Read Nzema Gyi 19 Bible Online

Gyi 19 - Nzema bible

Gyi 19

¹Mɔɔ Apɔlɔso wɔ Kɔlente la, Pɔɔlo hɔle maanzinli ne anu akpɔsa toonwo ɔravindele Ɛfɛsɛse, na ɔranwunle ɛdoavolɛma bie wɔ ɛkɛ.

²Ɔbizale bɛ kɛ, “Bɛliele bɛlile la, bɛnyianle Sunsum Nwuanzanwuanza ne ɔ?” Bɛzele ye kɛ, “Yɛtɛtele bɔbɔ kɛ Sunsum Nwuanzanwuanza bie wɔ ɛkɛ.”

³Ɔbizale bɛ kɛ, “Ɛnee ɛzɔnenlɛ ne boni a bɛnyianle a?” Bɛbuale kɛ, “Dwɔn ɛzɔnenlɛ ne ɔ.”

⁴ Na Pɔɔlo zele bɛ kɛ, “Dwɔn zɔnenle menli mɔɔ nlunle bɛ nwo wɔ bɛ ɛtane nwo la; na ɔzele Yizilayɛma kɛ bɛva bɛ rɛle bɛwula mɔɔ ɔli ɔ nzi ɛlɛba la anu. Na sonla zɔhane a le Gyisɛse.”

⁵Bɛdele ɛhye la, bɛmanle bɛzɔnenle bɛ wɔ Awulae Gyisɛse duma nu.

⁶Pɔɔlo vale ɔ sa guale bɛ nwo zo, bɛnyianle Sunsum Nwuanzanwuanza ne na bɛhanle ɛdendɛlɛ ngakyile bɛhanle Nyamenle nrɛlaleɛ ne.

⁷Bɛ muala bɛkɛyɛ bulu nee nwiɔ.

⁸Pɔɔlo hɔle nyianu sua ne anu na ɔdendɛle akɛnrasesebɛ zo ɔhilele Dwuuma ne mɔ toonwo siane nsa kɛ ɔmaa bɛanwu Nyamenle Belemgbunlililɛ ne.

⁹Na kɛmɔ bie mɔ ahonle ɛsolo la ati, bɛ muala bɛanlie bɛanli. Bie mɔ dendɛle ɛtane tiale Awulae Adenle ne wɔ menli somaa ne anyunlu. Zɔhane ati Pɔɔlo gyakyile bɛ na ɔ nee diedima ne mɔ akee kɔtendɛ na ɔkilehile bɛ wɔ Taelanɛse sukulu sua ne anu alehyenlɛ biala.[12]

¹⁰Ɛhye hɔle zolɛ ɛvolɛ nwiɔ. Yemɔti ɔmanle bɛdabɛ mɔɔ ɛnee bɛwɔ Ehyea maanzinli ne anu la, Dwuuma nee bɛdabɛ mɔɔ bɛnle Dwuuma la, amuala dele Awulae anwo Edwɛkpa ne.

¹¹Nyamenle luale Pɔɔlo anwo zo yɛle nwanwane ninyɛne mɔɔ yɛ ɛzulolɛ a.

¹²Saa bɛfa ye hameteduku anzɛɛ ahedazo bɛkɔgua awuleravolɛ nwo zo a, bɛte kpɔkɛ, na sunsum ɛtane ne mɔ fi bɛ nwo nriandi.

¹³Dwuuma bie mɔ noko mɔɔ bɛdabɛ bɛluolua nu bɛtu sunsum ɛtane la yɛle kɛ bɛfa Awulae Gyisɛse duma bɛayɛ bie. Bɛzele sunsum ɛtane ko kɛ, “Melua Gyisɛse ne mɔɔ Pɔɔlo bɔ ɔ nwo nolo la duma nu mese wɔ kɛ ɛvi ɔ nwo tu.”

¹⁴Debie zɛhae, Dwuunli sɛlɛvolɛ kpanyinli bie mɔɔ bɛfɛlɛ ye Siva la amra mrenya nsuu a yɛle a.

¹⁵Na sunsum ɛtane ne zele bɛ kɛ, “Meze Gyisɛse, yɛɛ meze Pɔɔlo, na bɛmɛ noko ɛ?”

