Read Nzema Mɛla 31 Bible Online

Mɛla 31 - Nzema bible

Mɛla 31

¹Mosisi hɔle zolɛ dendɛle hilele Yizilayɛma.

²Ɔzele bɛ kɛ, “Kɛkala meli ɛvolɛ ɛya ko abulanwiɔ. Mengola me nee bɛ ɛngɔ ɛmba kɛ dɛba ne la. Ɛdɛnkɛma ɛze me kɛ memmapɛ Dwɔdan ne mekɔ ɔ nzi lɔ.

³Ɛdɛnkɛma bɛ Nyamenle ne ɔdaye yɛɛ ɔ nee bɛ bahɔ, yeahɔzɛkye maanle maanle ɛhye mɔ yeamaa bɛ, yeamaa bɛali bɛ nwo zo konim a. Dwɔhyua yɛɛ bali bɛ ti a, kɛmɔ Ɛdɛnkɛma ɛha ɛdo ɛkɛ ne la.

⁴Ɛdɛnkɛma bayɛ bɛ kɛ ɔyɛle Amɔle Arelemgbunli Saehɔn nee Ɔɔgo nee bɛ azɛlɛ ne mɔ la. Ɔzɛkyele bɛ bɔkɔɔ.

⁵Ɛdɛnkɛma baye bɛ amaa bɛ, na bɛayɛ bɛ kɛ mɔɔ mɛla ne mɔɔ melɛfa meamaa bɛ la se la.

⁶Bɛgyinla kpundii na bɛmia bɛ nwo. Bɛmmasulo yɛɛ bɛmmamaa bɛ nwo mɔra tu. Ɔluakɛ Ɛdɛnkɛma bɛ Nyamenle ne a nee bɛ ɛlɛkɔ a. Ɔnrɛgyakyi bɛ yɛɛ ɔ rɛle ɛnrɛye bɛ ɛlɛ.”

⁷Akee Mosisi vɛlɛle Dwɔhyua na ɔdendɛle ɔhilele ye wɔ Yizilayɛma kɔsɔɔti anyunlu kɛ, “Mmamaa ɛ rɛle bɔ. Mia ɛ nwo, ɔluakɛ ɛdawɔ yɛɛ ɛ nee menli ɛhye mɔ bahɔ azɛlɛ ne mɔɔ Ɛdɛnkɛma ɛva ɛbɔ bɛ ze mɔ ɛwɔkɛ la azo na bɛahɔva a.

⁸ Ɛdɛnkɛma a bali ɛ nyunlu nee wɔ ahɔ a. Ɔ nee wɔ balua. Ɔnrɛgyakyi wɔ yɛɛ ɔ rɛle ɛnrɛvi wɔ. Mmasulo yɛɛ mmamaa ɛ rɛle bɔ.”

⁹Akee Mosisi hɛlɛle mɛla ɛhye na ɔvale ɔmanle Livae abo zo amra ne mɔ mɔɔ le sɛlɛvolɛma, mɔɔ zoale Ɛdɛnkɛma Ngyekyeleɛ Ɛlɛka ne la, nee Yizilayɛ mgbanyima ne mɔ.

¹⁰ Na Mosisi zele bɛ kɛ, “Ɛvolɛ nsuu biala awieleɛ, mɔɔ ɔkɛdwu mekɛ mɔɔ ɔwɔ kɛ bɛpɛ kakɛ biala mɔɔ awie tua bɛ la anu wɔ Kpɔda Bo Ɛdɛnlanlɛ Ɛvoyia ne anu,

¹¹mɔɔ Yizilayɛma kɔsɔɔti kɛra Ɛdɛnkɛma bɛ Nyamenle ne anyunlu, ɛleka mɔɔ Ɛdɛnkɛma ɛhile kɛ bɛzonle ye la, bɛgenga mɛla ɛhye bɛmaa Yizilayɛma kɔsɔɔti ɛde.

¹²Bɛboɔboa menli ne kɔsɔɔti anloa, mrenya, mraalɛ, ngakula, nee nyɛvolɛ mɔɔ wɔ bɛ azua ne mɔ azo la, amaa bɛade mɛla ne na bɛazulo Ɛdɛnkɛma bɛ Nyamenle ne, na bɛali mɛla ne amuala azo nɔhalɛ nu.

¹³Bɛyɛ ye zɔhane, amaa bɛ mra mɔɔ ɛnze la ade na bɛazulo Ɛdɛnkɛma bɛ Nyamenle ne, wɔ mekɛ tendenle biala mɔɔ bɛde ngoane nu wɔ azɛlɛ ne mɔɔ bɛlɛpɛ Dwɔdan ne bɛahɔva la azo la.”

¹⁴Na Ɛdɛnkɛma zele Mosisi kɛ, “Mekɛ asɛɛ ɛdwu mɔɔ ɔwɔ kɛ ɛkɔ wɔ ɛkɛla nzi a. Fɛlɛ Dwɔhyua na ɛ nee ye bɛrɛla Ndanlɛ Sua ne anu na menva ye gyima menwula ɔ sa nu.” Na Mosisi nee Dwɔhyua hɔle Ndanlɛ Sua ne anu.

