Read Nzema Dw 1 Bible Online

Dw 1 - Nzema bible

Dw 1

¹Mekɛ mɔɔ bɛkabɔ ewiade la, ɛnee Edwɛkɛ ne wɔ ɛkɛ; Edwɛkɛ ne nee Nyamenle a wɔ ɛkɛ a, na Edwɛkɛ ne le Nyamenle.

²Mɔlebɛbo ne amuala ɛnee Edwɛkɛ ne nee Nyamenle a wɔ ɛkɛ a.

³Ɔ nwo zo yɛɛ Nyamenle luale yɛle ninyɛne kɔsɔɔti a; bɛangoati ye bɛanyɛ debie biala mɔɔ wɔ aleɛabo amuala la.

⁴Ngoane kɔsɔɔti vi Edwɛkɛ ne anu a ba a, na ngoane ɛhye a le menli wienyi ne a.

⁵Wienyi ne ta awozinli nu, na awozinli ɛngola ɛngye ye.

⁶ Nyamenle zoanle nrenya bie mɔɔ bɛfɛlɛ ye Dwɔn la,

⁷manle ɔrahanle wienyi ne anwo edwɛkɛ ɔhilele menli, amaa bɛ kɔsɔɔti bɛade nrɛlaleɛ ne na bɛalie bɛali.

⁸Tɛ yemɔ a ɔle wienyi ne; ɔrale kɛ ɔbaha wienyi ne anwo edwɛkɛ.

⁹Edwɛkɛ ne a le nɔhalɛ wienyi ne mɔɔ ta menli kɔsɔɔti anwo zo na ɔba ewiade la.

¹⁰Ɛnee Edwɛkɛ ne wɔ ewiade ye. Nyamenle luale ɔ nwo zo a bɔle ewiade a, noko ewiade amra ɛnze ye.

¹¹Ɔrale ɔdaye ye maanle nu, na ye menli ne anlie ye.

¹²Bie mɔ dɔɔnwo liele ye na bɛliele ye bɛlile; ɛhye ati ɔmanle bɛ adenle kɛ bɛyɛ Nyamenle amra,

¹³mɔɔ bɛanlua nwonane nee mogya ngyehyɛlɛ zo a bɛwole bɛ na bɛarayɛ Nyamenle amra a, ɔluakɛ Nyamenle ɔdaye a ɔle bɛ ze a.

¹⁴Edwɛkɛ ne rayɛle sonla mɔɔ ɛlolɛ nee nɔhalɛ ɛyi ye tɛkɛɛ a, na ɔ nee yɛ dɛnlanle. Yɛnwunle ye anyunlunyia mɔɔ ɔnyianle ye kɛ ɔle Selɛ ne Ara kokye la.

¹⁵Dwɔn hanle ɔ nwo edwɛkɛ. Ɔse, “Ɛhye a le mɔɔ menganle ɔ nwo edwɛkɛ kɛ, ‘Ɔli me nzi ɔlɛba, na ɔle sonlakpole ɔtɛla me la, ɔboalekɛ bɛkawo me la ɛnee ɔwɔ ɛkɛ.’ ”

¹⁶Ye ɛlolɛ bebelebe ne ati, yeyila yɛ muala kɔsɔɔti, na ɔyila yɛ dahuu.

¹⁷Nyamenle luale Mosisi anwo zo vale mɛla ne rɛlɛle yɛ, na ɛlolɛ nee nɔhalɛ luale Gyisɛse Kelaese anwo zo a rale a.

¹⁸Awie biala ɛtɛnwunle Nyamenle ɛlɛ. Ralɛ ne ala mɔɔ ɔdaye ko ne ala a ɔle Nyamenle, na ɔde Selɛ ne anwo ɛkɛ ne la, yemɔ yɛɛ ɛmaa yɛnwu ye a.

¹⁹Dwuu mgbanyima mɔɔ wɔ Gyɛlusalɛm la zoanle sɛlɛvolɛma nee Livaema bie mɔ wɔ Dwɔn ɛkɛ kɛ bɛhɔbiza ye kɛ, “Wɔmɔ a le nwane?”

²⁰Dwɔn anva anvea bɛ na ɔkpale nwolɛ ɛdanlɛ wienyi kɛ, “Tɛ mame a mele Mɛzaya ne a.”

