Read Nzema Gyi 13 Bible Online

Gyi 13 - Nzema bible

Gyi 13

¹Nyamenle kpɔmanvolɛma nee kilehilevolɛma wɔ Anteɔko asɔne ne anu, bɛmɛ a le Baanabase, Semɛyɔn (mɔɔ bɛfɛlɛ ye Bile), Luseɛse (mɔɔ vi Saelin), Maneeyen (mɔɔ bɛtetele ye nee Amɛnlado Hɛlɔdo[9]), yɛɛ Sɔɔlo.

²Mɔɔ ɛnee bɛlɛyɛ nzɛlɛlɛ na bɛlɛkye ɛhɔne la, Sunsum Nwuanzanwuanza ne zele bɛ kɛ, “Bɛdu Baanabase nee Sɔɔlo bɛzie ahane bɛmaa me na memaa bɛhɔyɛ gyima mɔɔ yemɔti menvɛlɛle bɛ la.”

³Bɛhyele ɛhɔne bɛyɛle nzɛlɛlɛ, bɛvale bɛ sa bɛguale bɛ ti zo na bɛguale bɛ adenle.

⁴Sunsum Nwuanzanwuanza ne vale Baanabase nee Sɔɔlo hɔle Sɛlusea na bɛvale ɛlɛne bɛhɔle bɔra ne mɔɔ bɛfɛlɛ ye Saepelɛse la azo.

⁵Mɔɔ bɛdwule Salamese la, bɛhanle Nyamenle edwɛkɛ ne wɔ Dwuuma nyianu sua ne anu. Bɛ nee Dwɔn Maake a hɔle a na ɔboale bɛ wɔ gyima ne ɛyɛlɛ nu.

⁶Bɛkpɔsale bɔra ne azo na bɛrale Peefɔso bɛradole Dwuunli bie mɔɔ ye ngonyia la. Bɛfɛlɛ ye Baa-Gyisɛse, yɛɛ ɔdaye mumua ne ɔfɛlɛ ɔ nwo Nyamenle kpɔmanvolɛ.

⁷Ɔle bɔra ne azo amɛnlado ne mɔɔ bɛfɛlɛ ye Sɛgyeɛse Pɔɔlɛse la agɔnwo. Amɛnlado ɛhye ze nrɛlɛbɛ yɛɛ ɔ nye ɛde. Ɔzoanle ɔmanle bɛhɔvɛlɛle Baanabase nee Sɔɔlo kɛ bɛrɛla na ɔkulo kɛ ɔtie Nyamenle edwɛkɛ ne.

⁸Na Ɛlemase (Ngonyianli ne duma wɔ Giliki nu ɛne) ammaa bɛ adenle, na ɔyɛle kɛ ɔkakyi Amɛnlado ne adwenle, amaa yeanlie ɛzonlenlɛ fofolɛ ɛhye yeanli.

⁹Na Sunsum Nwuanzanwuanza ne rawolole Sɔɔlo, mɔɔ ɛnee akee bɛfɛlɛ ye Pɔɔlo la, ɔnleanle Ɛlemase koonwu

¹⁰na ɔzele ye kɛ, “Wɔmɔ Abɔnsam ara, ɛle debie kpalɛ biala kpɔvolɛ. Amumuyɛ ɛyi wɔ tɛkɛɛ, yɛɛ dahuu ɛbɔ adalɛ wɔ Awulae adenle kpalɛ ne anwo.

¹¹Awulae ɛdua wɔ kakɛ, ɔmaa ɛ nye ɛzi ɔhɔkpula mekɛ ekyi bie mɔɔ ɛnnwu debie biala a.” Na ɛkɛ ne ala awozinli vale Ɛlemase manle ɔlile nvuovua na ɔzɛlɛle kɛ awie ɛzɔ ɔ sa ɛhile ye adenle.

¹²Mɔɔ Amɛnlado ne nwunle mɔɔ ɛzi la, ɔliele ɔlile na Awulae anwo ngilehilelɛ ne yɛle ye azibɛnwo kpole.

