Read Nzema Mɛla 26 Bible Online

Mɛla 26 - Nzema bible

Mɛla 26

¹“Saa bɛkɔtɛnla azɛlɛ ne mɔɔ Ɛdɛnkɛma bɛ Nyamenle ne bava amaa bɛ kɛ bɛ ɛdeɛ ɔ la azo,

²na bɛso ɛya a, bɛ aleɛ mɔɔ bɛbalumua bɛanyia ye wɔ azɛlɛ ne azo la, bɛwula ye kɛndɛne nu bɛva bɛhɔ ɛleka mɔɔ Ɛdɛnkɛma bɛ Nyamenle ne kɛhile kɛ bɛzonle ye la.

³Bɛhɔ sɛlɛvolɛ ne mɔɔ ɛzonlenlɛ gyima ne wɔ ɔ sa nu la ɛkɛ ne na bɛha bɛhile ye kɛ, ‘Meka meado gua ɛnɛ kenle ye meahile Ɛdɛnkɛma wɔ Nyamenle ne kɛ, akee medwu azɛlɛ ne mɔɔ Ɛdɛnkɛma vale bɔle yɛ ze mɔ ɛwɔkɛ kɛ ɔkɛva ɔkɛmaa yɛ la azo.’

⁴“Sɛlɛvolɛ ne balie kɛndɛne ne mɔɔ aleɛ ne wɔ nuhua la na yeava yeazie Ɛdɛnkɛma bɛ Nyamenle ne azukponle ne anyunlu.

⁵Akee wɔ Ɛdɛnkɛma bɛ Nyamenle ne anyunlu ɛkɛ ne, bɛbaha edwɛkɛ ɛhye: ‘Ɛnee egya le Arelamenli adendulɛnli, na ɔhɔdɛnlanle Yigyibiti. Bɛkɔ la ɛnee bɛ nwo anzo; na wɔ Yigyibiti ɛkɛ ne, akee bɛyɛle maanle mumua na bɛ nwo yɛle ɛzulolɛ.

⁶Na Yigyibitima sisile yɛ na bɛyɛle yɛ kpɔdekpɔde, na bɛmanle yɛyɛle akɛlɛ gyima.

⁷Na yɛzunle yɛvɛlɛle yɛ ze mɔ Ɛdɛnkɛma Nyamenle ne. Ɛdɛnkɛma dele yɛ ne na ɔnwunle yɛ ɛvɛlɛ, yɛ nyane, nee ɛsisilɛ mɔɔ bɛlɛsisi yɛ la.

⁸Ɛdɛnkɛma vale tumi kpole nee nwanwane sɛkɛlɛneɛ nwunlonwunlanle Yigyibitima,

⁹na ɔyele yɛ ɔvile Yigyibiti ɔrale azɛlɛ ɛhye azo.

¹⁰Ɛhye ati meva me aleɛ mɔɔ ɛdawɔ Ɛdɛnkɛma wɔva wɔmaa me la anu mɔɔ lumua la melɛbɛlɛ wɔ.’ “Akee ɛbazokoɛ wɔazie Ɛdɛnkɛma wɔ Nyamenle ne anyunlu ɛkɛ na wɔazonle ye,

¹¹na ɛdawɔ nee wɔ sua nu amra, nee Livaema nee nyɛvolɛ mɔɔ wɔ bɛ avinli la bɛali fɛlɛko na bɛ nye alie wɔ ninyɛne kpalɛ mɔɔ Ɛdɛnkɛma bɛ Nyamenle ne ɛva ɛmaa bɛ la ati.

¹²“Ɛvolɛ nsa biala bɛ aleɛ mɔɔ bɛkɛnyia ye la, bɛbu nuhua bulu, bɛdu ɛkpɔ ko bɛmaa bɛva bɛmaa Livaema, nyɛvolɛ, nrisa, yɛɛ ahunlanvolɛ mɔɔ wɔ bɛ azua ne mɔ azo la, amaa bɛdabɛ bɛanyia bie bɛali bɛ ko ayi.

¹³Akee bɛbaha wɔ Ɛdɛnkɛma bɛ Nyamenle ne anyunlu ɛkɛ ne kɛ, ‘Meye ngyɛnu bulu ɛkpɔ ko nwuanzanwuanza ne mevi me awuke ye anu, na meva memaa Livaema ne, nyɛvolɛ, nrisa, nee ahunlanvolɛ, kɛmɔ wɔ mɛla ne mɔɔ ɛvale ɛmanle yɛ la se la. Metɛbulule wɔ mɛla ne mɔɔ ɛvale ɛmanle yɛ la azo, yɛɛ me rɛle ɛtɛfile bɛ.

¹⁴Nyane dole me la, meanli ngyɛnu bulu ɛkpɔ ko ne bie. Evinli hanle me wɔ me nyamenlezonlenlɛ nu la, meangɔ nwolɛ meangɔnye bie, yɛɛ meanva bie meambɔ azu meammaa mɔwuamra. Medie Ɛdɛnkɛma me Nyamenle ne ane na meyɛ mɔɔ ɛhyehyɛle ɛmanle me la amuala.

¹⁵Ɛwɔ anwuma lɔ, wɔ ɛleka nwuanzanwuanza ne a, to ɛ nye aze ɛke na yila wɔ menli Yizilayɛma nee azɛlɛ ne mɔɔ wɔva wɔmaa yɛ la, kɛmɔ ɛvale ɛbɔle yɛ nlenya mɔ ɛwɔkɛ kɛ azɛlɛ ne kye aleɛ la.’

¹⁶“Ɛnɛ kenle ye, Ɛdɛnkɛma bɛ Nyamenle ne ɛmaa bɛ mɛla nee ngyehyɛlɛ ɛhye mɔ kɛ bɛli zolɛ. Bɛnlea boɛ na bɛva bɛ ahonle nee bɛ ɛkɛla muala bɛli zolɛ.

¹⁷Ɛnɛ bɛha bɛdo gua kɛ Ɛdɛnkɛma a le bɛ Nyamenle a, na bɛbalua ye ndenle ne mɔ anu na bɛali ye mɛla nee ngyehyɛlɛ ne mɔ azo, bɛadie ɔ ne.

¹⁸Ɛdɛnkɛma noko ɛva ɛdo gua ɛnɛ kenle ye kɛ bɛle ɔdaye ye menli, kɛmɔ ɔvale ɔbɔle bɛ ɛwɔkɛ la; ɔwɔ kɛ bɛdi ye mɛla ne mɔ azo.

¹⁹Ɔbakpogya bɛ zo yeayɛ bɛ maanle kpole mɔɔ bo maanle maanle kɔsɔɔti anwo zo a, na bɛali bɛ eni bɛaye bɛ ayɛlɛ. Bɛbayɛ Ɛdɛnkɛma bɛ Nyamenle ne ɔdaye ye menli mɔɔ anwo te a, kɛmɔ ye ɛwɔkɛ ne se la.”