Read Nzema Mɛla 28 Bible Online

Mɛla 28 - Nzema bible

Mɛla 28

¹“Saa bɛtie Ɛdɛnkɛma bɛ Nyamenle ne ane, bɛnea boɛ, bɛdi ye mɛla ne mɔ mɔɔ melɛfa meamaa bɛ ɛnɛ la azo a, Ɛdɛnkɛma bɛ Nyamenle ne bamaa bɛazie maanle maanle mɔɔ wɔ ewiade la amuala.

²Saa bɛyɛ tieyɛ bɛmaa Ɛdɛnkɛma bɛ Nyamenle ne a, nyilalɛ ɛhye mɔ kɔsɔɔti bayɛ bɛ ɛdeɛ, na bɛanyia ye molozo.

³“Ɛdɛnkɛma bayila bɛ, yeayila bɛ azua mɔɔ bɛdede zolɛ nee bɛ egyinli mɔɔ bɛkɛyɛ la.

⁴“Ɛdɛnkɛma bayila bɛ yeamaa bɛanyia mralɛ dɔɔnwo, bɛyɔba dɔɔnwo wɔ bɛ ɛya ne mɔ anu, bɛ nyɛmoa bada, bɛ nlankɛ bazo, na bɛanyia mboane mralɛ dɔɔnwo.

⁵“Ɛdɛnkɛma bayila bɛ, yeamaa bɛ ahɛndɛne ayiyi tetɛkɛɛ, na aleɛ ɛnrɛkpa bɛ azua nu ɛlɛ.

⁶“Ɛdɛnkɛma bayila bɛ, wɔ bɛ ɛhɔlɛ nee bɛ ɛralɛ nu.

⁷“Ɛdɛnkɛma bamaa bɛali kpɔvolɛma mɔɔ kɛdwazo bɛ nwo zo la anwo zo konim. Bɛ kpɔvolɛma bava bɛ nyunlu ara na bɛava bɛ nzi bɛahɔ.

⁸“Ɛdɛnkɛma bayila bɛ sa anloa gyima zo na yeamaa bɛ kpɔda zo ayiyi, na yeamaa bɛ nwo ayɛ twetwe wɔ azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ la azo.

⁹“Saa bɛdi Ɛdɛnkɛma bɛ Nyamenle ne mɛla zo na bɛdua ye ndenle ne mɔ anu a, Ɛdɛnkɛma bava bɛ ayɛ ye menli mɔɔ anwo te a, kɛmɔ yeva yebɔ bɛ ɛwɔkɛ la.

¹⁰Menli kɔsɔɔti mɔɔ wɔ ewiade la banwu kɛ bɛfa ye duma a bɛfɛlɛ bɛ a, na bɛazulo bɛ.

¹¹Na Ɛdɛnkɛma bayila bɛ yeamaa bɛakpazi, bɛawo mralɛ, bɛ nlankɛ ada, na bɛ egyinli nu ninyɛne ara dɔɔnwo wɔ azɛlɛ ne mɔɔ Ɛdɛnkɛma vale bɔle bɛ ze mɔ ɛwɔkɛ kɛ ɔbava yeamaa bɛ la azo.

¹²Ɛdɛnkɛma babuke anwuma, yeamaa bɛ ezule wɔ ye ɛlobɔ nloa na yeayila bɛ sa anloa gyima yeamaa bɛanyia bie bɛabɔ maanle maanle dɔɔnwo bosea, noko bɛmɛ, bɛnrɛbiza bosea ɛlɛ.

¹³Saa bɛdi Ɛdɛnkɛma bɛ Nyamenle ne mɛla ne mɔ mɔɔ melɛfa meamaa bɛ ɛnɛ la azo nɔhalɛ nu, bɛnea boɛ, bɛyɛ bɛ muala a, Ɛdɛnkɛma bamaa bɛali maanle maanle ti dahuu, bɛnrɛha amozi ɛlɛ, na dahuu bɛ nyunlu akpogya yɛɛ bɛnrɛkpo aze ɛlɛ.

¹⁴Noko akee bɛnlea boɛ na bɛangoati me edwɛkɛ ne mɔ mɔɔ melɛka meahile bɛ ɛnɛ la anwo, bɛangɔ bɛne zo anzɛɛ fema zo, bɛangɔnzonle awozonle.