¹⁶Na sonla ne mɔɔ sunsum ɛtane ne gyi ɔ nwo la dele dɔle bɛ nwo zo na ɔhanle bɛ senle dwɛɛ ɔmanle bɛlɛle bɛ nwo zɔhane bɛnriandile bɛvile sua ne anu bɛhɔle, bɛbodɛboda zɛhae ala.

¹⁷Dwuuma nee bɛdabɛ mɔɔ bɛnle Dwuuma, mɔɔ wɔ Ɛfɛsɛse la amuala dele mɔɔ zile la; bɛ muala bɛzulole, na ɔmanle bɛlile Awulae Gyisɛse duma ne eni kpole kpalɛ.

¹⁸Na menli somaa ne ala mɔɔ liele lile la rale bagua nu rahanle ɛtane mɔɔ bɛyɛ bɛvea la amuala.

¹⁹Ngonyiama dɔɔnwo ne ala vale bɛ mbuluku mɔɔ bɛfa bɛyɛ bɛ gyima la rale manle bɛyelale bɛ wɔ bagua nu. Bɛsesenle mbuluku ne mɔ awolɛ la, bɛ muala bɛ nloa dole dwɛtɛ fufule apenle ngoko abulanlu.

²⁰Na ɔlua zɛhae adenle zo Awulae edwɛkɛ ne dɛlɛle na ɔlile konim dɔɔnwo.

²¹Ɛhye anzi, akee Pɔɔlo yɛle ye adwenle kɛ ɔkɔ Masidonea nee Akaya (Giliki maanle nu) na yeava lɔ yeahɔ Gyɛlusalɛm, na ɔhanle ɔzɔle zolɛ kɛ, “Saa mevi ɛkɛ a mebahɔ Wulomu noko.”

²²Zɔhane ati ɔmanle ye boavolɛma ne mɔ nwiɔ, Temɔte nee Yilasetɛse lumuale Masidonea, na yemɔ ɔdɛnlanle Ehyea maanzinli ne anu ekyii.

²³Mekɛ ɛhye anu ala Awulae Adenle ne ngilehilelɛ ne ati nzaka zile Ɛfɛsɛse.

²⁴Dwɛtɛ dwinvolɛ bie wɔ ɛkɛ, bɛfɛlɛ ye Dimiteleɛse. Ɔfa dwɛtɛ fufule ɔyɛ bozonle raalɛ Aatɛmese ananze ɔtɔne ye. Zɛhae gyima maa dwinvolɛma nyia ezukoa kpalɛ.

²⁵Kenle ko Dimiteleɛse vɛlɛle ɔ gɔnwo dwinvolɛma manle bɛyiale na ɔzele bɛ kɛ, “Ayi mɔ, bɛdabɛ bɛze kɛ yɛ ɛkpazilɛ gyi yɛ gyima ye azo.

²⁶Na bɛdabɛ bɛnwu ye yɛɛ eza bɛde nyɛleɛ mɔɔ Pɔɔlo ye ɛlɛyɛ la; asɛɛ yehakyi bɛdabɛ mɔɔ bɛwɔ Ɛfɛsɛse ɛke, nee Ehyea maanzinli ye anu la amuala adwenle kɛ ananze mɔɔ sonla ɛva ɔ sa ɛyɛ la ɛnle nyamenle fee.

²⁷Ɛhye kile kɛ yɛ gyima bazɛkye na bozonle raalɛ kpole Aatɛmese ɛzonlenlɛ sua kpole ne adɔ mgbane, mɔɔ ɔnrɛhyɛ biala na ye ɛzonlenlɛ wɔ Ehyea maanzinli ye anu nee ewiade amuala abɔ aze a.”

²⁸Mɔɔ dwinvolɛma ne mɔ dele Dimiteleɛse edwɛkɛ ne la, bɛ muala bɛvale ɛya na bɛdeɛdeanle nuhua kɛ, “Aatɛmese, Ɛfɛsɛsema bozonle raalɛ ne le kpole!”

