Read Nzema Mɛla 4 Bible Online

Mɛla 4 - Nzema bible

Mɛla 4

¹Na Mosisi zele menli ne kɛ, “Yizilayɛma, kɛkala, akee bɛdie mɛla nee ngyehyɛlɛ mɔɔ melɛkilehile bɛ la na bɛli zolɛ, amaa bɛanyi bɛahyɛ na bɛahɔva azɛlɛ ne mɔɔ Ɛdɛnkɛma, bɛ ze mɔ Nyamenle ne ɛlɛfa amaa bɛ la.

² Bɛmmafa edwɛkɛ kpɔkɛ ko bɔbɔ bɛboka mɔɔ melɛfa meamaa bɛ la anwo, yɛɛ bɛmmaye bie bɛfi nu, amaa bɛahola bɛali Ɛdɛnkɛma bɛ Nyamenle ne mɛla ne mɔ mɔɔ melɛfa meamaa bɛ la azo.

³Bɛ nye ɛnwu mɔɔ Ɛdɛnkɛma yɛle wɔ Beeyale Piyɔ Boka la. Ɛdɛnkɛma bɛ Nyamenle ne zɛkyele bɛdabɛ mɔɔ ɛnee bɛsonle Beeyale ne mɔɔ wɔ Piyɔ la.

⁴Bɛdabɛ noko mɔɔ bɛhɔle zo bɛzonlenle Ɛdɛnkɛma bɛ Nyamenle ne nɔhalɛ nu la tɛte aze kɛkala.

⁵“Bɛnlea, mehilehile bɛ mɛla nee ngyehyɛlɛ ne mɔ, kɛmɔ Ɛdɛnkɛma me Nyamenle ne vale manle me la, amaa bɛayɛ ye zɔhane wɔ azɛlɛ ne mɔɔ bɛlɛkɔ bɛahɔva bɛayɛ bɛ ɛdeɛ la azo.

⁶Bɛva bɛzie na bɛli zolɛ, ɔluakɛ yemɔ yɛɛ ɔbahile bɛ nrɛlɛbɛ nee ndelebɛbo mɔɔ bɛlɛ ye wɔ menli ne anyunlu a. Ɔboalekɛ saa bɛte mɛla ɛhye mɔ amuala a, bɛbaha kɛ, ‘Amgba, maanle kpole ɛhye anu amra ze nrɛlɛbɛ, bɛlɛ ndelebɛbo.’

⁷“Maanle biala ɛnle ɛkɛ mɔɔ lɛ nyamenle mɔɔ bikye ye menli ne kɛ Ɛdɛnkɛma yɛ Nyamenle ne si bikye yɛ la. Mekɛ biala yɛfɛlɛ ye a ɔdie yɛ zo.

⁸Eza maanle kpole biala ɛnle ɛkɛ mɔɔ lɛ mɛla nee amaamuo mɔɔ tenrɛ kɛ mɛla ɛhye mɔ mɔɔ melɛfa meamaa bɛ ɛnɛ la.

⁹Bɛnlea boɛ na bɛzie bɛ adwenle koonwu, amaa bɛ rɛle anvi ninyɛne mɔɔ bɛdabɛ bɛnwu ye bɛ nye zo la. Bɛmmamaa bɛ rɛle fi ye ɛlɛ wɔ mekɛ mɔɔ bɛde ngoane nu la. Bɛhilehile bɛ mra nee bɛ nlɔnra

¹⁰ninyɛne mɔɔ sisile mekɛ ne anu wɔ mekɛ mɔɔ ɛnee bɛgyi Ɛdɛnkɛma bɛ Nyamenle ne anyunlu wɔ Saenae Boka la. Ɛdɛnkɛma zele me kɛ, ‘Boɔboa menli ne anloa ɛ nee bɛ ɛvinde me nyunlu, amaa bɛade me nloa anu edwɛkɛ, na bɛabɔ ɔ bo kɛ bɛsulo me wɔ mekɛ mɔɔ bɛde ewiade ye anu la na eza bɛahilehile bɛ mra noko.’

¹¹“Bɛrale na bɛradwule boka ne abo la, bɛnwunle kɛ boka ne ɛlɛsɔ kɛ senle na yedwazo bolonwonwo yehɔ Nyamenle ne ako abo lɔ, na awozinli, amungu, nee esike ɛva ɛleka ne amuala.

