Read Nzema Mɛla 32 Bible Online

Mɛla 32 - Nzema bible

Mɛla 32

¹“Anwuma amra, bɛdie na metendɛ, Aze amra, bɛdie me nloa edwɛkɛ.

²Me ngilehilelɛ badɔ kɛ ezule, me ɛdendɛlɛ bavie kɛ ɛbɔlɛ. Me ɛdendɛlɛ bayɛ kɛ nyenyensuo mɔɔ gugua ndile zo, ɔbayɛ kɛ kyɛngyɛne mɔɔ gua doɔloa ɛbɔlɛ.

³Ɔluakɛ mebabɔ Ɛdɛnkɛma duma ne nolo, meahile yɛ Nyamenle ne ye bedevinli ne!

⁴“Bodane ne, ye gyima di munli, ɔluakɛ ɔdi pɛlepɛle. Ɔle Nyamenle mɔɔ di nɔhalɛ, ɔnle amumuyɛ, ɔdi pɛlepɛle, ye edwɛkɛ le fɔɔnwo.

⁵Bɛanli nɔhalɛ bɛammaa ye, bɛnle ɔ mra ko, ɔboalekɛ bɛ nwo lɛ dɛne; bɛle awolɛndoazo ɛtane, anzosesebɛma.

⁶Bɛmɛ menli ahɔnwɔne mɔɔ ɛnlɛ adwenle a, asoo bɛ mo mɔɔ bɛyɛ Ɛdɛnkɛma la ɛne. Asoo tɛ yemɔ yɛɛ ɔle bɛ ze, mɔɔ bɔle bɛ, na ɔyɛle bɛ maanle la?

⁷“Bɛhakye dɛba, bɛdwenle mɔmoane mɔmoane; bɛbiza bɛ ze mɔ, na bɛkɛha bɛkɛhile bɛ; bɛbiza bɛ mgbanyinli, na bɛkɛze bɛ.

⁸Mɔɔ Anwuma Anwumanli ne manle maanle biala agyadeɛ, mekɛ mɔɔ ɔkpakyekpakyele menli avinli la, ɔnleanle Yizilayɛma ne dodo na ɔgyigyale menli ne ɛweɛne.

⁹Ɛdɛnkɛma ɛkpɔ ɛdeɛ a le ye menli ne, Gyekɔbo a le ye afoa nu agyadeɛ a.

¹⁰“Ɔnwunle ye wɔ ɛsɛlɛ zo, wɔ fienemgbole nu anwoma nu. Ɔbɔle ɔ nwo bane, ɔlile ye adane, na ɔdule ɔ nye ko ɔdole ɔ nwo.

¹¹Kɛ kɔleɛ si kpusu ɔ nwo wɔ ye sane nu wozowozo ɔ ndɛba anu ɔ mra nwo zo, kɛ ɔkile ɔ mra ɛdulɛ, ɔsɔ bɛ wɔ ɔ ndɛba ne mɔ azo la,

¹²Ɛdɛnkɛma angome a hilele ye adenle a, nyamenle gyɛne biala amboka ɔ nwo.

¹³“Ɔmanle ɔluoluale azɛlɛ ye azo ɛleka mgbole mgbole, na ɔlile kpɔkɛ nu aleɛ; ɔmanle ɔnlonle bodane nu wolɛ, na ɔnlonle ɛtwɛlɛboɔ nu nwole.

¹⁴Ɔlile kyiisi na ɔnlonle nlankɛ nyɛfonzule, ɔlile Beehyan nlankɛ, mboane, nee mbɔnkye mɔɔ ɛlɔ, ɔlile hwiiti kpalɛ na ɔnlonle nwanye kpalɛ.

¹⁵“Nyamenle menli ne hyenle yɛle kpukpotoloo, bɛyɛle mgbole mbelane tutoboo, bɛkpole bɛ Nyamenle ne mɔɔ bɔle bɛ la, na bɛkpole bɛ Ngoanelielɛ Bodane ne.

¹⁶Bɛvale awozonlezonlenlɛ bɛhanle ye ɛya; bɛyɛle bɛkyi ninyɛne bɛmanle ɔvale ɛya.

¹⁷ Bɛbɔle azu bɛmanle mmonle mɔɔ ɛnle nyamenle, awozonle mɔɔ bɛnze bɛ, nyamenle fofolɛ bie mɔ mɔɔ ɛvinde, mɔɔ bɛ ze mɔ ɛnze bɛ.

