Read Nzema Mɛla 3 Bible Online

Mɛla 3 - Nzema bible

Mɛla 3

¹“Akee yɛhakyile yɛ nwo na yɛvale Beehyan adenle zo, na Beehyan Belemgbunli Ɔɔgo vale ye ɛlɔnema amuala rayiale yɛ, na yɛvale konle ne yɛbɔle ye zo wɔ Ɛdelɛyae.

²Na Ɛdɛnkɛma zele me kɛ, ‘Mmasulo ye, ɔluakɛ meva ye nee ye menli ne amuala memaa wɔ. Yɛ ye kɛ mɔɔ ɛyɛle Amɔle Belemgbunli Saehɔn mɔɔ ɛnee de Hɛhyebɔn la.’

³“Yemɔti Ɛdɛnkɛma yɛ Nyamenle ne yele Beehyan Belemgbunli Ɔɔgo nee ye menli ne amuala manle yɛ. Yɛhunle bɛ muala, ko bɔbɔ anga.

⁴Na yɛvale ye azuamgbole ne mɔ amuala. Suakpole ko bɔbɔ ɛnle ɛkɛ ne mɔɔ yɛanva a. Yɛvale azuamgbole abulasia wɔ Beehyan Belemgbunli Ɔɔgo maanle ne anu wɔ Aagɔbo maanzinli nu.

⁵Azuamgbole ɛhye mɔ amuala le azuamgbole mɔɔ bɛlie nwolɛ bane ndendenle na bɛlɛ nlenkɛ mgbole mɔɔ mbulalɛ gugua bɛ nzi a. Ɛye ɛhye mɔ a eza namunamu dɔɔnwo mɔɔ bɛanlie nwolɛ bane ndendenle la wɔ ɛkɛ.

⁶Na yɛzɛkyele bɛ kɔsɔɔti, yɛzɛkyele suakpole biala, yɛhunle mrenya nee mraalɛ nee ngakula kɔsɔɔti, yɛyɛle bɛ kɛ mɔɔ yɛyɛle Hɛhyebɔn Belemgbunli Saehɔn la.

⁷Na yɛvale nlankɛ nee ninyɛne mɔɔ yɛnyianle bɛ wɔ azuamgbole ne mɔ azo la.

⁸“Zɔhane ati mekɛ ne anu yɛliele azɛlɛ ne yɛvile Amɔle arelemgbunli nwiɔ ne mɔɔ wɔ Azule Dwɔdan aduduleɛ la asa anu. Azɛlɛ ne kpole vi Azule Anɔn bɔnza ne anu kɔdwu Hɛmɔn Boka.

⁹(Saedɛnema fɛlɛ Hɛmɔn Boka, Seleɔn, yɛɛ Amɔlema fɛlɛ ye Sinɛ).

¹⁰Yɛvale Belemgbunli Ɔɔgo maanle ne anu azuamgbole ne mɔ kɔsɔɔti mɔɔ wɔ boka azo sɛsɛ ne azo la nee Geleade nee Beehyan toonwo yɛhɔdwule Salɛka nee Ɛdelɛyae.”

¹¹(Ɛnee Beehyan Belemgbunli Ɔɔgo angomekye yɛɛ ɛha wɔ Rilipeeyemma anu mɔɔ de ngoane nu a. Ye ɛkpa mɔɔ ɔda zolɛ la le bulalɛ, ye tendenle le mita nna yɛɛ ye tɛtɛlɛ le asɛɛ mita nwiɔ. Ɛkpa zɛhae tɛbɔ Amɔlema suakpole bie mɔɔ bɛfɛlɛ ye Relaba la azo kɛkala.)

¹²“Yɛvale azɛlɛ ne la, menvale memanle Wulubɛn nee Gaade mbusua ekpunli ne mɔ kɛ ɔle bɛ ɛdeɛ. Azɛlɛ ne vi Alowɛ mɔɔ wɔ Azule Anɔn bɔnza ne anloa la toonwo ɔfa azuamgbole mɔɔ wɔ Geleade awoka ne mɔ foa ko la azo.

¹³Akee menvale Geleade foa ko ne mɔɔ ɛha la, Beehyan Belemgbunli Ɔɔgo maanle ne amuala, mɔɔ le Aagɔbo maanzinli ne la memanle Manasɛ abusua ekpunli ne foa ko.” (Ɛnee bɛfɛlɛ Beehyan maanle ne Rilipeeyemma maanle.

¹⁴Gyeeyɛɛ mɔɔ vi Manasɛ abusua nu la liele Aagɔbo, mɔɔ le Beehyan azɛlɛ ne, toonwo ɔhɔdwule Gɛhyuma ɛweɛne zo, na ɔvale ye duma ɔdole namunamu ne mɔ azo kɛ bɛfɛlɛ bɛ Gyeeyɛɛ namunamu. Duma ɛhye a tɛda bɛ nwo zo kɛkala a.)