¹³Pɔɔlo nee ɔ gɔnwo mɔ vi Peefɔso la bɛvale ɛlɛne bɛrale Pɛga, wɔ Pamefelea maanzinli nu, na Dwɔn Maake gyakyile bɛ ɛkɛ ne ziale hɔle Gyɛlusalɛm.

¹⁴Bɛvi Pɛga la bɛbɔle hwii bɛhɔle Anteɔko mɔɔ wɔ Paesedea la. Ɛnwomenlelielɛ Kenle ne dwule la, bɛhɔle nyianu sua ne anu na bɛhɔdɛnlanle aze.

¹⁵Bɛwiele Mosisi mɛla ne nee Nyamenle kpɔmanvolɛma edwɛkɛ ne kenga la, nyianu sua ne mgbanyima ne dole ɛsalɛ vɛlɛle bɛ kɛ, “Mediema, saa bɛlɛ edwɛkɛ fɛlɛko bie mɔɔ maa anwosesebɛ la a ɛnee bɛha bɛmaa menli ne ɛdie bie.”

¹⁶Pɔɔlo dwazole manle ɔ sa zo na ɔzele bɛ kɛ, “Ayi mɔ Yizilayɛma nee bɛdabɛ mɔɔ bɛnle Dwuuma mɔɔ bɛwɔ ɛke na bɛsulo Nyamenle la, bɛdie me!

¹⁷ Yizilayɛ Nyamenle ne kpale nu yele yɛ nlenya mɔ na ɔyɛle bɛ ɛlɔne kpole wɔ mekɛ mɔɔ ɛnee bɛle nyɛvolɛ bɔbɔ wɔ Yigyibiti azɛlɛ zo la. Nyamenle vale ye tumi kpole ne yele bɛ vile Yigyibiti azɛlɛ zo,

¹⁸ na ɔnyianle bɛ nwo abotane ɔnleanle bɛ gyɛlɛɛnye wɔ ɛsɛlɛ ne azo ɛvolɛ abulanla.

¹⁹ Wɔ Keena noko, Nyamenle zɛkyele maanle maanle nsuu na ɔvale bɛ azɛlɛ ne ɔmanle ye menli ne mɔ.

²⁰ “Ɛvolɛ asɛɛ ɛya nna abulanla anzi, ɔmanle bɛ ndɛnebuavolɛma toonwo ɔradwule Nyamenle kpɔmanvolɛ Samoɛle anwo zo.

²¹ Akee bɛbizale kɛ Nyamenle ɛmaa bɛ belemgbunli, yemɔti Nyamenle manle bɛvale Sɔɔlo mɔɔ le Kehye ara nrenya ne mɔɔ vi Bɛngyaman abusua nu la bɛyɛle bɛ belemgbunli ɛvolɛ abulanla.

²² Mɔɔ Nyamenle yele ye ɛkɛ ne la, ɔyɛle Devidi bɛ belemgbunli. Na Nyamenle hanle ɔ nwo edwɛkɛ kɛ, ‘Menwu Gyɛsi ara Devidi kɛ yemɔ a ɔle sonla mɔɔ sɔ me nye a, na yemɔ a ɔbali gyima mɔɔ mekpondɛ la amuala a.’

²³Devidi ɛhye alɔnra a le Gyisɛse mɔɔ Nyamenle ɛyɛ ye Yizilayɛma Ngoanedievolɛ, kɛmɔ ye ɛwɔkɛ ne se la.

²⁴ Gyisɛse babɔ ye gyimalilɛ ne abo la, Dwɔn lumuale rabɔle nolo zele Yizilayɛma kɛ bɛnlu bɛ nwo wɔ bɛ ɛtane ne mɔ anwo na bɛmaa bɛzɔne bɛ.

²⁵ Na mɔɔ Dwɔn bawie ye gyima ne la, ɔbizale menli ne kɛ, ‘Bɛdwenle kɛ mame a le nwane? Tɛ mɔɔ bɛlɛkendɛ ye la a le me. Na nea, ɔli me nzi ɔlɛba, na ye mgbɔlaboa bɔbɔ menfɛta kɛ menwɔyeye.’

