Read Nzema Dw 4 Bible Online

Dw 4 - Nzema bible

Dw 4

¹Falasiima ne dele kɛ Gyisɛse ɛlɛnyia menli dɔɔnwo azɔne bɛ, yeava bɛ yeayɛ ɛdoavolɛma adɛla Dwɔn.

²(Nɔhalɛ mɔɔ wɔ nu la a le kɛ Gyisɛse ɔdaye mumua ne yeanzɔne awie biala; ye ɛdoavolɛma ne mɔ a zɔnenle menli a.)

³Yemɔti mɔɔ Gyisɛse dele mɔɔ bɛlɛkeha la, ɔvile Dwudiya ɔziale ɔhɔle Galeli.

⁵ Ɔradwule Samɛlea sua bie mɔɔ bɛfɛlɛ ye Saekaa la azo. Ɛkɛ ne nee ɛleka mɔɔ Gyekɔbo vale ye azɛlɛ ne manle ɔ ra Dwosefi la anwa biala.

⁶Gyekɔbo bula ne wɔ ɛkɛ ne ala, na kɛmɔ ɛnee Gyisɛse ɛvɛ la ati, ɔdɛnlanle bula ne azo. Mekɛ ne kɛyɛ sɛnzɛngyinla.

⁷Samɛlea raalɛ bie rale kɛ ɔbado bula ne bie, na Gyisɛse zele ye kɛ, “Maa me nzule ne bie meno.”

⁸(Mekɛ ne anu ɛnee ye ɛdoavolɛma ne ɛhɔ sua zo kadɔ aleɛ.)

⁹ Raalɛ ne buale ye kɛ, “Ɛle Dwuunli, mele Samɛleanli. Kɛ ɔyɛ mɔɔ ɛlɛsɛlɛ me nzule ɛ?” (Dwuunli ɛnrɛva ɔ sa ɛnrɛha ɛyɛba anzɛɛ dwora mɔɔ Samɛleanli ɛli nu anzɛɛ ɛnlo nu la ɛlɛ.)

¹⁰Gyisɛse buale kɛ, “Saa ɛze kɛ Nyamenle ahyɛlɛdeɛ ne si de, nee ahenle mɔɔ ɛlɛsɛlɛ wɔ nzule ne la a, anrɛɛ wɔbiza ye wɔmaa yemaa wɔ ngoane nzule.”

¹¹Raalɛ ne zele kɛ, “Yɛmenle, na ɛnlɛ bokiti, yɛɛ bula ye noko anu kɔ. Na ɛnee nienwu yɛɛ ɛnyia ngoane nzule ne a?

¹²Yɛ nlenya Gyekɔbo a manle yɛ bula ɛhye a, yɛɛ yemɔ, ɔ mra yɛɛ ye nyɛmoa nlonle nuhua nzule. Na ɛkpondɛ wɔaha kɛ wɔmɔ ɛle sonlakpole ɛtɛla Gyekɔbo ɔ?”

¹³Gyisɛse buale kɛ, “Awie biala mɔɔ no nzule ɛhye bie la, nzuhɔne bahu ye bieko,

¹⁴na mɔɔ kɛnlo nzule ne mɔɔ mebava meamaa ye la bie la, nzuhɔne ɛnrɛhu ye ɛlɛ. Nzule ne mɔɔ mebava meamaa ye la bahakyi nzubula wɔ ye nu mɔɔ bamaa ye ngoane nzule nee ngoane mɔɔ ɛnlɛ awieleɛ a.”

¹⁵Raalɛ ne buale kɛ, “Yɛmenle, maa me nzule ɛhye bie maa meno na nzuhɔne angu me bieko na eza meara ɛke kɛ mebaza nzule.”

¹⁶Gyisɛse zele ye kɛ, “Kɔvɛlɛ ɛ hu na ɛ nee ye bɛrɛla.”

¹⁷Raalɛ ne buale kɛ, “Mengya nrenya.” Gyisɛse zele ye kɛ, “Saa ɛse ɛngya nrenya a ɛnee ɛle nɔhalɛ.

¹⁸Ɔluakɛ ɛdawɔ mumua ne wɔhɔ agyalɛ nnu, yɛɛ nrenya ne bɔbɔ mɔɔ ɛ nee ye de kɛkala la, tɛ ɛ hu ɔ. Wɔha nɔhalɛ bɔkɔɔ.”

¹⁹Raalɛ ne zele kɛ, “Yɛmenle, menea wɔ a ɛle Nyamenle kpɔmanvolɛ.