¹⁵“Na saa bɛandie Ɛdɛnkɛma bɛ Nyamenle ne ane anzɛɛ bɛanli ye mɛla nee ye ngyehyɛlɛ ne mɔ mɔɔ melɛfa meamaa bɛ ɛnɛ la azo nɔhalɛ nu a, yemɔ munzule ɛhye mɔ amuala bava bɛ aze yeabulu bɛ nwo zo:

¹⁶“Munzule baha bɛ wɔ bɛ azua mɔɔ bɛdede zolɛ la azo na yeaha bɛ egyinli ne mɔ.

¹⁷“Munzule bayiyi bɛ ahɛndɛne ne mɔ na ɛhɔne ara bɛ azua nu.

¹⁸“Munzule baha bɛ mɔɔ ɔnrɛmaa bɛnrɛnyia mralɛ dɔɔnwo, bɛ egyinli ɛnrɛhye, yɛɛ bɛ nlankɛ nee bɛ mboane ɛnrɛda.

¹⁹“Munzule bali bɛ nzi wɔ bɛ ɛhɔlɛ nee bɛ ɛralɛ nu.

²⁰“Saa bɛkpo Ɛdɛnkɛma a, Ɛdɛnkɛma bamaa munzule ado bɛ, bɛ nye zo ada bɛ, bɛ agbɔkɛ nu atuto wɔ debie biala mɔɔ bɛyɛ la anu, kɔdwu kɛ bɛkɛzɛkye bɛ bɔkɔɔ na bɛ bo zo kɛminli ndɛndɛ, wɔ bɛ munzule nyɛleɛ ne mɔ ati.

²¹Ɔbamaa ewule nee ewulenzane adɔ bɛ nwo kɔdwu kɛ bɛ muala bɛkɛwie wu wɔ azɛlɛ ne mɔɔ bɛlɛkɔ bɛahɔva bɛayɛ bɛ ɛdeɛ la azo.

²²Ɛdɛnkɛma bamaa avinli ewule adɔ bɛ nwo ahu bɛ. Ɔbamaa ebunlu ahye bɛ, bɛ nwo anwunwu. Ɔbavi ewia katekate yeadua ezule, na yeamaa ahumu kpole mɔɔ anu dɔ la ayela bɛ egyinli nu ninyɛne. Debie zɛhae bahɔ zolɛ toonwo yeahɔdwu kɛ ɔkɛzɛkye bɛ muala la.

²³Anwomanyunlu bado kɛ sɛmante, yɛɛ azɛlɛ ye bahwie ayɛ ketekete kɛ bolɛ.

²⁴Ɛdɛnkɛma bamaa munlutu adɔ kɛ ezule toonwo kɔkpula kɛ bɛ muala bɛkɛwie wu la.

²⁵“Ɛdɛnkɛma bamaa bɛ kpɔvolɛma ali bɛ nwo zo konim. Bɛbava bɛ nyunlu bɛahɔ na bɛava bɛ nzi bɛara. Na ɔbayɛ ewiade amra amuala nwanwane kɛ ɛhye ɛzi bɛ nwo zo a.

²⁶Bɛ avunli bayɛ anwomanyunlu nloma aleɛ na ɛbɔ nu nanemgbole ali bɛ nwonane, na bɛnrɛnyia awie ɛnrɛvoa bɛ.

²⁷Ɛdɛnkɛma bamaa nyila ne mɔ mɔɔ nwunwunle Yigyibitima la bie anwunwu bɛ. Bɛ nwo bayɛ nganlɛ, na bɛ nwo agua asa ayɛ nzabenle, mɔɔ bɛnrɛhola bɛ nwo ayile yɛ ɛlɛ a.

²⁸Ɛdɛnkɛma bamaa bɛ adwenle aha abɔ nu, bɛ nye azi, na bɛabɔ ɛlane.

²⁹Bɛbali nvuovua ewia henlema kɛ anyenzinliravolɛ fuovua awozinli nu la, yɛɛ bɛnrɛkpazi ɛlɛ. Awie mɔ ala a basisi bɛ awua bɛ dahuu a, noko bɛnrɛnyia awie ɛnrɛboa bɛ.

