Read Nzema Gyi 18 Bible Online

Gyi 18 - Nzema bible

Gyi 18

¹Ɛhye anzi, Pɔɔlo vile Atɛnse hɔle Kɔlente.

²Ɔhɔdole Dwuunli bie mɔɔ bɛfɛlɛ ye Akoyela na bɛwole ye wɔ Pɔntɛse maanzinli nu la kɛ bɔ zo mɔɔ ɔ nee ɔ ye Pelesela bɛvi Yetale bɛra a, ɔluakɛ ɛnee Belemgbunli Kolɔdeɛse ɛha kɛ Dwuuma mɔɔ wɔ Wulomu la amuala vi maanle ne anu ɛdu. Pɔɔlo hɔle bɛ nwo,

³na kɛmɔ bɛ muala bɛ gyima mɔɔ bɛyɛ bɛdi aleɛ la a le ɛdanlɛ sua ɛyɛlɛ la ati, ɔ nee ye dɛnlanle na ɔ nee bɛ yɛle gyima.

⁴Ɛnwomenlelielɛ Kenle biala ɔkɔ nyianu sua ne anu ɔ nee bɛ kɔtendɛ, kɛ ɔbɔ mɔdenle yeali Dwuuma nee Gilikima ne mɔ adwenle.

⁵Mɔɔ Saelase nee Temɔte vi Masidonea rale la ɛnee Pɔɔlo ɛva ye mekɛ muala ɛlɛka Edwɛkpa ne ali daselɛ ahile Dwuuma ne kɛ, Mɛzaya ne a le Gyisɛse.

⁶Nzinlii mɔɔ bɛtiale mɔɔ ɔlɛka la, bɛhehanle ɛtane dɔɔnwo bɛhilele ye. Ɛhye ati Pɔɔlo kpokpole ye tɛladeɛ ne anu munlutu guale na ɔzele bɛ kɛ, “Saa bɛminli a, nwolɛ ɛzonle ɛnzo me. Bɛdabɛ bɛ ɛminlinlɛ nwo ɛzonle zo bɛ! Ɔvi ɛnɛ mɔɔ kɔ la mebahɔ bɛdabɛ mɔɔ bɛnle Dwuuma la anu meahɔha Edwɛkpa ne.”

⁷Na Pɔɔlo vi ɛleka mɔɔ ɔde la dule na ɔhɔle nrenya bie mɔɔ ɛnle Dwuunli, na ɔsonle Nyamenle la sua nu. Nrenya ne bɛfɛlɛ ye Taeteɛse[10] Gyɛsetɛse; ye sua nu bikye Dwuuma nyianu sua ne.

⁸Kelesepɛse mɔɔ nea nyianu sua ne azo la nee ye sua nu amra liele Awulae lile, yɛɛ Kɔlentema dɔɔnwo mɔɔ dele Edwɛkpa ne la liele lile na bɛmanle bɛzɔnenle bɛ.

⁹Kenle ko nɔɔzo Pɔɔlo nwunle Awulae wɔ ɛlalɛ nu kɛ ɔlɛka yeahile ye kɛ, “Pɔɔlo, mmasulo; kɔ zolɛ ka Edwɛkpa ne, mmagyakyi

¹⁰na mezua ɛ nzi. Awie biala ɛnrɛhola wɔ ɛhwee yɛ, ɔluakɛ menli dɔɔnwo wɔ sua ye azo mɔɔ bɛle me ɛdeɛ a.”

¹¹Na Pɔɔlo dɛnlanle ɛkɛ ne toonwo ɛvolɛ ko nee foa, ɔhanle Nyamenle edwɛkɛ ne ɔhilele menli ne mɔ.

¹²Na mɔɔ bɛvale Galeyo bɛyɛle Wulomu amɛnlado mɔɔ nea Giliki maanzinli ne azo la, Dwuuma ne mɔ yɛle ko na bɛhwenle Pɔɔlo bɛhɔle kɛ ɔli ye edwɛkɛ.

¹³Bɛ ɛzonle mɔɔ bɛdonle ye la a le kɛ, “Sonla ɛhye ɛlɛbɔ mɔdenle yeamaa menli azonle Nyamenle wɔ adenle bie mɔɔ tia yɛ Dwuuma mɛla ne la azo.”

¹⁴Pɔɔlo yɛle kɛ ɔsa ɔ ne la, Galeyo zele Dwuuma ne mɔ kɛ, “Saa edwɛkɛ ɛhye yɛle debie mɔɔ tia mɛla anzɛɛ fane nyɛleɛ ɛtane bie anwo a anrɛɛ menwɔdie.

