ne wu a,

⁴ɔnle kɛ nrenya ne mɔɔ lumuale gyale ye la sia fa ye yɛ ɔ ye bieko, ɔboalekɛ ye nyɛleɛ ɛgua ɔ nwo evinli. Ɛhye le kyibadeɛ maa Ɛdɛnkɛma, yɛɛ ɔnle kɛ bɛfa evinli biala bɛka azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ kɛ bɛ ɛdeɛ ɔ la.

⁵“Saa nrenya gya raalɛ ɛkɛ ne ala a, ɔnle kɛ bɛmaa ɔkɔ ɛlɔne nloa kɛ ɔkaho anzɛɛ bɛfa gyima dɔɔnwo bɛgua ɔ nwo zo. Ɔwɔ kɛ bɛmaa ye adenle bɛmaa ɔda sua nu ɛvolɛ ko ɔ nee ɔ ye ne mɔɔ yegya ye la dielie bɛ nye.[9]

⁶Ɔnle kɛ awie biala fa awie mɔɔ yebɔ ye bosea la ɛdibolɛ di agyinla nu. Saa ɔyɛ ye zɔhane a ɛnee ɔkile kɛ ɔlɛye ahenle ne mɔɔ bizale ye bosea ne la nee ye sua nu amra anloa anu aleɛ.

⁷ “Saa awie kye ɔ diema Yizilayɛnli bie nuokɛ tɔne ye anzɛɛ maa ɔyɛ gyima ɛsesebɛ ɔmaa ye kɛ kanranli la a, ɔwɔ kɛ bɛku sonla zɔhane ne, amaa bɛakpa munzule debie zɔhane bɛavi bɛ avinli.

⁸“Saa ewule kokobɛ gua bɛ bie a, ɔnlea boɛ na ɔyɛ debie biala mɔɔ Livaema, mɔɔ le sɛlɛvolɛma la kɛha kɛhile ye la. Mɔɔ meha mehile bɛ la, bɛnlea bɛli zolɛ.

⁹Bɛhakye mɔɔ Ɛdɛnkɛma bɛ Nyamenle ne vale yɛle Meleam wɔ adevinli ne, wɔ mekɛ mɔɔ bɛvile Yigyibiti bɛdule bɛ bo kɛ bɛba la.

¹⁰ “Saa ɛbɔ ɛ diema bie bosea a, mmakɔ ye sua nu ɛkɛ ne kɛ ɛkalie deɛ ne mɔɔ ɔfa yeali agyinlanu la.

¹¹Gyinla alie nwo nehane maa ahenle ne mɔɔ wɔbɔ ye bosea ne la ɔdaye ɔva deɛ ne mɔɔ ɔfa yeali agyinlanu la ɔrɛla.

¹²Saa ahenle mɔɔ ɛbɔle ye bosea la le ehyianli a, mmafa deɛ mɔɔ ɔvale ɔlile agyinlanu ne la ɛsie ɛmaa aleɛ kye.

¹³Fa ye deɛ ne sia kɔmaa ye nɔsolɛ biala mɔɔ sɛnzɛne ne ɛlɛkɔ ahɔdɔ la, amaa saa ɛdanlɛ a, yeava yeagua ɔ nwo nɔe ne na yeayileyila wɔ kosoɛ kosoɛ. Ɛhye a sɔ Ɛdɛnkɛma bɛ Nyamenle ne anye a.

¹⁴ “Saa bɛbɔ awie ɛkpa na ahenle le ehyianli a anrɛɛ bɛmmasisi ye. Saa ɔle bɛ mediema ne mɔ anu ko o, saa ɔle ɛyɛvolɛ mɔɔ wɔ bɛ azɛlɛ ne azo azua ne mɔ ko azo o, bɛmmasisi ye.

¹⁵Bɛdua ye ɛkpabɔlɛ ahatualɛ ne bɛmaa ye kenle ko biala na sɛnzɛne ne adɔ, ɔluakɛ ɔle ehyianli yɛɛ ɔ ti nee ɔ bo ne amuala ala ɛne. Saa bɛanyɛ ye zɔhane a, ɔbazu yeavɛlɛ Ɛdɛnkɛma yeatia bɛ wɔ nwolɛ, na ɛhye le ɛtane mɔɔ batia bɛ a.

¹⁶“Awie biala mɔɔ kɛyɛ ɛtane la, yemɔ yɛɛ ɔwɔ kɛ bɛku ye a. Ɔnle kɛ bɛku awovolɛma wɔ mralɛ ɛtane ti anzɛɛ bɛku mralɛ wɔ awovolɛma ɛtane ti.

¹⁷ “Ɔnle kɛ bɛnea ɛyɛvolɛ anzɛɛ arisa nyunlu bɛbua ye mgbɔvodɛne. Eza ɔnle kɛ bɛdie kunlanvolɛ raalɛ ɛdanlɛ bɛsie awoba.

¹⁸Bɛhakye kɛ ɛnee bɛdabɛ bɛle ahanra wɔ Yigyibiti yɛɛ Ɛdɛnkɛma bɛ Nyamenle ne rayele bɛ vile ɛkɛ a. Yemɔti mese bɛ kɛ, bɛyɛ ɛhye mɔ mɔɔ meha la.

¹⁹ “Saa ɛbu wɔ ɛya nu bɛyɔba ne, na wɔ sua zo ɛralɛ nu, ɛ rɛle fi ekyi bie mɔɔ wɔkyekye kɛ ɛfa wɔara sua zo la ɛbɔ ne anu na ɛba sua zo a, mmasia ɛ nzi kɛ ɛkɔ wɔahɔva. Maa ɔyɛ nyɛvolɛ, mɔɔ ɛlɛpɛ nu aze anzɛɛ nrisa nee ahunlanvolɛ bie ɛdeɛ, amaa Ɛdɛnkɛma wɔ Nyamenle ne ayila wɔ wɔ debie biala mɔɔ ɛyɛ la anu.

²⁰Saa ɛte wɔ ɔlivi ma ne ɛwie a, ngoko ne mɔɔ kɛha zolɛ la, mmakɔ kɛ ɛkatete. Gyakyi maa nyɛvolɛ, nrisa, nee ahunlanvolɛ.

²¹Zɔhane ala yɛɛ saa ɛtete wɔ vanye ma ne ɛwie a, ngoko ne mɔɔ kɛha zolɛ la, mmasia ɛkɔtete a. Gyakyi maa nyɛvolɛ, nrisa, nee ahunlanvolɛ.

²²Bɛhakye kɛ ɛnee bɛle ahanra wɔ Yigyibiti. Yemɔti mese bɛ kɛ bɛli mɔɔ meha la azo.