Read Nzema Mɛla 27 Bible Online

Mɛla 27 - Nzema bible

Mɛla 27

¹Akee Mosisi nee Yizilayɛ mgbanyima ne mɔ zele kɛ, “Bɛli mɛla ne mɔɔ meva memaa bɛ ɛnɛ la amuala azo.

²Kenle mɔɔ bɛkɛpɛ bɛkɛhɔ Azule Dwɔdan ne anzi lɔ, azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ la azo la, bɛva awolɛ mgbole, na bɛkokoa zolɛ bɛmaa ɔyɛ tonlotonlo.

³Bɛhɛlɛ mɛla ɛhye mɔ kɔsɔɔti bɛgua zolɛ wɔ mekɛ mɔɔ bɛkɛpɛ bɛkɛhɔ azɛlɛ ne mɔɔ kye aleɛ, mɔɔ Ɛdɛnkɛma bɛ Nyamenle ne bava amaa bɛ la azo la, kɛmɔ bɛ ze mɔ Ɛdɛnkɛma Nyamenle ne ɛva ɛbɔ bɛ ɛwɔkɛ la.

⁴Na saa bɛpɛ bɛkɔ Dwɔdan ne anzi a, bɛkpɔnlɔkpɔnla awolɛ ne mɔ mɔɔ ɛnɛ kenle ye melɛka nwolɛ edwɛkɛ meahile bɛ la wɔ Yibale Boka na bɛfɔtɔ sɛmante bɛgua ɔ bo.

⁵Akee bɛzi azukponle wɔ ɛkɛ ne bɛmaa Ɛdɛnkɛma bɛ Nyamenle ne. Bɛva awolɛ a bɛzi azukponle ne a; bɛmmafa bulalɛ biala bɛwula nu.

⁶Bɛva awolɛ mɔɔ bɛanva bulalɛ bɛanga ye la a bɛzi Ɛdɛnkɛma bɛ Nyamenle ne azukponle ne a, na bɛbɔ ɛyelalɛ azu wɔ zolɛ bɛmaa Ɛdɛnkɛma bɛ Nyamenle ne.

⁷Eza bɛbɔ anzonudwolɛ azu ne mɔ wɔ ɛkɛ na bɛli debie wɔ ɛkɛ, bɛli fɛlɛko na bɛmaa bɛ nye ɛlie wɔ Ɛdɛnkɛma bɛ Nyamenle ne anyunlu.

⁸Bɛhɛlɛ edwɛkɛ biala mɔɔ wɔ mɛla ne anu la wienyi bɛgua awolɛ ne mɔ azo.”

⁹Na Mosisi nee Livaema mɔɔ le sɛlɛvolɛma la zele Yizilayɛma kɛ, “Yizilayɛma, bɛyɛ ngungoonwu na bɛdie. Ɛnɛ kenle ye, Ɛdɛnkɛma bɛ Nyamenle ne ɔdaye ye menli a le bɛ.

¹⁰Zɔhane ati ɔwɔ kɛ bɛtie Ɛdɛnkɛma bɛ Nyamenle ne ane na bɛdi ye mɛla nee ye ngyehyɛlɛ ne mɔ mɔɔ melɛfa meamaa bɛ ɛnɛ demua ye la azo.”

¹¹Kenle ko ne ala, eza Mosisi hanle ɛhye hilele menli ne mɔ, ɔzele kɛ,

¹²“Saa bɛpɛ Dwɔdan ne bɛkɔ ɔ nzi lɔ a, mbusua ekpunli ɛhye mɔ bagyinla Gɛlaezem Boka azɛlɛ nyilalɛ amaa Yizilayɛma: Semɛyɔn, Livae, Dwuda, Yesakaa, Dwosefi, yɛɛ Bɛngyaman.

¹³Ɛhye mɔ noko bagyinla Yibale Boka awa amonle: Wulubɛn, Gaade, Ahya, Zɛbulɛn, Dan, yɛɛ Nafetalae.

¹⁴Na Livaema abuke bɛ nloa aha ye kpole ahile Yizilayɛma kɛ,

¹⁵ “ ‘Munzule ɛha sonla ne mɔɔ kɛgua anzɛɛ kɛze ananze, anzɛɛ debie biala mɔɔ le bɛkyi maa Ɛdɛnkɛma na ɔkɛvea ɔkɛzonle ye la; ɔle sonla asa anloa gyima yɛɛ Ɛdɛnkɛma kyi.’ “Menli ne amuala baha kɛ, ‘Amen!’

¹⁶ “ ‘Munzule ɛha sonla mɔɔ yeanli ɔ ze nee ɔ nli eni la.’ “Menli ne amuala baha kɛ, ‘Amen!’

¹⁷“ ‘Munzule ɛha sonla mɔɔ kɛdu ɔ gɔnwo ɛweɛne la.’ “Menli ne amuala baha kɛ, ‘Amen!’

¹⁸ “ ‘Munzule ɛha sonla mɔɔ kɛhile anyenzinliravolɛ adenle ɛtane kɛmaa ɔkɛva zolɛ la.’ “Menli ne amuala baha kɛ, ‘Amen!’

¹⁹ “ ‘Munzule ɛha sonla mɔɔ kɛnlea ɛyɛvolɛ, arisa, anzɛɛ kunlanvolɛ nyunlu kɛbua ye mgbɔvodɛne la.’ “Menli ne amuala baha kɛ, ‘Amen!’

²⁰ “ ‘Munzule ɛha sonla mɔɔ kɛva ɔ ze aye la, ɔboalekɛ ɛnee yekpa ɔ ze anwo!’ “Menli ne amuala baha kɛ ‘Amen!’

²¹ “ ‘Munzule ɛha sonla mɔɔ nee ayɛmoa biala kɛla la.’ “Menli ne amuala baha kɛ, ‘Amen!’

²² “ ‘Munzule ɛha sonla mɔɔ nee ɔ diema raalɛ kɛla la, saa ɔ ze ara raalɛ o, saa ɔ nli ara raalɛ o.’ “Menli ne amuala baha kɛ, ‘Amen!’

²³ “ ‘Munzule ɛha sonla mɔɔ kɛvo ɔ ye ɔ nli ɛzɔlɛ zo la.’ “Menli ne amuala baha kɛ, ‘Amen!’

²⁴“ ‘Munzule ɛha sonla mɔɔ kɛvea kɛhu sonla la.’ “Menli ne amuala baha kɛ, ‘Amen!’

²⁵“ ‘Munzule ɛha sonla mɔɔ kɛlie ndoloboa kɛhu awie mɔɔ ɛnze nwolɛ bie la.’ “Menli ne amuala baha kɛ, ‘Amen!’

²⁶ “ ‘Munzule ɛha sonla mɔɔ yeanli mɛla ɛhye mɔ azo la.’ “Menli ne amuala baha kɛ, ‘Amen!’