¹²Na Ɛdɛnkɛma luale senle ne anu dendɛle hilele bɛ. Bɛdele edwɛkɛ ne, noko bɛannwu ɛhwee. Ɛnelɛ ne ala a bɛdele a.

¹³Ɔhanle ye ngyehyɛlɛ ne amuala nee mɛla mɔɔ ɔwɔ kɛ bɛdi zolɛ la ɔhilele bɛ. Ɔhɛlɛle mɛla ne mɔ wɔ awolɛ ndɛbandɛba nwiɔ azo na ɔzele bɛ kɛ bɛli zolɛ. Edwɛkɛ mɔɔ ɔhanle la a le Mɛla Bulu ne.

¹⁴Na Ɛdɛnkɛma zele me kɛ mengilehile bɛ ye mɛla ne nee ngyehyɛlɛ ne mɔ, amaa bɛali zolɛ wɔ azɛlɛ ne mɔɔ bɛlɛkɔ bɛahɔva la azo.

¹⁵“Mekɛ mɔɔ Ɛdɛnkɛma tendɛ ahile bɛ wɔ Saenae Boka la, bɛannwu debie biala wɔ senle ne anu. Zɔhane ati bɛnlea bɛ nwo boɛ

¹⁶na bɛanyɛ ananze bɛammaa yeanzɔho debie biala, amaa bɛanyɛ ɛtane. Bɛmmayɛ debie mɔɔ le kɛ raalɛ anzɛɛ nrenya.

¹⁷Bɛmmayɛ debie bɛmaa ɔsɔho azɛlɛ ye azo nane biala, nloma mɔɔ lɛ ndɛbalɛ tu duolua anwomanyunlu,

¹⁸debie biala mɔɔ twenle ɔ kɛnra aze anzɛɛ fɛlɛ mɔɔ wɔ azule nu la.

¹⁹Eza bɛnlea boɛ, amaa saa bɛmaa bɛ nye zo anwuma na bɛnwu sɛnzɛne ne, siane ne, nee nwɔlɔra ne mɔ nee ninyɛne mɔɔ wɔ anwomanyunlu la a, bɛangakyi bɛangɔnzonle bɛ. Bɛle ninyɛne mɔɔ Ɛdɛnkɛma bɛ Nyamenle ne ɛva ɛziezie ɛkɛ ne wɔ menli mɔɔ wɔ aleɛabo la ati.

²⁰Na bɛmɛ, Ɛdɛnkɛma ɛva bɛ na yeye bɛ yevi Yigyibiti bulalɛ fonlomo gɔhyee ne anu kɛ bɛrayɛ ɔdaye ye menli, kɛmɔ bɛde ɛnɛ la.

²¹Akee bɛmɛ bɛ ti Ɛdɛnkɛma ɛva me nwo ɛya na yeha ndane kɛ me gyakɛ ba ɛnrɛtia Azule Dwɔdan ne anzi lɔ na yeayɛ azɛlɛ kɛnlɛma ne mɔɔ Ɛdɛnkɛma bɛ Nyamenle ne ɛlɛfa amaa bɛayɛ bɛ ɛdeɛ la azo.

²²Ɔnle kɛ mepɛ mekɔ Dwɔdan ne anzi lɔ. Ɔwɔ kɛ mewu azɛlɛ ɛhye azo, na bɛmɛ, bɛbapɛ na bɛahɔva azɛlɛ kpalɛ ne.

²³Bɛnlea bɛ nwo boɛ na bɛ rɛle anvi ngyekyeleɛ ne mɔɔ Ɛdɛnkɛma bɛ Nyamenle ne nee bɛ yɛle la. Bɛmmayɛ debie biala ananze, kɛmɔ Ɛdɛnkɛma bɛ Nyamenle ne ɛdua bɛ la.

²⁴ Ɔluakɛ Ɛdɛnkɛma bɛ Nyamenle ne le sendɔlɔra. Ɔle Nyamenle mɔɔ twe nungule.

