Read Nzema Mɛla 34 Bible Online

Mɛla 34 - Nzema bible

Mɛla 34

¹Akee Mosisi vi Mowabe ɛsɛlɛ ne anu hɔle Nibo Boka, ɔhɔvole ɔhɔle Pesega boka ne mɔɔ nee Gyɛleko anye bɔ zolɛ la azo. Ɛdɛnkɛma hilele ye azɛlɛ ne kɔsɔɔti, ɔvi Geleade mɔɔ kɔdwu Dan la, Nafetalae amuala,

²Yifelaem nee Manasɛ azɛlɛ ne, Dwuda azɛlɛ ne amuala toonwo mɔɔ kɔgua ye Mɛdetɛlenia Nyevile ne anloa,

³Dwuda nyiakɛ, yɛɛ fienemgbole ne mɔɔ vi Zowaa kɔdwu Gyɛleko, mrɛlɛ suakpole ne azo la amuala.

⁴ Na Ɛdɛnkɛma zele ye kɛ, “Azɛlɛ ne mɔɔ menvale membɔle Ebileham, Ayezeke, nee Gyekɔbo ɛwɔkɛ kɛ mebava meamaa bɛ bo zo amra la ɛne. Memaa ɛ nye nwiɔ anwu ye, noko ɛ gyakɛ ba ɛnrɛtia zolɛ.”

⁵Yemɔti Ɛdɛnkɛma sonvolɛ Mosisi wule Mowabe azɛlɛ zo, kɛmɔ Ɛdɛnkɛma hanle la.

⁶Ɛdɛnkɛma ziele ye wɔ bɔnza ne mɔɔ wɔ Mowabe azɛlɛ ne mɔɔ nee Bɛtepiyɔ anye bɔ zolɛ la anu. Na toonwo mɔɔ yeradwu ɛnɛ la, awie biala ɛtɛnwunle ye nla ne.

⁷Mosisi lile ɛvolɛ ɛya ko abulanwiɔ na yeawu. Ɔ nye anyɛ yɛɛ dahuu ɔlɛ anwosesebɛ.

⁸Na Yizilayɛma zunle ye wɔ Mowabe fienemgbole ne anu kenle abulasa.

⁹Akee Nɛn ara Dwɔhyua nrɛlɛbɛ ne yɛle kpole, ɔluakɛ ɛnee Mosisi ɛva ɔ sa ɛgua ɔ ti zo. Yemɔti Yizilayɛma diele ye na bɛlile mɛla mɔɔ Ɛdɛnkɛma vale manle Mosisi la azo.

¹⁰ Na sumunli kɛ de la Nyamenle kpɔmanvolɛ biala ɛtɛfindele Yizilayɛ mɔɔ le kɛ Mosisi, mɔɔ ɛnwu Ɛdɛnkɛma anyunlu a.

¹¹Bie ɛnle ɛkɛ mɔɔ Ɛdɛnkɛma ɛzoa ye ɛmaa yeyɛ nwanwane ninyɛne, kɛmɔ Mosisi yɛle wɔ Yigyibiti azɛlɛ zo hilele Yigyibiti belemgbunli ne, ye azɛlɛ, nee ye menli ne la.

¹²Nyamenle kpɔmanvolɛ biala ɛtɛfindele mɔɔ Ɛdɛnkɛma ɛmaa yeyɛ nwanwane ninyɛne ɛzulolɛ mgbole ɛhile Yizilayɛma ɛdɛla mɔɔ Mosisi yɛle la a.