Read Nzema Dw 10 Bible Online

Dw 10 - Nzema bible

Dw 10

¹Gyisɛse zele bɛ kɛ, “Meka nɔhalɛ ne meahile bɛ: Awie mɔɔ ɛlɛkɔ mboane tunli ne anu na yeanlua anlenkɛ ne anu, na ɔkɛvo bane ne la le awule, ɔle kɔdiawu.

²Sonla ne mɔɔ fa anlenkɛ ne anu kɔ nuhua la a le mboaneneavolɛ ne a.

³Anlenkɛ sinzavolɛ ne tukue ye anlenkɛ ne; mboane ne mɔ te ɔ ne, ɔfa boane ko biala duma ɔfɛlɛ ye na ɔfa bɛ ɔfinde ɔkɔ adidi.

⁴Saa ɔfa bɛ ɔfinde a ɔdi bɛ nyunlu na mboane ne adoa ye, ɔluakɛ bɛze ɔ ne.

⁵Bɛnrɛdoa awie gyɛne biala; bɛnriandi ye, ɔluakɛ bɛnze ɔ ne.”

⁶Gyisɛse bule ɛrɛlɛ ɛhye, na bɛande mɔɔ ɔlɛka yeahile bɛ la abo.

⁷Yemɔti Gyisɛse hanle ye bieko kɛ, “Meka nɔhalɛ ne meahile bɛ: Mame a mele anlenkɛ ne mɔɔ bɛfa nu bɛkɔ mboane tunli ne anu la.

⁸Awie mɔ gyɛne mɔɔ lumuale me nyunlu rale la le nwule nee ahɔdiawu, na mboane ne mɔ andie bɛ ne.

⁹Mame a mele anlenkɛ ne; mɔɔ kɛlua me nwo zo kɛhɔ nu la kɛnyia ngoane mɔɔ ɛnlɛ awieleɛ. Ɔbawolo nu na yeavinde yeahɔkpondɛ aleɛ.

¹⁰Awule sonla biala ba kɛ ɔbawua, yeahu, na yeazɛkye mboane ne mɔ. Mera amaa bɛanyia ngoane, na bɛanyia ye molozo.

¹¹“Mame a mele mboaneneavolɛ kpalɛ ne a. Mboaneneavolɛ kpalɛ ne fa ye ngoane to aze maa ye mboane ne.

¹²Awie mɔɔ bɛkɛbɔ ye ɛkpa, mɔɔ mboane ne ɛnle ye ɛdeɛ, na ɔnle mboaneneavolɛ kpalɛ la, saa ɔnwu nane kpole anwo ɛzulolɛ bie mɔɔ le kɛ bedi la a, ɔnriandi ɔgyakyi mboane ne mɔ, yemɔti bɛdi ne babɔ mboane ne anu na ɔbɔ bɛ asande.

¹³Ɛkpanli ne nriandi kɔ, ɔluakɛ yemɔ, bɛbɔle ye ɛkpa ala, mboane ne mɔ edwɛkɛ ɛnyɛ ye edwɛkɛ.

¹⁴ Mame a mele mboaneneavolɛ kpalɛ ne a. Kɛmɔ Selɛ ne ze me na meze Selɛ ne la, zɔhane ala yɛɛ meze me mboane ne na bɛdabɛ noko bɛze me a; yɛɛ mekponle zolɛ kɛ menwɔwu menwɔmaa bɛ.

¹⁶Me mboane ne mɔ bie ɛnle mboane tunli ye anu. Ɔwɔ kɛ mekpondɛ bɛ bo zo; bɛbade me ne, na bɛ muala bɛbayɛ mboane ekpunli ko mɔɔ bɛ neavolɛ ko a.

¹⁷“Selɛ ne kulo me, ɔluakɛ mekponle zolɛ kɛ menwɔva me ngoane menwɔdo aze, amaa meazia meava ye bieko.

¹⁸Awie ɛngola ɛnye me ngoane. Medame me ngome a mekola megyakyi nu a. Melɛ adenle mekola mefa memaa, yɛɛ melɛ adenle mefa me debie bieko. Mɔɔ Egya ɛhyehyɛ ɛmaa me kɛ ɔwɔ kɛ meyɛ la ɛne.”

¹⁹Edwɛkɛ ɛhye manle Dwuuma ne lile abunwiɔ.

²⁰Bɛ nuhua dɔɔnwo hanle kɛ, “Ɔlɛ ayɛne! Ɔlɛsɛ; duzu ati a bɛkɛdie ye ɛ?”

