Read Nzema Gyi 22 Bible Online

Gyi 22 - Nzema bible

Gyi 22

¹“Ayi mɔ, mediema nee egya mɔ, bɛyɛ ɛnzonlɛ bɛdie me bɛmaa menza me ne mengile bɛ!”

²Mɔɔ bɛdele kɛ ɔlɛtendɛ yeahile bɛ wɔ Hibulu aneɛ nu la, bɛ muala akee bɛyɛle koonwu. Na Pɔɔlo hɔle zolɛ hanle kɛ,

³ “Mele Dwuunli, bɛwole me wɔ Taasɛse mɔɔ wɔ Selesea maanle nu la. Bɛtetele me wɔ Gyɛlusalɛm ɛke wɔ nwomanli Gameeleɛle sukulu ne anu. Menzukoale yɛ nlenya mɔ mɛla ne nee amaamuo ne kpalɛ, na mendule me nwo memanle Nyamenle, kɛmɔ kɛkala bɛde la.

⁴ Mengyele menli mɔɔ lua Adenle ɛhye azo la dɔɔnwo, mraalɛ nee mrenya, memanle bɛguale bɛ efiade na bɛhunle bɛ.

⁵Sɛlɛvolɛ Kpanyinli ne nee ayia mgbanyima ne mɔ amuala di daselɛ kɛ mɔɔ melɛka la le nɔhalɛ. Menliele ngɛlata wɔ bɛ lɔ kɛ melɛ mekamaa mediema Dwuuma mɔɔ wɔ Dɛmasekɛse la. Na menzile nu kɛ mekahye menli ɛhye mɔ meagua bɛ anga na meava bɛ meara Gyɛlusalɛm, amaa bɛadea bɛ, kɛmɔ ɔfɛta la.

⁶“Mɔɔ melua adenle zo melɛkɔ na ɔka ekyii medwu Dɛmasekɛse la, kɛyɛ sɛnzɛngyinla mekɛ nu, arɛlevilɛ nu ala wienyi kpole bie vi anwuma dale bɛnrale yiale me.

⁷Mempɛle menfinle na mendele kɛ ɛnelɛ bie se, ‘Sɔɔlo, Sɔɔlo! Duzu ati a ɛyɛ me kpɔdekpɔde zɛhae ɛ?’

⁸Na membizale kɛ, ‘Awulae, ɛdawɔ nwane ɔ?’ Na ɔzele me kɛ, ‘Medame a mele Gyisɛse mɔɔ vi Nazalɛte, mɔɔ wɔdu ɛ nye wɔzie me nyunlu ɛlɛyɛ me kpɔdekpɔde la.’

⁹Menli mɔɔ nee me lua la nwunle wienyi ne, na bɛande ɛnelɛ ne mɔɔ dendɛle hilele me la.

¹⁰Na membizale kɛ, ‘Awulae, duzu a menyɛ a?’ Na Awulae zele me kɛ, ‘Dwazo na kɔ Dɛmasekɛse, na ɛkɛ ne yɛɛ bɛbaha debie mɔɔ Nyamenle ɛhyehyɛ kɛ ɔmaa wɔayɛ la bɛahile wɔ a.’

¹¹Wienyi ne kɛ zile dale la manle me nye zinle. Ɛhye ati me gɔnwo mɔ mɔɔ nee me lua la sosɔle me sa vale me hɔle Dɛmasekɛse.

¹²“Nrenya bie wɔ Dɛmasekɛse ɛkɛ, bɛfɛlɛ ye Ananayase, ɔdi mɛla ne azo kpalɛ, yɛɛ Dwuuma mɔɔ wɔ Dɛmasekɛse la amuala bu ye.

¹³Ɔrale ɛleka mɔɔ mewɔ la, ɔragyinlanle me nwo ɛkɛ na ɔzele me kɛ, ‘Adiema Sɔɔlo, nwu debie bieko.’ Na ɛkɛ ne ala me nye zo dele na menwunle debie bieko na meneanle ɔ nyunlu.

¹⁴Na ɔhanle kɛ, ‘Yɛ nlenya mɔ Nyamenle ne ɛye wɔ ɛzie ɛkɛ kɛ ɛnwu ye ɛhulolɛdeɛ na ɛnwu ye Fɔɔnwonli sonvolɛ ko ne, na ɛde ɔ ne.

¹⁵Ɔluakɛ ɛbali ɔ nwo daselɛ wɔaha mɔɔ wɔde nee mɔɔ wɔnwu ye la wɔahile ewiade amra amuala.

¹⁶Na duzu ati a akee ɛlɛkendɛ bieko ɛ? Dwazo na sɛlɛ maa bɛzɔne wɔ bɛnrinzi wɔ ɛtane ne mɔ bɛgua.’

