Read Nzema Dw 20 Bible Online

Dw 20 - Nzema bible

Dw 20

¹Molɛ nwonlomɔ mangyee ne ala mɔɔ maanle nu ɛtɛwiele tete la, Mɛle mɔɔ vi Magedala la hɔle sɛka ne azo na ɔnwunle kɛ bɛye bolɛ ne mɔɔ bɛvale bɛnyinle nla ne anloa la.

²Ɔnriandile ɔhɔbɔle Saemɔn Pita nee ɛdoavolɛ ne mɔɔ Gyisɛse kulo ye edwɛkɛ la amaneɛ kɛ, “Bɛye Awulae wɔ nla ne anu bɛhɔ, na yɛnnwu ɛleka mɔɔ bɛhɔdo ye a.”

³Pita nee ɛdoavolɛ ko ne hɔle hɔnleanle nla ne.

⁴Bɛ mu nwiɔ bɛlɛkɔ la bɛlɛ ɛnriandilɛ, na ɛdoavolɛ ɛhendeɛ ne nriandile ndɛndɛ dɛlale Pita na ɔhɔdwule sɛka ne azo.

⁵Ɔhanle ɔ nwo aze ɔnleanle nla ne anu la ɔnwunle kɛ kisane ne mɔ gua nu, na yeandwu nu.

⁶Saemɔn Pita vi amozi rale, na ɛkɛ ne ala ɔdwule nla ne anu. Ɔnwunle kɛ kisane ne

⁷yɛɛ ɛdanlɛ ne mɔɔ bɛvale bɛzɔle Gyisɛse ada la gua ɛkɛ. Bɛ muala bɛngua ɛleka ko. Bɛbubu ɛdanlɛ ne bɛgua ɔ ngome.

⁸Akee ɛdoavolɛ ne mɔɔ lumuale dwule sɛka ne azo la ɔdaye ɔdwule nla ne anu; ɔnwunle ɛhye mɔ na ɔliele ɔlile.

⁹(Ɛnee bɛtɛtele Nyamenle Edwɛkɛ ne abo kɛ ɔse ɔwɔ kɛ ɔdwazo ɔfi ewule nu.)

¹⁰Na ɛdoavolɛma nwiɔ ne hɔle sua nu.

¹¹Mɛle hale sɛka ne azo zunle. Mɔɔ ɔsu la, ɔnleanle nla ne anu.

¹²Na ɔnwunle Nyamenle soanvolɛma nwiɔ mɔɔ wula adɛladeɛ fufule la kɛ bɛde ɛleka mɔɔ anrɛɛ Gyisɛse funli ne la la, ko de ɔ ti sɔlɔ yɛɛ ko de ɔ gyakɛ anu.

¹³Bɛbizale ye kɛ, “Ɔmɔ, duzu ati a ɛlɛsu a?” Ɔbuale bɛ kɛ, “Bɛrava me Awulae bɛhɔ, na mennwu ɛleka mɔɔ bɛhɔdo ye a.”

¹⁴Ɔhanle ɛhye la ɔhakyile ɔ nwo na ɔnwunle kɛ Gyisɛse gyi ɛkɛ, noko yeannwu ye sonla holɛ.

¹⁵Gyisɛse bizale ye kɛ, “Ɔmɔ, duzu ati a ɛlɛsu a? Nwane a ɛkpondɛ ye a?” Ɛnee Mɛle dwenle kɛ ahenle ne mɔɔ gyi ɔ nyunlu ɛkɛ ne la a le sonla ne mɔɔ nea tola ne azo la ati, ɔzele ye kɛ, “Yɛmenle, saa ɛdawɔ yɛɛ ɛrayele ye ɛhɔle a, ka na kile me ɛleka mɔɔ ɛhɔdole ye la maa mengɔnva.”

¹⁶Gyisɛse vɛlɛle ye, “Mɛle!” Ɔhakyile ɔ nye wɔ ɔ nwo ɛkɛ ne na ɔhanle ye Hibulu nu kɛ, “Labonae!” (Ɔ bo a le “Kilehilevolɛ”)

¹⁷Gyisɛse zele ye kɛ, “Mmasɔ me, ɔboalekɛ metɛkɔle Selɛ ne anwo lɔ. Na wɔmɔ kɔ na kɔze me mediema ne mɔ kɛ, ‘Melɛkɔ Egya nee bɛ Ze ne, me Nyamenle nee bɛ Nyamenle ne anwo lɔ.’ ”

¹⁸Zɔhane ati Mɛle mɔɔ vi Magedala la hɔle na ɔhɔhanle ɔhilele ɛdoavolɛma ne kɛ yenwu Awulae na yeva zɛhae nrɛlaleɛ yemaa ye.

