Read Nzema Mɛla 30 Bible Online

Mɛla 30 - Nzema bible

Mɛla 30

¹“Kɛkala, meva ninyɛne nwiɔ a mezie bɛ nyunlu a, nyilalɛ yɛɛ munzule. Saa ninyɛne ɛhye mɔ sisi bɛ nwo zo na Ɛdɛnkɛma bɛ Nyamenle ne maa bɛkponde bɛ wɔ maanle maanle ne mɔ azo a, bɛhakye mɔɔ meha mehile bɛ la.

²Bɛzia bɛrɛla Ɛdɛnkɛma bɛ Nyamenle ne ɛkɛ, bɛdabɛ nee bɛ bo zo amra amuala, na bɛva bɛ ahonle nee bɛ ɛkɛla muala bɛdie ɔ ne, kɛmɔ meze bɛ ɛnɛ la.

³Bɛyɛ ye zɔhane na Ɛdɛnkɛma bɛ Nyamenle ne banwu bɛ anwunvɔne, na yeaboɔboa bɛ nloa, yeava bɛ yeavi maanle maanle mɔɔ ɔmanle bɛ nee bɛ hɔle nu la amuala azo yeara, na yeamaa bɛakpazi bieko.

⁴Saa bɛ nee bɛ menli ne mɔɔ bɛmbu bɛ bie la wɔ moa bɔbɔ a, Ɛdɛnkɛma bɛ Nyamenle ne baboɔboa bɛ nloa na ɔ nee bɛ vi lɔ ara.

⁵Ɛdɛnkɛma bɛ Nyamenle ne nee bɛ bara azɛlɛ ne mɔɔ bɛ ze mɔ dɛnlanle zolɛ la azo, amaa bɛdabɛ noko bɛadɛnla zolɛ na yeamaa bɛakpazi, bɛ nwo azo dɔɔnwo adɛla bɛ ze mɔ.

⁶Ɛdɛnkɛma bɛ Nyamenle ne bade bɛ ahonle nu, na yeade bɛ bo zo amra ahonle nu, amaa bɛava bɛ ahonle nee bɛ ɛkɛla muala bɛahulo Ɛdɛnkɛma bɛ Nyamenle ne, na bɛanyia ngoane.

⁷Na Ɛdɛnkɛma bɛ Nyamenle ne bava munzule ne ahɔgua bɛ kpɔvolɛma ne mɔɔ yɛle bɛ kpɔdekpɔde la anwo zo.

⁸Bɛbadie Ɛdɛnkɛma ane bieko na bɛali ye mɛla ne mɔ mɔɔ meva memaa bɛ ɛnɛ la azo.

⁹Ɛdɛnkɛma bɛ Nyamenle ne bamaa bɛakpazi wɔ gyima biala anu, bɛawo mralɛ dɔɔnwo, bɛ nlankɛ azo na bɛ egyinli ahye. Ɔluakɛ Ɛdɛnkɛma anye balie bɛ nwo bieko kɛ bɛkɛkpazi, kɛmɔ ɔ nye liele bɛ ze mɔ anwo la.

¹⁰Noko ɔwɔ kɛ bɛtie Ɛdɛnkɛma bɛ Nyamenle ne ane, na bɛdi ye mɛla nee ngyehyɛlɛ ne mɔ azo, kɛmɔ bɛhɛlɛ bɛ wɔ Mɛla Buluku ɛhye anu la, na bɛfa bɛ ahonle nee bɛ ɛkɛla muala bɛsia bɛba Ɛdɛnkɛma bɛ Nyamenle ne ɛkɛ.

¹¹“Mɛla ɛhye mɔɔ melɛfa meamaa bɛ ɛnɛ la ɛnyɛ se, yɛɛ ɔmbo bɛ nwo zo.

¹² Ɔnle anwuma yɛɛ bɛkava a na bɛaha kɛ, ‘Nwane a fo ahɔ ahɔva ara, amaa yeadie bie na yeali zolɛ a?’

¹³Anzɛɛ ɔnle nyevile nzi na bɛaha kɛ, ‘Nwane a pɛ nyevile ye ahɔ ɔ nzi lɔ ahɔva ara, amaa yɛadie bie na yɛali zolɛ a?’

¹⁴Kyɛkyɛ, edwɛkɛ ne nee bɛ a wɔ ɛke a. Ɔwɔ bɛ ahonle nu yɛɛ ɔdua bɛ nloa. Yemɔti bɛkola bɛdi zolɛ.

¹⁵“Bɛnlea, ɛnɛ meva ngoane nee saleɛ, yɛɛ munzule nee ewule mezie bɛ nyunlu.

¹⁶Saa bɛdi Ɛdɛnkɛma bɛ Nyamenle ne mɛla ne mɔ azo,[11] bɛkulo ye, na bɛdua ye ndenle ne mɔ anu, bɛdi ye ngyehyɛlɛ ne mɔ azo a, bɛbanyia ngoane, bɛ nwo azo, na Ɛdɛnkɛma bɛ Nyamenle ne bayila bɛ wɔ azɛlɛ ne mɔɔ bɛlɛkɔ bɛahɔva la azo.

¹⁷“Na saa bɛyɛ anzosesebɛ na bɛandie ye, bɛtwe bɛ nwo bɛkɔbɔ bɛ ti aze bɛmaa awozonle, bɛsonle bɛ a,

¹⁸meka ye wienyi meahile bɛ ɛnɛ demua ye kɛ bɛ muala bɛbawu. Bɛnrɛhyɛ wɔ azɛlɛ ne mɔɔ bɛlɛpɛ Dwɔdan ne bɛahɔ ɔ nzi lɔ bɛahɔva la azo.

¹⁹Mefɛlɛ anwuma nee aze kɛ bɛrali me nee bɛ daselɛ kɛ ɛnɛ demua ye, meva ngoane nee ewule, yɛɛ saleɛ nee munzule mezie bɛ nyunlu. Zɔhane ati bɛva ngoane, amaa bɛ nee bɛ bo zo amra bɛanyia ngoane.

²⁰Bɛhulo Ɛdɛnkɛma bɛ Nyamenle ne, bɛdie ɔ ne na bɛdudu bɛhisa ye, ɔluakɛ saa bɛyɛ ye zɔhane a ɔle ngoane ɔmaa bɛ, yɛɛ bɛbanyi bɛahyɛ, wɔ azɛlɛ ne mɔɔ Ɛdɛnkɛma vale bɔle bɛ ze mɔ, Ebileham, Ayezeke, nee Gyekɔbo ɛwɔkɛ kɛ ɔbava yeamaa bɛ la azo.”