Read Nzema Dw 21 Bible Online

Dw 21 - Nzema bible

Dw 21

¹Ɛhye anzi, Gyisɛse eza yele ɔ nwo hilele ɛdoavolɛma ne wɔ Taebilease Tandane ne anloa. Kɛ ɔyɛle la ɛne:

²Saemɔn Pita, Tɔmase, mɔɔ bɛfɛlɛ ye Nda, Natanayɛle, mɔɔ vi Kana mɔɔ wɔ Galeli maanzinli nu la, Zɛbɛdi amra ne mɔ, yɛɛ Gyisɛse ɛdoavolɛma gyɛne nwiɔ, bɛ muala bɛwɔ ɛkɛ.

³ Saemɔn Pita zele bɛ kɛ, “Mekɔ azule zo.” Bɛzele ye kɛ, “Yɛ nee wɔ kɔ.” Zɔhane ati bɛ muala bɛhɔvale ɛlɛne na bɛhɔle, na nɔe ne amuala bɛyɛle biala na bɛangye fɛlɛ.

⁴Mɔɔ sɛnzɛne ne ɛlɛba aradudu la, Gyisɛse ragyinlanle tandane ne anloa, noko ɛdoavolɛma ne annwu kɛ ɔdaye ɔ.

⁵Na ɔbizale bɛ kɛ, “Mgbavolɛ ye mɔ, bɛhyele fɛlɛ ɔ?” Bɛbuale ye kɛ, “Yɛannyia debie!”

⁶ Gyisɛse zele bɛ kɛ, “Bɛdo bɛ avonle ne wɔ bɛ sa fema zo ɛkɛ ne, na bɛkɛhye bie.” Amgba bɛdole avonle ne bɛ fema zo, na fɛlɛ ngome mɔɔ bɛhyele la ammaa bɛangola avonle ne twehwe gua ɛlɛne ne anu.

⁷Ɛdoavolɛ ne mɔɔ Gyisɛse kulo ye edwɛkɛ la hanle hilele Pita kɛ, “Awulae ɔ.” Saemɔn Pita dele kɛ Awulae la, ɔvale ye anwuma tɛladeɛ ne ɔwulale (ɔluakɛ ɛnee yekpa yegua) na ɔwulule ɔdɔle azule ne anu ɔweɛle ɔrale file zo.

⁸Ɛdoavolɛma ne mɔ mɔɔ hale la vale ɛlɛne ne radwule aze, bɛhwenle avonle ne mɔɔ fɛlɛ ɛyi ye tɔ la bɛrale. Ɛnee bɛ nee aze anwa biala, ɔkɛyɛ abɛsamu abulanlu.

⁹Mɔɔ bɛdwule aze la, bɛnwunle kɛ bɛva emunlike bɛwuda senle na fɛlɛ gua zo yɛɛ kpanwo noko wɔ ɛkɛ.

¹⁰Gyisɛse zele bɛ kɛ, “Bɛva fɛlɛ ne mɔɔ bɛhye bɛ kɛkala la bie bɛrɛla.”

¹¹Saemɔn Pita hɔle ɛlɛne ne anu na ɔhɔhwehwenle avonle ne ɔrale file zo, fɛlɛ mgbole ɛya ko abulanlu nee nsa ɛyi ye tɛkɛɛ! Bɛhyele fɛlɛ dɔɔnwo, noko avonle ne anye ko bɔbɔ ande.

¹²Gyisɛse zele bɛ kɛ, “Bɛrɛla bɛrali debie.” Ɛdoavolɛma ne anu biala angola ambiza ye kɛ, “Na ɛdawɔ a le nwane?” Ɔluakɛ bɛze kɛ Awulae ɔ.

¹³Na Gyisɛse hɔvale kpanwo ne, na ɔbubule ɔmanle bɛ; eza ɔhɔvale fɛlɛ ne, na ɔyɛle ye zɔhane ala.

¹⁴Ɛhye a tɔ zolɛ nsa mɔɔ Gyisɛse yele ɔ nwo hilele ye ɛdoavolɛma ne mɔ wɔ mekɛ mɔɔ bɛdwazole ye bɛvile ewule nu la a.

