Read Nzema Dw 11 Bible Online

Dw 11 - Nzema bible

Dw 11

¹ Nrenya bie anwo dole ye wɔ Bɛtani. Bɛfɛlɛ ye Lazalɛse. Mɛle nee ɔ diema raalɛ Maata bɛ sua zo a le Bɛtani.

² (Mɛle ɛhye a wolale nwole evuanlɛ ne guale Awulae agyakɛ anwo na ɔvale ɔ ti enrinli ɔkyikyile la, yɛɛ ɔ diema nrenya a le Lazalɛse ɛhye mɔɔ ɛnde kpɔkɛ la.)

³Mediema mraalɛ ne mɔ zoanle manle bɛhɔzele Gyisɛse kɛ, “Awulae, ɛ gɔnwo kpalɛ ne ɛnde kpɔkɛ.”

⁴Mɔɔ Gyisɛse asa hanle nrɛlaleɛ ne la ɔhanle kɛ, “Anwondolɛ ɛhye ɛnrɛmaa Lazalɛse ɛnrɛwu. Nyamenle anyunlunyia ti yɛɛ ɛhye ɛzi a, na ɔbayɛ debie mɔɔ ɔlua zolɛ Nyamenle Ara ne ɔdaye ɔbanyia anyunlunyia a.”

⁵Gyisɛse kulo Maata nee ɔ diema Mɛle nee Lazalɛse edwɛkɛ kpole.

⁶Noko mɔɔ ɔdele Lazalɛse anwondolɛ nrɛlaleɛ ne la, ɔzile aze kenle nwiɔ wɔ ɛleka mɔɔ ɔwɔ la.

⁷Na akee ɔhanle ɔhilele ye ɛdoavolɛma ne kɛ, “Bɛmaa yɛzia yɛ nzi yɛhɔ Dwudiya.”

⁸Ɛdoavolɛma ne zele ye kɛ, “Kilehilevolɛ, ɔtɛkyɛle biala yɛɛ Dwuuma ne yɛle kɛ bɛsi wɔ awolɛ a; na eza wɔyɛ wɔ adwenle kɛ ɛkɔ lɔ bieko ɔ?”

⁹Gyisɛse buale bɛ kɛ, “Dɔnehwele bulu nee nwiɔ a wɔ alehyenlɛ ko anu a. Yemɔti saa sonla tudu agyakɛ wɔ alehyenlɛ nu a ɔmkpula, ɔboalekɛ maanle nu le wienyi.

¹⁰Na saa ɔtudu agyakɛ wɔ aledwolɛ nu a ɔkpulokpula, ɔboalekɛ awozinli ne ɛmmaa ɔnnwu aze.”

¹¹Gyisɛse hanle ɛhye na ɔvale ɔzɔle zolɛ kɛ, “Yɛ gɔnwo Lazalɛse ɛlafe, na mekɔ meahɔdunwue ye.”

¹²Ɛdoavolɛma ne buale kɛ, “Awulae, saa yelafe a, ɛnee ɔbadunwue!”

¹³Gyisɛse ɛnee kpondɛ aze kɛ Lazalɛse ɛwu, na bɛmɛ bɛdwenlenle nafelɛ kpalɛ nwo.

¹⁴Yemɔti Gyisɛse hanle ye wienyi hilele bɛ kɛ, “Lazalɛse ɛwu,

¹⁵na bɛmɛ ti, ɔyɛ me fɛ kɛ menle lɔ a, amaa bɛalie bɛali. Bɛmaa yɛhɔ ɛleka mɔɔ ɔwɔ la.”

¹⁶Tɔmase (mɔɔ eza bɛfɛlɛ ye Nda la) zele ɔ gɔnwo mɔ ɛdoavolɛma ne mɔ kɛ, “Bɛmaa yɛ nee Kilehilevolɛ ne ɛhɔ na saa ewule bɔbɔ a yɛ nee ye ɛhɔwu.”

¹⁷Mɔɔ Gyisɛse radwule la, ɔnwunle kɛ Lazalɛse ɛwu, bɛzie ye na yeli kenle nna.

¹⁸Bɛtani mɔɔ kɔ Gyɛlusalɛm la le “kilomita” kɛyɛ nsa,

¹⁹yemɔti Dwuuma dɔɔnwo ɛra kɛ bɛbakyekye Maata nee ɔ diema Mɛle arɛle wɔ bɛ diema nrenya ne ewule ne anwo.

²⁰Maata dele kɛ Gyisɛse ɛlɛba la, ɔhɔle ɔhɔyiale ye adenle. Mɛle angɔ bie.

