Read Nzema Mɛla 6 Bible Online

Mɛla 6 - Nzema bible

Mɛla 6

¹“Akee mɛla ne mɔ nee ngyehyɛlɛ mɔɔ Ɛdɛnkɛma vale manle me kɛ mengilehile bɛ, na bɛli zolɛ wɔ azɛlɛ ne mɔɔ bɛlɛpɛ azule ne bɛahɔva bɛayɛ bɛ ɛdeɛ la azo la ɛne,

²amaa bɛazulo Ɛdɛnkɛma bɛ Nyamenle ne, na bɛ mra nee bɛ mra amra ali zolɛ. Bɛli mɛla ne mɔ azo wɔ mekɛ mɔɔ bɛde ngoane nu la amuala na bɛ mekɛ awa.

³Zɔhane ati, Yizilayɛma, bɛnlea boɛ na bɛli mɛla ne mɔ azo, amaa yeayɛ boɛ yeamaa bɛ wɔ azɛlɛ ne mɔɔ kye aleɛ la azo, na bɛ nwo azo dɔɔnwo, kɛmɔ Ɛdɛnkɛma, bɛ ze mɔ Nyamenle ne vale bɔle bɛ ɛwɔkɛ la.

⁴“Yizilayɛma, bɛdie, Ɛdɛnkɛma yɛ Nyamenle ne le Ɛdɛnkɛma kokye ala.[3]

⁵ Bɛva bɛ ahonle muala, bɛ ɛkɛla muala, nee bɛ anwosesebɛ muala bɛhulo Ɛdɛnkɛma bɛ Nyamenle ne.

⁶ Bɛmaa mɛla ɛhye mɔɔ melɛfa meamaa bɛ la ɛdɛnla bɛ ahonle nu,

⁷na bɛva bɛhilehile bɛ mra kpalɛ kpalɛ. Bɛwɔ bɛ awuke ne mɔ anu a, bɛdwenledwenle nwolɛ, yɛɛ saa bɛlua adenle zo o, bɛla o, bɛdwazo o, bɛyɛ ye zɔhane.

⁸Bɛhɛlɛ ye debie zo bɛbobɔ bɛ sa, bɛva bɛhendɛhenda bɛ ndo avinli,

⁹na bɛhɛlɛ ye wɔ bɛ nlenkɛ nee nlenkɛ mgbole ne mɔ felɛmo ne mɔ anwo.

¹⁰“Kɛmɔ Ɛdɛnkɛma bɛ Nyamenle ne vale bɔle bɛ ze mɔ, Ebileham, Ayezeke, nee Gyekɔbo ɛwɔkɛ la, ɔ nee bɛ badwu azɛlɛ ne mɔɔ azuamgbole ngɛnlɛma mɔɔ tɛ bɛmɛ a bɛkyekyele la wɔ zo la azo.

¹¹Awuke mgbole mɔɔ nuhua le ninyɛne kpalɛ ngome mɔɔ tɛ bɛmɛ a bɛvale bɛzieziele nuhua, bula mɔɔ tɛ bɛmɛ a bɛbɔle, nee vanye tola nee ɔlivi mbaka egyinli mɔɔ tɛ bɛmɛ a bɛluale la wɔ ɛkɛ. Na saa bɛdwu azɛlɛ ne azo na bɛnyia ye bɛdi, bɛ ko yi a,

¹²anrɛɛ bɛnlea boɛ na bɛ rɛle anvi Ɛdɛnkɛma mɔɔ yele bɛ vile Yigyibiti akɛlɛzonlenlɛ nu rale la.

¹³ Bɛzulo Ɛdɛnkɛma bɛ Nyamenle ne, bɛzonle ye, na bɛva ye duma bɛha ndane.

¹⁴Bɛmmakɔdi awozonle nzi na bɛsonle menli mɔɔ ɛbɔ ɛyia bɛ la nyamenle ne mɔ,

¹⁵ɔluakɛ Ɛdɛnkɛma bɛ Nyamenle ne mɔɔ wɔ bɛ avinli la le Nyamenle mɔɔ twe nungule a. Saa bɛyɛ ye zɔhane a, Ɛdɛnkɛma bɛ Nyamenle ne bava bɛ nwo ɛya na yeazɛkye bɛ, yeaminli bɛ bo zo bɔkɔɔ wɔ azɛlɛ ye azo.

¹⁶ “Bɛmmasɔ Ɛdɛnkɛma bɛ Nyamenle ne bɛnea, kɛmɔ bɛzɔle ye bɛnleanle wɔ Masa la.

¹⁷Bɛli Ɛdɛnkɛma bɛ Nyamenle ne mɛla ne nee ye ngyehyɛlɛ ne mɔ mɔɔ yeva yemaa bɛ la azo kpalɛ kpalɛ.

¹⁸Bɛli boɛ na bɛyɛ mɔɔ sɔ Ɛdɛnkɛma anye la, amaa bɛakpazi na bɛahola bɛahɔva azɛlɛ kpalɛ ne mɔɔ Ɛdɛnkɛma vale bɔle bɛ ze mɔ ɛwɔkɛ la bɛayɛ bɛ ɛdeɛ,

¹⁹na bɛavoa bɛ kpɔvolɛma ne mɔ amuala bɛagua ɛbɔ nu, kɛmɔ Ɛdɛnkɛma ɛwɔkɛ ne mɔɔ ɔbɔle la se la.

²⁰“Saa kenle bie bɛ mra biza bɛ kɛ, ‘Mɛla nee ngyehyɛlɛ ɛhye mɔ mɔɔ Ɛdɛnkɛma yɛ Nyamenle ne vale manle bɛ la abo a le duzu?’ a,

²¹bɛha bɛhile bɛ mra ne mɔ kɛ, ‘Anrɛɛ yɛle Yigyibiti belemgbunli ne ahanra, na Ɛdɛnkɛma vale tumi kpole rayele yɛ vile Yigyibiti.

²²Ɛdɛnkɛma yɛle nwanwane ninyɛne nee sɛkɛlɛneɛ mgbole mɔɔ yɛ ɛzulolɛ la tiale Yigyibiti maanle ne nee ye belemgbunli ne nee ye sua nu amra mɔɔ yɛdayɛ yɛ nye nwunle bɛ a.

²³Ɔyele yɛ ɔvile ɛkɛ ne kɛ ɔ nee yɛ ba na yeava azɛlɛ ne mɔɔ ɔvale ɔbɔle yɛ ze mɔ ɛwɔkɛ la yeamaa yɛ.

²⁴Na Ɛdɛnkɛma vale mɛla nee ngyehyɛlɛ ɛhye mɔ manle yɛ kɛ yɛli zolɛ, yɛzulo Ɛdɛnkɛma yɛ Nyamenle ne dahuu wɔ yɛdayɛ yɛ kpalɛyɛlɛ ti, amaa yeazinza yɛ yeamaa yɛ ngoane, kɛmɔ ɛnɛ ɔde la.

²⁵Na saa yɛnea boɛ na yɛdi ye mɛla ne azo nɔhalɛ nu, kɛmɔ ɔdaye Ɛdɛnkɛma yɛ Nyamenle ne yeze yɛ la a, yɛbazɔ ɔ nye.’