²⁶“Me mediema, Ebileham nlɔnra nee bɛdabɛ mɔɔ bɛnle Dwuuma na bɛsulo Nyamenle mɔɔ bɛwɔ ɛke la amuala, yɛmɛ yɛ ti yɛɛ bɛvale ngoanelielɛ nwo Edwɛkpa ɛhye bɛzoanle a!

²⁷Menli mɔɔ wɔ Gyɛlusalɛm nee bɛ mgbanyima ne mɔ annwu kɛ yemɔ a ɔle Ngoanedievolɛ ne a, yɛɛ bɛande Nyamenle kpɔmanvolɛma edwɛkɛ ne mɔɔ bɛkenga ye dahuu wɔ Ɛnwomenlelielɛ Kenle ne la abo. Noko bɛbule Gyisɛse ewule fɔlɛ bɛmanle Nyamenle kpɔmanvolɛma edwɛkɛ ne mɔɔ hanle la yɛle nɔhalɛ.

²⁸ Bɛannyia kpɔkɛ biala bɛangyinla zolɛ bɛambua ye ewule fɔlɛ, noko bɛzele Paelɛte kɛ ɔmaa bɛhu ye.

²⁹ Bɛwiele debie biala mɔɔ Nyamenle Edwɛkɛ ne kile ye wɔ ɔ nwo la amuala yɛ la, bɛyele ye wɔ meanubaka ne azo na bɛziele ye.

³⁰Na Nyamenle dwazole ye vile mɔwuamra anu,

³¹ na ɔyele ɔ nwo ɔhilele bɛdabɛ mɔɔ bɛ nee ye vi Galeli rale Gyɛlusalɛm la, na ɔmanle bɛnwunle ye fane dɔɔnwo. Na bɛmɛ yɛɛ kɛkala bɛdi ɔ nwo daselɛ bɛkile Yizilayɛma a.

³² Na yɛdayɛ noko yɛra ɛke kɛ yɛfa Edwɛkpa ne yɛarɛlɛ bɛ kɛ, Nyamenle ɛwɔkɛ ne mɔɔ ɔbɔle yɛ nlenya mɔ la, yelua Gyisɛse mɔɔ yedwazo ye yera ngoane nu la anwo zo yeyɛ yemaa yɛmɛ mɔɔ yɛle bɛ nlɔnra la. Edwɛndolɛ ne mɔɔ tɔ zolɛ nwiɔ la se, ‘Wɔmɔ, ɛle me ra; ɛnɛ merayɛ ɛ ze.’

³³

³⁴ Mɔɔ fane ye mɔwuamra anu ɛdwazolɛ mɔɔ kile kɛ ɔnrɛkpɔlɔ ɛlɛ la, kɛ Nyamenle se la ɛne, ‘Mebava me nyilalɛ ne mɔɔ sonle bolɛ mɔɔ menvale membɔle Devidi ɛwɔkɛ la meamaa wɔ.’

³⁵ Eza yeha ye wɔ ɛleka fofolɛ kɛ, ‘Ɛnrɛmaa wɔ sonvolɛ ne mɔɔ ɛdu ɔ nwo ɛmaa wɔ la ɛnrɛkpɔlɔ.’

³⁶Devidi zonlenle ye Nyamenle wɔ ye mekɛ zo na ɔwule, bɛziele ye wɔ ɔ nlenya mɔ avinli, na ɔkpɔlɔle.

³⁷Na sonla ne mɔɔ Nyamenle dwazole ye vile mɔwuamra anu la amkpɔlɔ.

³⁸Zɔhane ati mediema, bɛ muala bɛnwu ye kɛ ɔlua Gyisɛse anwo zo yɛɛ bɛlɛka ɛtanefakyɛ nwo edwɛkɛ bɛahile bɛ a; awie biala mɔɔ kɛlie ye kɛli la bɛbalie ye bɛavi ye ɛtane ne mɔ mɔɔ Mosisi mɛla ne angola anye ye anvi nu la anu.