²⁰Me nlenya mɔ Samɛleama zonlenle Nyamenle wɔ boka ye azo, na bɛmɛ Dwuuma bɛse Gyɛlusalɛm ala a le ɛleka mɔɔ ɔwɔ kɛ bɛsonle Nyamenle a.”

²¹Gyisɛse zele ye kɛ, “Ɔmɔ, die me di, mekɛ bara mɔɔ menli ɛnrɛzonle Selɛ ne wɔ boka ye azo anzɛɛ wɔ Gyɛlusalɛm a.

²²Nɔhalɛ, bɛmɛ Samɛleama, bɛnze mɔɔ bɛsonle ye la, na yɛmɛ Dwuuma, yɛze mɔɔ yɛsonle ye la. Ɔboalekɛ ngoanelielɛ kɛra a ɔvi Dwuuma.

²³Na mekɛ ne ɛlɛba, yɛɛ yedwu bɔbɔ, mɔɔ ɛzonlenlɛma kpalɛ ne bazonle Selɛ ne wɔ sunsum nu nee nɔhalɛ nu a. Ɔluakɛ kɛ Selɛ ne kpondɛ kɛ bɛsonle ye la ɛne.

²⁴Nyamenle le Sunsum, yemɔti ɔwɔ kɛ bɛdabɛ mɔɔ bɛsonle ye la bɛsonle ye wɔ sunsum nu nee nɔhalɛ nu.”

²⁵Raalɛ ne hanle kɛ, “Meze kɛ Mɛzaya ne mɔɔ bɛfɛlɛ ye Kelaese ne la bara. Saa ɔba a, ɔbaha mɔɔ ɔwɔ ɛkɛ ne la amuala yeahile yɛ.”

²⁶Gyisɛse buale ye kɛ, “Medame a me nee wɔ ɛlɛtendɛ la.”

²⁷Mekɛ ne anu ala yɛɛ Gyisɛse ɛdoavolɛma ne ziale rale a, na ɔyɛle bɛ azibɛnwo kpole kɛ ɔ nee raalɛ ɛlɛtendɛ a. Na bɛ nuhua biala angola ambiza raalɛ ne kɛ, “Duzu yɛɛ ɛkpondɛ a?” na bɛabiza Gyisɛse kɛ, “Duzu ati a ɛ nee raalɛ ne ɛlɛtendɛ a?”

²⁸Na raalɛ ne gyakyile ye nzule buakɛ ne ɛkɛ, ɔziale ɔhɔle na ɔhɔhanle ɔhilele sua ne azo amra kɛ,

²⁹“Bɛrɛla bɛranlea awie bie mɔɔ ɛha debie biala mɔɔ meyɛ la ɛhile me a. Asoo tɛ yemɔ a ɔle Mɛzaya ne?”

³⁰Yemɔti menli dule twi, bɛvi sua ne azo bɛrale ɛleka mɔɔ Gyisɛse wɔ la.

³¹Mekɛ ne anu ɛnee ɛdoavolɛma ne gua zo ɛlɛkpa Gyisɛse kyɛlɛ kɛ, “Kilehilevolɛ, bakpula ɛ sa!”

³²Na ɔbuale bɛ kɛ, “Melɛ aleɛ medi mɔɔ bɛnze a.”

³³Yemɔti ɛdoavolɛma ne mɔ bɔle ɔ bo kɛ bɛbizebiza bɛ nwo kɛ, “Ɛnee awie ɛrɛlɛ ye aleɛ ɔ?”

³⁴Gyisɛse zele bɛ kɛ, “Me aleɛ a le kɛ menwɔli mɔɔ zoanle me la ɛhulolɛdeɛ zo na menwɔwie gyima mɔɔ ɔvale ɔmanle me kɛ menyɛ la yɛ.

³⁵Bɛmɛ bɛse, ‘Yeha siane nna na ɛbuhenle ne adwu.’ Na meka meahile bɛ kɛ bɛdo bɛ nye bɛnlea ɛya nu lɔ boɛ; nzoleɛ ɛbolo, na yedwu mɔɔ ɔwɔ kɛ bɛbu a.

³⁶Mɔɔ bu bɛyɔba ne la bɛtua ye kakɛ na ɔsoa nzoleɛ ne ɔkɔ ngoane mɔɔ ɛnlɛ awieleɛ la anu, amaa mɔɔ dua nee mɔɔ bu la abɔ nu ali fɛlɛko.

³⁷Ɛrɛlɛ ne le nɔhalɛ bɔkɔɔ, ‘Ko dua na ko bu.’