¹⁵Na kɛmɔ yehɔyɛ edwɛkɛ nu ngilehilelɛ nee duma yɛɛ bɛdabɛ Dwuuma bɛ mɛla nwo edwɛkɛ la, ɛnee bɛdabɛ bɛhɔnlea na bɛziezie. Edwɛkɛ zɛhae mɔ menrɛdɛnla menrɛli.”

¹⁶Na ɔyele bɛ ali wɔ kɔɔto ɛkɛ ne.

¹⁷Bɛvindele la, bɛhɔle Sɔsotɛnize mɔɔ nea nyianu sua ne azo la anwo zo na bɛbole ye dwɛɛ wɔ kɔɔto sua ne anyunlu ɛkɛ ne, noko ɛhye anvane Galeyo anwo nretee zɛhae bɔbɔ.

¹⁸ Pɔɔlo lile mekɛ ekyi wɔ diedima ne mɔ anwo ɛkɛ ne la, nzinlii ɔ nee Pelesela nee Akoyela bɛvile ɛkɛ bɛvale azule nye kɛ bɛkɔ Selea. Bɛdwule Sɛnkilia la Pɔɔlo bɔle ɛwɔkɛ manle Nyamenle, yemɔti ɔmanle bɛkpale ɔ ti.

¹⁹Bɛdwule Ɛfɛsɛse la, Pɔɔlo gyakyile Pelesela nee Akoyela. Ɔhɔle Dwuuma nyianu sua ne anu ɔ nee bɛ hɔdendɛle.

²⁰Menli mɔɔ liele lile la bodole ye kɛ ɔ nee bɛ ɛdɛnla ɛhyɛ, na yeamkponle.

²¹Ɔzele bɛ kɛ, “Saa[11] ɔyɛ Nyamenle ɛhulolɛ a mebazia meara.” Na ɔvi Ɛfɛsɛse ɔvale ɛlɛne ɔhɔle.

²²Ɔradwule Sizalia la ɔbɔle hwii ɔhɔle Gyɛlusalɛm ɔhɔkpɔlale asɔnema ne mɔ na ɔpɛle nu ɔhɔle Anteɔko.

²³Ɔlile mekɛ ekyi wɔ ɛkɛ ne la, ɔvile ɛkɛ ne na ɔhɔkpɔsale Galeehyea nee Felegyea maanzinli ne mɔ anu ɔmanle diedima ne mɔ anwosesebɛ.

²⁴Dwuunli bie mɔɔ bɛfɛlɛ ye Apɔlɔso, mɔɔ bɛwole ye Alɛzandelea, na ɔ nloa ɛde, eza ɔze Nyamenle Edwɛkɛ ne kpalɛ la rale Ɛfɛsɛse.

²⁵Bɛtete ye wɔ Awulae Adenle ne anu, yemɔti ɔkola ɔka Gyisɛse anwo edwɛkɛ ne fɔɔnwo kpalɛ. Noko Dwɔn ɛzɔnenlɛ ɛdeɛ ne ala a ɔze a.

²⁶Ɔdendɛle akɛnrasesebɛ zo kpalɛ wɔ Dwuuma nyianu sua ne anu. Pelesela nee Akoyela nwunle ye la, bɛvɛlɛle ye bɛ sua nu na bɛhilehilele ye Awulae Adenle ne anwo edwɛkɛ fɔɔnwo.

²⁷Apɔlɔso yɛle ye adwenle kɛ ɔkaluolua Akaya (Giliki maanle nu) yeaha Nyamenle edwɛkɛ ne, zɔhane ati mediema ne mɔ boale ye na bɛhɛlɛle kɛlata bɛmanle ɔhɔmanle mediema mɔɔ wɔ nehane la, kɛ bɛlie ye kɛnlɛma gyɛlɛɛnye. Ɔhɔdwule la ɔyɛle moalɛ kpole ɔmanle bɛdabɛ mɔɔ bɛlua Nyamenle ɛlolɛ zo bɛrayɛ diedima la.

²⁸Ɔluakɛ ɔka Dwuuma ne mɔ ɔgua mekɛ biala mɔɔ bɛkɛyia kɛ bɛyɛ ngilehilelɛ la na ɔfa Nyamenle Edwɛkɛ ne ɔkilehile nu wienyi kɛ Mɛzaya ne a le Gyisɛse.