³⁰“Bɛbayia raalɛ, na awie gyɛne a nee ye bala a; bɛbazi sua, na bɛnrɛla nuhua ɛlɛ; bɛbayɛ vanye egyinli, na bɛnrɛli ye ma ne bie.

³¹Bɛbahu bɛ nlankɛ wɔ bɛdabɛ bɛ nye zo, na bɛnrɛnyia bie bɛnrɛli. Bɛbaza bɛ bɛalie bɛ asoaso ne mɔ wɔ bɛ sa nu, bɛnrɛva bie bɛnrɛzie bɛ bo zo. Bɛbava bɛ mboane bɛamaa bɛ kpɔvolɛma, awie ɛnrɛboa bɛ.

³²Bɛdabɛ mumua ne bɛ nye zo, bɛbadɔne bɛ mra mrenya nee bɛ mra mraalɛ bɛamaa awie mɔ gyɛne, noko bɛnrɛhola bɛnrɛlie bɛ. Bɛ nwo balɔ bɛ, na bɛ nye aha adenle zo, na bɛnrɛnwu bɛ ɛlɛ.

³³Maanle bie mɔɔ bɛtɛtele ye nganeɛ ɛlɛ la anu amra barali bɛ ɛya ne mɔ anu aleɛ, na bɛbasisi bɛ bɛayɛ bɛ amumuyɛ dahuu,

³⁴mɔɔ bɛannea bɔbɔ a mɔɔ bɛbanwu ye la bamaa bɛabɔ ɛlane a.

³⁵Ɛdɛnkɛma bamaa nyila anwunwu bɛ gyakɛ agbɔkɛ nee bɛ gyakɛ agbɔma ne mɔ anwo, ɔvi bɛ gyakɛ akunlu toonwo yeahɔdwu bɛ ti zo, mɔɔ bɛnrɛhola bɛ ayile yɛ ɛlɛ a.

³⁶“Ɛdɛnkɛma bamaa bɛava bɛ nee bɛ belemgbunli ne mɔɔ bɛdabɛ bɛbazie la bɛahɔ maanle bie mɔɔ bɛ ze mɔ bɔbɔ ɛnze nu na yeayɛ bɛdabɛ la anu, na bɛazonle awozonle mɔɔ bɛva mbaka nee awolɛ bɛze la.

³⁷Na ɔbayɛ maanle ne mɔɔ bɛ nee bɛ bahɔ nu la anu amra azibɛnwo, na yeayɛ ɛrɛlɛ nee ɛfenle wɔ menli nloa.

³⁸“Bɛbalua ma dɔɔnwo wɔ bɛ ɛya nu, noko bɛ bɛyɔba bayɛ ekyi bie, ɔluakɛ mbɛbɛ bali bɛ muala.

³⁹Bɛbayɛ vanye egyinli, noko bɛnrɛnyia zolɛ ma ne bie na yeayɛ nuhua nwanye, ɔluakɛ nvuba bali bɛ muala.

⁴⁰Bɛbanyia ɔlivi mbaka wɔ bɛ maanle ne kɔsɔɔti anu yeayia, noko bɛnrɛnyia nuhua nwole bɛnrɛkpokpa, ɔluakɛ bɛ ɔlivi ma ne bakpolo agua.

⁴¹Bɛbawo mralɛ mrenya nee mralɛ mraalɛ, noko bɛnrɛyɛ bɛ ɛdeɛ, ɔluakɛ bɛbahye bɛ nuokɛ.

⁴²Mbɛbɛ bali bɛ mbaka nee bɛ egyinli nu aleɛ muala.

⁴³“Ɛyɛvolɛ mɔɔ wɔ bɛ maanle ne anu la bavo adɛnla bɛ kɔme zo na bɛmɛ bɛ tumi ne abɔ aze bɔkɔɔ.

⁴⁴Ɔbabɔ bɛ bosea, na bɛmɛ bɛnrɛhola bɛnrɛbɔ ye bosea ɛlɛ; na ɔbazie bɛ na bɛazonle ye.

