Read Nzema Dw 12 Bible Online

Dw 12 - Nzema bible

Dw 12

¹Mɔɔ ɔhale kenle nsia na Akpabɛnwo Ɛvoyia ne adwu la, Gyisɛse hɔle Bɛtani. Bɛtani a Lazalɛse vi a. Lazalɛse ɛhye a wule mɔɔ Gyisɛse dunwuele ye la.

²Bɛdole Gyisɛse ɛkponle wɔ ɛkɛ ne, na Maata boka bɛdabɛ mɔɔ bɛzonlenle la anwo, yɛɛ Lazalɛse noko nee Gyisɛse a de ɛkponle ne anwo a.

³ Mɛle vale nwole evuanlɛ bie mɔɔ ye bolɛ yɛ se kpalɛ na bɛfɛlɛ ye “naade” la toba kpole ko mɔɔ kɛyɛ litili ko la rawolale guale Gyisɛse agyakɛ anwo, na ɔvale ɔ ti enrinli ɔkyikyile. Nwole ne evuanlɛ vale sua ne anu amuala.

⁴Gyisɛse ɛdoavolɛma ne anu ko, mɔɔ bɛfɛlɛ ye Dwudase Yesekaleɔto mɔɔ yele Gyisɛse manle la hanle kɛ,

⁵“Duzu ati a bɛandɔne nwole ye kɛyɛ dwɛtɛ fufule ɛya nsa na bɛanva ezukoa ne bɛamboa ehyianvolɛma ɛ?”

⁶Tɛ kɛ asɛɛ ɔdwenle ehyianvolɛma anwo somaa la ati a ɔhanle ɛhye a, na ɔle awule, eza kɛmɔ ɔdaye a ɔsie bɛ gya ne la, ɔyɛ a ɔto ɔ sa nu.

⁷Na Gyisɛse zele kɛ, “Bɛgyakyi raalɛ ne! Me ɛzielɛ ti a yeyɛ ɛhye a.

⁸ Bɛmɛ bɛ nee ehyianvolɛma de dahuu, na mame bɛ nee me ɛnrɛdɛnla dahuu.”

⁹Dwuuma dɔɔnwo kpalɛ dele kɛ Gyisɛse wɔ Bɛtani la, bɛhɔle ɛkɛ ne. Tɛ Gyisɛse angome ati a bɛhɔle a, na eza bɛhɔle kɛ bɛkanlea Lazalɛse mɔɔ Gyisɛse dwazole ye vile ewule nu la.

¹⁰Zɔhane ati sɛlɛvolɛ mgbanyinli ne mɔ vale adwenle kɛ bɛku Lazalɛse noko,

¹¹ɔluakɛ ɔdaye ɔ ti yɛɛ Dwuuma dɔɔnwo ɛlɛgyakyi bɛ mgbanyima dɛba ne anzi ɛlilɛ na bɛalie Gyisɛse bɛali a.

¹²Aleɛ hyenle la menli dɔɔnwo mɔɔ rale Akpabɛnwo Ɛvoyia ne ɛlilɛ ne bie la dele kɛ Gyisɛse ɛlɛba Gyɛlusalɛm.

¹³ Yemɔti bɛvale mrɛlakɛ bɛhɔyiale ye adenle, bɛdeɛdeanle nu kɛ, “Bɛye Nyamenle ayɛlɛ![6] Nyamenle ɛyila mɔɔ lua Awulae duma nu ɛlɛba la! Nyamenle ɛyila Yizilayɛ belemgbunli ne!”

¹⁴Gyisɛse dɛnlanle asoaso zo, kɛmɔ Nyamenle Edwɛkɛ ne se la. Ɔse,

¹⁵ “Suakpole Zayɔn, mmasulo! Wɔ belemgbunli ne de asoaso zo ɛlɛba.”

¹⁶Mekɛ ne anu ye ɛdoavolɛma ne ande ɛhye abo; na mɔɔ bɛdwazole Gyisɛse anyunlunyia nu bɛvile ewule nu la, bɛhakyele kɛ Nyamenle Edwɛkɛ ne ɛha ɛhye wɔ ɔ nwo, na bɛmɛ yɛɛ bɛyɛle ɛhye bɛmanle ye a.

