Read Nzema Mɛla 33 Bible Online

Mɛla 33 - Nzema bible

Mɛla 33

¹Nyilalɛ mɔɔ Nyamenle sonla Mosisi zɛlɛle manle Yizilayɛma kolaa na yeawu la ɛne:

²Ɛdɛnkɛma vi Saenae Boka rale, ɔdudule yɛ nwo zo wɔ Yidɔm kɛ sɛnzɛne. Ɔdale ɔvi Pɛlan Boka ɔguale yɛ nwo zo, ɔ nee nwuanzanwuanzama apenle bulu a lua a, ɔlɛ senle hulenyihulenyi ɔ sa fema nu.

³Ɛhɛe, ɔhulole ye menli ne, ɔbɔ bɛdabɛ mɔɔ bɛva bɛ nwo bɛmaa ye la anwo bane. Ɛhye ati bɛdoale ɛ bo zo, bɛtie bɛyɛ mɔɔ ɛkɛze bɛ la.

⁴Mosisi manle yɛ mɛla kɛ Gyekɔbo abo zo amra agyadeɛ.

⁵Na Ɛdɛnkɛma yɛle belemgbunli wɔ Yizilayɛ, wɔ mekɛ mɔɔ mbusua ekpunli ekpunli, nee mbusua mgbanyinli yiale nu la.

⁶Mosisi hanle wɔ Wulubɛn abusua ekpunli ne anwo kɛ, “Maa Wulubɛn abusua ekpunli ne ɛnyi, ɔmmabɔ, na maa nuhua menli ne anwo ɛzo.”

⁷Mɔɔ ɔhanle wɔ Dwuda abusua ekpunli ne anwo la ɛne: “O Ɛdɛnkɛma, tie Dwudama ane, na maa bɛ nee mbusua ekpunli mɔɔ ɛha la ɛli ahua. Ɛdawɔ die bɛ konle ko maa bɛ, na boa bɛ wɔ bɛ kpɔvolɛma anyunlu.”

⁸ Mɔɔ ɔhanle wɔ Livae abusua ekpunli ne anwo la ɛne: “Ɛdɛnkɛma, dua Livaema ye anwo zo maa bɛva Yulem nee Tɛmem[12] bɛye wɔ ɛhulolɛdeɛ bɛhile. Ɛzɔle bɛ ɛnleanle wɔ Masa na ɛnwunle bɛ nɔhalɛlilɛ wɔ Mɛleba nzule nloa.

⁹Bɛkpole bɛ ze mɔ nee bɛ nli mɔ, bɛzele bɛ kɛ bɛnze bɛ; bɛkpole mediema nee mralɛ, ɔluakɛ bɛlile wɔ mɛla zo, na bɛlile wɔ ngyekyeleɛ ne azo.

¹⁰Bɛbahilehile Gyekɔbo abo zo amra wɔ ngyehyɛlɛ ne mɔ; bɛahilehile Yizilayɛma wɔ mɛla ne mɔ; bɛbakpu ɛyɛlɛ bɛamaa wɔ, bɛayela nane mumua bɛabɔ azu bɛamaa wɔ.

¹¹O Ɛdɛnkɛma, yila bɛ abusua ekpunli ne; na maa bɛ gyima ɛzɔ ɛ nye. Sɛkye bɛ kpɔvolɛma mɔɔ kyi bɛ la, sɛkye bɛ mɔɔ bɛndwazo ko ɛlɛ a.”

¹²Ɔhanle ɛhye wɔ Bɛngyaman abusua ekpunli ne anwo; “Ɛdɛnkɛma kulo abusua ekpunli ɛhye anu amra, ɔbɔ bɛ nwo bane, ɔsinza bɛ alehyenlɛ biala, na ɔde bɛ avinli.”

¹³Wɔ Dwosefi abusua ekpunli ne anwo, ɔzele kɛ: “Ɛdɛnkɛma ɛdɔ ɛbɔlɛ kpalɛ ɛgua bɛ azɛlɛ ne azo, na ɔmaa azɛlɛ ɛkpu nzule ɛmaa bɛ.

¹⁴Ɛdɛnkɛma ɛmaa ewia ɛvi ɛbolo bɛ bɛyɔba, ɔmaa bɛ nzoleɛ kpalɛ wɔ ɛbuhenle nloa.

¹⁵Ɛdɛnkɛma ɛmaa bɛ tete awoka ne mɔ ɛhye aleɛ, na aleɛ ɛbu awoka ne mɔ azo.