¹⁸Bɛandwenle Bodane ne mɔɔ bɔle bɛ la anwo, bɛ rɛle vile Nyamenle ne mɔɔ wole bɛ la.

¹⁹“Ɛdɛnkɛma nwunle ye na ɔkpole bɛ, ɔboalekɛ ɔ mra mrenya nee mraalɛ hanle ye ɛya.

²⁰Na ɔzele kɛ, ‘Meye me nye meado ɛbɔ nu, na meanlea kɛ bɛ awieleɛ kɛzi kɛwie bɛ la. Ɔluakɛ bɛle awolɛndoazo mɔɔ ɛzɛkye a, menli mɔɔ nɔhalɛ ɛnle bɛ nu.

²¹ Bɛva debie mɔɔ ɛnle nyamenle la bɛha me ɛya, bɛva bɛ mmonle bɛfutu me ahonle. Yemɔti medame mebava menli mɔɔ ɛndo ɛhwee la meaha bɛ ɛya; mebava maanle kɔnwɔne bie meaha bɛ ɛya.

²²Ɔluakɛ me ɛya sɔ kɛ senle, ɔsɔ toonwo ɔdwu ɛbolɔ. Ɔyela azɛlɛ ye nee zolɛ debie biala, na ɔmaa awoka ne mɔ adiabo yela.

²³“ ‘Mebamaa munzule mgbole ado bɛ; mebatoto me nyane ɛda ne meawowɔ bɛ.

²⁴Ɛhɔne bazɛkye bɛ muala, ewia samɛnlakɛ nee ewulenzane bayela bɛ wee. Mebamaa nanemgbole ahye bɛ ali, na nwɔlɛ akeka bɛ ahu bɛ.

²⁵Bɛbadɔ dadeɛ nloa wɔ konle nu, bɛbanwu ɛzulolɛ bɛ sua kunlu. Bɛbahu mgbavolɛ nee mbɛlɛra, yɛɛ ngakula mɔɔ no nyɛfonlɛ nee mrelera.

²⁶Anrɛɛ menwɔha kɛ: Mebabɔ bɛ asande, meagua bɛ moa, na meamaa menli arɛle avi bɛ.

²⁷Noko mesulo ɔ nzi kɛ kpɔvolɛ ne kɛha me ɛya, anrɛɛ mɔɔ kyi bɛ la ɛnrɛde ɔ bo, na bɛkɛha kɛ yɛli konim, na tɛ mame Ɛdɛnkɛma yɛɛ meyɛ a.’

²⁸“Yizilayɛma le menli mɔɔ ɛnde folɛ, bɛle menli mɔɔ ɛnlɛ ndelebɛbo fee.

²⁹Saa bɛze nrɛlɛbɛ a anrɛɛ bɛkɛde ɛhye abo, anrɛɛ bɛbanwu mɔɔ nzinlii bazi bɛ nwo zo la.

³⁰Kɛ ɔkɛyɛ na baholɛ avoa apenle, na menli nwiɔ aha apenle bulu agua ɛbɔ nu ɛ? Kyesɛ Ɛdɛnkɛma bɛ Bodane ne ɛdɔne bɛ ɛmaa, na Ɛdɛnkɛma ɛye bɛ ɛmaa.

³¹Ɔluakɛ bɛ bodane ne ɛnle kɛ yɛ Bodane ne, yɛ kpɔvolɛma bɔbɔ ze ɛhye sie.

³²Ɔluakɛ bɛ vanye ne vi Sodɔm, yɛɛ Gomɔla vanye egyinli ne mɔ anu, Bɛ ma ne mɔ le pɔezen, bɛ vanye aziakɛ yɛ ɛnwonle.

³³Bɛ nwanye ku kɛ nwɔlɛ bɔlɔ, ɔ nloa yɛ se kɛ bɔna bɔlɔ.

³⁴“Meva ɛhye mɔ amuala mezie, meheda zo wɔ me gya ne mɔ anu, na me rɛle ɛnrɛvi ɛlɛ.

³⁵ Mekɛ mɔɔ bɛ gyakɛ kɛhoati la, medame a mebali nzenralɛ na meadua kakɛ a. Bɛ anwubɛnyunlu mekɛ ɛdwu, na bɛ awieleɛ ɛbikye.

