Read Nzema Dw 7 Bible Online

Dw 7 - Nzema bible

Dw 7

¹Ɛhye anzi, Gyisɛse hɔle akpɔsa wɔ Galeli maanzinli nu. Yeangulo kɛ ɔkɛhɔ Dwudiya, ɔluakɛ ɛnee Dwuu mgbanyima ne mɔ ɛlɛtɛ ye wɔ ɛkɛ ne ahu ye.

² Mɔɔ Dwuuma Belandane Bo Ɛdɛnlanlɛ Ɛvoyia ne bikyele la,

³Gyisɛse amediema mrenya ne mɔ zele ye kɛ, “Kɔ Dwudiya ɛ, amaa menli mɔɔ doa wɔ la anwu wɔ nwanwane gyima mɔɔ ɛlɛdi la.

⁴Awie biala mɔɔ kpondɛ kɛ menli nwu ye kpalɛ la ɛnvea ye ninyɛne ɛyɛlɛ nwo. Kɛmɔ ɛlɛyɛ ɛhye mɔ la, ɛnee ɛbɔneko ɛngɔ ɛmaa ewiade amra amuala ɛnwu wɔ!”

⁵(Nea, ɔ mediema ne mɔ bɔbɔ ɛnlie ye ɛnli.)

⁶Gyisɛse zele bɛ kɛ, “Me mekɛ kpalɛ ne ɛtɛdwule. Bɛmɛ, mekɛ biala le kpalɛ maa bɛ.

⁷Ɛtane ewiade ye ɛmkpɔ bɛ, na mame, ɔkpɔ me, ɔluakɛ meka mekile ye dahuu kɛ ye ndenle ne mɔ ɛnle kpalɛ.

⁸Bɛmɛ bɛhɔ bɛ ɛvoyialilɛ ne. Na mame, menrɛhɔ, ɔboalekɛ me mekɛ kpalɛ ne ɛtɛdwule.”

⁹Ɔhanle ɛhye na ɔdɛnlanle Galeli.

¹⁰Mɔɔ Gyisɛse amediema ne mɔ hɔle ɛvoyialilɛ ne la, nzinlii ɔdaye noko ɔhɔle, noko yeanye ɔ nwo yeangile, ɔveale ɔ nwo.

¹¹Mekɛ ne anu ɛnee Dwuu mgbanyima ne mɔ ɛlɛkpondɛ ye ɛsesebɛ wɔ ɛvoyia ne abo, na bɛbizale kɛ, “Ɔwɔ nienwu?”

¹²Menli dɔɔnwo mɔɔ rale ɛvoyialilɛ ne bie la hanle ɔ nwo edwɛkɛ huhuhuhu dɔɔnwo. Bie mɔ se, “Ɔle sonla kpalɛ.” Bie mɔ noko se, “Ɔnle sonlakpalɛ, ɔlɛyɛ menli ne koasea.”

¹³Noko biala angola anye ɔ nyunlu anga ɔ nwo edwɛkɛ baguase, ɔboalekɛ bɛsulo Dwuu mgbanyima ne mɔ.

¹⁴Mɔɔ bɛlile ɛvoyia ne dedee na ɔhɔdwule ye avinli bie la, Gyisɛse hɔle Ɛzonlenlɛ Sua ne anu, na ɔbɔle ɔ bo kɛ ɔkilehile.

¹⁵Ye ngilehilelɛ ne zinle Dwuu mgbanyima ne mɔ anwo kpole manle bɛhanle kɛ, “Na kenlenzu a sonla ɛhye zukoale ye nwoma ye, mɔɔ ɔtɛkɔle sukulu ɛlɛ, noko ɔze debie kpole zɛhae a?”

¹⁶Gyisɛse buale bɛ kɛ, “Mɔɔ melɛkilehile la ɛnle me ti anwo ngilehilelɛ. Ɔvi Nyamenle ne mɔɔ zoanle me la ɛkɛ.

¹⁷Mɔɔ kɛboɔboa ɔ nwo kɛ ɔyɛ mɔɔ Nyamenle kpondɛ la banwu kɛ mɔɔ melɛkilehile la vi Nyamenle ɛkɛ anzɛɛ medame me ti anwo ngilehilelɛ ɔ.

¹⁸Awie mɔɔ di ɔ ti anwo kilehile la kpondɛ ɔdaye ɔ ngome ɔ nyunlu. Mɔɔ kpondɛ anyunlunyia maa mɔɔ zoanle ye la ka nɔhalɛ ne, yɛɛ nvonleɛ biala ɛnle ye nu.