¹⁷Menli mɔɔ ɛnee wɔ ɛkɛ ne a Gyisɛse vɛlɛle Lazalɛse vile ye nla ne anu, na ɔdwazole ye ɔvile ewule nu la hɔhanle mɔɔ bɛnwunle ye la.

¹⁸Ɛhye ati menli dɔɔnwo rayiale ye adenle, ɔboalekɛ bɛdele kɛ ɔdaye a yeyɛ nwanwane sɛkɛlɛneɛ mɔɔ le zɛhae la a.

¹⁹Na Falasiima ne hanle hilele bɛ nwo kɛ, “Bɛnwu kɛ yɛangola ɛhwee yɛ ɛ! Nea kɛ ewiade amuala ɛdu doa ye ɛ!”

²⁰Gilikima bie boka menli mɔɔ hɔle Gyɛlusalɛm kɛ bɛkazonle la anwo wɔ mekɛ mɔɔ bɛdi ɛvoyia ne la.

²¹Bɛrale Felepe anwo ɛkɛ ne na bɛzele ye kɛ, “Yɛmenle, yɛkulo kɛ yɛnwu Gyisɛse.” (Felepe vi Bɛteseeyeda mɔɔ wɔ Galeli maanzinli nu la.)

²²Felepe hɔhanle hilele Andelu, na bɛ mu nwiɔ bɛhɔhanle bɛhilele Gyisɛse.

²³Gyisɛse buale kɛ, “Mekɛ akee ɛdwu kɛ bɛkɛwula medame Sonla Ra anyunlunyia kpole a.

²⁴Meka nɔhalɛ ne meahile bɛ: Abɛlɛ ma ko anwo ɛnrɛzo dɔɔnwo kyesɛ bɛdua na ɔkpɔlɔ. Saa ɔkpɔlɔ a, ɔfifi na ɔso ma dɔɔnwo.

²⁵ Mɔɔ ye ngoane hyia ye la baminli ye, na mɔɔ ye ngoane ɛngyia ye wɔ ewiade ɛhye anu la banyia ngoane mɔɔ ɛnlɛ awieleɛ.

²⁶Awie mɔɔ kpondɛ kɛ ɔsonle me la ɔwɔ kɛ toa me bo zo, amaa ɛleka mɔɔ mewɔ la, me sonvolɛ ne ɔdaye yeara ɛkɛ ne, yɛɛ Egya bawula mɔɔ sonle me la anyunlunyia.

²⁷“Nyane ɛha me kpole; na duzu edwɛkɛ a menga a? Asoo menga ye kɛ, ‘Egya, mmamaa mekɛ zɔhane to me’ ɔ? Kyɛkyɛ, ɛhye ala ati a membale a; membale kɛ meba mearazɔ nyane sa wɔ zɔhane mekɛ ne anu.

²⁸Egya, maa anyunlunyia ɛha wɔ duma ne.” Ɔhanle ɛhye la, ɛnelɛ bie vi anwuma zele kɛ, “Mewula ye anyunlunyia dɛba, na mebawula ye bieko.”

²⁹Ɛlɔne mɔɔ gyi ɛkɛ ne la dele ɛnelɛ ne na bɛhanle kɛ, “Ɔhulule kɛ ezule!” Bie mɔ noko hanle kɛ, “Nyamenle soanvolɛ ɛdendɛ ɛhile ye!”

³⁰Na Gyisɛse zele bɛ kɛ, “Tɛ me ti a ɛnelɛ ɛhye rale a, na bɛdabɛ bɛ ti ɔ.

³¹Mekɛ ɛdwu mɔɔ akee ɔwɔ kɛ bɛbua ewiade ndɛne a; akee bɛbadu Seetan mɔɔ sie ɛtane ewiade ɛhye la bɛavi ɛkɛ.

³²Na mame, saa bɛmaa me zo wɔ azɛlɛ ye azo a, mebahwe menli kɔsɔɔti meamaa me nwo.”

³³(Ɔhanle ɛhye ɔvale ɔhilele ewule holɛ ko mɔɔ ɔbawu la.)