⁴⁵“Munzule ɛhye mɔ kɔsɔɔti bara bɛ nwo zo, adu bɛ mgbaliko na bɛabu bɛava bɛ nwo zo, kɔkpula kɛ bɛ muala bɛkɛwie wu la, ɔboalekɛ bɛanli Ɛdɛnkɛma bɛ Nyamenle ne mɛla nee ye ngyehyɛlɛ ne mɔ mɔɔ yeva yemaa bɛ la azo.

⁴⁶Bɛbayɛ munzule sɛkɛlɛneɛ nee azibɛnwo debie yeala bɛ nwo zo nee bɛ bo zo amra anwo zo, wɔ mekɛ mɔɔ ɛnlɛ awieleɛ.

⁴⁷Yemɔti, kɛmɔ Ɛdɛnkɛma bɛ Nyamenle ne ɛmaa ninyɛne ɛbu bɛ nwo zo la, saa bɛanva fɛlɛko nee anyelielɛ bɛanzonle ye a,

⁴⁸ɔbamaa bɛazonle bɛ kpɔvolɛma mɔɔ Ɛdɛnkɛma bamaa bɛaraho ava bɛ la. Ɛhɔne nee nzuhɔne bahu bɛ; bɛbalɛ bɛ nwo zɔ na bɛahyia ninyɛne kɔsɔɔti anwo. Ɛdɛnkɛma[10] bava kpomgbolo kpole akpolo bɛ, kɔkpula kɛ bɛ bo zo kɛbɔ la.

⁴⁹Ɛdɛnkɛma bamaa maanle vi moa moa adwazo bɛ nwo zo. Maanle zɔhane anu amra anwo yɛ ndɛ kɛ kɔleɛ. Bɛvi ewiade awieleɛ lɔ, yɛɛ bɛnde bɛ ɛdendɛlɛ.

⁵⁰Bɛle maanle mɔɔ bɛ ti yɛ se, bɛmbu kpanyinli yɛɛ bɛnze kakula anwunvɔne.

⁵¹Bɛbali bɛ nlankɛ ne mɔ na bɛali bɛ ɛya nu aleɛ muala, kɔkpula kɛ bɛ bo zo kɛbɔ la. Bɛnrɛgyakyi bɛ aleɛ ma ɛdwoba ko bɔbɔ, na yeayɛ nwanye nee nwole; bɛnrɛmaa bɛ nlankɛ ɛnrɛda yɛɛ bɛ mboane mralɛ ɛnrɛzo, kɔkpula kɛ bɛkɛminli bɛ bo zo bɔkɔɔ la.

⁵²Bɛbava konle bɛadoa bɛ wɔ bɛ azua mɔɔ Ɛdɛnkɛma bɛ Nyamenle ne ɛva ɛmaa bɛ wɔ azɛlɛ ne azo la azo, na bɛ bane ndendenle nee aranemgbole ne mɔ mɔɔ bɛ ti zua bɛ la bagologolo agua.

⁵³“Mekɛ mɔɔ bɛ kpɔvolɛma kɛva bɛ ɛlɔnema kɛrabɛnra kɛyia bɛ la, ɛhɔne bamaa bɛ nye zo ada bɛ na bɛado bɛ kunlu mralɛ mɔɔ Ɛdɛnkɛma bɛ Nyamenle ne ɛva ɛmaa bɛ la bɛali.

⁵⁴Saa ɔba ye zɔhane a, sonla nrenya bɔbɔ mɔɔ di ɔ nwo eni na ɔle sonlakpole la ati bayɛ se. Ɛhɔne anyezota bamaa yeava ye aleɛ yeavea, ɔnrɛmaa ɔ diema nrenya bie, ɔnrɛmaa ɔ ye bɔbɔ mɔɔ la ye ahonle nwo la bie, na yeayɛ ɔ mra mɔɔ ɔ nee bɛ de la. Ɔku ɔ mra ne mɔ bie bɔbɔ ɔto aleɛ a ɔnrɛmaa awie bie, ɔluakɛ ɛhwee ɛnle sua nu.

⁵⁵

⁵⁶Zɔhane ala yɛɛ raalɛ mɔɔ de boɛ mɔɔ ɛngyia ɛhwee nwo la, ɛhɔne anyezota bamaa yeayɛ ɔ hu nee ɔ mra aleɛ nwo abokɛ a.