²¹Maata hanle hilele Gyisɛse kɛ, “Awulae, saa ɛwɔ ɛke a, anrɛɛ me diema nrenya ne anwu!

²²Na eza meze kɛ, kɛkala bɔbɔ, debie biala mɔɔ ɛkɛbiza Nyamenle la, ɔkɛyɛ ɔkɛmaa wɔ.”

²³Gyisɛse zele ye kɛ, “Ɛ diema nrenya ne badwazo ara ngoane nu.”

²⁴Maata buale kɛ, “Meze kɛ ɔbadwazo yeara ngoane nu wɔ mekɛ ne mɔɔ li awieleɛ la anu.”

²⁵Gyisɛse zele ye kɛ, “Mame a mele ewudwazo ne nee ngoane ne a. Mɔɔ kɛlie me kɛli la, saa ɔwu bɔbɔ a ɔkɛnyia ngoane;

²⁶yɛɛ mɔɔ de aze na ɔdie me ɔdi la ɛnrɛwu ɛlɛ. Ɛdie ɛhye ɛdi ɔ?”

²⁷Maata buale kɛ, “Ɛhɛe, Awulae! Medie medi kɛ wɔmɔ a ɛle Mɛzaya ne, Nyamenle Ara ne mɔɔ ɔwɔ kɛ ba ewiade la.”

²⁸Maata hanle ɛhye la, ɔziale ɔhɔle na ɔhɔdule ɔ diema Mɛle azukue kɛ, “Kilehilevolɛ ne ɛra na yebiza wɔ.”

²⁹Mɛle dele la, ɔdwazole na ɔnriandile ɔhɔyiale Gyisɛse.

³⁰(Ɛnee Gyisɛse ɛtɛdwule sua ne azo, na ɔtɛbɔ ɛleka mɔɔ Maata hɔyiale ye la.)

³¹Dwuuma mɔɔ ɛnee wɔ sua nu ɛkɛ ne ɛlɛkyekye Mɛle arɛle la nwunle kɛ yezi yemaa ɔ nwo zo na ɔlɛnriandi yeahɔ la, bɛdwenlenle kɛ ɔlɛkɔ ɔ diema ne sɛka zo lɔ yeahɔzu. Yemɔti bɛdoale ye.

³²Mɛle dwule ɛleka mɔɔ Gyisɛse wɔ na ɔnwunle ye la, ɔdule ɔdɔle ɔ gyakɛ anu na ɔzele kɛ, “Awulae, saa ɛwɔ ɛke a, anrɛɛ me diema nrenya ne anwu.”

³³Gyisɛse nwunle kɛ Mɛle ɛlɛsi azu, na Dwuuma mɔɔ nee ye ɛra la ɛlɛsu la, nyane kpole hanle ye manle alɔbɔlɛ hunle ye.

³⁴Ɔbizale bɛ kɛ, “Nienwu a bɛdole ye a?” Bɛzele ye kɛ, “Awulae, bɛla banlea.”

³⁵Gyisɛse zunle.

³⁶Yemɔti menli mɔɔ wɔ ɛkɛ ne la hanle kɛ, “Nea, amgba ɔkulo ye edwɛkɛ kpalɛ!”

³⁷Na bie mɔ hanle kɛ, “Se anrɛɛ ɔtukuedukue anyenzinliravolɛma anye o! Duzu ati a yeanlie Lazalɛse yeanvi ewule nu a?”

³⁸Gyisɛse lile nyane kpole bieko na ɔhɔle nla ne anwo. Nla ne le bolɛ bɔne yɛɛ bɛvale bolɛ bɛnyinle ɔ nloa.

³⁹Gyisɛse zele bɛ kɛ, “Bɛye bolɛ ne!” Maata, mɔɔ le nrenya ne mɔɔ ɛwu la adiema raalɛ ne zele kɛ, “Awulae, yebɔ! Bɛziele ye la ɛnɛ le kenle nna!”

⁴⁰Gyisɛse zele ye kɛ, “Metɛkanle metɛkilele wɔ kɛ saa ɛdie ɛdi a ɛkɛnwu kɛ Nyamenle anyunlunyia ne si de la ɔ?”

⁴¹Bɛhundole bolɛ ne bɛyele ye ɛkɛ. Gyisɛse nleanle anwuma na ɔhanle kɛ, “Egya, meyɛ wɔ mo somaa kɛ wɔdie me a.