³⁴ Ɛlɔne ne bizale ye kɛ, “Yɛ mɛla ne ka kile yɛ kɛ Mɛzaya ne ɛnrɛwu ɛlɛ. Na duzu ati a ɛse ɔwɔ kɛ bɛmaa Sonla Ra ne zo a? Nwane a le Sonla Ra ɛhye?”

³⁵Gyisɛse buale kɛ, “Wienyi ne nee bɛ badɛnla mekɛ ekyi. Yemɔti bɛva wienyi ne bɛhɔdwu, amaa awozinli anva bɛ, ɔluakɛ mɔɔ dua awozinli nu la ɛnnwu ɛleka mɔɔ ɔlɛkɔ la.

³⁶Zɔhane ati bɛlie wienyi ne bɛli wɔ mekɛ mɔɔ ɔ nee bɛ de la, amaa bɛayɛ wienyi nu menli.” Gyisɛse hanle ɛhye la, ɔhɔveale.

³⁷Ɔluakɛ yeyɛ nwanwane sɛkɛlɛneɛ dɔɔnwo ɛhye mɔ yemaa bɛnwu bɛ ɛdeɛ, noko bɛanlie ye bɛanli,

³⁸ amaa mɔɔ Nyamenle kpɔmanvolɛ Ayezaya hanle la ayɛ nɔhalɛ kɛ, “Awulae, na awie liele wɔ edwɛkɛ ne mɔɔ yɛhanle la lile ɔ? Na Awulae yele ye tumi ne hilele awie ɔ?”

³⁹Yemɔti bɛangola bɛanlie Gyisɛse bɛanli, ɔboalekɛ Ayezaya eza hanle kɛ,

⁴⁰ “Nyamenle ɛzi bɛ nye na yemaa bɛsolo, amaa bɛ nye annwu debie na bɛ nzo ade edwɛkɛ, na bɛahakyi bɛara me nwo kɛ menyɛ bɛ ayile.”

⁴¹Ayezaya hanle ɛhye, ɔluakɛ ɔnwunle Gyisɛse anyunlunyia ne dɛba yɛɛ ɔhanle ɔ nwo edwɛkɛ a.

⁴²Noko bɔbɔ, Dwuu mgbanyima ne mɔ anu dɔɔnwo liele Gyisɛse lile; na Falasiima ati bɛangola nwolɛ edwɛkɛ ka bagua nu anrɛɛ bɛkɛye bɛ ali bɛkɛvi nyianu sua ne anu.

⁴³Bɛkulo menli nganvolɛ bɛtɛla Nyamenle nganvolɛ.

⁴⁴Gyisɛse manle ɔ ne zo hanle kɛ, “Sonla mɔɔ die me di la ɛnlie me ngome ɛnli na ɔdie mɔɔ zoanle me la noko ɔdi.

⁴⁵Mɔɔ ɛnwu me la ɛnwu mɔɔ zoanle me la.

⁴⁶Mera kɛ mame a mele ewiade wienyi ne a, amaa mɔɔ kɛlie me kɛli la anga awozinli nu.

⁴⁷Sonla mɔɔ kɛde me edwɛkɛ ne na yeanli zolɛ la, menrɛbua ye ewule fɔlɛ. Meamba kɛ mebabua ewiade ewule fɔlɛ; membale kɛ mebalie ye.

⁴⁸Na mɔɔ kɛkpo me na yeanlie me edwɛkɛ ne la lɛ mɔɔ babua ye ewule fɔlɛ a. Edwɛkɛ ne mɔɔ meha la yɛɛ babua ye ewule fɔlɛ wɔ mekɛ ne mɔɔ li awieleɛ la a.

⁴⁹Ɔle zɔhane, ɔboalekɛ tɛ medame me tumi zo a medua metendɛ a. Selɛ ne mɔɔ zoanle me la a kile me mɔɔ ɔwɔ kɛ meka la a;

⁵⁰yɛɛ meze kɛ ye edwɛkɛ ne maa sonla ngoane mɔɔ ɛnlɛ awieleɛ. Yemɔti mɔɔ Selɛ ne ɛha ɛhile me la, yemɔ yɛɛ meka a.”