¹⁵Ɛdɛnkɛma rale Ndanlɛ Sua ne anu na ɔyɛle amungu mpila ɔgyinlanle anlenkɛ ne anloa.

¹⁶Na Ɛdɛnkɛma zele Mosisi kɛ, “Ɔnrɛhyɛ biala na wɔahɔ wɔ ɛkɛla nzi. Na menli ɛhye mɔ babɔ tuutuu ɛbɛla, bɛakpo me na bɛazonle azɛlɛ ne mɔɔ bɛkadɛnla zolɛ la azo awozonle ne mɔ. Bɛ rɛle bavi me na bɛatulu ngyekyeleɛ ne mɔɔ me nee bɛ ɛyɛ la.

¹⁷Mekɛ zɔhane anu, mebava bɛ nwo ɛya na meamaa bɛazɛkye bɛ. Munzule dɔɔnwo basisi bɛ nwo zo na bɛanwu amaneɛ. Na ɔdwu zo a akee bɛbaha kɛ, ‘Ɛhye mɔ kɔsɔɔti ɛzi yɛ nwo zo, ɔboalekɛ yɛ Nyamenle ne ɛnle yɛ avinli.’

¹⁸Amgba noko, bɛ ninyɛndane ti, ɔvi kenle zɔhane mebaye me nye meado ɛbɔ nu, ɔboalekɛ bɛgyakyi me bɛlɛsonle awozonle.

¹⁹“Zɔhane ati, kɛlɛ edwɛne ɛhye na kile Yizilayɛma. Maa bɛdo ye dahuu bɛmaa ɔkokoa bɛ nloa anu, amaa yeayɛ daselɛ wɔ me nee bɛ yɛ avinli.

²⁰Ɔluakɛ saa mefa bɛ medwu azɛlɛ ne mɔɔ kye aleɛ mɔɔ menvale membɔle bɛ ze mɔ ɛwɔkɛ la azo, na bɛdi bɛ ko yi, bɛyɛ mbelane a, bɛbahakyi bɛabɔ bɛ ti aze bɛamaa awozonle na bɛazonle bɛ. Bɛbakpo me na bɛatulu me ngyekyeleɛ ne.

²¹Na saa edwɛkɛ to bɛ na munzule si bɛ nwo zo a, edwɛne ɛhye bara bɛ ti anu yeamaa bɛ ti anu aze bɛ, ɔboalekɛ bɛ bo zo amra bɔbɔ arɛle ɛnrɛvi edwɛne ɛhye. Bɛbahakye ye dahuu. Bɛtɛdwule azɛlɛ ne mɔɔ meva mebɔ bɛ ɛwɔkɛ la azo bɔbɔ, noko meze mɔɔ kɛkala angome bɛlɛdwenle debie mɔɔ bɛdwu a bɛbayɛ la anwo.”

²²Yemɔti Mosisi hɛlɛle edwɛne ne na ɔhilele Yizilayɛma amuala.

²³ Akee Ɛdɛnkɛma vale Nɛn ara Dwɔhyua gyima ne wulale ɔ sa nu na ɔzele ye kɛ, “Mia ɛ nwo na gyinla kpundii, ɔluakɛ ɛbava Yizilayɛma wɔadwu azɛlɛ ne mɔɔ menvale membɔle bɛ ɛwɔkɛ la azo. Me nee wɔ balua.”

²⁴Mosisi hɛlɛle Nyamenle Mɛla ne amuala wulale buluku nu; ɔdɔle ɔ rɛle aze ɔhɛlɛle, amaa bie anga nuhua.

²⁵Akee Mosisi zele Livaema ne mɔɔ soa Ɛdɛnkɛma Ngyekyeleɛ Ɛlɛka ne la kɛ,

²⁶“Bɛlie mɛla buluku ɛhye bɛdo Ɛdɛnkɛma bɛ Nyamenle ne Ngyekyeleɛ Ɛlɛka ne anu foa ko, amaa yeala ɛkɛ ne yeali daselɛ yeatia bɛ.

²⁷Ɔluakɛ meze kɛ bɛngyɛ na bɛade atua. Mɔɔ medame mumua ne mede aze la, medame me nye zo, bɛdele Ɛdɛnkɛma anwo atua, na akee mɔɔ menwɔwu la!

²⁸Bɛboɔboa mbusua ekpunli ekpunli ne mɔ mgbanyinli ne mɔ, nee bɛ mbɔlɔba mgbanyinli ne mɔ anloa bɛmaa bɛrɛla bɛmaa menga edwɛkɛ mengile bɛ, na menvɛlɛ anwuma nee aze memaa bɛli yɛ daselɛ.

²⁹Ɔluakɛ meze kɛ mewu a bɛbade atua na bɛahwe bɛ nwo bɛavi adenle ne mɔɔ mese bɛlua zolɛ la azo. Mekɛ zɔhane anu, kɛmɔ bɛbayɛ ɛtane bɛatia Ɛdɛnkɛma na bɛava bɛ sa anloa gyima bɛaha ye ɛya la ati, munzule bazi bɛ nwo zo.”

³⁰Akee Mosisi dole edwɛne ne toonwo ɔdwulale, na Yizilayɛma amuala diele ye.