¹⁵“Menvale Geleade memanle Meekɛɛ abusua ekpulike ne mɔɔ wɔ Manasɛ abusua ekpunli ne anu la,

¹⁶na menvale azɛlɛ ne mɔɔ vi Geleade toonwo kɔdwu Azule Anɔn bɔnza ne anu la memanle Wulubɛn nee Gaade mbusua ekpunli ne mɔ. Bɛ ɛweɛne ne la bɔnza ne avinli toonwo ɔkɔkpula Azule Dwɔdan ne anloa, wɔ Amɔnoma ɛweɛne zo.

¹⁷Wɔ ye adɔleɛ noko, Azule Dwɔdan ne a le ɛweɛne a, ɔvi Galeli Tandane ne anloa, wɔ ɛbɔ nu afoa nu ɔbagua Nyevile Wulera ne anloa wɔ nyiakɛ nee Pesega Boka ne ndololeɛ nu wɔ aduduleɛ.

¹⁸“Mekɛ ne anu menzele bɛ kɛ, ‘Ɛdɛnkɛma bɛ Nyamenle ne ɛva azɛlɛ ɛhye ɛmaa bɛ kɛ bɛ ɛdeɛ ɔ. Akee bɛmaa bɛ menli mɔɔ ze konle nye zo la ɛzia bɛ nwo na bɛpɛ bɛli bɛ mediema Yizilayɛma anyunlu.

¹⁹Bɛ ye mɔ, bɛ mra nee bɛ nlankɛ (meze kɛ bɛlɛ nlankɛ dɔɔnwo) baha ɛke, wɔ azuamgbole mɔɔ meva memaa bɛ la azo

²⁰kɔkpula kɛ Ɛdɛnkɛma kɛmaa bɛ mediema ne mɔ amuala kɛnyia ɛleka kɛdɛnla, kɛmɔ yeyɛ yemaa bɛ la, na bɛkɛnyia azɛlɛ ne mɔɔ Ɛdɛnkɛma bɛ Nyamenle ne ɛva ɛmaa bɛ wɔ Azule Dwɔdan ne anzi lɔ la. Na bɛwie a, akee awie biala azia ahɔva ye azɛlɛ ɛdeɛ ne mɔɔ meva memaa ye la.’

²¹“Akee menzele Dwɔhyua kɛ, ‘Ɛdawɔ ɛ nye ɛnwu debie mɔɔ Ɛdɛnkɛma wɔ Nyamenle ne ɛva ɛyɛ arelemgbunli nwiɔ ɛhye mɔ la. Zɔhane ala yɛɛ Ɛdɛnkɛma bava ayɛ arelemgbunli mɔɔ bɛbahɔva bɛ maanle ne mɔ la a.

²²Bɛmmasulo bɛ, ɔluakɛ Ɛdɛnkɛma bɛ Nyamenle ne a ko maa bɛ a.’

²³ “Mekɛ ne anu menzɛlɛle kɛ,

²⁴‘O Awulae Nyamenle, bɔ zo mɔɔ wɔbɔ ɔ bo ɛlɛkile wɔ sonvolɛ wɔ kpoleyɛlɛ nee wɔ tumi a. Ɔluakɛ nyamenle biala ɛnle anwuma anzɛɛ aze mɔɔ kola yɛ ninyɛne mgbole nee nwanwane gyima kɛ wɔmɔ ala.

²⁵Mesɛlɛ wɔ, maa mempɛ azule ye mengɔ ɔ nzi lɔ na mengɔnwu azɛlɛ kpalɛ ne mɔɔ la Azule Dwɔdan ne anzi lɔ awoka ne mɔ azo la nee Lɛbanɔn.’

²⁶“Na kɛmɔ ɛnee bɛmɛ bɛ ti Ɛdɛnkɛma ɛva me nwo ɛya la, yeandie me nzɛlɛlɛ ne, na ɔzele me kɛ, ‘Yeyɛ boɛ; mmaka ɛhye anwo edwɛkɛ bieko ɛkile me.

²⁷Kɔ Boka Pesega azo na to ɛ nye adɔleɛ, ɛbɔ nu, nyevile nu, nee aduduleɛ na nea ye kpalɛ, ɔluakɛ ɛ gyakɛ ba ɛnrɛtia Dwɔdan ne anzi lɔ.

²⁸Fa ɛlɔne ne wula Dwɔhyua asa anu; si ye ahonle na maa ye anwosesebɛ. Ɔluakɛ yemɔ yɛɛ ɔbali menli ne ati bɛahɔpɛ azule ne bɛahɔ ɔ nzi lɔ na yeahɔva azɛlɛ ne mɔɔ ɛ nye banwu ye la yeamaa bɛ a.’

²⁹“Yemɔti yɛdɛnlanle bɔnza ne ɛleka mɔɔ nee sua Bɛtepiyɔ anye bɔ zolɛ la anu.”