²¹ Bɛbizale ye kɛ, “Ɛnee wɔmɔ a le nwane? Wɔmɔ a ɛle Yilaegya ɔ?” Dwɔn buale bɛ kɛ, “Kyɛkyɛ, tɛ yemɔ a le me.” Bɛbizale ye kɛ, “Wɔmɔ a ɛle Nyamenle kpɔmanvolɛ ne ɔ?” Ɔbuale kɛ, “Kyɛkyɛ.”

²²Bɛzele ye kɛ, “Ɛnee kile yɛ wɔ sonlazule. Ɔluakɛ ɔwɔ kɛ yɛfa mualɛ yɛkɔmaa menli mɔɔ zoanle yɛ la. Duzu a ɛka ye wɔ ɛ nwo a?”

²³ Dwɔn buale kɛmɔ Nyamenle kpɔmanvolɛ Ayezaya hanle la: “Mame a mele ɛnelɛ ne mɔɔ ɛlɛtea nu wɔ ɛsɛlɛ ne anu, ‘Bɛdenrɛdenrɛ adenle ne bɛmaa Awulae ɛlua nu!’ la.”

²⁴Menli mɔɔ rale la, Falasiima a zoanle bɛ a.

²⁵Bɛbizale Dwɔn kɛ, “Saa tɛ wɔ a ɛle Mɛzaya ne, Yilaegya anzɛɛ Nyamenle kpɔmanvolɛ ne a, ɛnee duzu ati a ɛsɔne menli a?”

²⁶Dwɔn buale kɛ, “Mame mefa nzule a mesɔne a, na ko bie gyi bɛ avinli ɛkɛ ne mɔɔ bɛnze ye a.

²⁷Yemɔ, ɔli me nzi ɔlɛba, na menfɛta kɛ menwɔzianyi ye mgbɔlaboa zo nyɛma bɔbɔ.”

²⁸Ɛhye mɔ amuala zile Bɛtani, Azule Dwɔdan ne anloa mɔɔ di kɔ aduduleɛ, ɛleka mɔɔ Dwɔn ɛlɛsɔne menli la.

²⁹Aleɛ hyenle la Dwɔn nwunle kɛ Gyisɛse ɛlɛba ɛleka mɔɔ ɔwɔ la na ɔhanle kɛ, “Bɛnlea, Nyamenle Boaneralɛ ne mɔɔ ɔbava yeabɔ azu yeaye ewiade amra ɛtane yeahɔ la ɛne!

³⁰Ɛhye a ɛnee melɛka ye edwɛkɛ mɔɔ menganle kɛ ‘Nrenya bie li me nzi ɛlɛba na ɔle sonlakpole ɔtɛla me la, ɔboalekɛ mɔɔ bɛkawo me la ɛnee ɔwɔ ɛkɛ.’

³¹Ɛnee menze ye sonlazule, noko membale kɛ mebava nzule meazɔne menli amaa Yizilayɛma anwu ye.”

³²Daselɛ mɔɔ Dwɔn lile la ɛne. Ɔse, “Menwunle kɛ Sunsum ne vi anwuma ɛlɛdwu ɔ nwo zo kɛ abubule la, na ɔrazinzele ɔ nwo zo.

³³Ɛnee menze kɛ yemɔ ɔ; noko Nyamenle ne mɔɔ zoanle me kɛ menva nzule menzɔne la zele me kɛ, ‘Ɛbanwu kɛ Sunsum ne ɛrazinze nrenya bie anwo zo; sonla zɔhane a le sonla ne mɔɔ ɔbava Sunsum Nwuanzanwuanza ne yeazɔne la.’

³⁴Na mese, menwu ye, na meka meahile bɛ kɛ, nrenya ɛhye, yemɔ a ɔle Nyamenle Ara ne a.”

³⁵Ye alehyenlɛ nu ɛnee Dwɔn nee ye ɛdoavolɛma nwiɔ gyi ɛkɛ ne ko ne ala,

³⁶na bɛnwunle kɛ Gyisɛse ɛlɛse. Na Dwɔn hanle kɛ, “Bɛnlea, Nyamenle Boaneralɛ ne ɛne!”

