Read Nzema Dw 13 Bible Online

Dw 13 - Nzema bible

Dw 13

¹Gyisɛse nwunle kɛ akee mekɛ ɛdwu mɔɔ ɔwɔ kɛ ɔfi ewiade ɛhye anu na ɔkɔ Selɛ ne anwo lɔ a. Mekɛ ne anu ɛnee aleɛ kye a bɛkɛli Akpabɛnwo Ɛvoyia ne. Yehulo bɛdabɛ mɔɔ bɛle ye ɛdeɛ wɔ ewiade ye anu la dahuu, yɛɛ yehulo bɛ yehɔ awieleɛ.

²Gyisɛse nee ye ɛdoavolɛma ne dɛnlanle aze nɔsolɛ nu kɛ bɛdi debie. Abɔnsam noko ɛbɔ kpɔkɛ ɛwie kɛ ɔwɔ kɛ Dwudase, Saemɔn Yesekaleɔto ara ne ye Gyisɛse maa.

³Gyisɛse ze kɛ Selɛ ne ɛmaa ye tumi bɔkɔɔ; ɔze kɛ ɔdaye Gyisɛse, ɔvi Nyamenle anwo lɔ a ɔrale a na eza ɔbazia yeahɔ Nyamenle anwo lɔ.

⁴Yemɔti ɔvile ɛkponle ne anwo ɔdwazole, ɔkpale ɔguale, na ɔvale tohulu ɔpɛle ɔ bo.

⁵Akee ɔvale nzule ɔguale kyɛnze kpole bie anu na ɔbɔle ɔ bo kɛ ɔnrinzi ye ɛdoavolɛma ne agyakɛ anwo. Ɔnrinzi ɔwie a ɛnee yeva tohulu ne mɔɔ pɛ ɔ bo la yekyikyi.

⁶Ɔradwule Saemɔn Pita anwo zo la, Pita bizale Gyisɛse kɛ, “Awulae, na akee wɔmɔ yɛɛ ɛnrinzi me gyakɛ anwo a?”

⁷Gyisɛse buale ye kɛ, “Ɛnrɛde mɔɔ melɛyɛ la abo kɛkala, na nzinlii ɛbade ɔ bo.”

⁸Pita zele ye kɛ, “Menrɛmaa ɛnrɛnrinzi me gyakɛ anwo kenle bie maanle nu!” Gyisɛse buale ye kɛ, “Saa meanrinzi ɛ gyakɛ anwo a ɛnee ɛnle me ɛdoavolɛ bieko.”

⁹Saemɔn Pita zele ye kɛ, “Awulae, ɛnee noko mmanrinzi me gyakɛ anwo ala! Nrinzi me sa anwo nee me ti zo amuala noko!”

¹⁰Gyisɛse zele ye kɛ, “Mɔɔ ɛbia la anwo le bɔkɔbɔkɔ na ɔngyia kɛ ɔkɛbia bieko. Debie mɔɔ ɔwɔ kɛ ɔyɛ la a le kɛ ɔnrinzi ɔ gyakɛ anwo ala. Bɛ muala bɛ nwo le bɔkɔbɔkɔ. Sonla ko ala yɛɛ anwo ɛnle bɔkɔbɔkɔ a.”

¹¹Ɛnee Gyisɛse ze sonla mɔɔ baye ye amaa la, ɛhye ati a ɔhanle kɛ, “Bɛ muala bɛ nwo le bɔkɔbɔkɔ, sonla ko ala a anwo ɛnle bɔkɔbɔkɔ a.”

¹² Gyisɛse wiele bɛ gyakɛ anwo nrinzi la, ɔwulale ye tɛladeɛ ne na ɔziale ɔhɔdɛnlanle ɔ bo zo ne wɔ ɛkponle ne anwo, na ɔbizale bɛ kɛ, “Asoo bɛte mɔɔ meyɛ ye kɛkala la abo?

¹³Bɛfɛlɛ me Kilehilevolɛ nee Awulae, na ɔle kpalɛ kɛ bɛkɛvɛlɛ me zɔhane a, ɔluakɛ mele zɔhane.

¹⁴Mele bɛ Awulae nee bɛ Kilehilevolɛ, noko menrinzinrinzi bɛ gyakɛ anwo. Bɛdabɛ noko bɛnrinzinrinzi bɛ gyakɛ anwo ngoko ngoko.

¹⁵Meyɛ ndonwo ɛhye mehile bɛ, amaa bɛdabɛ noko bɛayɛ ye zɔhane ala.

¹⁶ Meka nɔhalɛ meahile bɛ: Akɛlɛ biala ɛnle kpole ɛndɛla ɔ menle; soanvolɛ biala ɛnle kpole ɛndɛla ahenle mɔɔ zoanle ye la,

¹⁷Kɛkala mɔɔ bɛnwu nɔhalɛ ɛhye la, saa bɛfa bɛyɛ gyima a bɛkɛli fɛlɛko kpole!

¹⁸ “Tɛ bɛ muala bɛ nwo edwɛkɛ a melɛka a; meze mɔɔ mekpa nu meye bɛ la. Na Nyamenle Edwɛkɛ ne mɔɔ se, ‘Sonla ne mɔɔ nee me di nee me no la hakyile ɔ nzi zile me’ la ɔwɔ kɛ yɛ zɔhane.

