Read Nzema Gyi 14 Bible Online

Gyi 14 - Nzema bible

Gyi 14

¹Wɔ Ayekoneɛm noko, edwɛkɛ ko ne ala bie zile. Pɔɔlo nee Baanabase hɔle Dwuuma nyianu sua ne anu hɔdendɛle manle Dwuuma nee Gilikima dɔɔnwo liele lile.

²Na Dwuuma bie mɔ mɔɔ anlie anli la lile wulale bɛdabɛ mɔɔ bɛnle Dwuuma la bie mɔ manle bɛvale diedima ne mɔ ɛkpɔlɛ.

³Noko ɛzoanvolɛma ne dɛnlanle ɛkɛ hyɛle, bɛhanle Awulae anwo edwɛkɛ ne akɛnrasesebɛ zo na Awulae hilele nɔhalɛ mɔɔ wɔ ye ɛlolɛ nwo nolo ne mɔɔ bɛlɛbɔ la anu na ɔmanle bɛ tumi ɔmanle bɛyɛle sɛkɛlɛneɛ nee nwanwane ninyɛne dɔɔnwo.

⁴Na menli mɔɔ wɔ suakpole ne azo la anloa anzɛ bɛ nwo; foa ko hɔle Dwuuma anzi, yɛɛ foa ko hɔle ɛzoanvolɛma ne anzi.

⁵Nzinlii bɛdabɛ mɔɔ bɛnle Dwuuma la bie mɔ nee Dwuuma bɔle nu bɛ nee bɛ mgbanyima yɛle adwenle kɛ bɛkɔ ɛzoanvolɛma ne mɔ anwo zo bɛahɔzi bɛ awolɛ.

⁶Mɔɔ ɛzoanvolɛma ne dele la, bɛyele bɛ nwo zo na bɛhɔle Lesetela nee Dɛbi mɔɔ wɔ Laekewonea maanzinli nu la nee namunamu mɔɔ zuozua ɛkɛ ne la azo

⁷bɛhɔhanle Edwɛkpa ne wɔ ɛkɛ.

⁸Nrenya bie wɔ Lesetela, bɛwole ye abubura, yemɔti ɔtɛtiale ɛlɛ.

⁹Ɛnee nrenya ɛhye ɛlɛtie Pɔɔlo kpalɛ. Na Pɔɔlo nwunle kɛ nrenya ne ɛnyia diedi mɔɔ kola yɛ ye ayile la, ɔnleanle ye koonwu

¹⁰na ɔdeanle nu ɔzele ye kɛ, “Dwazo gyinla!” Nrenya ne wulule gyinlanle na ɔbɔle ɔ bo kɛ ɔtia.

¹¹Mɔɔ menli ne mɔ nwunle mɔɔ Pɔɔlo ɛyɛ la, bɛdeɛdeanle nu wɔ Laekewonea aneɛ ne anu kɛ, “Awozonle ne mɔ ɛhakyi bɛ nwo menli ɛra yɛ avinli!”

¹²Na bɛvɛlɛle Baanabase, Ziyɛse, na bɛvɛlɛle Pɔɔlo, Hɛmɛse, ɔluakɛ bɛse Pɔɔlo a tendɛ maa bɛ a.

¹³Na kɔmenle ne mɔɔ tendɛ Ziyɛse anloa azo, na ye amonle sua ne gyi sua ne kandiba ɛkɛ ne ala la vale nlankɛ nee ndotolo kɔtɔlɔba rale suakpole ne bane ne anlenkɛ kpole ne anloa kɛ ɔ nee menli ne mɔ bɛbabɔ azu bɛamaa ɛzoanvolɛma ne.