³⁷Ɛdoavolɛma nwiɔ ne dele la bɛgyakyile ye ɛkɛ bɛdoale Gyisɛse.

³⁸Gyisɛse dole ɔ nye na ɔnwunle kɛ bɛdoa ye la, ɔbizale bɛ kɛ, “Bɛkpondɛ duzu?” Bɛbuale kɛ, “Relabae, nienwu ɛleka yɛɛ ɛde a?” (Relabae abo a le “Kilehilevolɛ”)

³⁹Ɔbuale bɛ kɛ, “Bɛrɛla bɛranlea.” Yemɔti bɛ nee ye hɔle sua nu na bɛhɔnwunle ɛleka mɔɔ ɔde la, na bɛ nee ye dɛnlanle kenle ko ne. (Mekɛ ne anu ɛnee bɛbɔ nɔsolɛ dɔne nna.)

⁴⁰Bɛ mu nwiɔ mɔɔ bɛdele Dwɔn edwɛkɛ ne, na bɛdoale Gyisɛse la anu ko a le Andelu, mɔɔ le Saemɔn Pita adiema ne.

⁴¹Na ndɛndɛ ne ala Andelu hɔkpondɛle ɔ diema Saemɔn na ɔzele ye kɛ, “Yɛnwu Mɛzaya ne.” (Mɛzaya abo a le Kelaese.)

⁴²Na ɔ nee Saemɔn bɛrale Gyisɛse ɛkɛ. Gyisɛse nleanle Pita koonwu na ɔzele ye kɛ, “Wɔmɔ a ɛle Saemɔn, mɔɔ le Dwɔn ara ne. Bɛbavɛlɛ wɔ Sifase.” (“Sifase” yemɔ ala a le “Pita” na ɔ bo a le “Bodane”.)

⁴³Aleɛ hyenle la Gyisɛse yɛle kɛ ɔkɔ Galeli. Ɔnwunle Felepe na ɔzele ye kɛ, “Bɛla maa yɛhɔ!”

⁴⁴(Felepe vi Bɛteseeyeda, Andelu nee Pita sua zo.)

⁴⁵Felepe hɔkpondɛle Natanayɛle na ɔzele ye kɛ, “Yɛnwu sonla ne mɔɔ Mosisi hɛlɛle ɔ nwo edwɛkɛ wɔ mɛla ne anu, na Nyamenle kpɔmanvolɛma noko hɛlɛle ɔ nwo edwɛkɛ la. Yemɔ a le Gyisɛse, Dwosefi mɔɔ vi Nazalɛte la ara ne.”

⁴⁶Natanayɛle bizale ye kɛ, “Asoo debie kpalɛ bie kola fi Nazalɛte finde?” Felepe buale kɛ, “Bɛla banlea.”

⁴⁷Mɔɔ Gyisɛse nwunle kɛ Natanayɛle ɛlɛba la, ɔzele kɛ, “Bɛnlea, Yizilayɛnli kpalɛ mɔɔ ɛnze adalɛ bɔ la ɛne!”

⁴⁸Natanayɛle bizale ye kɛ, “Na ɛze me nienwu?” Gyisɛse buale kɛ, “Menwunle wɔ wɔ mekɛ mɔɔ ɛnee ɛde feege baka ne abo la kolaa na Felepe aravɛlɛ wɔ.”

⁴⁹Natanayɛle hanle kɛ, “Kilehilevolɛ, wɔmɔ a ɛle Nyamenle Ara ne. Wɔmɔ a ɛle Yizilayɛ Belemgbunli ne a!”

⁵⁰Gyisɛse buale ye kɛ, “Kɛmɔ meha kɛ menwunle wɔ wɔ mekɛ mɔɔ ɛnee ɛde feege baka ne abo la ati yɛɛ wɔlie wɔli a. Ɛbanwu nwanwane ninyɛne mgbole mɔɔ tɛla ɛhye a!”

⁵¹ Na ɔhanle ɔhilele bɛ muala kɛ, “Meka nɔhalɛ ne meahile bɛ: bɛbanwu kɛ anwuma ɛbuke na Sonla Ra ne ati, Nyamenle soanvolɛma ɛlɛfo dwu.”