¹⁷“Menziale mengɔle Gyɛlusalɛm na mɔɔ mewɔ Ɛzonlenlɛ Sua ne anu melɛyɛ nzɛlɛlɛ la, me nye hɔle dɔɔnwo,

¹⁸na menwunle Awulae kɛ ɔlɛtendɛ yeaze me kɛ, ‘Maa ɛ nwo ɛyɛ ndɛ fi Gyɛlusalɛm. Ɔluakɛ menli mɔɔ wɔ ɛke la ɛnrɛdie daselɛ ne mɔɔ ɛlɛdi ye me nwo la.’

¹⁹Na menganle kɛ, ‘Awulae, bɛdabɛ bɛze ye wienyi kɛ medame a anrɛɛ ɛnee mekye menli mɔɔ die wɔ di la, mebo bɛ, metwenle bɛ aze wɔ nyianu azua ne mɔ anu a.

²⁰ Mekɛ mɔɔ bɛku wɔ dasevolɛ Sitivin la, ɛnee medame mewɔ ɛkɛ, me kunlu dwole ye ɛhunlɛ nwo na menliele menli mɔɔ hunle ye la ndanlɛ menlɛle bɛ.’

²¹Na Awulae zele me kɛ, ‘Kɔ, mesoa wɔ wɔ maanle zo moa moa wɔ menli mɔɔ ɛnle Dwuuma la avinli.’ ”

²²Menli ne mɔ diele Pɔɔlo toonwo na mɔɔ ɔhanle edwɛkɛ kpɔkɛ ɛhye la bɛ muala bɛ ahonle futule na bɛdeɛdeanle nu kɛ, “Bɛye ye wɔ ɛkɛ ne! Bɛhu ye! Ɔle musuofoɔ!”

²³Bɛtea la ɛnee bɛlɛfuandivuandi bɛ ndanlɛ anwuma, na bɛfula anwea bɛsande ye anwomanyunlu, kɛ bɛndie edwɛkɛ biala.

²⁴Zɔhane ati Wulomu sogyama kpanyinli ne zele ye menli ne mɔ kɛ bɛva Pɔɔlo bɛwolo aranemgbole ne anu, na bɛbila ye empele bɛmaa ɔha deɛ holɛ ko mɔɔ ɔlua zo a Dwuuma doa ye ɛlɛwudo la.

²⁵Na mɔɔ bɛkyekyele ye kɛ bɛbila ye empele ne la, Pɔɔlo bizale sogya kpanyinli ko mɔɔ gyi ɔ nwo ɛkɛ ne la kɛ, “Asoo ɔfa mɛla adenle zo kɛ bɛkɛbo Wulomunli mgbane wɔ mekɛ mɔɔ bɛtɛdile ye edwɛkɛ bɛtɛbuale ye fɔlɛ kɛ yedo mɛla la ɔ?”

²⁶Sogya kpanyinli ne dele ɛhye la, ɔhɔle sogyama kpanyinli ne ɛkɛ ne na ɔhɔbizale ye kɛ, “Duzu debie a ɛlɛyɛ la? Nea, sonla ne le Wulomunli.”

²⁷Na sogyama kpanyinli ne rale Pɔɔlo anwo ɛkɛ rabizale ye kɛ, “Na ɛle Wulomunli ɔ?” Pɔɔlo buale ye kɛ, “Ɛhɛe.”

²⁸Na sogyama kpanyinli ne zele ye kɛ, “Mame, menduale ezukoa kpole kpalɛ yɛɛ menyianle zɔhane gyinlabelɛ a.” Pɔɔlo buale ye kɛ, “Mame, bɛwole me Wulomunli.”

²⁹Na ɛkɛ ne ala menli mɔɔ rale kɛ bɛbabizebiza Pɔɔlo edwɛkɛ la vi ɔ nwo ɛkɛ hwenle bɛ nwo. Mɔɔ sogyama kpanyinli ne nwunle kɛ Pɔɔlo le Wulomunli na yegua ye nwɔnzɔnwɔnzɔ la ye ahonle dule.

³⁰Ɛnee sogyama kpanyinli ne kpondɛ kɛ ɔnwu deɛ holɛ ko mɔɔ yemɔti Dwuuma ne ɛlɛto Pɔɔlo ɛzonle la ati, aleɛ hyenle la ɔmanle bɛyele Pɔɔlo nwɔnzɔnwɔnzɔ ne na ɔmanle sɛlɛvolɛ mgbanyinli ne nee ayiama ne mɔ amuala yiale na ɔvale Pɔɔlo ɔragyinlanle bɛ nyunlu ɛkɛ.