²⁵“Saa bɛwo bɛ mra na bɛ mra wo mralɛ, na bɛwie mgbanyinli yɛ wɔ azɛlɛ ne azo, na saa bɛyɛ anzosesebɛ, bɛgua debie biala ananze bɛmaa bɛ nwo, na bɛyɛ ɛtane bɛtia Ɛdɛnkɛma bɛ Nyamenle ne, bɛfa bɛka ye ɛya a,

²⁶meka anwuma nee aze ɛnɛ kenle ye kɛ, ɔnrɛhyɛ biala na bɛ bo zo abɔ bɔkɔɔ wɔ azɛlɛ ne mɔɔ bɛlɛpɛ Azule Dwɔdan ne bɛahɔva bɛayɛ bɛ ɛdeɛ la azo, bɛnrɛhyɛ zolɛ fee.

²⁷Na Ɛdɛnkɛma bakponde bɛ wɔ maanle maanle ne mɔ avinli. Maanle biala noko mɔɔ Ɛdɛnkɛma kɛhɔgua bɛ nu la, bɛ nwo ɛnrɛzo, bɛbaha ekyi,

²⁸na bɛazonle mbaka nee awolɛ, mɔɔ le menli asa anloa gyima mɔɔ bɛnnwu debie, bɛnde edwɛkɛ, bɛnli aleɛ, yɛɛ bɛnde nvoanle la kɛ bɛ nyamenle.

²⁹Na ɛkɛ ne yɛɛ akee bɛbakpondɛ Ɛdɛnkɛma bɛ Nyamenle ne a. Na saa bɛfa bɛ ahonle kpokpoti nee bɛ ɛkɛla kpokpoti bɛkpondɛ ye ɛdeɛ a, yemɔ bɛbanwu ye.

³⁰Saa ngyegyelɛ kpole bie ba bɛ nwo zo, na ɛhye mɔ sisi bɛ nwo zo a, bɛzia bɛdoa Ɛdɛnkɛma bɛ Nyamenle ne, na bɛdie ɔ ne,

³¹ɔluakɛ Ɛdɛnkɛma bɛ Nyamenle ne le Nyamenle mɔɔ se anwunvɔne a. Ɔnrɛye bɛ anrinli ɔnrɛdo bɛ sa nu, ɔnrɛzɛkye bɛ, yɛɛ ɔ rɛle ɛnrɛvi ngyekyeleɛ ne mɔɔ ɔ nee bɛ ze mɔ yɛle na ɔhanle ndane ɔdole zolɛ la.

³²“Akee bɛbizebiza bɛnwu mekɛ mɔɔ ɛraze ɛhɔ la anu edwɛkɛ, ɔvi mekɛ mɔɔ Nyamenle bɔle ewiade na ɔbɔle sonla ɔdole nu la toonwo bɛradwu mekɛ mɔɔ bɛwole bɛ la; bɛbiza bɛhɔ ewiade ye ati nee ɔ bo na bɛdie saa debie kpole mɔɔ le zɛhae la bie ɛzi ɛlɛ anzɛɛ saa bɛde bie anwo edwɛkɛ ɛlɛ a.

³³Bɛbiza bɛnwu ye saa menli bie wɔ ɛkɛ, mɔɔ bɛde ye ɛlɛ kɛ nyamenle bie ɛlɛtendɛ ahile bɛ wɔ sendɔlɔra nu na bɛtɛte aze, kɛmɔ bɛmɛ bɛde na bɛtɛte aze la a.

³⁴Anzɛɛ saa nyamenle bie wɔ ɛkɛ ne, mɔɔ ɔdaye yezi ɔ kɛnra na yeyɛ kɛ ɔkava maanle bie wɔ maanle bie avinli yeayɛ ye ɔdaye ye maanle, na yeva ngyegyelɛ sɛkɛlɛneɛ, nwanwane nyɛleɛ, konle nee tumi kpole nee ɛzulolɛ yeyɛ, kɛmɔ Ɛdɛnkɛma bɛ Nyamenle yɛle wɔ Yigyibiti manle bɛdabɛ bɛnwunle ye la a.

³⁵ Bɛyɛle ɛhye bɛmanle bɛnwunle ye, amaa bɛanwu kɛ Ɛdɛnkɛma a le Nyamenle a; nyamenle bieko ɛnle ɛkɛ.

³⁶Ɔmaa bɛte ɔ ne wɔ anwuma lɔ, amaa yeadu bɛ folɛ, yɛɛ bɛte ɔ ne wɔ aze ɛke, amaa bɛanwu ye senle kpole ne na bɛade ye edwɛkɛ ne mɔɔ vi senle ne anu ba la.

