Read Nzema Mɛla 7 Bible Online

Mɛla 7 - Nzema bible

Mɛla 7

¹ “Ɛdɛnkɛma bɛ Nyamenle ne bava bɛ adwu azɛlɛ ne mɔɔ bɛlɛkɔ bɛahɔva bɛayɛ bɛ ɛdeɛ la azo, na yeavoa maanle maanle dɔɔnwo yeamaa bɛ. Ɔbavoa maanle mgbole nsuu mɔɔ anwo yɛ se tɛla bɛ la yeavi bɛ nye zo. Maanle ne mɔ a lɛ Hɛtema, Gɛgahyema, Amɔlema, Keenama, Pɛlɛzema, Haevaema, yɛɛ Gyibɛsema.

²Saa Ɛdɛnkɛma bɛ Nyamenle ne ye menli ɛhye mɔ maa bɛ na bɛdi bɛ nwo zo konim a, anrɛɛ bɛzɛkye bɛ bɔkɔɔ. Bɛ nee bɛ mmayɛ ngyekyeleɛ biala, yɛɛ bɛmmase bɛ anwunvɔne.

³Bɛmmagya bɛ bie, bɛmmafa bɛ mra mraalɛ bɛmaa menli zɔhane amra mrenya gya bɛ, yɛɛ bɛmmagya menli zɔhane amra mraalɛ bɛmaa bɛ mra mrenya.

⁴Saa bɛyɛ ye zɔhane a bɛbahakyi bɛ mra mrenya ne mɔ, bɛnrɛli Ɛdɛnkɛma anzi bieko, na bɛbahɔzonle awozonle. Ɔba ye zɛhae a, Ɛdɛnkɛma bava bɛ nwo ɛya na yeazɛkye bɛ muala ndɛndɛ.

⁵ Kɛ ɔwɔ kɛ bɛyɛ bɛ la ɛne: bɛbubu bɛ azukponle ne mɔ bɛgua, na bɛbubu bɛ mpila sɛkɛlɛneɛ ne mɔ, bɛpepɛ bɛ bozonle raalɛ Ahyela ne sɛkɛlɛneɛ mbaka ne mɔ bɛgua, na bɛyela ananze ne mɔ mɔɔ bɛbubu bɛgua la.

⁶ Ɔluakɛ bɛmɛ, bɛle menli mɔɔ Ɛdɛnkɛma bɛ Nyamenle ne ɛde bɛ nwo a. Ɛdɛnkɛma bɛ Nyamenle ne ɛkpa nu ɛye bɛ ɛvi menli mɔɔ wɔ ewiade la amuala anu, kɛ ye menli a le bɛ.

⁷“Tɛ kɛ asɛɛ bɛ nwo zonle tɛla maanle maanle kɔsɔɔti la ati yɛɛ Ɛdɛnkɛma hulole bɛ na ɔkpale nu ɔyele bɛ a, ɔluakɛ wɔ maanle maanle kɔsɔɔti anu, bɛmɛ bɔbɔ yɛɛ bɛ nwo anzo fee a.

⁸Ɛdɛnkɛma kulo bɛ, ɔboalekɛ ɔlɛdi ye ndane ne mɔɔ ɔhanle ɔhilele bɛ ze mɔ la azo, na yemɔti yɛɛ yeva tumi kpole yeye bɛ yevi akɛlɛzonlenlɛ nu wɔ Yigyibiti belemgbunli ne asa anu a.

⁹Bɛnwu ye kɛ Ɛdɛnkɛma bɛ Nyamenle ne le Nyamenle, nɔhalɛ Nyamenle ne mɔɔ sie ye ngyekyeleɛ, na ɔkulo bɛdabɛ mɔɔ bɛkulo ye na bɛdi ye mɛla zo la, kɔdwu awolɛndoazo apenle nwo zo,

¹⁰na ɔtea bɛdabɛ mɔɔ bɛkyi ye la, ɔbɔ bɛ bo zo bɔkɔɔ. Awie biala mɔɔ kyi ye la ɔnrɛva ɔnrɛhyɛ ye, ɔbadea ye kpalɛ.

¹¹Yemɔti bɛnlea boɛ na bɛli ye mɛla nee ye ngyehyɛlɛ ne mɔ mɔɔ melɛfa meamaa bɛ ɛnɛ la azo.

¹²“Saa bɛtie mɛla nee ngyehyɛlɛ ɛhye mɔ, bɛfa bɛsie na bɛdi zolɛ a, Ɛdɛnkɛma bɛ Nyamenle ne bali ye ngyekyeleɛ ne azo na yeahulo bɛ kpalɛ, kɛmɔ ɔvale ɔbɔle bɛ ze mɔ ɛwɔkɛ kɛ ɔkɛyɛ la.

