Read Nzema Dw 14 Bible Online

Dw 14 - Nzema bible

Dw 14

¹Gyisɛse zele bɛ kɛ, “Bɛmmamaa bɛ rɛle bɔ na bɛdi nyane. Bɛlie Nyamenle bɛli na bɛlie medame noko bɛli.

²Egya awuke nu ɛkɛ ne, azua ngome; mekɔ meahɔziezie ɛleka meamaa bɛ. Saa ɔnle zɔhane a anrɛɛ menrɛha menrɛhile bɛ.

³Saa mekɔ na mesiezie ɛleka memaa bɛ a, mebara bieko na mearava bɛ meahɔ me nwo lɔ, amaa bɛadɛnla ɛleka mɔɔ mewɔ la.

⁴Bɛdabɛ bɛze adenle ne mɔɔ kɔ ɛleka mɔɔ melɛkɔ la.”

⁵Tɔmase bizale ye kɛ, “Awulae, yɛnze ɛleka mɔɔ ɛlɛkɔ la; na kɛ ɔkɛyɛ na yɛanwu adenle ne mɔɔ kɔ ɛkɛ ne la ɛ?”

⁶Gyisɛse buale ye kɛ, “Mame a mele adenle ne, nɔhalɛ ne, nee ngoane ne a; awie biala ɛnrɛhola Selɛ ne ɛkɛ ne kɔ kyesɛ ɔdua me nwo zo.”

⁷Ɔvale ɔzɔle zo kɛ, “Saa bɛze me a anrɛɛ bɛze Egya noko, yɛɛ ɔvi ɛnɛ mɔɔ kɔ la, bɛnwu ye yɛɛ bɛze ye.”

⁸Felepe hanle kɛ, “Awulae, kile yɛ Selɛ ne; mɔɔ yɛkpondɛ la ala ɛne.”

⁹Gyisɛse buale ye kɛ, “Felepe, yemɔti mekɛ tendenle ye mɔɔ me nee bɛ muala ɛdɛnla la bɛnze me? Awie mɔɔ ɛnwu me la ɛnwu Selɛ ne. Duzu ati a akee ɛbiza me kɛ, ‘Kile yɛ Selɛ ne ɛ?’

¹⁰Felepe, na ɛnlie ɛnli kɛ mede Selɛ ne nu yɛɛ Selɛ ne de me nu ɔ?” Gyisɛse akee hanle hilele ye ɛdoavolɛma ne amuala kɛ, “Edwɛkɛ mɔɔ meha mehile bɛ la ɛnle me ti anwo edwɛkɛ. Selɛ ne mɔɔ de me nu la a yɛ ye gyima a.

¹¹Bɛlie me bɛli kɛ mede Selɛ ne nu yɛɛ Selɛ ne de me nu. Saa tɛ ye zɔhane a, ɛnee gyima mɔɔ meyɛ la ati, bɛlie me bɛli.

¹²Meka nɔhalɛ ne meahile bɛ: Awie mɔɔ kɛlie me kɛli la kɛyɛ gyima mɔɔ meyɛ la bie, yɛɛ ɔbayɛ mɔɔ tɛla ɛhye mɔ la bɔbɔ, ɔluakɛ melɛkɔ Selɛ ne anwo lɔ,

¹³yɛɛ mɔɔ bɛkɛbiza ye biala wɔ me duma nu la, mebayɛ, amaa bɛalua Ralɛ ne anwo zo bɛaye Selɛ ne anyunlunyia bɛahile.

¹⁴Saa bɛbiza debie biala wɔ me duma nu a, mebayɛ.

¹⁵“Saa bɛkulo me a, bɛbali me mɛla ne mɔ azo.

¹⁶Mebabiza Selɛ ne meamaa yeamaa bɛ Boavolɛ fofolɛ, na ɔ nee bɛ aradɛnla dahuu.