⁵⁷Nyane nee abodelɛ bamaa yeahu ɔ ra mɔɔ yewo ye fofolɛ la, na yeado ye nee ye anziama ne amuala yeali wɔ mekɛ mɔɔ ɛlɔnema kɛrabɛnra kɛyia bɛ sua ne la.

⁵⁸“Saa bɛannea boɛ bɛanli edwɛkɛ ne mɔ mɔɔ wɔ mɛla ɛhye mɔɔ bɛhɛlɛ bɛ wɔ buluku ɛhye anu la azo nɔhalɛ nu, bɛanzulo Ɛdɛnkɛma bɛ Nyamenle ne duma nwuanzanwuanza kpole ne a,

⁵⁹Ɛdɛnkɛma bava munzule ɛhye mɔ nee ewule ngakyile mɔɔ anloa yɛ se la arɛlɛ bɛ nee bɛ mra mɔɔ bɛyɛ nwolɛ ɛhwee a ɔnrɛyɛ boɛ a. Ɔbaha bɛ nwo dahuu.

⁶⁰Eza ɔbamaa ewule ngakyile ne mɔ mɔɔ wɔ Yigyibiti mɔɔ bɛsulo bɛ la ara bɛ nwo zo na yeaha bɛ nwo.

⁶¹Eza ɔbamaa ewule ngakyile ne mɔ mɔɔ bɛangɛlɛ bɛ wɔ mɛla buluku ɛhye anu la aha bɛ, kɔkpula kɛ bɛ muala bɛkɛwie wu, bɛ bo zo kɛbɔ la.

⁶²Kɛkala, bɛ nwo zonle kɛ anwomanyunlu nwɔlɔra, noko saa bɛandie Ɛdɛnkɛma bɛ Nyamenle ne ane a, bɛ nwo baha ekyi.

⁶³Na kɛ Ɛdɛnkɛma anye zile liele bɛ nwo mɔɔ yemaa bɛ nwo ɛzo zɛhae la, zɔhane ala yɛɛ ɔbayɛ yeava munzule yeara bɛ nwo zo, na yeazɛkye bɛ wɔ azɛlɛ ne mɔɔ bɛlɛkɔ bɛahɔva bɛayɛ bɛ ɛdeɛ la azo a.

⁶⁴“Ɛdɛnkɛma babɔ bɛ asande na bɛakponde bɛahɔ maanle ti nee maanle bo bɛahɔzonle awolɛ nee mbaka awozonle mɔɔ bɛ nee bɛ nlenya mɔ bɛtɛsonlenle bie ɛlɛ la.

⁶⁵Bɛ nwo ɛnrɛdɔ bɛ ɛlɛ yɛɛ bɛ nzo nu ɛnrɛdwo bɛ wɔ maanle zɔhane mɔ anu; Ɛdɛnkɛma baye ahunlundetelɛ ado bɛ nwo, bɛ nye bayɛ na bɛ ɛbolɛ ade;

⁶⁶bɛbalɛ bɛ ahonle bɛ sa nu alehyenlɛ nee aledwolɛ muala, ɛzulolɛ baheda bɛ nwo zo, na bɛnrɛnwu ye, saa bɛde ngoane nu o, saa bɛwɔ ewule nu o.

⁶⁷Ɔdwu nwonlomɔ a bɛbaha kɛ, ‘Me kunlu a anrɛɛ aleɛ ɛdwo,’ yɛɛ ɔdwu nɔsolɛ a bɛbaha kɛ, ‘Me kunlu a anrɛɛ aleɛ ɛhye.’ Bɛ ahonle badu wɔ debie biala mɔɔ bɛbanwu ye la anwo.

⁶⁸Ɛdɛnkɛma bawula bɛ meli nu ɔ nee bɛ ahɔ Yigyibiti bieko, na bɛadu adenle ne mɔɔ bɛbɔ bɛ nwolɛ ɛwɔkɛ kɛ bɛnrɛdu ye bieko ɛlɛ la. Na ɛkɛ ne yɛɛ bɛdabɛ bɛ ngome bɛbadɔne bɛ nwo kɛ ahanra mraalɛ nee mrenya bɛamaa bɛ kpɔvolɛma, noko bɔbɔ, awie ɛnrɛdɔ bɛ.”