¹⁹Molɛ kenle ko ne ala mɔɔ ɛnee aleɛ ɛdwo kpalɛ la, ɛnee ɛdoavolɛma ne ɛhuohua bɛ nloa na bɛdo bɛ nwo anlenkɛ nu, ɔboalekɛ bɛsulo Dwuu mgbanyima ne mɔ. Gyisɛse ragyinlanle bɛ avinli na ɔzele bɛ kɛ, “Anzonudwolɛ ɛha bɛ.”

²⁰Ɔhanle ɛhye la, ɔvale ɔ sa nee ɔ nvenle ɔhilele bɛ. Ɛdoavolɛma ne anye liele kpole kɛ bɛnwu Awulae a.

²¹Na Gyisɛse zele bɛ bieko kɛ, “Anzonudwolɛ ɛha bɛ. Kɛmɔ Selɛ ne zoanle me la, zɔhane ala yɛɛ medame noko mesoa bɛ a.”

²²Akee ɔliele ɛnwomenle ɔguale bɛ nwo zo na ɔhanle kɛ, “Bɛlie Sunsum Nwuanzanwuanza ne.

²³ Saa bɛfa awie ɛtane bɛkyɛ ye a, ɛnee bɛva bɛhyɛ ye; saa bɛanva bɛangyɛ ahenle a, bɛnrɛva bɛnrɛhyɛ ye.”

²⁴Ɛdoavolɛma bulu nee nwiɔ ne anu ko mɔɔ bɛfɛlɛ ye Tɔmase (mɔɔ eza bɛfɛlɛ ye Nda) la, ɛnle ɛkɛ ne a Gyisɛse rale a.

²⁵Yemɔti ɛdoavolɛma mɔɔ hale la hanle hilele ye kɛ, “Yɛnwu Awulae!” Tɔmase zele bɛ kɛ, “Saa metɛnwunle ɔ sa nu pɛlɛko ne mɔɔ bɛbɔle ye la abo zo kapenle ne, metɛfale me sa metɛfuale kapenle ne, na metɛfale me sa metɛkanle ɔ nvenle kapenle ne a, menrɛlie menrɛli.”

²⁶Ɔlile dapɛne ko la ɛdoavolɛma ne mɔ eza huohuanle bɛ nloa na bɛdole bɛ nwo anlenkɛ nu bieko, mekɛ ne anu ɛnee Tɔmase boka bɛ nwo. Bɛtotole nlenkɛ ne mɔ anu ɛdeɛ, noko Gyisɛse ragyinlanle bɛ avinli na ɔzele bɛ kɛ, “Anzonudwolɛ ɛha bɛ.”

²⁷Akee ɔzele Tɔmase kɛ, “Tɔmase, fa ɛ sa bɛla ɛke na nea me sa nu; tenrɛ ɛ sa fua me nvenle. Gyakyi wɔ kpolerazulɛ ne na die di!”

²⁸Tɔmase buale kɛ, “Me Awulae nee me Nyamenle!”

²⁹Gyisɛse zele ye kɛ, “Wɔnwu me la ati yɛɛ wɔlie wɔli a? Nyilalɛ ɛha bɛdabɛ mɔɔ bɛtɛnwunle me na bɛlie bɛli la!”

³⁰Gyisɛse yɛle nwanwane ninyɛne dɔɔnwo mɔɔ ye ɛdoavolɛma ne mɔ nwunle bɛ, mɔɔ bɛangɛlɛ bɛ wɔ buluku ɛhye anu a.

³¹Mɔɔ bɛhɛlɛ ye wɔ ɛke la, bɛhɛlɛ amaa bɛalie bɛali kɛ Gyisɛse a le Mɛzaya ne mɔɔ le Nyamenle Ara ne la, na ɔlua bɛ diedi mɔɔ bɛlɛ ye wɔ ye nu la azo bɛanyia ngoane.