Read Nzema Mɛla 25 Bible Online

Mɛla 25 - Nzema bible

Mɛla 25

¹“Saa menli nwiɔ nyia edwɛkɛ na bɛfa bɛba ndɛnebuavolɛma anyunlu a, bɛli edwɛkɛ ne na bɛbua mɔɔ ye edwɛkɛ yɛ fɛ la benle bɛmaa ɔhɔ, na bɛbua ɛhendeɛ ne fɔlɛ.

²Saa ɔba ye kɛ mɔɔ lile fɔlɛ la, ɔwɔ kɛ bɛbo ye a, ndɛnebuavolɛ ne ɛmaa bɛbutu ye na bɛbila ye empele dodo biala mɔɔ fɛta ye ɛtane ne mɔɔ yeyɛ la wɔ ɔdaye ndɛnebuavolɛ ne ɔ nyunlu.

³Saa ɔkyele zolɛ a bɛbila ye empele abulanla, ɔnle kɛ ɔbo. Saa ɔbo a ɛnee bɛbɔ adiema ne anyiemgba wɔ bagua nu.

⁴ “Saa ɛlɛfa ɛnlankɛ wɔawozo ma a mmakyekye ɔ nloa.

⁵ “Saa mediema mrenya wɔ ɛleka ko na bɛ nuhua ko anwo ralɛ nrenya na ɔwu a, ɔnle kɛ bɛbɔ raalɛ ne ewole bɛmaa awie gyɛne gya ye. Ɔwɔ kɛ mediema mrenya ne mɔ ko fa kunlanvolɛ raalɛ ne yɛ ɔ ye.

⁶Ralɛ nrenya mɔɔ bɛkɛlumua bɛkɛwo ye la, yemɔ a ɔdi ɔ ze ne mɔɔ ɛwu la agya a, amaa mɔɔ ɛwu la duma amminli Yizilayɛ maanle ne anu.

⁷Na saa nrenya ne ɛngulo kɛ ɔfa ɔ diema ne mɔɔ ɛwu la aye ne a, ɛnee kunlanvolɛ raalɛ ne ɛhɔ mgbanyima ne mɔ ɛkɛ, wɔ suakpole ne anlenkɛ kpole ne anloa na ɔze bɛ kɛ, ‘Me hu adiema nrenya ne ɛkpo kɛ ɔnrɛmaa ɔ diema nrenya ne mɔɔ ɛwu la duma ɛnrɛha Yizilayɛ maanle ne anu. Amaamuo mɔɔ ɔwɔ kɛ ɔbu ɔmaa me kɛ ɔ diema nrenya a le me hu ne mɔɔ ɛwu la, ɔmbu.’

⁸Ɔba ye zɔhane a suakpole ne azo mgbanyima ne mɔ ɛvɛlɛ nrenya ne na bɛbiza ye, na saa eza ɔsi zolɛ bieko kɛ, ‘Menrɛyɛ a’,

⁹ɛnee bɛmaa kunlanvolɛ raalɛ ne ɛhɔye nrenya ne agyakɛ ko mgbɔlaboa, ɔdo nyɛlɛ ɔ nwo wɔ mgbanyima ne mɔ anyunlu ɛkɛ ne na ɔha kɛ, ‘Mɔɔ ɔwɔ kɛ bɛfa bɛyɛ sonla ne mɔɔ ɛngulo kɛ ɔ diema duma ka Yizilayɛ azɛlɛ zo la ɛne.’

¹⁰Na Yizilayɛma amuala bavɛlɛ ye awuke ne, ‘Nrenya ne mɔɔ bɛyele ɔ gyakɛ mgbɔlaboa la awuke nu ɛne.’

¹¹“Saa mrenya nwiɔ ɛlɛko, na ko aye ba kɛ ɔbalie ɔ hu yeavi mɔɔ ɛlɛbo ye la asa anu, na ɔsɔ ko ne mrenyanu a,

¹²bɛpɛ ɔ sa; bɛmmase ye anwunvɔne fee.

¹³ “Bɛmmanyia ɛzuzudeɛ nwiɔ nwiɔ mɔɔ ko le kpole tɛla ko la wɔ bɛ azua nu anzɛɛ bɛ ahodoku ne mɔ anu.

¹⁵Bɛsuzu debie a bɛzuzu ye pɛpɛ. Bɛyɛ ye zɔhane, amaa bɛanyi bɛahyɛ wɔ azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ la azo.

¹⁶Ɛdɛnkɛma kyi menli mɔɔ le nzisi la.

¹⁷ “Bɛhakye mɔɔ Amalɛkema vale yɛle bɛ wɔ mekɛ mɔɔ bɛvi Yigyibiti bɛlɛba la.

¹⁸Bɛanzulo Nyamenle, bɛratetale yɛ adenle nu wɔ mekɛ mɔɔ ɛnee yɛwie fɛ na yɛ nwo ɛbɛlɛ yɛ la, na bɛhunle menli mɔɔ ɛvɛlɛ manle bɛhale amozi la kɔsɔɔti.

¹⁹Yemɔti saa Ɛdɛnkɛma bɛ Nyamenle ne maa bɛ nwo tɔ bɛ wɔ azɛlɛ ne mɔɔ Ɛdɛnkɛma bɛ Nyamenle ɛlɛfa amaa bɛ la azo, mɔɔ kpɔvolɛ biala ɛngyegye bɛ bieko la a, bɛhu Amalɛkema amuala; bɛmmagyakyi ko bɔbɔ na awie ava abɔ bɛ duma bieko wɔ ewiade ye anu. Bɛmmamaa bɛ rɛle fi ɛhye fee.