Read Nzema Mɛla 29 Bible Online

Mɛla 29 - Nzema bible

Mɛla 29

¹Edwɛkɛ agbɔkɛ mɔɔ wɔ ngyekyeleɛ ne mɔɔ Ɛdɛnkɛma manle Mosisi nee Yizilayɛma yɛle la anu la ɛne: Bɛyɛle ngyekyeleɛ ɛhye wɔ Mowabe azɛlɛ zo, yɛɛ asolo mɔɔ Ɛdɛnkɛma nee bɛ yɛle wɔ Saenae Boka la.

²Mosisi manle Yizilayɛma kɔsɔɔti rayiale na ɔzele bɛ kɛ, “Bɛdabɛ bɛ nye nwiɔ, bɛnwunle debie mɔɔ Ɛdɛnkɛma yɛle wɔ Yigyibiti azɛlɛ zo, nee mɔɔ ɔvale ɔyɛle Yigyibiti belemgbunli ne nee ye mgbanyima nee maanle ne amuala la.

³Bɛnwunle amaneɛ mgbole dɔɔnwo mɔɔ rale bɛ nwo zo nee sɛkɛlɛneɛ nee nwanwane ninyɛne mgbole mɔɔ ɔyɛle la amuala.

⁴Noko toonwo mɔɔ yeradwu ɛnɛ la, Ɛdɛnkɛma ɛtɛmanle bɛ adwenle ɛtɛmanle bɛtɛtele ɔ bo, na bɛanyia ɛnyelɛ bɛanwu ye, anzɛɛ bɛanyia ɛnzonlɛ bɛadie.

⁵Meli bɛ ti wɔ fienemgbole ye anu ɛvolɛ abulanla ye amuala, bɛ adɛladeɛ nee bɛ ndanlɛ ɛtɛtetele yɛɛ bɛ mgbɔlaboa ɛtɛtetele;

⁶bɛtɛdile aleɛ yɛɛ bɛtɛnonle nwanye anzɛɛ nza ɛsesebɛ biala, amaa bɛanwu kɛ yemɔ yɛɛ ɔle Ɛdɛnkɛma bɛ Nyamenle ne a.

⁷Mɔɔ bɛradwule ɛke la, Hɛhyebɔn Belemgbunli Saehɔn nee Beehyan Belemgbunli Ɔɔgo rale kɛ bɛ nee yɛ baho, na yɛlile bɛ nwo zo konim.

⁸Yɛvale bɛ azɛlɛ ne, na yɛhyɛle yɛmanle Wulubɛn abusua ekpunli ne, Gaade abusua ekpunli ne, nee Manasɛ abusua ekpunli foa ko ne anu amra.

⁹Yemɔti bɛnlea edwɛkɛ mɔɔ wɔ ngyekyeleɛ ɛhye anu la boɛ na bɛli zolɛ, amaa bɛakpazi wɔ debie biala anu.

¹⁰“Ɛnɛ bɛ muala bɛgyi Ɛdɛnkɛma bɛ Nyamenle ne anyunlu ɛke, bɛ mbusua ekpunli ekpunli ne mɔ mgbanyinli, maanle mgbanyima, bɛ mbɔlɔba mgbanyinli, Yizilayɛma kɔsɔɔti,

¹¹bɛ mra, bɛ ye mɔ, nyɛvolɛ mɔɔ wɔ bɛ avinli ɛke, sonvolɛma mɔɔ soa ɛyɛne nee mɔɔ soa nzule, bɛ kɔsɔɔti bɛra,

¹²amaa bɛ nee Ɛdɛnkɛma bɛ Nyamenle ne ayɛ ngyekyeleɛ ɛhye ɛnɛ,

¹³na yeava bɛ yeayɛ ye menli na ɔdaye yeayɛ bɛ Nyamenle, kɛmɔ ɔvale ɔbɔle bɛ ɛwɔkɛ la. Zɔhane ɛwɔkɛ ne ala yɛɛ ɔvale ɔbɔle bɛ nlenya mɔ, Ebileham, Ayezeke, nee Gyekɔbo a.

¹⁴Tɛ bɛ ngome yɛɛ me nee bɛ ɛlɛyɛ ngyekyeleɛ ɛhye a.

¹⁵Me nee bɛdabɛ mɔɔ bɛnle ɛke kɛkala la nee bɛdabɛ mɔɔ bɛwɔ ɛke, bɛgyi Ɛdɛnkɛma yɛ Nyamenle ne anyunlu ɛke la yɛɛ ɛlɛyɛ ngyekyeleɛ ne a.