³⁸Mezoa bɛ kɛ bɛhɔva bɛyɔba wɔ ɛya mɔɔ bɛanyɛ nuhua gyima la anu; awie mɔ gyɛne a yɛle nuhua gyima a, na bɛmɛ, bɛnyia menli zɔhane mɔ anwo nvasoɛ.”

³⁹Samɛleama dɔɔnwo mɔɔ wɔ sua ne azo la liele Gyisɛse lile, ɔboalekɛ raalɛ ne lile daselɛ kɛ, “Yeha debie biala mɔɔ meyɛ la yehile me.”

⁴⁰Yemɔti mɔɔ Samɛleama rale Gyisɛse anwo ɛkɛ ne la, bɛzɛlɛle ye kɛ ɔ nee bɛ ɛradɛnla, na ɔ nee bɛ dɛnlanle kenle nwiɔ.

⁴¹Bie mɔ dɔɔnwo noko liele ye lile wɔ ɔ nloa edwɛkɛ ti,

⁴²na bɛhanle bɛhilele raalɛ ne kɛ, “Kɛkala, tɛ mɔɔ ɛhanle la ati yɛɛ ɛmaa yɛlie ye yɛli a. Yɛlie ye yɛli, ɔluakɛ yɛdayɛ noko yɛde ɔ nloa edwɛkɛ yɛ nzo nu na yɛnwu kɛ amgba yemɔ a ɔle ewiade Ngoanedievolɛ ne a.”

⁴³Gyisɛse lile kenle nwiɔ wɔ ɛkɛ ne la, ɔvile ɛkɛ ne na ɔhɔle Galeli,

⁴⁴ ɔluakɛ Gyisɛse ɔdaye mumua ne yeha ye ɛlɛ kɛ, “Nyamenle kpɔmanvolɛ biala ɛnlɛ ɔ nyunlu wɔ ɔdaye ye maanle nu.”

⁴⁵ Na mɔɔ ɔdwule Galeli la, menli mɔɔ wɔ ɛkɛ ne la liele ye gyɛlɛɛnye, ɔluakɛ Akpabɛnwo Ɛvoyia ne mɔɔ bɛlile wɔ Gyɛlusalɛm la, bɛhɔle bie na bɛnwunle debie biala mɔɔ ɔyɛle wɔ ɛvoyia ne abo la.

⁴⁶ Akee Gyisɛse ziale hɔle Galeli sua ne mɔɔ bɛfɛlɛ ye Kana la azo bieko, ɛleka mɔɔ ɔhakyile nzule ne nwanye la. Arane abɔlɔba bie wɔ ɛkɛ mɔɔ ɔ ra wɔ Kapɛnayɛm na ɔnde kpɔkɛ a.

⁴⁷Ɔdele kɛ Gyisɛse vi Dwudiya ɛra Galeli la ɔhɔle ɔ nwo ɛkɛ ne na ɔzɛlɛle ye kɛ ɔmaa bɛhɔ Kapɛnayɛm na ɔhɔyɛ ɔ ra ne ayile, ɔluakɛ asɛɛ yewu.

⁴⁸Gyisɛse zele ye kɛ, “Bɛmɛ, bɛ biala ɛnrɛlie ɛnrɛli ɛlɛ kyesɛ bɛnwu nwanwane sɛkɛlɛneɛ mgbole bie.”

⁴⁹Abɔlɔba ne hanle kɛ, “Yɛmenle, mesɛlɛ wɔ, maa yɛhɔ na me ra ne kɛwu.”

⁵⁰Gyisɛse zele ye kɛ, “Kɔ na ɛ ra ne ɛde kpɔkɛ.” Nrenya ne liele Gyisɛse edwɛkɛ ne lile, na ɔhɔle.

⁵¹Ɔlua adenle zo mɔɔ ɔlɛkɔ la, ye sonvolɛma nee ye yiale na bɛhanle kɛ, “Ɛ ra ne ɛde kpɔkɛ.”

⁵²Ɔbizale bɛ mekɛ mɔɔ ɔ ra ne dele kpɔkɛ la, na bɛhanle kɛ, “Anoma ewiazo dɔne ko yɛɛ ɛyɛlɛyɛlɛ ne dule a.”

⁵³Nrenya ne hakyele kɛ zɔhane mekɛ ne anu ala yɛɛ Gyisɛse hanle hilele ye kɛ, “Ɛ ra ne ɛde kpɔkɛ” a. Yemɔti ɔ nee ye sua nu amra amuala liele lile.

⁵⁴Ɛhye a le nwanwane gyima kpole mɔɔ tɔ zolɛ nwiɔ mɔɔ Gyisɛse vi Dwudiya rale Galeli la ɔyɛle a.