³⁶Ɔluakɛ Ɛdɛnkɛma balie ye menli ne ati, na yeanwu ye ngɛkɛlɛ anwunvɔne, saa ɔnwu kɛ bɛ anwosesebɛ ɛwie, na alehelɛ nee ahanra muala ɛlɛminli a.

³⁷Akee ɔbaha kɛ: Na bɛ nyamenle ne mɔ, bodane ne mɔɔ bɛhɔveale ɔ bo,

³⁸mɔɔ lile bɛ azubɔdeɛ mgbole ne mɔ, nlonle bɛ nwanye azubɔdeɛ ne mɔ la wɔ ni? Bɛmaa bɛdwazo bɛboa bɛ ɛ! Bɛmaa bɛlie bɛ ti ɛ!

³⁹“Kɛkala, bɛnwu ye kɛ medame ala a mele Nyamenle a, nyamenle bieko ɛnle ɛkɛ kɛ me ngome. Medame a meku, memaa ngoane a, meboda eza meyɛ ayile a. Awie ɛngola ɛnlie debie wɔ me sa nu.

⁴⁰Ɔluakɛ kɛmɔ mele Tease Nyamenle la, memaa me sa zo anwuma meka ndane kɛ,

⁴¹saa mesi me konle dadeɛ memeamemea ne, na mese kɛ mebua ndɛne a, mebali me kpɔvolɛma ne nzenralɛ, na meadua menli mɔɔ kpɔ me la kakɛ.

⁴²Me ɛda mbaka babia mogya, na me dadeɛ ali nwonane, menli mɔɔ bɛhu bɛ nee menli mɔɔ bɛhye bɛ nuokɛ, menrɛvavi bie, mebahu me kpɔvolɛma ne amuala.

⁴³ “Maanle maanle, bɛye Ɛdɛnkɛma menli ne ayɛlɛ; ɔluakɛ Ɛdɛnkɛma di ye sonvolɛma ati, ɔsenra ye kpɔvolɛma amuala, na ɔkpɔda ɔ nwo wɔ ye menli ne ati.”

⁴⁴Mosisi nee Nɛn ara Dwɔhyua hanle edwɛne ne anu edwɛkɛ agbɔkɛ ne manle menli ne amuala dele.

⁴⁵Mɔɔ Mosisi wiele edwɛkɛ ɛhye mɔ amuala ka kile Yizilayɛma la,

⁴⁶ɔzele bɛ kɛ, “Bɛva mɛla mɔɔ meva memaa bɛ ɛnɛ la amuala bɛzie bɛ ahonle nu na bɛli zolɛ, amaa bɛaha bɛahile bɛ mra, na bɛdabɛ noko bɛali zolɛ.

⁴⁷Ɔnle nwɔwe edwɛkɛ; ɔle bɛ ngoane. Bɛdi zolɛ a bɛbanyi bɛahyɛ wɔ azɛlɛ ne mɔɔ bɛlɛkɔ bɛahɔva wɔ Azule Dwɔdan ne anzi lɔ la azo.”

⁴⁸Kenle ko ne Ɛdɛnkɛma zele Mosisi kɛ,

⁴⁹“Kɔ Abalem awoka ne mɔ mɔɔ wɔ Mowabe azɛlɛ zo la azo, na fo Nibo Boka ne mɔɔ nee Gyɛleko bɛ nye bɔ zolɛ la na to ɛ nye nea Keena azɛlɛ ne mɔɔ melɛfa meamaa Yizilayɛma kɛ bɛva la.

⁵⁰Wu boka ne mɔɔ ɛbavo zolɛ la azo, na kɔ wɔ ɛkɛla nzi, kɛmɔ ɛ diema Aalɔn wule Hɔɔ Boka ne azo na ɔhɔle ye ɛkɛla nzi la.

⁵¹Ɔboalekɛ bɛ mu nwiɔ bɛanli nɔhalɛ bɛammaa me wɔ Yizilayɛma anyunlu wɔ Mɛleba, mɔɔ zua Keedɛhye nzule ne mɔ anloa wɔ Zen fienemgbole ne anu la. Ɔboalekɛ bɛanli me eni bɛanzonle me kɛ mele nwuanzanwuanza bɛangile Yizilayɛma.

⁵²Ɛbanwu azɛlɛ ne kɛ ɔla ɛ nyunlu lɔ, na ɛ gyakɛ ba ɛnrɛtia azɛlɛ ne mɔɔ melɛfa meamaa Yizilayɛma la azo.”