Read Nzema Dw 5 Bible Online

Dw 5 - Nzema bible

Dw 5

¹Ɛhye anzi Gyisɛse hɔle Gyɛlusalɛm wɔ mekɛ mɔɔ ɛnee Dwuuma ɛlɛdi bɛ Nyamenle ɛzonlenlɛ ɛvoyia bie la.

²Wɔ Gyɛlusalɛm “Mboane Anuhɔlɛ” ne anloa, nzubula bie wɔ ɛkɛ ne, ɔlɛ kpɔda nnu wɔ nwolɛ, bɛfɛlɛ nzubula ne wɔ Hibulu aneɛ nu “Bɛtezata.”[1]

³Menli dɔɔnwo mɔɔ ɛnde kpɔkɛ la gugua kpɔda ne mɔ abo, anyenzinliravolɛma, abuburama, yɛɛ bɛdabɛ mɔɔ bɛ foa ko ɛdwe la amuala. [Bɛlɛkendɛ bɛamaa bɛakpoto azule ne,

⁴ɔboalekɛ ɔdwu mekɛ ne bie a, Nyamenle soanvolɛ dwu azule ne anu kpoto ye. Saa ɔyɛ ye zɔhane a, wuleravolɛ biala mɔɔ kɛlumua kɛhɔdɔ nuhua la anwo sa bɔkɔɔ.]

⁵Nrenya bie wɔ nzubula ne anloa mɔɔ ye ewule ne hanle ye la ye ɛvolɛ abulasa nee mɔtwɛ ɛ.

⁶Gyisɛse nwunle ye la, ɛnee yenwu kɛ ɔ nwo dole ye la ɛhyɛ kpalɛ; yemɔti ɔbizale ye kɛ, “Ɛkulo kɛ ɛte kpɔkɛ ɔ?”

⁷Nrenya ne buale kɛ, “Yɛmenle, menlɛ awie wɔ ɛke mɔɔ saa bɛkpoto azule ne a ɔfa me ɔto nu a; mekɛ biala mɔɔ menwɔbɔ mɔdenle kɛ mekadɔ nu la, ɛnee sonla fofolɛ ɛlumua me nyunlu ɛhɔdɔ nu.”

⁸Gyisɛse zele ye kɛ, “Dwazo, fa wɔ ɛkpa ne na kɔ.”

⁹Ɛkɛ ne ala nrenya ne dele kpɔkɛ; ɔvale ye ɛkpa ne na ɔhɔle. Kenle mɔɔ ɛhye zile la le Ɛnwomenlelielɛ Kenle.

¹⁰ Yemɔti Dwuu mgbanyima ne zɔle nrenya ne mɔɔ bɛyɛ ye ayile la nu na bɛzele ye kɛ, “Ɛnɛ le Ɛnwomenlelielɛ Kenle, yemɔti ɔtia yɛ mɛla ne kɛ ɛkɛzoa wɔ ɛkpa ne.”

¹¹Nrenya ne buale kɛ, “Sonla ne mɔɔ yɛle me ayile la a zele me kɛ, ‘Fa wɔ ɛkpa ne na kɔ’ a.”

¹²Bɛbizale ye kɛ, “Ɛnee nwane a ɔdaye yeze wɔ kɛ ɛva wɔ ɛkpa ne na ɛhɔ a?”

¹³Na nrenya ne mɔɔ bɛyɛ ye ayile ne la ɛnze Gyisɛse sonla holɛ, ɔluakɛ ɛnee menli dɔɔnwo wɔ ɛkɛ, yɛɛ Gyisɛse noko ɛvinde ɛhɔ.

¹⁴Nzinlii, Gyisɛse nwunle nrenya ne wɔ Ɛzonlenlɛ Sua ne anu na ɔzele ye kɛ, “Nea o, kɛkala wɔde kpɔkɛ. Gyakyi wɔ ɛtane ne mɔ anzi ɛlilɛ, anrɛɛ mɔɔ kɛzi ɛ nwo zo la kɛbo zolɛ.”

¹⁵Nrenya ne hɔle na ɔhɔhanle ɔhilele Dwuu mgbanyima ne mɔ kɛ Gyisɛse a yɛle ye ayile a.

