Read Nzema Mɛla 5 Bible Online

Mɛla 5 - Nzema bible

Mɛla 5

¹Mosisi manle Yizilayɛma amuala rayiale na ɔzele bɛ kɛ, “Yizilayɛma, bɛdie mɛla nee ngyehyɛlɛ ne mɔ mɔɔ meka meahile bɛ ɛnɛ kenle ye la. Bɛzukoa na bɛli bɛ muala azo boɛ.

²Ɛdɛnkɛma yɛ Nyamenle ne nee yɛ yɛle ngyekyeleɛ wɔ Saenae Boka.

³Ngyekyeleɛ ɛhye, tɛ yɛ ze mɔ yɛɛ Ɛdɛnkɛma nee bɛ kyekyele a. Yɛdayɛ mɔɔ kɛkala yɛtɛte aze la, yɛmɛ yɛɛ ɔ nee yɛ kyekyele a.

⁴Ɛdɛnkɛma dendɛle hilele bɛ wɔ boka ne azo, wɔ mekɛ mɔɔ ɛnee ɔwɔ senle ne anu la, bɛ muala bɛ nye zo ɔ.

⁵Mekɛ ne anu mengyinlanle bɛ nee Ɛdɛnkɛma avinli kɛ meka Ɛdɛnkɛma anloa edwɛkɛ ne meahile bɛ. Ɔluakɛ senle ne ati ɛnee bɛsulo, yemɔti bɛangola boka ne azo lɔ kɔ. “Ɛdɛnkɛma zele kɛ,

⁶‘Mame a mele Ɛdɛnkɛma bɛ Nyamenle ne mɔɔ yele bɛ vile akɛlɛzonlenlɛ nu wɔ Yigyibiti azɛlɛ zo rale la.

⁷“ ‘Bɛmmanyia nyamenle biala kɛ medame me ngome ala.

⁸“ ‘Bɛmmayɛ ananze biala bɛmaa bɛ nwo. Bɛmmayɛ debie biala mɔɔ wɔ anwomanyunlu anzɛɛ azɛlɛ ti anu anzɛɛ mɔɔ wɔ nzule mɔɔ wɔ azɛlɛ ye abo la anu ananze.

⁹Bɛmmabɔ bɛ ti aze bɛmaa bɛ anzɛɛ bɛsonle bɛ, ɔluakɛ medame Ɛdɛnkɛma bɛ Nyamenle, mele Nyamenle mɔɔ twe nungule a, na mefa selɛma mɔɔ kyi me la amumuyɛ nwo ndeanlɛ metea bɛ mra kɔdwu awolɛndoazo nsa nee nna ne azo,

¹⁰na mekile me ɛhulolɛ kpundii ne wɔ apenle apenle mɔɔ kulo me na bɛdi me mɛla ne mɔ azo la anwo zo.

¹¹“ ‘Bɛmmabɔ Ɛdɛnkɛma bɛ Nyamenle ne duma mgbane mgbane, ɔluakɛ medame, Ɛdɛnkɛma, menrɛmaa mɔɔ bɔ me duma mgbane mgbane la ɛnrɛva ɔ nwo dwɔɔ.

¹²“ ‘Bɛzie Ɛnwomenlelielɛ Kenle ne nwuanzanwuanza, kɛmɔ medame, Ɛdɛnkɛma bɛ Nyamenle meha mehile bɛ la.

¹³ Bɛva kenle nsia bɛyɛ gyima, na bɛyɛ bɛ gyima biala.

¹⁴Kenle ne mɔɔ tɔ zolɛ nsuu la le ɛnwomenlelielɛ maa medame, Ɛdɛnkɛma bɛ Nyamenle. Bɛmmayɛ gyima biala wɔ kenle ne anu; ɛdawɔ o, ɛ ra nrenya o, ɛ ra raalɛ o, wɔ sonvolɛ nrenya anzɛɛ raalɛ o, wɔ ɛkpɔnwɔ o, asoaso o, anzɛɛ wɔ nlankɛ ne mɔ anu biala, yɛɛ wɔ ɛyɛvolɛ mɔɔ ɛrazokoɛ wɔ la, amaa wɔ sonvolɛ mrenya nee mraalɛ noko nee wɔ alie bɛ ɛnwomenle.

¹⁵Bɛhakye kɛ ɛnee bɛle ahanra wɔ Yigyibiti, yɛɛ medame, Ɛdɛnkɛma bɛ Nyamenle menvale tumi kpole menyele bɛ menvile ɛkɛ a. Zɔhane ati medame, Ɛdɛnkɛma bɛ Nyamenle mehyehyɛ kɛ ɔwɔ kɛ bɛsie Ɛnwomenlelielɛ Kenle ne.