⁴²Meze kɛ dahuu ɛtie me edwɛkɛ, na melɛka ɛhye wɔ menli mɔɔ kɛkala wɔ ɛke la ati, amaa bɛalie bɛali kɛ ɛdawɔ a ɛzoanle me a.”

⁴³Ɔhanle ɛhye la, ɔdeanle nu kpole ɔzele kɛ, “Lazalɛse, dwazo bɛla!”

⁴⁴Nrenya ne mɔɔ ɛwu la vindele rale, na ndanlɛ mɔɔ bɛvale bɛkyekyele ye funli ne la kyekye ɔ sa, ɔ gyakɛ nee ɔ da. Gyisɛse zele bɛ kɛ, “Bɛzianyizianyi ye na bɛmaa ɔhɔ.”

⁴⁵Dwuuma dɔɔnwo mɔɔ rale Mɛle ɛkpɔlalɛ la nwunle mɔɔ Gyisɛse ɛyɛ la, na bɛliele ye bɛlile.

⁴⁶Na bie mɔ ziale hɔle Falasiima ɛkɛ ne na bɛhɔhanle mɔɔ Gyisɛse ɛyɛ la bɛhilele bɛ.

⁴⁷Yemɔti Falasiima ne nee sɛlɛvolɛ mgbanyima ne mɔ yiale Ayiama ne na bɛhanle kɛ, “Duzu bɔbɔ yɛɛ akee yɛyɛ a? Nea nwanwane gyima mɔɔ akee nrenya ne ɛlɛyɛ la!

⁴⁸Saa yɛmaa ɔkɔ zolɛ ɔyɛ a, awie biala balie ye ali, na Wulomu arane ne bava ɛya na yearazɛkye yɛ Ɛzonlenlɛ Sua ye nee yɛ maanle ye amuala.”

⁴⁹Ɛvolɛ ne anu Sɛlɛvolɛ Kpanyinli ne, mɔɔ bɛfɛlɛ ye Kayafase la zele bɛ kɛ, “Bɛdabɛ, bɛnze ɛhwee!

⁵⁰Yemɔti bɛnze kɛ ɔle kpalɛ kɛ sonla ko kɛwu kɛmaa maanle ne tɛla kɛ yɛ maanle ne amuala kɛbɔ ɔ?”

⁵¹Nɔhalɛ, ɔ nye ɛnla nwo yɛɛ ɔhanle ɛhye a, na kɛmɔ yemɔ a ɛvolɛ ne anu ɔle Sɛlɛvolɛ Kpanyinli la, ɛnee ɔlɛka mɔɔ Nyamenle ɛye ɛhile ye la kɛ ɔwɔ kɛ Gyisɛse wu maa Dwuuma amuala,

⁵²yɛɛ tɛ Dwuuma angome bɔbɔ, na kɛ ɔkɛva Nyamenle amra mɔɔ ɛde ɛkponde ewiade amuala la kɔsɔɔti ɔkarabɔ nu ɔkɛyɛ bɛ menli ko.

⁵³Ɔvi kenle ko zɔhane, Dwuu mgbanyima ne mɔ yɛle ngyehyɛlɛ kɛ ɔwɔ kɛ bɛku Gyisɛse.

⁵⁴Yemɔti Gyisɛse anye ɔ nwo anlua Dwudiya maanzinli ne anu, na ɔvile ɛkɛ ne ɔhɔle ɛleka bie mɔɔ bikye ɛsɛlɛ ne azo la, wɔ sua bie mɔɔ bɛfɛlɛ ye Yifelaem la azo; ɛkɛ ne yɛɛ ɔ nee ye ɛdoavolɛma ne dɛnlanle a.

⁵⁵Dwuuma Akpabɛnwo Ɛvoyia ne ɛbikye, na menli dɔɔnwo vi namunamu ne mɔ azo ɛra Gyɛlusalɛm kɛ bɛbanlua bɛ nwo kolaa na ɛvoyia ne adwu.

⁵⁶Mekɛ ne anu ɛnee bɛlɛkpondɛ Gyisɛse, yemɔti mɔɔ bɛyiale Ɛzonlenlɛ Sua ne anu la, bɛbizebizale bɛ nwo kɛ, “Kɛ ɔde ɛ? Asoo ɔkɛhola ɛvoyia ye bie ba ɔ?”

⁵⁷Sɛlɛvolɛ mgbanyima ne nee Falasiima ɛva ɛdo gua kɛ saa awie biala ze ɛleka mɔɔ Gyisɛse vea la a, ɔraha, amaa bɛahɔhye ye.