¹⁶Ɛhye ati bɛbɔle ɔ bo kɛ bɛyɛ Gyisɛse kpɔdekpɔde kɛ yeyɛ ayile wɔ Ɛnwomenlelielɛ Kenle a.

¹⁷Gyisɛse buale bɛ kɛ, “Egya yɛ gyima kenle biala, yemɔti ɔwɔ kɛ medame noko meyɛ gyima.”

¹⁸Edwɛkɛ ɛhye akee manle Dwuu mgbanyima ne nyianle adwenle kɛ ɔwɔ kɛ bɛku ye bɛye ye ɛkɛ, ɔluakɛ tɛ kɛ yetia Ɛnwomenlelielɛ Kenle ne mɛla ne angome ɔ, na eza ɔse Nyamenle le Ɔ Ze, na ɔlua adenle ɛhye azo yehile kɛ ɔ nee Nyamenle bɛsɛ.

¹⁹Yemɔti Gyisɛse zele bɛ kɛ, “Meka nɔhalɛ ne meahile bɛ: Ralɛ ne angome ɛnli ɔ ti anwo ɛnyɛ debie biala; ɔyɛ mɔɔ ɔkɛnwu kɛ Selɛ ne ɛlɛyɛ la ala angome. Mɔɔ Selɛ ne yɛ la, yɛɛ Ralɛ ne ɔdaye ɔyɛ a.

²⁰Ɔluakɛ Selɛ ne kulo Ralɛ ne, yɛɛ ɔkile ye mɔɔ ɔdaye mumua ne ɔlɛyɛ la amuala. Ɔbahile ye ninyɛne mgbole bɔbɔ mɔɔ tɛla ɛhye mɔ la yeamaa yeayɛ, na ɔbayɛ bɛ muala azibɛnwo.

²¹Kɛmɔ Selɛ ne dwazo mɔwuamra na ɔmaa bɛ ngoane la, zɔhane ala yɛɛ Ralɛ ne ɔdaye ɔmaa awie biala mɔɔ ɔkulo kɛ ɔmaa ye ngoane la ngoane a.

²²Selɛ ne ɔdaye mumua ne ɔmbua awie ndɛne. Yemaa Ralɛ ne tumi biala kɛ ɔbua ndɛne,

²³amaa menli kɔsɔɔti ali Ralɛ ne eni, kɛmɔ bɛdi Selɛ ne eni la. Awie biala mɔɔ ɛnli Ralɛ ne eni la, ɛnli Selɛ ne mɔɔ zoanle ye la eni.

²⁴“Meka nɔhalɛ ne meahile bɛ: Mɔɔ kɛdie me edwɛkɛ na ɔkɛlie mɔɔ zoanle me la kɛli la lɛ ngoane mɔɔ ɛnlɛ awieleɛ. Bɛnrɛbua ye ndɛne, na ɔvi ewule nu yera ngoane nu.

²⁵Meka nɔhalɛ ne meahile bɛ: mekɛ ɛlɛba, yɛɛ yera bɔbɔ, mɔɔ mɔwuamra bade Nyamenle Ara ne ane, na bɛdabɛ mɔɔ bɛkɛde la bɛbadwazo bɛ bɛara ngoane nu.

²⁶Kɛmɔ Selɛ ne a le ngoanemaavolɛ la, zɔhane ala yɛɛ yeyɛ Ralɛ ne ngoanemaavolɛ a.

²⁷Eza yemaa Ralɛ ne tumi kɛ ɔbua ndɛne, ɔboalekɛ yemɔ a ɔle Sonla Ra ne a.

²⁸Bɛmmamaa ɛhye yɛ bɛ azibɛnwo; mekɛ ɛlɛba mɔɔ mɔwuamra amuala bade ɔ ne wɔ bɛ nla ne mɔ anu,

²⁹ na bɛvi bɛ nla ne mɔ anu bɛbavinde: bɛdabɛ mɔɔ bɛlile boɛ la badwazo na bɛanyia ngoane mɔɔ ɛnlɛ awieleɛ, na bɛdabɛ mɔɔ bɛlile ɛtane la badwazo na bɛabua bɛ ewule fɔlɛ.”