¹⁶ “ ‘Bɛli bɛ ze nee bɛ nli eni, kɛmɔ Ɛdɛnkɛma bɛ Nyamenle zele bɛ la, amaa bɛ mekɛ mɔɔ bɛbali la awa na yeayɛ boɛ yeamaa bɛ wɔ azɛlɛ ne mɔɔ medame, Ɛdɛnkɛma bɛ Nyamenle mebava meamaa bɛ la azo.

¹⁷ “ ‘Bɛmmaku sonla.

¹⁸ “ ‘Bɛmmafa awie aye anzɛɛ awie ɔ hu.[2]

¹⁹“ ‘Bɛmmawua.

²⁰“ ‘Bɛmmadi dasewia

²¹“ ‘Bɛmmamaa bɛ nye bolo bɛ gɔnwo aye anzɛɛ ye sua, ye ɛya, ye sonvolɛ nrenya anzɛɛ raalɛ, ye ɛnlankɛ, ye asoaso, anzɛɛ debie biala mɔɔ le bɛ gɔnwo ɛdeɛ la.’

²² “Mɛla mɔɔ Ɛdɛnkɛma vale manle bɛ muala wɔ mekɛ mɔɔ bɛyiale boka ne azo, wɔ senle, amungu, nee awozinli kabii ne anu la ɛne. Ɔvale ɛnelɛ kpole a ɔdendɛle a; yeanva debie biala yeamboka nwolɛ. Ɔhɛlɛle bɛ muala wɔ awolɛ ndɛbandɛba nwiɔ azo na ɔvale ɔmanle me.

²³“Mekɛ mɔɔ ɛnee boka ne azo amuala ɛlɛsɔ na bɛdele ɛnelɛ ne wɔ awozinli ne anu la, bɛ muala, bɛ mbusua ekpunli ekpunli ne mɔ mgbanyinli nee bɛ mgbanyima bikyele me,

²⁴na bɛzele kɛ, ‘Nea, Ɛdɛnkɛma yɛ Nyamenle ne ɛhile ye anyunlunyia nee ye kpoleyɛlɛ ne yɛɛ yɛde ɔ ne wɔ senle ne anu. Ɛnɛ kenle ye yɛnwu kɛ Nyamenle nee sonla ɛdendɛ na sonla tɛte ngoane nu.

²⁵Saa ye zɔhane a ɛnee duzu ati yɛɛ yɛkɛhwe ewule yɛkɛmaa yɛ nwo a? Saa yɛtɛnla ɛke kɛ yɛtie Ɛdɛnkɛma yɛ Nyamenle ne ane bieko a, senle kpole ɛhye barava yɛ ahu yɛ.

²⁶Ɔluakɛ dasanli boni yɛɛ ɛde Nyamenle ane kɛ ɔlɛtendɛ yeavi senle nu na ɔtɛte ngoane nu kɛ yɛdayɛ a?

²⁷Bikye ye na tie mɔɔ Ɛdɛnkɛma yɛ Nyamenle ne kɛha kɛhile wɔ la na baha kile yɛ, na yɛkɛdie na yɛkɛyɛ.’

²⁸“Ɛdɛnkɛma dele bɛ edwɛkɛ ne mɔɔ bɛhanle bɛhilele me la na ɔzele me kɛ, ‘Mede menli ɛhye mɔ edwɛkɛ ne mɔɔ bɛha bɛhile wɔ la. Bɛha nɔhalɛ bɔkɔɔ wɔ mɔɔ bɛnwu ye la anwo.

²⁹Anrɛɛ bɛanyia adwenle mɔɔ le zɛhae la dahuu, kɛ bɛkɛzulo me na bɛkɛli me mɛla ne mɔ azo, amaa yeayɛ boɛ yeamaa bɛ nee bɛ mra dahuu.

³⁰Kɔ na kɔze bɛ kɛ bɛzia bɛhɔ bɛ ndanlɛ azua ne mɔ anu.

³¹Na wɔmɔ, gyinla me nwo ɛke na mebaha mɛla nee ngyehyɛlɛ ne mɔ mɔɔ ɛbava wɔahilehile bɛ la meahile wɔ, amaa bɛali zolɛ wɔ azɛlɛ ne mɔɔ mebava meamaa bɛayɛ bɛ ɛdeɛ la azo.’

³²“Zɔhane ati bɛnlea boɛ na bɛyɛ kɛmɔ Ɛdɛnkɛma bɛ Nyamenle ne ɛze bɛ la, bɛmmakɔ fema zo anzɛɛ bɛne zo.

³³Bɛlua adenle mɔɔ Ɛdɛnkɛma bɛ Nyamenle ne ɛze bɛ la azo, amaa bɛanyia ngoane, na yeayɛ boɛ yeamaa bɛ, na bɛanyi bɛahyɛ wɔ azɛlɛ ne mɔɔ bɛbahɔva bɛayɛ bɛ ɛdeɛ la azo.