¹⁶Ɛdɛnkɛma ɛmaa bɛ azɛlɛ ɛhye aleɛ, na ɔzɔ mɔɔ dendɛle kpɔkɛ ne anu senle ne anu la anye. Nyilalɛ ɛhye mɔ amuala ɛyɛ Dwosefi abusua ekpunli ne ɛdeɛ, ɔboalekɛ yemɔ a ɔlile ɔ mediema ne mɔ ati a.

¹⁷Dwosefi anwosesebɛ le kɛ ɛnlankɛ nyinli, ye mɛne ɛsesebɛ le kɛ ɛnlankɛ kokonyinli. Ye mɛne le Manasɛ ɛdeɛ apenle, ɔle Yifelaem ɛdeɛ apenle bulu. Ɔfa ɔpia maanle maanle ne mɔ, ɔpia bɛ toonwo ɔkɔ ewiade ati nee ɔ bo.”

¹⁸Ɔhanle ɛhye noko wɔ Zɛbulɛn nee Yesakaa mbusua ekpunli ne mɔ anwo: “Ɛdɛnkɛma ɛmaa Zɛbulɛn anwo ɛyɛ twetwe wɔ ye maanle zo gualilɛ nu, ɔmaa Yesakaa ɛkpazi sua nu.

¹⁹Bɛbavɛlɛ menli wɔ bɛ awoka ne mɔ azo, na bɛabɔ azu mɔɔ sɔ ɛnyelɛ la. Ɔluakɛ bɛnyia bɛ anwonyia wɔ nyevile nu, bɛnyia bɛ mgbɔba wɔ anwea nu.”

²⁰Mɔɔ ɔhanle wɔ Gaade abusua ekpunli ne anwo la ɛne: “Bɛye Nyamenle ayɛlɛ kɛ ɔmanle bɛ azɛlɛ ne dɛlɛle a, Gaade kɔ nzia kɛ awenade, ɔto a ɔtu ɛsalɛ, ɔkpuke amelɛ.

²¹Bɛnleanle nu bɛvale azɛlɛ kpalɛ ne, ɔluakɛ ɔle safohyenle kyɛfoa; ɔrale abusua mgbanyinli ne mɔ anwo ɛkɛ na ɔmanle Yizilayɛma lile Ɛdɛnkɛma mɛla ne mɔ azo.”

²²Wɔ Dan abusua ekpunli ne anwo, ɔhanle kɛ, “Dan le awenade ralɛ, mɔɔ vi Beehyan wulu ba a.”

²³Wɔ Nafetalae abusua ekpunli ne anwo, ɔhanle kɛ, “O Nafetalae, wɔzɔ Ɛdɛnkɛma anye, yɛɛ Ɛdɛnkɛma ɛyila wɔ dɔɔnwo. Fa azɛlɛ ne fi Galeli Tandane ne anloa, kɔdwu nyiakɛ nehane.”

²⁴Ahya abusua ekpunli ne anwo noko, ɔzele kɛ, “Bɛyila Ahya abusua ekpunli ne bɛdɛla abusua ekpunli biala. Ɛdɛnkɛma ɛmaa ɔ mediema ne mɔ ɛhulo ye, na nwole ɛbu ye azɛlɛ ne azo.

²⁵Bɛbava mbulalɛ nee kɔbele bɛagua bɛ azuamgbole nlenkɛ nzi, Ɛdɛnkɛma ɛmaa bɛnyi bɛhyɛ na bɛde kpɔkɛ dahuu.”

²⁶Yizilayɛma, nyamenle bie ɛnle ɛkɛ mɔɔ le kɛ bɛ Nyamenle ne, mɔɔ dua ye belemgbunlililɛ nu vi anwuma baboa ye menli a.

²⁷Damɛnlangoate Nyamenle ne anwo ɛkɛ a le bɛ tɛnlabelɛ a; bɛvea ɔ sa abo a, bɛ nwo kɔlɔnwo, ɔka bɛ kpɔvolɛma ɔgua ɔmaa bɛ, na yeaze bɛ kɛ, “Bɛhu bɛ.”

²⁸Yemɔti Yizilayɛma dɛnlanle anzonudwolɛ nu, Gyekɔbo abo zo amra ye angome, dɛnlanle azɛlɛ mɔɔ abɛlɛ nee nza ɛbu zolɛ la azo; ɛbɔlɛ ɛmkpa azɛlɛ ne azo ɛlɛ.

²⁹Yizilayɛma, nyilalɛ ɛha bɛ! Nwane mɔ bɔbɔ a le kɛ bɛdabɛ a? Bɛmɛ mɔɔ Ɛdɛnkɛma ɛlie bɛ, yebɔ bɛ nwo bane, na ɔle bɛ dadeɛ bɛfa bɛdi konim a. Bɛ kpɔvolɛma badu agua bɛ nyunlu, na bɛatietia bɛ nwo zo.