²⁹He-e-e ko mɔɔ bɛyɛle la pɛle sua bɔdenle ne. Na nzakama ne mɔ dule twi kokye la ɛnee bɛwɔ Masidoneama nwiɔ, Gayɛse nee Alesetaakɛse mɔɔ nee Pɔɔlo a lua la anwo zo nwee. Bɛhwenle bɛ bɛ nee bɛ hɔle ɛleka mɔɔ ɔyɛ a bɛyia la.

³⁰Pɔɔlo yɛle kɛ ɔkɔ bagua ne anu yeahɔdendɛ yeahile bɛ, na diedima ne mɔ amkponle ye.

³¹Maanzinli ne anu mgbanyima ne bie mɔ, mɔɔ le Pɔɔlo agɔnwo mɔ la noko zoanle manle bɛhɔzele ye kɛ ɔmmaye ɔ nyunlu wɔ ɛlɔne ne anu.

³²Mekɛ ne anu ɛnee ɛwudolɛ ala a ɛlɔne ne ɛlɛwudo a. Bie mɔ ɛlɛka edwɛkɛ ko la, ɛnee bie mɔ noko ɛlɛka edwɛkɛ fofolɛ, na ayia sua ne anu yɛle wadawada zɛhae ala, ɔluakɛ bie mɔ dɔɔnwo mɔɔ rale ɛkɛ ne la ɛngola ɛnnwu deɛ holɛ ko mɔɔ ɔlua zolɛ bɛrayia la.

³³Bɛ nuhua bie mɔ dwenlenle kɛ Alɛzanda a di nzakadolɛ ne anwo ɛzonle a, ɔluakɛ Dwuuma bie mɔ mɔɔ wɔ ɛkɛ ne la ɛzuhuzuhu ye dedee bɛmaa yeragyinla ɛlɔne ne anyunlu. Alɛzanda bobole bɛ kɛ bɛyɛ koonwu, na ɔyɛle kɛ ɔtendɛ yeahile bɛ.

³⁴Na mɔɔ bɛnwunle kɛ ɔle Dwuunli la, bɛ muala bɛdeɛdeanle nuhua bɛwudole dedee asɛɛ dɔnehwele nwiɔ bɛhanle kɛ, “Aatɛmese, Ɛfɛsɛsema bozonle raalɛ ne le kpole!”

³⁵Nzinlii, maanle abɔlɔba ne nleanle manle ɛlɔne ne yɛle koonwu na ɔzele bɛ kɛ, “Ɛfɛsɛsema, awie biala ze kɛ suakpole Ɛfɛsɛse a nea bozonle raalɛ kpole Aatɛmese amonle sua ne nee ye dehelɛ bolɛ ne mɔɔ vi anwuma radɔle aze la azo a.

³⁶Awie biala ɛnzu ɛhye anwo kpolera kɛ yemɔ ɔnze. Yemɔti, bɛha bɛ ahonle bɛgua azule nu, na bɛmmayɛ bɛsɛkye debie.

³⁷Bɛva menli ɛhye mɔ bɛra ɛke wɔ mekɛ mɔɔ bɛtɛwuale bozonle debie yɛɛ bɛtɛkanle munzule edwɛkɛ biala bɛtɛtiale yɛ bozonle raalɛ ne la.

³⁸Saa Dimiteleɛse nee ɔ gɔnwo mɔ lɛ edwɛkɛ bie tia awie a, kɔɔto wɔ ɛkɛ yɛɛ edwɛkɛdivolɛma ne noko wɔ ɛkɛ mekɛ biala. Bɛkola bɛ nee bɛ kɔ lɔ.

³⁹Na saa bɛnea na debie gyɛne bieko wɔ nu mɔɔ yemɔti ɔwɔ kɛ bɛdi ye baguafutu a, ɛnee ɔwɔ kɛ bɛyɛ ye kɛmɔ ngyehyɛlɛ ne kile la.

⁴⁰Ɔluakɛ saa yɛannea boɛ a yɛbali ɛzonle wɔ nzakadolɛ ɛhye mɔɔ ɛra ɛnɛ la anwo, ɔboalekɛ mɔɔ bɛlɛyɛ la ɛnlɛ ngilenu biala.”

⁴¹Ɔhanle ɛhye la ɔmanle bɛzandele.