¹⁷Boavolɛ zɔhane, yemɔ a le Sunsum ne mɔɔ baye nɔhalɛ ne mɔɔ fane Nyamenle anwo la ahile bɛ la. Ewiade ɛnrɛhola ɛnrɛlie ye, ɔboalekɛ ɔnrɛnwu ye yɛɛ ɔnze ye. Na bɛmɛ bɛze ye, ɔluakɛ ɔ nee bɛ a de a yɛɛ ɔde bɛ nu.

¹⁸“Saa mekɔ a, menrɛgyakyi bɛ nrisa; mebara bɛ nwo bieko.

¹⁹Ɔnrɛhyɛ biala ɛnee ewiade ɛnnwu me bieko, na bɛmɛ, bɛbanwu me, na kɛmɔ mede ngoane nu la, bɛdabɛ noko bɛbadɛnla ngoane nu.

²⁰Saa mekɛ zɔhane dwu a bɛkɛnwu kɛ mede Egya nu na bɛdabɛ noko bɛde me nu, na medame mede bɛ nu la.

²¹“Awie biala mɔɔ kɛlie me mɛla ne mɔ na ɔkɛli zolɛ la, yemɔ a kulo me a. Egya bahulo awie biala mɔɔ kulo me la, na medame noko mebahulo ye na meaye me nwo meahile ye.”

²²Dwudase (tɛ Dwudase Yesekaleɔto ɔ) bizale ye kɛ, “Awulae, duzu ati a ɛye ɛ nwo wɔahile yɛ na ɛnrɛye ɛ nwo ɛnrɛhile ewiade ɛ?”

²³Gyisɛse buale ye kɛ, “Awie biala mɔɔ kulo me la bali me ngilehilelɛ zo. Egya bahulo ye, na me nee Egya yɛbara ɔ nwo ɛkɛ yɛ nee ye aradɛnla.

²⁴Mɔɔ ɛngulo me la ɛnli me ngilehilelɛ zo. Edwɛkɛ ne mɔɔ bɛde la ɛnvi me ɛkɛ ne, ɔvi Selɛ ne mɔɔ zoanle me la ɛkɛ.

²⁵“Mekɛ mɔɔ me nee bɛ de ala ye yɛɛ meha ɛhye mehile bɛ la o!

²⁶Boavolɛ ne, mɔɔ le Sunsum Nwuanzanwuanza ne, mɔɔ Selɛ ne bazoa ye wɔ me duma nu la, barahilehile bɛ debie biala, na yeamaa bɛahakye mɔɔ meha mehile bɛ la amuala.

²⁷“Anzonudwolɛ a mefa megyakyi bɛ a; medame me anzonudwolɛ a mefa megyakyi bɛ a. Menva memmaa bɛ kɛmɔ ewiade fa maa la. Bɛmmamaa bɛ rɛle bɔ na bɛdi nyane; bɛmmasulo noko.

²⁸Bɛdele kɛ meha kɛ, ‘Melɛkɔ na mebara bieko.’ Saa bɛhulole me a, anrɛɛ bɛ nye ɛlie kɛ melɛkɔ Selɛ ne anwo lɔ a, ɔboalekɛ yemɔ, ɔle kpole ɔtɛla me.

²⁹Kɛkala meha ɛhye mehile bɛ, kolaa na yeazi, amaa saa ɔsi a, bɛalie bɛali.

³⁰Menrɛhola me nee bɛ ɛnrɛdendɛ ɛnrɛhyɛ dɔɔnwo biala, ɔboalekɛ mɔɔ sie ɛtane ewiade ɛhye la ɛlɛba. Ɔnlɛ me nwo zo tumi ɛdeɛ,

³¹noko ɔwɔ kɛ ewiade nwu kɛ mekulo Selɛ ne; yemɔti meyɛ debie biala mɔɔ ɔkɛze me la. “Bɛdwazo bɛmaa yɛhɔ.”