³⁷Kɛmɔ ɔhulole bɛ ze mɔ na ɔkpale nu ɔyele bɛ nee bɛ bo zo amra la ati, ɔyele ɔ nyunlu ɔvale tumi kpole ɔyele bɛ ɔvile Yigyibiti.

³⁸Na ɔvoanle maanle maanle mɔɔ le mgbole, bɛ nwo yɛ se tɛla bɛ la ɔvile bɛ nye zo na ɔ nee bɛ ɛra kɛ ɔbava bɛ azɛlɛ ne yeamaa bɛava bɛayɛ bɛ ɛdeɛ, kɛmɔ kɛkala ɔde la.

³⁹Zɔhane ati bɛnwu ye ɛnɛ na bɛva bɛzie bɛ ti anu kɛ Ɛdɛnkɛma a le Nyamenle wɔ anwuma nee azɛlɛ ti anu a; nyamenle bieko ɛnle ɛkɛ.

⁴⁰Yemɔti bɛli ye mɛla nee ye ngyehyɛlɛ ne mɔ mɔɔ melɛfa meamaa bɛ ɛnɛ la azo, amaa yeayɛ kpalɛ yeamaa bɛ nee bɛ bo zo amra mɔɔ bara la. Bɛyɛ ye zɔhane a, bɛbanyi bɛahyɛ wɔ azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ bɔkɔɔ la azo.”

⁴¹ Akee Mosisi yele azuamgbole nsa wɔ Dwɔdan Aduduleɛ, kɛ

⁴²ɛkɛ ne mɔ yɛɛ awie mɔɔ anye ɛnla nwo, na ɔkɛhu sonla mɔɔ ɔ nee ye ɛnlɛ bie dɛba la, ɔwɔ kɛ nriandi kɔfea a, amaa yeanyia ɔ ti.

⁴³Azuamgbole ne mɔ a lɛ Bizɛ mɔɔ wɔ fienemgbole ne anu azɛlɛ sɛsɛ ne azo la; ɛke a Wulubɛnema bie mɔɔ ɛnzuzu na ɔkɛhu sonla la nriandi kɔfea a. Gaadema suakpole ɛvealeka a le Releemo mɔɔ wɔ Geleade la, yɛɛ Manasɛma suakpole ɛvealeka a le Golan mɔɔ wɔ Beehyan la.

⁴⁴Mosisi akee vale Nyamenle Mɛla ne mɔ manle Yizilayɛma.

⁴⁵Mɛla nee ngyehyɛlɛ mɔɔ Mosisi vale manle Yizilayɛma la ɛne. Mekɛ mɔɔ bɛvile Yigyibiti na bɛwɔ Azule Dwɔdan ne aduduleɛ bɔnza ne anu, mɔɔ ɛnee bɛ nee Bɛtepiyɔ sua zo anye bɔ zolɛ la yɛɛ ɔvale mɛla ɛhye mɔ ɔmanle bɛ a. Mekɛ ne anu ɛnee bɛwɔ Amɔle Belemgbunli Saehɔn mɔɔ ɛnee sie Hɛhyebɔn la maanle nu. Mosisi nee ye ɛlɔnema ne lile ɔ nwo zo konim wɔ mekɛ mɔɔ bɛvi Yigyibiti bɛrale la.

⁴⁶

⁴⁷Na bɛvale azɛlɛ ne nee Beehyan Belemgbunli Ɔɔgo azɛlɛ ne amuala. Bɛle Amɔle arelemgbunli nwiɔ mɔɔ ɛnee wɔ Dwɔdan Aduduleɛ a.

⁴⁸Bɛ azɛlɛ ne mɔ tɛlɛ vi Alowɛ mɔɔ wɔ Azule Anɔn bɔnza ne anloa la toonwo ɔkɔdwu Sayɔn Boka (eza bɛfɛlɛ ye Hɛmɔn Boka).

⁴⁹Azɛlɛ tɛtɛtɛlɛlɛ ne mɔɔ la Azule Dwɔdan ne aduduleɛ afoa nu toonwo mɔɔ kɔ ye ɛbɔ nu kɔdwu Nyevile Wulera ne anloa nee Pesega Boka ne abo aduduleɛ afoa nu la amuala boka nwolɛ.