¹⁴Mɔɔ Baanabase nee Pɔɔlo dele mɔɔ menli ne mɔ kpondɛ ayɛ la, ɔyɛle bɛ azibɛnwo. Yemɔti bɛsuosuanle bɛ adɛladeɛ ne mɔ anu na bɛnriandile bɛhɔle menli ne avinli na bɛzele bɛ kɛ,

¹⁵ “Ayi mɔ, duzu ati a bɛlɛyɛ ɛhye mɔ ɛ? Yɛdayɛ noko yɛle menli kɛ bɛdabɛ la. Yɛrale kɛ yɛbabɔ Edwɛkpa ne nolo yeahile bɛ, amaa bɛahwe bɛ nwo bɛavi ninyɛne mgbane mgbane ɛhye mɔ mɔɔ anwo ɛnlɛ nvasoɛ la anwo, na bɛazonle tease Nyamenle ne mɔɔ bɔle anwuma, azɛlɛ, nyevile nee mɔɔ wɔ nuhua la amuala la.

¹⁶Mɔmoane ɔmanle menli muala adenle ɔmanle bɛyɛle mɔɔ bɛdabɛ bɛkulo la.

¹⁷Noko dahuu ɔdua ye ninyɛne kpalɛ mɔɔ ɔyɛ la azo ɔkile ɔ nwo ɔkile bɛ: ɔmaa bɛ ezule, yɛɛ ɛbuhenle ne dwu a ɔmaa bɛ aleɛ na ɔmaa bɛ nye die.”

¹⁸Noko ɛhye mɔ amuala anzi, ɔhale kyɛkyɛ mɔɔ ɛnee bɛngola bɛnzi menli ne mɔ aze wɔ bɛ azu ɛbɔlɛ ne anwo a.

¹⁹Nzinlii Dwuuma bie vi Anteɔko mɔɔ wɔ Paesedea maanzinli nu nee Ayekoneɛm la rale, bɛralile menli ne anzo bɛhɔle bɛ afoa na bɛzile Pɔɔlo awolɛ bɛmanle ɔ nye zo bulule; bɛhwenle ye bɛhɔdole sua ne kandiba, ɛnee bɛdwenle kɛ yewu.

²⁰Na mɔɔ diedima ne rabɔle yiale ye la, ɔ nye rale zolɛ na ɔdwazole ɔ nee bɛ hɔle sua nu. Aleɛ hyenle la ɔ nee Baanabase bɛhɔle Dɛbi.

²¹Pɔɔlo nee Baanabase hanle Edwɛkpa ne wɔ Dɛbi la, bɛnyianle ɛdoavolɛma gyɛlɛɛnye. Bɛvi ɛkɛ ne bɛziale bɛhɔle Lesetela nee Ayekoneɛm, yɛɛ Anteɔko mɔɔ wɔ Paesedea maanzinli nu la.

²²Bɛmanle diedima ne mɔ anwosesebɛ na bɛzele bɛ kɛ bɛzɔ diedi ne anu kpundii. Bɛhilehilele bɛ kɛ ɔwɔ kɛ yɛnwu amaneɛ dɔɔnwo na yɛanwu Nyamenle Belemgbunlililɛ ne.

²³Bɛzieziele mgbanyima bɛmanle bɛ, na bɛvale ɛhɔnehyelɛ nee nzɛlɛlɛ bɛdule bɛ bɛwulale Awulae ne mɔɔ bɛva bɛ rɛle bɛwule ye nu la asa anu.

²⁴Akee bɛhɔkpɔsale Paesedea maanzinli ne anu na bɛrale Pamefelea maanzinli nu.

²⁵Bɛhanle Edwɛkpa ne wɔ Pɛga na bɛhɔle Ateelea.

²⁶Bɛvi ɛkɛ ne la bɛvale ɛlɛne bɛziale bɛrale Anteɔko. Ɛke a bɛdule bɛ bɛwulale Nyamenle ɛlolɛ ne abo kolaa na bɛabɔ bɛ gyima ɛhye mɔɔ bɛwie ye di la abo a.

²⁷Mɔɔ bɛradwule Anteɔko la, bɛyiale asɔnema ne amuala na bɛhanle mɔɔ Nyamenle ɛva bɛ ɛyɛ la amuala bɛhilele bɛ, nee kɛ yezi yebuke diedi adenle yemaa bɛdabɛ mɔɔ bɛnle Dwuuma la.

²⁸Na bɛ nee diedima ne dɛnlanle ɛkɛ ne hyɛle dɔɔnwo.