¹³Ɔbahulo bɛ, yeayila bɛ, na yeamaa bɛ nwo azo. Eza ɔbayila bɛ kunlu mralɛ na yeayila bɛ azɛlɛ ne, amaa bɛanyia abɛlɛ, nwanye, nee nwole dɔɔnwo; bɛ nlankɛ nwo bazo na bɛanyia mboane mralɛ dɔɔnwo wɔ azɛlɛ ne mɔɔ ɔvale ɔbɔle bɛ ze mɔ ɛwɔkɛ la azo.

¹⁴Bɛbanyia nyilalɛ dɔɔnwo bɛadɛla maanle biala anu amra. Bɛ nrenya anzɛɛ raalɛ anzɛɛ ɛnlankɛ ɛnrɛyɛ mota.

¹⁵Ɛdɛnkɛma baye bɛ nwo ewule kɔsɔɔti ahɔ, Yigyibiti ewule ɛzulolɛ ne mɔ, mɔɔ bɛdabɛ bɛze la, ɔnrɛmaa bie ɛnrɛha bɛ, noko ɔbamaa bie aha menli mɔɔ kpɔ bɛ la.

¹⁶Bɛzɛkye menli mɔɔ Ɛdɛnkɛma bɛ Nyamenle ne kɛye bɛ kɛmaa bɛ la amuala. Ɔnle kɛ bɛse bɛ anwunvɔne fee, yɛɛ bɛmmasonle bɛ awozonle ne mɔ, ɔluakɛ zɔhane ninyɛne ne mɔ bayɛ ngane amaa bɛ.

¹⁷“Bɛmmaka bɛkile bɛ nwo kɛ, ‘Maanle ɛhye mɔ le mgbole tɛla yɛ, na kɛ yɛkɛzi yɛkɛye bɛ ɛkɛ ne ɛ?’

¹⁸Bɛmmasulo bɛ. Bɛhakye mɔɔ Ɛdɛnkɛma bɛ Nyamenle ne vale yɛle Yigyibiti belemgbunli ne nee ye maanlema amuala la.

¹⁹Ɔgyegyele bɛ dɔɔnwo mɔɔ bɛdabɛ bɛnwunle ye a. Nwanwane ninyɛne nee sɛkɛlɛneɛ mgbole, yɛɛ tumi kpole yɛɛ Ɛdɛnkɛma bɛ Nyamenle ne vale yele bɛ a. Na zɔhane ala yɛɛ Ɛdɛnkɛma bɛ Nyamenle ne bava ayɛ menli mɔɔ bɛsulo bɛ la a.

²⁰Eza Ɛdɛnkɛma bɛ Nyamenle ne bamaa ewulenzane adɔ menli zɔhane avinli, kɔkpula kɛ bɛdabɛ mɔɔ bɛkɛha na bɛkɛvoa bɛ la kɛwie wu bɔkɔɔ la.

²¹Ɔnle kɛ bɛsulo bɛ, ɔluakɛ Ɛdɛnkɛma bɛ Nyamenle ne wɔ bɛ avinli. Ɔle Nyamenle kpole mɔɔ anwo yɛ ɛzulolɛ a.

²²Ɛdɛnkɛma bɛ Nyamenle ne bavoa menli ɛhye mɔ ngyikyi ngyikyi. Bɛnrɛwie bɛ muala sɛkye ɛkɛ ne ala. Bɛyɛ ye zɔhane a, nanemgbole anwo kɛzo kɛbo bɛ nwo zo.

²³Ɛdɛnkɛma bɛ Nyamenle ne baye bɛ amaa bɛ, bɛ nye zo bada bɛ kɔkpula kɛ bɛ bo kɛdu bɔkɔɔ la.

²⁴Ɔbaye bɛ arelemgbunli ne mɔ yeamaa bɛ na bɛamaa bɛ aluma aminli ewiade ye anu. Awie biala ɛnrɛhola bɛ nyunlu gyinla, kɔkpula kɛ bɛkɛzɛkye menli zɔhane mɔ kɔsɔɔti la.

²⁵Bɛyela bɛ ananze ne mɔ mɔɔ bɛgua la kɔsɔɔti wɔ senle nu. Bɛmmamaa bɛ nye bolo ezukoa nvutuke anzɛɛ dwɛtɛ fufule ne mɔ mɔɔ bɛholo bɛgua nwolɛ la na anrɛɛ bɛkɛzua bɛ nwo ɛhane, ɔluakɛ bɛle Ɛdɛnkɛma bɛ Nyamenle ne kyibadeɛ.

²⁶Bɛmmafa debie biala mɔɔ le kyibadeɛ la bɛba bɛ azua nu. Bɛhyi bɛ na bɛkpo bɛ, ɔluakɛ bɛle munzule ninyɛne.