¹⁹Meka ɛhye meahile bɛ kɛkala kolaa na yeazi, amaa saa ɔsi a, bɛalie bɛali kɛ ‘Medame a le Medame’,

²⁰ Meka nɔhalɛ ne meahile bɛ: Awie mɔɔ kɛlie awie biala mɔɔ menwɔzoa ye la ɛlie medame noko, yɛɛ mɔɔ kɛlie me la ɛlie ahenle mɔɔ zoanle me la.”

²¹Gyisɛse hanle ɛhye la, ɛnee akee nyane ɛha ye kpole kpalɛ, na ɔhanle ɔdole gua kɛ, “Meka nɔhalɛ ne meahile bɛ: Bɛdabɛ, bɛ nuhua ko baye me amaa.”

²²Ɛhye yɛle ɛdoavolɛma ne azibɛnwo kpole na bɛnleɛnleanle bɛ nyunlu.

²³Ɛnee ɛdoavolɛ ne mɔɔ Gyisɛse kulo ye edwɛkɛ la de Gyisɛse anwo ɛkɛ ne.

²⁴Yemɔti Saemɔn Pita bɔle ɔ nye hilele ye kɛ, “Biza ye ahenle mɔɔ ɔlɛka ɔ nwo edwɛkɛ la.”

²⁵Ɛdoavolɛ ne hwenle bikyele Gyisɛse na ɔbizale ye kɛ, “Awulae, ɛnee nwane ɔ?”

²⁶Gyisɛse buale kɛ, “Saa mebu kpanwo ne mebɔ subue ne anu na mɔɔ menwɔva menwɔmaa ye la, yemɔ ɔ.” Yemɔti Gyisɛse bule kpanwo ne ekyi, ɔvale ɔbɔle subue ne anu na ɔvale ɔmanle Dwudase, Saemɔn Yesekaleɔto ara ne.

²⁷Dwudase liele kpanwo ne la yɛɛ Seetan wolole ye a. Gyisɛse zele ye kɛ, “Ka ɛ nwo yɛ mɔɔ ɛyɛ la.”

²⁸Awie biala mɔɔ de ɛkponle ne anwo la ande mɔɔ Gyisɛse hanle hilele Dwudase la abo.

²⁹Kɛmɔ Dwudase a ɛnee nea bɛ gya zo la ati, ɛdoavolɛma ne bie mɔ dwenlenle kɛ Gyisɛse ɛzoa ye kɛ ɔhɔtotɔ ninyɛne mɔɔ bɛbahyia nwolɛ wɔ ɛvoyia ne ɛlilɛ nu la, anzɛɛ yeha yehile ye kɛ ɔva debie ɔhɔmaa ehyianvolɛma.

³⁰Dwudase liele kpanwo ne la, ndɛndɛ ne ala ɔvindele; na ɛnee aleɛ ɛdwo.

³¹Dwudase vindele la, Gyisɛse hanle kɛ, “Akee bɔ zo mɔɔ medame Sonla Ra, me anyunlunyia ne ɛla ali a; bɛbalua me nwo zo bɛaye Nyamenle anyunlunyia ne bɛahile.

³²Na saa bɛdua me nwo zo bɛye Nyamenle anyunlunyia ne bɛkile a, Nyamenle ɔdaye ɔbaye medame Sonla Ra ne noko, me anyunlunyia ne yeahile, na ɔbayɛ ɛhye ndɛndɛ ne ala.

³³ Me mra, me nee bɛ ɛnrɛdɛnla ɛnrɛhyɛ. Bɛbakpondɛ me, na mɔɔ menganle mengilele Dwuu mgbanyima ne mɔ la yɛɛ meka meahile bɛdabɛ noko a. ‘Bɛnrɛhola ɛleka mɔɔ melɛkɔ la kɔ’.

³⁴ Memaa bɛ mɛla fofolɛ: Bɛhulo bɛ nwo ngoko ngoko. Kɛ mezi mehulo bɛ la, zɔhane ala yɛɛ bɛhulo bɛ nwo ngoko ngoko a.

³⁵Saa bɛkulo bɛ nwo ngoko ngoko a yɛɛ awie biala kɛnwu kɛ bɛle me ɛdoavolɛma a.”

³⁶Saemɔn Pita bizale ye kɛ, “Awulae, na nienwu a ɛkɔ a?” Gyisɛse buale ye kɛ, “Kɛkala, ɛleka mɔɔ melɛkɔ la, ɛnrɛhola me toa, na nzinlii ɛbadoa me lɔ.”

³⁷Pita bizale ye kɛ, “Awulae, duzu ati a menrɛhola wɔ toa kɛkala ɛ? Meziezie me nwo kɛ saa ewule bɔbɔ a menwɔwu menwɔmaa wɔ.”

³⁸Gyisɛse buale ye kɛ, “Amgba wɔboɔboa ɛ nwo kɛ ɛkɛwu ɛkɛmaa me ɔ? Meka nɔhalɛ ne meahile wɔ: Akɔlɛ kabɔ la ɛnee wɔha ye fane nsa kɛ ɛnze me.”