Read Nzema Dw 17 Bible Online

Dw 17 - Nzema bible

Dw 17

¹Gyisɛse wiele ɛhye ka la, ɔnleanle anwuma na ɔhanle kɛ, “Egya, mekɛ ne ɛdwu. Wula Ɛ Ra anyunlunyia na maa Ralɛ ne ɛwula wɔ anyunlunyia.

²Ɔluakɛ wɔmaa ye menli kɔsɔɔti anwo zo tumi, amaa yeava ngoane mɔɔ ɛnlɛ awieleɛ la yeamaa menli mɔɔ wɔva bɛ wɔmaa ye la.

³Ngoane mɔɔ ɛnlɛ awieleɛ la a le kɛ bɛkɛnwu kɛ wɔmɔ a ɛle nɔhalɛ Nyamenle kokye ne a, na bɛkɛnwu Gyisɛse Kelaese, mɔɔ wɔzoa ye la.

⁴Mehile wɔ anyunlunyia ne wɔ azɛlɛ ye azo; mewie gyima mɔɔ ɛvale ɛmanle me la di.

⁵Egya, fa me anyunlunyia maa me, anyunlunyia ne mɔɔ bɛkabɔ ewiade ye la ɛnee melɛ ye la, fa maa me wɔ ɛ nyunlu ɛke kɛkala.

⁶“Mela wɔ ali[7] mehile menli mɔɔ ɛvale bɛ ɛvile ɛtane ewiade ye anu ɛmanle me la. Ɛnee bɛle wɔ ɛdeɛ, yɛɛ ɛvale bɛ ɛmanle me a. Bɛli wɔ edwɛkɛ ne azo,

⁷na kɛkala bɛnwu kɛ debie biala mɔɔ ɛvale ɛmanle me la vi wɔ ɛkɛ.

⁸Nrɛlaleɛ mɔɔ ɛvale ɛmanle me la, meva memaa bɛ, yɛɛ bɛzɔ nu noko; bɛze kɛ ɔle nɔhalɛ kɛ mevi ɛ nwo lɔ a membale a, yɛɛ bɛdie bɛdi kɛ ɛdawɔ a ɛzoanle me a.

⁹“Mesɛlɛ meamaa bɛ. Menzɛlɛ memmaa ɛtane ewiade ye. Mesɛlɛ meamaa menli mɔɔ ɛvale bɛ ɛmanle me la, ɔboalekɛ bɛle wɔ ɛdeɛ.

¹⁰Mɔɔ melɛ la le wɔ ɛdeɛ, yɛɛ mɔɔ ɛlɛ la amuala le me ɛdeɛ; na bɛ nwo zo yɛɛ me anyunlunyia dua da ali a.

¹¹Kɛkala melɛba ɛ nwo lɔ; menle ewiade ye anu bieko, na bɛmɛ bɛwɔ ewiade ye anu. Selɛ Nwuanzanwuanza, wɔ duma ne mɔɔ ɛvale ɛmanle me la tumi nu ti, fa bɛ sie gyɛlɛɛnye, amaa bɛayɛ ko kɛ ɛdawɔ nee medame yɛle la.

¹² Mɔɔ ɛnee me nee bɛ de la, menziele bɛ gyɛlɛɛnye wɔ wɔ duma ne mɔɔ ɛvale ɛmanle me la tumi nu. Membɔle bɛ nwo bane, na ko bɔbɔ amminli, kyesɛ kokye ne, Dwudase musuofoɔ ala mɔɔ ɔwɔ kɛ minli la, amaa Nyamenle Edwɛkɛ ne ayɛ nɔhalɛ.

¹³Kɛkala melɛba ɛ nwo lɔ, yɛɛ melɛka ɛhye mɔ noko wɔ ewiade ye anu, amaa bɛ nye alie me nwo kpole wɔ bɛ ahonle nu.

¹⁴Meha wɔ nrɛlaleɛ ne mehile bɛ, yemɔti ɛtane ewiade ɛhye kpɔ bɛ, ɔboalekɛ bɛnle ɛtane ewiade ye ɛdeɛ, kɛmɔ menle ɛtane ewiade ye ɛdeɛ la.

¹⁵Membiza kɛ ɛye bɛ ɛvi ewiade ye anu, mesɛlɛ kɛ ɛkɛzie bɛ gyɛlɛɛnye ɛkɛvi amumuyɛnli Seetan asa anu.

¹⁶Kɛmɔ menle ɛtane ewiade ɛdeɛ la, bɛdabɛ noko bɛnle ye ɛdeɛ.

¹⁷Dua nɔhalɛ ne azo te bɛ nwo na fa bɛ yɛ wɔ ɛdeɛ; wɔ edwɛkɛ ne a le nɔhalɛ ne.

¹⁸Mezoa bɛ wɔ ewiade ye anu, kɛmɔ ɛzoanle me wɔ ewiade ye anu la;

¹⁹yɛɛ ɔlua bɛ ti medu me nwo memaa wɔ, amaa bɛdabɛ noko bɛadu bɛ nwo nɔhalɛ nu bɛamaa wɔ.

²⁰“Menzɛlɛ memmaa bɛ ngome. Mesɛlɛ meamaa bɛdabɛ noko mɔɔ wɔ edwɛkɛ ne ati bɛdie me bɛdi la.

²¹Mesɛlɛ kɛ bɛ muala bɛkɛyɛ ko. Egya! Maa bɛdɛnla yɛ nu, kɛmɔ ɛde me nu na medame mede wɔ nu la. Maa bɛyɛ ko, amaa ewiade amra alie ali kɛ amgba ɛdawɔ a ɛzoanle me a.

²²Anyunlunyia ne mɔɔ ɛvale ɛmanle me la meva zɔhane ala bie memaa bɛ, amaa bɛayɛ ko, kɛmɔ ɛdawɔ nee medame yɛle ko la;

²³maa mendɛnla bɛ nu, na ɛdawɔ noko tɛnla me nu, amaa bɛayɛ ko kpalɛ kpalɛ, na ewiade amra anwu kɛ ɛdawɔ a ɛzoanle me a, na ɛkulo bɛ kɛmɔ ɛkulo me la.

²⁴“Egya! Wɔva bɛ wɔmaa me, na mekpondɛ kɛ bɛ nee me tɛnla ɛleka mɔɔ mewɔ la, amaa bɛanwu me anyunlunyia ne mɔɔ ɛvale ɛmanle me la, ɔluakɛ ɛhulole me kolaa na bɛabɔ ewiade ye.

²⁵Pɛlepɛlelilɛ Egya! Ɛtane ewiade ye ɛnze wɔ, na mame meze wɔ, yɛɛ ɛhye mɔ ze kɛ ɛdawɔ a ɛzoanle me a.

²⁶Mela wɔ ali mehile bɛ na mebahɔ zo meayɛ ye zɔhane, amaa ɛhulolɛ ne mɔɔ ɛlɛ ye me nwo la adɛnla bɛ nu, na medame noko meadɛnla bɛ nu.”