¹⁹Tɛ Mosisi a vale mɛla ne rɛlɛle bɛ la ɔ? Noko bɛ nuhua ko biala ɛnli mɛla ne azo. Duzu ati a bɛkpondɛ kɛ bɛku me ɛ?”

²⁰Ɛlɔne ne buale kɛ, “Ɛnlɛ ɛ sa! Nwane a ɛlɛkpondɛ wɔ ahu wɔ a?”

²¹Gyisɛse buale kɛ, “Nwanwane gyima kpole ko pɛ mɔɔ menyɛle la ɛzi bɛ muala bɛ nwo.

²² Se Mosisi hanle kɛ bɛyɛ bɛ mra mrenyanu nzonlɛ la ati, (noko tɛ Mosisi bɔbɔ a bɔle ɔ bo a, bɛ nlenya mɔ a bɔle ɔ bo a) saa ɔdwu Ɛnwomenlelielɛ Kenle bɔbɔ a, bɛyɛ.

²³ Na saa bɛyɛ kakula nrenya mrenyanu nzonlɛ wɔ Ɛnwomenlelielɛ Kenle na bɛndo Mosisi mɛla ne a, ɛnee duzu ati yɛɛ bɛva me nwo ɛya kɛ meyɛ sonla ayile memaa ɔ nwo ɛza wɔ Ɛnwomenlelielɛ Kenle ɛ?

²⁴Anrɛɛ bɛmmanea sonla nyunlu bɛbua ye ndɛne, bɛbua ndɛne wɔ ye adenle zo.”

²⁵Menli mɔɔ vi Gyɛlusalɛm ɛkɛ ne la bie mɔ hanle kɛ, “Asoo tɛ nrenya ne mɔɔ bɛlɛkpondɛ ye bɛahu ye la ɛne?

²⁶Nea! ɔlɛtendɛ bagua nu, noko awie biala ɛngola ɛnga edwɛkɛ biala ɛntia ye! Ɛnee mgbanyima ne mɔ akee ɛlie ɛdo nu kɛ yemɔ a ɔle Mɛzaya ne ɔ?

²⁷Saa Mɛzaya ne ba a, awie biala ɛnrɛnwu ɛleka mɔɔ ɔvi a. Noko nrenya ɛhye, yɛze ɛleka mɔɔ ɔvi la.”

²⁸Mɔɔ Gyisɛse ɛlɛkilehile wɔ Ɛzonlenlɛ Sua ne anu la ɔhanle ye kpole kpalɛ kɛ, “Asoo amgba bɛze me yɛɛ bɛze ɛleka mɔɔ mevi la? Meamba me ti anwo adenle. Mɔɔ zoanle me la le nɔhalɛ. Bɛmɛ bɛnze ye,

²⁹na mame meze ye, ɔboalekɛ mevi ɔ nwo lɔ a membale a yɛɛ ɔdaye a ɔzoanle me a.”

³⁰Yemɔti bɛyɛle kɛ bɛkye ye, noko awie angola anzɔ ye nu, ɔboalekɛ ɛnee ye mekɛ ne ɛtɛdwule.

³¹Menli dɔɔnwo mɔɔ wɔ ɛlɔne ne anu la liele ye lile na bɛhanle kɛ, “Asoo Mɛzaya ne ba a, ɔbayɛ nwanwane gyima mgbole yeadɛla mɔɔ nrenya ɛhye ɛyɛ la?”

³²Falasiima dele mɔɔ menli ne ɛlɛka ye huhuhuhu wɔ Gyisɛse anwo la, yemɔti bɛ nee sɛlɛvolɛ mgbanyinli ne mɔ yɛle adwenle na bɛzoanle kɛ bɛhɔhye ye bɛrɛla.

³³Gyisɛse zele bɛ kɛ, “Me nee bɛ badɛnla mekɛ ekyi bie ala na akee meahɔ mɔɔ zoanle me la anwo lɔ.

³⁴Bɛbakpondɛ me, na bɛnrɛnwu me, ɔluakɛ ɛleka mɔɔ mekɔ la bɛnrɛhola ɛkɛ ne kɔ.”