¹⁵Bɛwiele debie di la, Gyisɛse zele Saemɔn Pita kɛ, “Dwɔn ara Saemɔn, asoo ɛkulo me kpalɛ ɛtɛla ɛhye mɔ?” Pita buale ye kɛ, “Ɛhɛe, Awulae, ɛze kɛ mekulo wɔ.” Gyisɛse zele ye kɛ, “Nea me mboane mralɛ ne mɔ boɛ.”

¹⁶Gyisɛse eza bizale Pita kɛ, “Dwɔn ara Saemɔn, asoo ɛkulo me?” Pita buale kɛ, “Ɛhɛe, Awulae, ɛze kɛ mekulo wɔ.” Gyisɛse zele ye kɛ, “Nea me mboane ne mɔ boɛ.”

¹⁷Fane nsa ne azo eza Gyisɛse bizale Pita kɛ, “Dwɔn ara Saemɔn, asoo ɛkulo me?” Nyane hanle Pita kɛ Gyisɛse ɛbiza ye fane nsa kɛ, “Asoo ɛkulo me?” a, na ɔbuale ye kɛ, “Awulae ɛze debie biala; ɛze kɛ mekulo wɔ.” Gyisɛse zele ye kɛ, “Nea me mboane ne mɔ boɛ.

¹⁸Meka nɔhalɛ ne meahile wɔ: Mekɛ mɔɔ ɛle kpavolɛ la, ɛnee ɛdawɔ ɛkola ɛmaa ɛ nwo zo ɛkɔ ɛleka biala mɔɔ ɛkulo la, na saa ɛyɛ kpanyinli a, ɛbadenrɛ ɛ sa na awie akyekye bɛ na yeava wɔ yeahɔ ɛleka mɔɔ ɛngulo kɛ ɛkɔ la.”

¹⁹(Gyisɛse hanle ɛhye hilele adenle holɛ ko mɔɔ Pita balua zo awu awula Nyamenle anyunlunyia la.) Akee Gyisɛse zele Pita kɛ, “Bɛla maa yɛhɔ!”

²⁰Pita hakyile ɔ nwo na ɔnwunle kɛ ɛdoavolɛ ko ne mɔɔ Gyisɛse kulo ye edwɛkɛ la doa bɛ. Ɛdoavolɛ ɛhye ala a mekɛ mɔɔ bɛdi aleɛ ne la, ɔhwenle ɔbikyele Gyisɛse na ɔbizale ye kɛ, “Awulae, nwane a baye wɔ amaa?” la.

²¹Pita nwunle ye la ɔbizale Gyisɛse kɛ, “Awulae, na nrenya ɛhye ɛ?”

²²Gyisɛse buale ye kɛ, “Saa mekulo kɛ ɔtɛnla aze kɔkpula kɛ menwɔra la a, ɔle wɔ edwɛkɛ ɔ? Wɔmɔ baze maa yɛhɔ!”

²³Yemɔti edwɛkɛ ne dendenle dwule Gyisɛse ɛdoavolɛma ne mɔ amuala anzo nu kɛ ɛdoavolɛ ɛhye ɛnrɛwu ɛlɛ. Noko Gyisɛse anga ye zɔhane. Ɔse, “Saa mekulo kɛ ɔtɛnla aze kɔkpula kɛ menwɔra la a, ɔle wɔ edwɛkɛ ɔ?”

²⁴Ɛdoavolɛ zɔhane a le ɛdoavolɛ ne mɔɔ ɛlɛka edwɛkɛ ɛhye mɔ la, yemɔ noko ala a eza hɛlɛle a, na yɛze kɛ mɔɔ yeha la le nɔhalɛ.

²⁵Akee ninyɛne dɔɔnwo wɔ ɛkɛ ne mɔɔ Gyisɛse yɛle a. Saa bɛhɛlɛle bɛ muala ngoko ngoko a anrɛɛ menea a nwolɛ mbuluku ɛnrɛzo ewiade ye amuala anu.