¹⁶“Bɛdabɛ bɛnwunle kɛ ɛnee yɛsi yɛde wɔ Yigyibiti azɛlɛ zo la, nee kɛ yɛzile yɛluoluale maanle maanle avinli toonwo mɔɔ yɛradwule ɛke la.

¹⁷Bɛnwu bɛ nyɛleɛ ɛtane ɛtane ne mɔ mɔɔ yɛ ayahanlɛ la, bɛ awolɛ nee mbaka awozonle ne mɔ, nee bɛ dwɛtɛ fufule nee ezukoa nvutuke awozonle ne mɔ.

¹⁸ Bɛnlea boɛ na bɛ bie, raalɛ o, nrenya o, mbusua ekpulike anzɛɛ abusua ekpunli, andwe ɔ nwo anvi Ɛdɛnkɛma yɛ Nyamenle ne anwo angɔnzonle maanle zɔhane mɔ awozonle ne mɔ. Bɛnlea boɛ na bɛ bie anyɛ ɔ nwo ndinli ɛtane mɔɔ fifi so ma ɛnwonle mɔɔ ku sonla la.

¹⁹Bɛnlea na bɛ bie anva andu ɔ nwo kɛ, kɛmɔ yede ngyekyeleɛ ne anu edwɛkɛ la ati saa ɔyɛ anzosesebɛ a, ɔbava ɔ nwo dwɔɔ. Ɛhye ka awie biala, kpalɛ o, anzɛɛ ɛtane o.

²⁰Ɛdɛnkɛma ɛnrɛva ye ɛtane ɛnrɛhyɛ ye. Ɛdɛnkɛma bava ɛya ahwe nungule na yeaye ye yeavi ɔ nye zo. Munzule mɔɔ bɛhɛlɛ bɛ buluku ye anu la amuala baha ye, na Ɛdɛnkɛma baye ye duma avi ewiade.

²¹Ɛdɛnkɛma baye ɔ ngomekye yeavi Yizilayɛ mbusua ekpunli ekpunli ne mɔ avinli kɛ yebɔ munzule, kɛmɔ ngyekyeleɛ ne anu munzule ne mɔ mɔɔ bɛhɛlɛ bɛ mɛla buluku ne anu la de la.

²²“Mekɛ bie bara, na bɛ bo zo amra mɔɔ bara amozi la, nee nyɛvolɛ mɔɔ vi maanle mɔɔ wɔ moa moa la anu la bara aranwu munzule nee ewule mɔɔ Ɛdɛnkɛma vale dole azɛlɛ ye azo la.

²³Bɛbanwu kɛ azɛlɛ ne ɛhwie, ɛhwee ɛnfifi zolɛ, bɛnlua debie zolɛ, ndile ɛnfifi zolɛ, zolɛ le sɔlefe nee ngyenle ngome, na yeyɛ kɛ Sodɔm nee Gomɔla, Ademaa nee Zɛbɔyem mɔɔ Ɛdɛnkɛma vale ɛya zɛkyele bɛ la.

²⁴Akee maanle maanle kɔsɔɔti babiza kɛ, ‘Duzu ati a Ɛdɛnkɛma ɛyɛ azɛlɛ ye zɛhae ɛ? Ɛya kpole ɛhye abo a le duzu?’

²⁵Na menli baye ɔ nloa kɛ, ‘Ɔboalekɛ menli ne kpole Ɛdɛnkɛma, bɛ ze mɔ Nyamenle ne ngyekyeleɛ ne mɔɔ ɔ nee bɛ yɛle, wɔ mekɛ mɔɔ ɔ nee bɛ vi Yigyibiti radwule ɛke la,

²⁶na bɛhɔzonlenle nyamenle gyɛne gyɛne, bɛbɔle bɛ ti aze bɛmanle awozonle mɔɔ bɛnze bɛ, yɛɛ yeanze bɛ kɛ bɛzonle bɛ la.

²⁷Ɛhye ati Ɛdɛnkɛma vale bɛ nwo ɛya manle ɔhanle bɛ azɛlɛ ye, na ɔvale munzule ne mɔ mɔɔ bɛhɛlɛ bɛ wɔ buluku ɛhye anu la ɔrale bɛ azɛlɛ ne azo.

²⁸Ɛdɛnkɛma eza vale ɛya dule bɛ azɛlɛ ne azo na ɔmanle bɛvale bɛ bɛhɔle maanle gyɛne nu, kɛmɔ kɛkala ɔde la.’

²⁹“Ninyɛne mɔɔ vea la le Ɛdɛnkɛma yɛ Nyamenle ne ɛdeɛ; na mɔɔ bɛye bɛhile la le yɛ nee yɛ mra ɛdeɛ dahuu, amaa yɛayɛ mɔɔ mɛla ne kpondɛ la amuala.