³⁹

⁴⁰Ɛhye ati, bɛnlea boɛ na mɔɔ Nyamenle kpɔmanvolɛma hanle la anzi bɛ nwo zo. Ɔse,

⁴¹ ‘Bɛnlea, bɛmɛ agolobɛnwoma! Akpule ku bɛ agua bɛ lɔ! Ɔluakɛ, gyima mɔɔ melɛdi wɔ bɛ mekɛ zo la ɛnle debie mɔɔ awie kile nu kile bɛ bɔbɔ a bɛkɛlie bɛkɛli a!’ ”

⁴²Mɔɔ Pɔɔlo nee Baanabase vi nyianu sua ne anu finde ahɔ la menli ne zɛlɛle bɛ kɛ Ɛnwomenlelielɛ Kenle bieko bɛbɔ mɔdenle bɛraha edwɛkɛ ne kpalɛ bɛhile bɛ.

⁴³Nzinlii mɔɔ bɛkpɔnenle la, Dwuuma nee bɛdabɛ mɔɔ bɛnle Dwuuma mɔɔ boka Dwuuma Nyamenlezonlenlɛ ne anwo la dɔɔnwo doale Pɔɔlo nee Baanabase, na ɛzoanvolɛma ne zile bɛ ahonle kɛ bɛzɔ Nyamenle ɛlolɛ ne anu kpundii.

⁴⁴Ɛnwomenlelielɛ Kenle bieko dwule la, asɛɛ suakpole ne azo amra amuala dule rale kɛ bɛbadie Awulae edwɛkɛ ne.

⁴⁵Mɔɔ Dwuuma ne nwunle menli dɔɔnwo ne la, anyebolo dɔle bɛ nwo; bɛdendɛle bɛtiale mɔɔ Pɔɔlo ɛlɛka la, na bɛbɔle bɛ aholoba.

⁴⁶Noko Pɔɔlo nee Baanabase dendɛle akɛnrasesebɛ zo zele bɛ kɛ, “Anrɛɛ ɔhyia kɛ bɛkɛlumua bɛkɛha Nyamenle edwɛkɛ ne bɛkɛhile bɛmɛ Dwuuma. Na saa bɛnyia bɛkpo kɛ bɛnrɛdie na bɛhile kɛ bɛ nwo ɛnfɛta ngoane mɔɔ ɛnlɛ awieleɛ la a, ɛnee ɔwɔ kɛ yɛgyakyi bɛ na yɛkɔka edwɛkɛ ne yɛkile bɛdabɛ mɔɔ bɛnle Dwuuma la.

⁴⁷ Ɔluakɛ Awulae zele yɛ kɛ, ‘Meyɛ bɛ kɛ kɛnlaneɛ memaa bɛdabɛ mɔɔ bɛnle Dwuuma la, amaa aleɛabo amra amuala anyia ngoane.’ ”

⁴⁸Mɔɔ bɛdabɛ mɔɔ bɛnle Dwuuma la dele ɛhye la, bɛlile fɛlɛko na bɛyeyɛle Nyamenle wɔ ye edwɛkɛ ne anwo, na bɛ nuhua mɔɔ ɔwɔ kɛ Nyamenle maa bɛ ngoane mɔɔ ɛnlɛ awieleɛ la liele lile.

⁴⁹Awulae edwɛkɛ ne dɛlɛle hɔle maanzinli ne anu amuala.

⁵⁰Na Dwuuma ne lile mgbanyima mɔɔ wɔ suakpole ne azo nee mraalɛ mgbanyinli mɔɔ gyi boɛ na bɛsulo Nyamenle na bɛnle Dwuuma la anzo. Bɛmanle bɛbɔle ɔ bo bɛyɛle Pɔɔlo nee Baanabase kpɔdekpɔde toonwo bɛdule bɛ maanzinli ne anu.

⁵¹ Ɛzoanvolɛma ne kpɔlɔkpɔlale bɛ gyakɛ abo munlutu guale sua ne azo amra ati zo na bɛzile nu bɛhɔle Ayekoneɛm.

⁵²Na diedima mɔɔ wɔ Anteɔko la lile fɛlɛko kpole na Sunsum Nwuanzanwuanza ne yile bɛ tɛkɛɛ.