²¹Bie mɔ noko hanle kɛ “Sonla mɔɔ lɛ ayɛne la ɛnrɛdendɛ kɛmɔ ɔlɛtendɛ la. Kɛ sonla zɛhae si yɛ tukue anyenzinliravolɛma anye ɛ?”

²²Ɛyɛlɛ mekɛ[4] ne dwule la ɛnee bɛlɛdi Ɛzonlenlɛ Sua ne Ɛnluanlɛ Ɛvoyia ne wɔ Gyɛlusalɛm.

²³Gyisɛse ɛnee lua Sɔlɔmɔn Kpɔda ne abo wɔ Ɛzonlenlɛ Sua ne anu.

²⁴Dwuuma bɔle yiale ye na bɛbizale ye kɛ, “Na ɛmaa yɛ nye agyinla ahɔdwu kenlenzu? Saa wɔmɔ a ɛle Mɛzaya ne a ɛnee ka ye wienyi kile yɛ.”

²⁵Gyisɛse buale bɛ kɛ, “Meha mehile bɛ dɛba, na bɛanlie me bɛanli, Gyima mɔɔ Egya maa meyɛ la di me daselɛ,

²⁶na bɛnlie bɛnli, ɔboalekɛ bɛmboka me mboane ne anwo.

²⁷Me mboane ne tie me ne; meze bɛ, yɛɛ bɛtoa me bo zo.

²⁸Memaa bɛ ngoane mɔɔ ɛnlɛ awieleɛ, yemɔti bɛnrɛwu ɛlɛ, yɛɛ awie ɛnrɛhola ɛnrɛlie bɛ ɛnrɛvi me sa nu.

²⁹Egya mɔɔ vale bɛ manle me la le kpole tɛla awie biala,[5] yemɔti awie biala ɛnrɛhola ɛnrɛlie bɛ ɛnrɛvi Egya asa anu.

³⁰Selɛ ne nee medame yɛle ko.”

³¹Dwuuma ne eza sesale awolɛ kɛ bɛtoto bɛazi ye.

³²Gyisɛse bizale bɛ kɛ, “Selɛ ne ɛmaa meli gyima kpalɛ dɔɔnwo memaa bɛ; na nuhua ne boni ati yɛɛ bɛkpondɛ kɛ bɛsi me nwolɛ awolɛ a?”

³³ Dwuuma ne buale kɛ, “Yɛnzi wɔ awolɛ kɛ wɔyɛ gyima kpalɛ la ati ɔ, yɛsi wɔ awolɛ kɛ wɔha munzule edwɛkɛ! Ɛle sonla ala, noko ɛlɛyɛ ɛ nwo Nyamenle!”

³⁴ Gyisɛse buale kɛ, “Bɛhɛlɛ ye wɔ bɛdabɛ bɛ mɛla ne anu kɛ Nyamenle se, ‘Bɛdabɛ, bɛle nyamenlema!’

³⁵Yɛze kɛ mɔɔ Nyamenle Edwɛkɛ ne ka la le nɔhalɛ dahuu, na saa Nyamenle ɛvɛlɛ bɛdabɛ mɔɔ bɛhanle ye edwɛkɛ ne bɛhilele bɛ la kɛ bɛle nyamenlema a,

³⁶ɛnee mame mɔɔ Selɛ ne ɛnlea nu ɛye me, na yezoa me wɔ ewiade ye anu la, saa meka kɛ mele Nyamenle Ara a, ɛnee munzule ne mɔɔ mebɔ la a le boni?

³⁷Saa menyɛ Selɛ ne gyima a ɛnee bɛmmadie me bɛdi ɛ!

³⁸Na saa meyɛ Selɛ ne gyima ne na bɛnlie me bɛnli bɔbɔ a, bɛlie me gyima ne bɛdo nu, amaa bɛanwu ye wienyi kɛ Egya de me nu yɛɛ medame mede Egya nu.”

³⁹Bɛyɛle ye bieko kɛ bɛkye ye, na ɔvile bɛ sa.

⁴⁰ Gyisɛse eza pɛle hɔle Azule Dwɔdan ne anzi lɔ, ɛleka mɔɔ Dwɔn lumuale zɔnenle menli la na ɔdɛnlanle ɛkɛ.

⁴¹Menli dɔɔnwo hɔle ɔ nwo ɛkɛ. Bɛse, “Dwɔn anyɛ nwanwane gyima mgbole biala, noko edwɛkɛ biala mɔɔ ɔhanle wɔ nrenya ɛhye anwo la le nɔhalɛ.”

⁴²Na bɛdabɛ dɔɔnwo mɔɔ bɛwɔ ɛkɛ ne la liele ye lile.