Read Nzema Mɛla 9 Bible Online

Mɛla 9 - Nzema bible

Mɛla 9

¹“O Yizilayɛma, bɛdie! Ɛnɛ kenle ye, bɛpɛ Dwɔdan ne bɛhɔ ɔ nzi lɔ, bɛhɔ maanle mɔɔ le kpole, na menli mɔɔ wɔ nu la anwo yɛ ɛzulolɛ tɛla bɛ la bɛhɔza bɛ bɛlie bɛ azɛlɛ ne, nee bɛ azuamgbole mɔɔ bɛlie nwolɛ bane bɛmaa yehɔ anwuma la.

²Menli mɔɔ wɔ maanle ne anu la le Anakema, kɛmɔ bɛdabɛ bɛze la, bɛle menli kakanyinli, yɛɛ menli ka bɛ nwo edwɛkɛ kɛ awie biala ɛngola bɛ.

³Na ɛnɛ yɛɛ bɛbanwu kɛ ahenle ne mɔɔ li Yizilayɛma ati kɛ sendɔlɔra la a le Ɛdɛnkɛma bɛ Nyamenle ne a. Ɔbazɛkye bɛ na yeali bɛ nwo zo konim, bɛbavoa bɛ bɛaminli bɛ bo zo ndɛndɛ, kɛmɔ Ɛdɛnkɛma vale bɔle bɛ ɛwɔkɛ la.

⁴“Saa Ɛdɛnkɛma bɛ Nyamenle ne maa bɛgua ndwɛlɛ aze wɔ bɛ nyunlu a, bɛmmaka kɛ asɛɛ bɛ kpalɛ mɔɔ bɛle la ati yɛɛ yeva bɛ yera kɛ bɛrava azɛlɛ ne bɛdɛnla zolɛ a. Menli mɔɔ de azɛlɛ ne azo la amumuyɛ mɔɔ le la ati yɛɛ Ɛdɛnkɛma ɛlɛtu bɛ yeava azɛlɛ ne yeamaa bɛmɛ a.

⁵Tɛ bɛ tenleneyɛlɛ anzɛɛ bɛ boɛ mɔɔ bɛdi la ati yɛɛ Ɛdɛnkɛma bɛ Nyamenle ne ɛlɛtu bɛ a, na amaa ye ɛwɔkɛ ne mɔɔ ɔbɔle bɛ ze mɔ Ebileham, Ayezeke, nee Gyekɔbo la ali munli la ati ɔ.

⁶Zɔhane ati bɛnwu ye kɛ, tɛ bɛ tenlene ti yɛɛ Ɛdɛnkɛma bɛ Nyamenle ne ɛlɛfa azɛlɛ ne amaa bɛadɛnla zolɛ a, ɔluakɛ bɛle menli mɔɔ bɛ nzo yɛ se kpalɛ a.

⁷“Bɛdabɛ bɛhakye yɛɛ bɛmmamaa bɛ rɛle fi kɛ bɛzile bɛhanle Ɛdɛnkɛma bɛ Nyamenle ne ɛya wɔ ɛsɛlɛ ne azo la. Ɔvi mekɛ mɔɔ bɛvi Yigyibiti bɛyele bɛ nwo toonwo mɔɔ bɛradwu ɛke la, anzosesebɛ ala a bɛyɛ wɔ Ɛdɛnkɛma anwo a.

⁸Wɔ Saenae Boka bɔbɔ bɛyɛle dedee akee bɛmanle Ɛdɛnkɛma vale bɛ nwo ɛya mɔɔ anrɛɛ ɔsɛkye bɛ a.

⁹Mekɛ mɔɔ mengɔle boka ne azo kɛ mekalie awolɛ ndɛbandɛba ne mɔɔ Ɛdɛnkɛma Ngyekyeleɛ ne mɔɔ ɔ nee bɛ yɛle la wɔ zo la, menlile kenle kɔkɔlɛ abulanla wɔ ɛkɛ ne; meanli aleɛ yɛɛ meanno nzule.

¹⁰Na Ɛdɛnkɛma vale awolɛ ndɛbandɛba nwiɔ ne mɔɔ ɔdaye ɔvale ɔ sa ɛrɛlɛsɛka ɔhɛlɛle zolɛ la ɔmanle me. Edwɛkɛ biala mɔɔ Ɛdɛnkɛma hanle vile senle ne anu hilele bɛ wɔ boka ne azo, wɔ mekɛ mɔɔ bɛyiale ɛkɛ ne la, ɔhɛlɛle ye kɔsɔɔti wɔ zolɛ.

¹¹Kenle kɔkɔlɛ abulanla ne awieleɛ, akee Ɛdɛnkɛma vale awolɛ ndɛbandɛba nwiɔ ne mɔɔ ngyekyeleɛ ne wɔ zolɛ la manle me.

¹²“Akee Ɛdɛnkɛma zele me kɛ, ‘Dwazo, ɛvi ɛke tolo kɔ ndɛndɛ, ɔluakɛ wɔ menli ne mɔɔ ɛ nee bɛ vi Yigyibiti ɛra la ɛbɔ munzule. Kɛkala angome bɛhakyi bɛ nzi bɛzi me adenle ne mɔɔ menzele bɛ kɛ bɛlua nu la, na bɛgua ananze bɛmaa bɛ nwo.’

