Read Nzema Gyi 1 Bible Online

Gyi 1 - Nzema bible

Gyi 1

¹ Nana Tiyɔfelɛse: Wɔ me alumua buluku ne anu, menganle ninyɛne mɔɔ Gyisɛse yɛle nee mɔɔ ɔhilehilele la anwo edwɛkɛ

²ɔhɔdwule mekɛ mɔɔ bɛvale ye bɛhɔle anwuma la. Mɔɔ bɛbava ye bɛahɔ anwuma la, ɔluale Sunsum Nwuanzanwuanza ne azo ɔhilehilele ye ɛzoanvolɛma ne mɔɔ yekpa nu yeye bɛ la debie mɔɔ ɔwɔ kɛ bɛyɛ la amuala.

³Bɛdwazole ye bɛvile ewule nu la, ɔyele ɔ nwo ɔhilele bɛ wɔ ndenle dɔɔnwo anu kenle abulanla ɔmanle bɛnwunle ye wienyi kɛ ɔde aze, na ɔhanle Nyamenle Belemgbunlililɛ ne anwo edwɛkɛ ɔhilele bɛ.

⁴ Mekɛ mɔɔ ɔ nee bɛ yiale la[1] ɔhanle ɔhilele bɛ kɛ, “Bɛmmatu bɛ bo bɛfi Gyɛlusalɛm, na bɛhendɛ Egya ahyɛlɛdeɛ ne mɔɔ yeva yebɔ bɛ ɛwɔkɛ na meha nwolɛ edwɛkɛ mehile bɛ la.

⁵ Dwɔn vale nzule a zɔnenle a, na bɛmɛ, ɔnrɛhyɛ biala, bɛbava Sunsum Nwuanzanwuanza ne a bɛazɔne bɛ a.”

⁶Mɔɔ ɛzoanvolɛma ne nee Gyisɛse yiale nu la bɛbizale ye kɛ, “Awulae, akee mekɛ ɛdwu mɔɔ ɛbava Belemgbunlililɛ ne wɔamaa Yizilayɛma bieko ɔ?”

⁷Gyisɛse buale bɛ kɛ, “Egya a kyehyɛ mekɛ nee ɛlobɔ muala a, yemɔti ɔngyia kɛ bɛkɛnwu kenle mɔɔ ɛhye mɔ kɛzi la.

⁸ Na saa Sunsum Nwuanzanwuanza ne ba bɛ nwo zo a bɛbanyia tumi, na bɛali me nwo daselɛ wɔ Gyɛlusalɛm, nee Dwudiya amuala nee Samɛlea bɛahɔdwu aleɛabo ɛleka biala.”

⁹ Mɔɔ ɔhanle ɛhye la, bɛmanle ye zo anwuma, na mɔɔ bɛ nye gyi ɔ nwo ala la amungu liele ye vile bɛ nye zo.

¹⁰Bɛ nye hale anwomanyunlu, na arɛlevilɛ nu ala mrenya nwiɔ mɔɔ wula adɛladeɛ fufule la ragyinlanle bɛ nwo ɛkɛ ne na bɛzele ɛzoanvolɛma ne kɛ,

¹¹“Galelima, duzu ati a bɛgyi ɛke na bɛ nye ɛha anwuma ɛ? Gyisɛse ɛhye mɔɔ bɛrava ye wɔ bɛ avinli ɛke bɛhɔ anwuma la bazia alua adenle zɔhane ala azo ara bieko, kɛmɔ bɛnwu ye kɛ ɔlɛkɔ la.”

¹²Ɛzoanvolɛma ne vi boka ne mɔɔ bɛfɛlɛ ye Ɔlivi la azo ziale rale Gyɛlusalɛm; adenle ne kɛyɛ kilomita ko.