³⁰“Menva me tumi menyɛ debie biala; mebua me ndɛne kɛmɔ Nyamenle kɛze me la, yemɔti me ndɛnebualɛ ne le fɔɔnwo, ɔboalekɛ mempele menyɛ mɔɔ medame mekulo la, na meyɛ mɔɔ ahenle mɔɔ zoanle me la kpondɛ la.

³¹“Saa me ngome medi me nwo daselɛ a, mɔɔ menwɔha la bɛdie bɛto nu a ɔnyɛ boɛ.

³²Na awie ko wɔ ɛkɛ ne mɔɔ di me nwo daselɛ a, yɛɛ meze kɛ mɔɔ ɔka ye me nwo la le nɔhalɛ.

³³ Bɛzoanle menli bɛmanle bɛhɔle Dwɔn anwo ɛkɛ ne, na ɔhanle nɔhalɛ ne anwo edwɛkɛ ɔhilele bɛ.

³⁴Tɛ kɛ asɛɛ mekpondɛ sonla daselɛ la ati ɔ; meka ɛhye amaa bɛalie bɛ ngoane.

³⁵Dwɔn le kɛ kɛnlaneɛ la, ɔzɔle na ɔdale, noko bɛ nye liele ye wienyi ne anu mekɛ ekyi bie ala.

³⁶Melɛ dasevolɛ kpole bie mɔɔ ka me nwo edwɛkɛ kpalɛ tɛla mɔɔ Dwɔn hanle la. Gyima ne mɔɔ meyɛ, gyima ne mɔɔ Selɛ ne ɛva ɛmaa me kɛ menyɛ la, yemɔ a di me daselɛ kpalɛ na ɔkile kɛ Selɛ ne a zoanle me a.

³⁷ Eza Selɛ ne mɔɔ zoanle me la ɔdaye ɔdi me daselɛ. Bɛtɛtele ɔ ne ɛlɛ, yɛɛ bɛtɛnwunle ɔ nyunlu ɛlɛ.

³⁸Bɛnva ye edwɛkɛ ne bɛnzie bɛ ahonle nu, ɔluakɛ bɛnlie mɔɔ zoanle ye la bɛnli.

³⁹Bɛmɛ, bɛsukoa Nyamenle Edwɛkɛ ne, ɔluakɛ bɛdwenle kɛ nuhua yɛɛ bɛkɛnwu ngoane mɔɔ ɛnlɛ awieleɛ ne a. Nyamenle Edwɛkɛ mumua ne ɔdaye ɔka me nwo edwɛkɛ.

⁴⁰Noko akee bɛkpo kɛ bɛnrɛra me nwo ɛkɛ na bɛanyia ngoane.

⁴¹“Tɛ menli ayɛlɛyelɛ yɛɛ mekpondɛ a.

⁴²Bɛmɛ, meze bɛ, meze kɛ bɛnlɛ Nyamenle anwo ɛhulolɛ nretee zɛhae wɔ bɛ ahonle nu.

⁴³Egya tumi nu yɛɛ melua mɔɔ membale a, na bɛmɛ, bɛanlie me; na saa awie gyɛne ɔdaye ɔfa ye tumi ɔba a, bɛbalie ye.

⁴⁴Bɛkpondɛ kɛ bɛkanvo bɛ ngome bɛ nwo ngoko ngoko, na bɛmpele bɛnlie nganvolɛ bɛnvi Nyamenle kokye ne ɛkɛ ne, na ɛnee kɛ ɔkɛyɛ na bɛalie me bɛali ɛ?

⁴⁵Bɛmmadwenle nwolɛ kɛ mame a mebadoa bɛ meahile Egya a. Mosisi mɔɔ bɛ nye la ɔ nwo zo la a badoa bɛ a.

⁴⁶Saa bɛliele Mosisi bɛlile a anrɛɛ bɛlie medame noko bɛli; ɔboalekɛ ɔhɛlɛle me nwo edwɛkɛ.

⁴⁷Na kɛmɔ bɛnlie mɔɔ ɔhɛlɛle la bɛanli la, kɛ ɔkɛyɛ na bɛalie mɔɔ meka la bɛali ɛ?”