¹³“Ɛdɛnkɛma eza zele me kɛ, ‘Menlea menli ɛhye mɔ dedee la, menwu kɛ bɛle menli mɔɔ ɛsolo a.

¹⁴Gyakyi me maa menzɛkye bɛ, menye bɛ menvi ewiade ne anu, na menyɛ wɔ maanle kpalɛ mɔɔ anwo yɛ se na bɛ nwo yɛ ɛzulolɛ tɛla ɛhye mɔ la bɛ ze.’

¹⁵“Ɛhye ati menziale me nzi mentolole boka ne. Mekɛ ne anu ɛnee melɛ Nyamenle ngyekyeleɛ awolɛ ndɛbandɛba nwiɔ ne me sa nu na boka ne azo sendɔlɔra ne tɛsɔ.

¹⁶Na meneanle menwunle kɛ bɛyɛ ɛtane bɛtia Ɛdɛnkɛma bɛ Nyamenle ne. Bɛgua ɛnlankɛ ralɛ ananze bɛmaa bɛ nwo, bɛhakyi bɛ nzi kɛkala angome bɛzi adenle ne mɔɔ Ɛdɛnkɛma ɛze bɛ kɛ bɛlua nu la.

¹⁷Yemɔti bɛdabɛ bɛ nye zo ɛkɛ ne ala, mengyakyile awolɛ ndɛbandɛba nwiɔ ne mɔɔ melɛ la menguale aze memanle bɛbubule.

¹⁸Akee mendule mendɔle Ɛdɛnkɛma anyunlu mutule nu, kɛmɔ meyɛ ye dɛba ne ala la kenle kɔkɔlɛ abulanla. Meanli debie yɛɛ meanno nzule, ɔboalekɛ ɛnee bɛyɛ ɛtane kpole kpalɛ kɛ bɛyɛ debie mɔɔ Ɛdɛnkɛma kyi la bɛhile ye na bɛha ye ɛya a.

¹⁹Ɔluakɛ ɛnee mesulo kɛ, kɛ Ɛdɛnkɛma ɛzi ɛva bɛ nwo ɛya kpole la, ɔkɛbɔ bɛ bo zo. Na Ɛdɛnkɛma eza diele me wɔ mekɛ zɔhane anu.

²⁰Na Ɛdɛnkɛma vale Aalɔn anwo ɛya kpole kpalɛ mɔɔ ɛnee ɔkpondɛ kɛ ɔku ye a. Na menzɛlɛle memanle Aalɔn ɔdaye noko wɔ mekɛ ne anu.

²¹Akee menvale munzudeɛ ne, mɔɔ le ɛnlankɛ ralɛ ananze ne mɔɔ bɛyɛle la mendole senle nu menyelale ye, membubule nu na mendinle ye motomoto memanle ɔyɛle kɛ munlutu, na mendole menguale azule ekyi ne mɔɔ senze vi boka ne anu ba la anu.

²²“Wɔ Tabɛla, Manasɛ, nee Kebelo Hateeyava noko, bɛmanle Ɛdɛnkɛma vale ɛya.

²³Eza mɔɔ bɛwɔ Keedɛhye Baanɛya la, Ɛdɛnkɛma zele bɛ kɛ, ‘Bɛhɔ na bɛhɔva azɛlɛ ne mɔɔ meva memaa bɛ la.’ Noko bɛdule Ɛdɛnkɛma bɛ Nyamenle ne anloa bɛdole; bɛanlie ye bɛanli yɛɛ bɛandie ɔ ne.

²⁴Sumunli kɛ medame menwunle bɛ ala la, atua ala a bɛte wɔ Ɛdɛnkɛma anwo a.

²⁵“Yemɔti kenle abulanla ne amuala menlale mutule nu wɔ Ɛdɛnkɛma anyunlu ɛkɛ ne nɔɔzo nee ewiazo, ɔboalekɛ ɛnee Ɛdɛnkɛma ɛyɛ kɛ ɔbɔ bɛ bo zo.

²⁶Na menzɛlɛle Ɛdɛnkɛma kɛ, ‘O Ɛdɛnkɛma Nyamenle, mmabɔ wɔ menli ne mɔɔ le wɔ agyadeɛ, mɔɔ wɔva wɔ kpoleyɛlɛ nee tumi kpole wɔlie bɛ, na wɔye bɛ wɔvi Yigyibiti la abo zo.

²⁷Kakye wɔ sonvolɛma, Ebileham, Ayezeke, nee Gyekɔbo, na mmatoa anzosesebɛ ne, amumuyɛ ɛbɛla ne, nee ɛtane ne mɔ mɔɔ menli ɛhye mɔ ɛyɛ la;

²⁸anrɛɛ maanlema mɔɔ yɛgyakyile bɛ yɛ nzi a yɛrale la baha kɛ, “Kɛmɔ Ɛdɛnkɛma angola anva menli ne andwu azɛlɛ ne mɔɔ ɔvale ɔbɔle bɛ ɛwɔkɛ la azo, na ɔkpɔ bɛ la ati, ɔvale bɛ ɔhɔle ɛsɛlɛ ne azo ɔhɔhunle bɛ ɔbɔle bɛ bo zo.”

²⁹Saa yeanyɛ boɛ bɔbɔ a, bɛmɛ a bɛle wɔ menli ne, mɔɔ le wɔ agyadeɛ mɔɔ ɛvale tumi kpole ɛliele bɛ na ɛyele bɛ ɛvile Yigyibiti a.’