Read Nzema Dw 2 Bible Online

Dw 2 - Nzema bible

Dw 2

¹Ye kenle nwiɔ ne anzi bɛliele atɔfolɛ bie wɔ Kana sua zo, wɔ Galeli maanzinli nu. Gyisɛse ɔ nli wɔ ɛkɛ ne bie,

²yɛɛ bɛdole ɛsalɛ bɛvɛlɛle Gyisɛse nee ye ɛdoavolɛma ne mɔ noko.

³Mɔɔ bɛnlonle nwanye ne na ɔwiele la, Gyisɛse ɔ nli zele ye kɛ, “Bɛ nwanye ɛwie.”

⁴Gyisɛse buale ye kɛ, “Ɔmɔ, mmaka mɔɔ ɔwɔ kɛ meyɛ la ɛkile me, me mekɛ ɛtɛdwule.”

⁵Gyisɛse ɔ nli zele sonvolɛma ne mɔ kɛ, “Mɔɔ ɔkɛha ɔkɛhile bɛ biala la, bɛyɛ.”

⁶Dwuuma lɛ ɛzonlenlɛ nu ngyehyɛlɛ bie mɔɔ fane ɛnluanlɛ nwo. Debie zɛhae ati bolɛ dwora nsia wɔ awuke ne anu, ko biala kola di nzule litili ɛya ko.

⁷Gyisɛse zele soanvolɛma ne mɔ kɛ, “Bɛsesa nzule bɛgua dwora ne mɔ anu bɛmaa bɛyi tetɛkɛɛ.” Na bɛyɛle ye zɔhane.

⁸Ɔhanle ɔhilele bɛ kɛ, “Akee bɛza nzule ne bie bɛhɔmaa mɔɔ ɛlɛnea atɔfolɛlielɛ ne azo la.” Bɛzale bie bɛhɔle,

⁹na ɔzɔle nzule ne mɔɔ ɛnee ɛhakyi nwanye la bie ɔnleanle la, ɛnee ɔngola ɔnnwu ɛleka mɔɔ nwanye ne vi a (sonvolɛma ne mɔ mɔɔ sesale nzule ne la bɛmɛ bɛze); yemɔti ɔvɛlɛle atɔfolɛ nrenya ne

¹⁰na ɔzele ye kɛ, “Awie biala die atɔfolɛ a, ɔdumua ɔye ye nwanye kpalɛ ne ɔfinde, na mɔɔ bɛkɛbo ekyii la akee yeava nwanye mɔɔ anwo ɛngyia la yeara. Na wɔ ɛdeɛ ne, yeanyɛ zɔhane. Wɔva kpalɛ ne wɔzie dedee yeradwu bekezɛ!”

¹¹Gyisɛse yɛle nwanwane gyima ɛhye mɔɔ lumua la wɔ Kana mɔɔ wɔ Galeli la; ɛkɛ ne yɛɛ ɔyele ye anyunlunyia ne ɔhilele a, na ye ɛdoavolɛma ne mɔ liele ye lile.

¹² Ɛhye anzi, Gyisɛse nee ɔ nli, ɔ mediema ne mɔ, yɛɛ ye ɛdoavolɛma ne mɔ hɔle Kapɛnayɛm hɔdɛnlanle ɛkɛ ne mekɛ ekyi.

¹³ Ɛnee Dwuuma Akpabɛnwo Ɛvoyia ne asɛɛ ɛdwu, yemɔti Gyisɛse hɔle Gyɛlusalɛm.

¹⁴Ɔhɔdole kɛ menli ɛlɛdi nlankɛ, mboane, yɛɛ mɔlɔnoma gua wɔ Ɛzonlenlɛ Sua ne anu, na eza menli dede ɛkponle nwo ɛlɛsenza ezukoa.

¹⁵Gyisɛse vale nyɛma yɛle empele na ɔvale ɔvoanle nane ne mɔ, mboane nee nlankɛ kɔsɔɔti, ɔvile Ɛzonlenlɛ Sua ne anu; akee ɔbutubutule ɛkponle ne mɔ mɔɔ bɛlɛfa bɛazenza ezukoa la ɔmanle ezukoa ne zandele sua ne anu,

¹⁶na ɔzele bɛdabɛ mɔɔ bɛtɔne mɔlɔnoma ne la kɛ, “Bɛva bɛ bɛvinde! Bɛmmafa Egya sua ne bɛyɛ gua nu!”

¹⁷ Ye ɛdoavolɛma ne hakyele kɛ Nyamenle Edwɛkɛ ne ɛha ɛdo ɛkɛ ne kɛ, “Nyamenle, wɔ sua ne anwo ɛhulolɛ sɔ kɛ senle la wɔ me nu.”

¹⁸Dwuu mgbanyima ne mɔ ziale rale na bɛrabizale ye kɛ, “Duzu nwanwane nyɛleɛ yɛɛ ɛkɛhola ɛkɛyɛ ɛkɛhile kɛ ɛlɛ adenle ɛyɛ ɛhye mɔ a?”

¹⁹ Gyisɛse buale kɛ, “Bɛbubu Ɛzonlenlɛ Sua ɛhye bɛgua na mebava kenle nsa meazi ye bieko.”

²⁰Bɛbizale ye kɛ, “Ɛzonlenlɛ Sua ɛhye mɔɔ yɛvale ɛvolɛ abulanla nee nsia a yɛzile la, wɔmɔ ɛfa kenle nsa wɔazi?”

²¹Na Ɛzonlenlɛ Sua ne mɔɔ ɛnee Gyisɛse ɛlɛka nwolɛ edwɛkɛ la a le ɔdaye mumua ne ye sonlabaka ne.

²²Yemɔti mɔɔ bɛdwazole ye bɛvile ewule nu la, ye ɛdoavolɛma ne hakyele kɛ yeha ɛhye ɛlɛ, na bɛliele Nyamenle Edwɛkɛ ne nee mɔɔ Gyisɛse hanle la noko bɛlile.

²³Akpabɛnwo Ɛvoyia ne anu ɛnee Gyisɛse wɔ Gyɛlusalɛm, na bɛdabɛ dɔɔnwo mɔɔ bɛnwunle gyima mgbole mɔɔ ɔlile la liele ye lile.

²⁴Na Gyisɛse anva ɔ nwo ando awie biala anwo zo, ɔboalekɛ ɔze bɛ kɔsɔɔti kpalɛ.

²⁵Yeangyia kɛ awie kɛha sonla nwo edwɛkɛ kɛhile ye, ɔboalekɛ ɔdaye mumua ne ɔze mɔɔ wɔ sonla biala ahonle nu la.