¹³ Bɛdwule la, bɛhɔle anwuma sua ne mɔɔ ɛnee bɛwɔ nu la anu. Bɛmɛ a le: Pita, Dwɔn, Gyemise yɛɛ Andelu; Saemɔn mɔɔ le Maanle Kulovolɛ ne yɛɛ Felepe nee Tɔmase; Baatɔlomiyu, Mateyu, Afeɛse ara Gyemise, yɛɛ Dwudase mɔɔ le Gyemise ara ne.

¹⁴Bɛ muala bɛyia nu dahuu na bɛfa koyɛlɛ bɛ nee mraalɛ ne mɔ yɛɛ Mɛle mɔɔ le Gyisɛse ɔ nli ne nee ɔ mediema mrenya ne mɔ yɛ nzɛlɛlɛ.

¹⁵Mekɛ ne anu diedima ne yiale nu. Bɛ nloa kɛyɛ ɛya ko abulanwiɔ. Pita dwazole zele bɛ kɛ,

¹⁶“Ayi mɔ, ɔwɔ kɛ Nyamenle Edwɛkɛ ne mɔɔ Sunsum Nwuanzanwuanza ne luale Belemgbunli Devidi anwo zo hanle dole ɛkɛ ne, mɔɔ fane Dwudase mɔɔ lile menli mɔɔ rahyele Gyisɛse la anyunlu la anwo la yɛ nɔhalɛ.

¹⁷Ɔluakɛ ɛnee Dwudase boka yɛ nwo wɔ gyima ɛhye anu.”

¹⁸ (Ezukoa ne mɔɔ Dwudase luale ye ninyɛndane zo liele la, ɔvale ɔdɔle azɛlɛ, na ɛkɛ ne a ɔvuandinle ɔ nwo ɔdele, ɔ ko kpukele na ɔ kunlu anyalɛ muala tulule guale na ɔwule a.

¹⁹Awie biala mɔɔ de Gyɛlusalɛm la dele ɛhye. Yemɔti bɛvɛlɛle azɛlɛ ne wɔ Hibulu aneɛ nu “Akɛledɛma.” Ɔ bo a le “Mogya azɛlɛ.”)

²⁰ “Ɔluakɛ bɛhɛlɛ ye wɔ Edwɛndolɛ Buluku ne anu kɛ, ‘Bɛmaa ye awuke ɛbɔ; awie mmatɛnla nu ɛlɛ.’ Eza bɛhɛlɛ ye kɛ, ‘Bɛmaa awie fofolɛ ɛli ɔ gyakɛ anu.’

²¹ “Zɔhane ati, bɛdabɛ mɔɔ ɛnee bɛboka yɛ nwo, ɔvi mekɛ mɔɔ Dwɔn bɔle ɔ bo kɛ ɔsɔne menli nee mekɛ mɔɔ Gyisɛse yɛ ye gyima ne, bakpula mekɛ mɔɔ bɛvale Awulae bɛhɔle anwuma la amuala, ɔwɔ kɛ bɛ nuhua ko baboka yɛ nwo maa yɛdi Awulae ewudwazo ne anwo daselɛ.”

²³Yemɔti bɛzuzule menli nwiɔ, Dwosefi mɔɔ bɛfɛlɛ ye Baasabase (na eza ɔyɛ a bɛfɛlɛ ye Gyɛsetɛse la) nee Matayase.

²⁴Bɛyɛle nzɛlɛlɛ bɛzele kɛ, “Awulae, wɔmɔ yɛɛ ɛze menli kɔsɔɔti ahonle nu a. Zɔhane ati Awulae, ɛdawɔ kilehile yɛ maa yɛye menli nwiɔ ye anu ko mɔɔ wɔvɛlɛ ye la,

²⁵maa ɔrayɛ wɔ ɛzoanvolɛ, ɔli gyima ne mɔɔ Dwudase gyakyile ziele ahane hɔle ye ɛdeɛ nu la.”

²⁶Na bɛguale menli nwiɔ ne ati nzeleba la ɔbɔle Matayase. Yemɔti bɛvale ye bɛbokale ɛzoanvolɛma bulu nee ko ne anwo.