³⁵Dwuu mgbanyima ne hanle ye wɔ bɛ nwo ɛkɛ ne kɛ, “Ɛnee nienwu ɛleka a ɔkɔ mɔɔ yɛkpondɛ ye a yɛnrɛnwu ye a? Ɛnee ɔkɔ Giliki azuamgbole ne mɔ bie azo ɛleka mɔɔ Dwuuma bie mɔ wɔ la yeahɔhilehile Gilikima ɔ?

³⁶Ɔse, ‘Bɛbakpondɛ me, na bɛnrɛnwu me’, yɛɛ eza ɔse, ‘Bɛnrɛhola ɛleka mɔɔ melɛkɔ la kɔ.’ Ɛnee duzu edwɛkɛ a ɔkpondɛ yeaha a?”

³⁷Kenle mɔɔ li awieleɛ wɔ ɛvoyia ne ɛlilɛ nu la hyia kpole. Kenle ko zɔhane Gyisɛse dwazole na ɔhanle ye kpole kpalɛ kɛ, “Mɔɔ nzuhɔne ɛlɛku ye la ɛrɛla me ɛkɛ ɛranlo nzule.

³⁸ Kɛmɔ Nyamenle Edwɛkɛ ne se la, ‘Mɔɔ die me di la, ngoane azudenle vi ye ahonle nu baze.’ ”

³⁹Gyisɛse hanle ɛhye wɔ Sunsum ne mɔɔ menli mɔɔ die ye di la banyia ye la anwo. Mekɛ ne anu ɛnee bɛtɛfale Sunsum ne bɛtɛmanle, ɔboalekɛ ɛnee bɛtɛdwazole Gyisɛse bɛtɛbale ye anyunlunyia ne anu.

⁴⁰Menli mɔɔ wɔ ɛlɔne ne anu la anu dɔɔnwo dele mɔɔ ɔhanle la, na bɛzele kɛ, “Amgba, nrenya ɛhye a le Nyamenle Kpɔmanvolɛ ne!”

⁴¹Bie mɔ noko se, “Yemɔ a ɔle Mɛzaya ne.” Eza bie mɔ noko se, “Mɛzaya ne vi Galeli ɛnrɛra.

⁴² Nyamenle Edwɛkɛ ne se Mɛzaya ne bayɛ Belemgbunli Devidi dehelɛ, yɛɛ bɛbawo ye wɔ Bɛtelɛhɛm, ɛleka mɔɔ Devidi dɛnlanle la.”

⁴³Ɛhye ati mgbakyelɛ ralale menli ne avinli wɔ Gyisɛse ati.

⁴⁴Bie mɔ yɛle kɛ bɛkye ye, noko awie biala angola anzɔ ye nu.

⁴⁵Ɛzonlenlɛ Sua ne sinzavolɛma mɔɔ sɛlɛvolɛ mgbanyinli nee Falasiima ne mɔ zoanle bɛ kɛ bɛhɔhye Gyisɛse la ziale rale, na bɛbizale bɛ kɛ, “Duzu ati a bɛangye ye bɛamba ɛ?”

⁴⁶Bɛbuale bɛ kɛ, “Awie biala ɛtɛtendɛle kɛ nrenya ɛhye tendɛ la.”

⁴⁷Falasiima ne bizale bɛ kɛ, “Bɛmaa yeyɛ bɛdabɛ noko koasea ɔ?

⁴⁸Asoo bɛnwu kɛ mgbanyima ne mɔ bie anzɛɛ Falasiima bie bɔbɔ ɛlie ye ɛli?

⁴⁹Na ɛlɔne ne die ye di, ɔboalekɛ bɛ nuhua ko bɔbɔ ɛnze Mosisi mɛla ne, yemɔti abule kpalɛ a ɛbu bɛ a!”

⁵⁰ Nekɔdimɛse ɛnee wɔ ɛkɛ ne bie, ɔle sonla mɔɔ ɛhɔ Gyisɛse anwo ɛlɛ a. Ɔzele bɛ kɛ,

⁵¹“Yɛ mɛla ne kile kɛ saa yɛtɛtele sonla anloa anu edwɛkɛ, yɛtɛnwunle mɔɔ yeyɛ la a, yɛmbu ye ewule fɔlɛ.”

⁵²Bɛbizale ye kɛ, “Ɛnee ɛdawɔ noko ɛvi Galeli ɔ? Kɔvedevede Nyamenle Edwɛkɛ ne anu kpalɛ nea kɛ saa ɛkɛnwu kɛ Nyamenle kpɔmanvolɛ ko bɔbɔ vi Galeli ɛvinde a!”