Read Nzema Gyi 24 Bible Online

Gyi 24 - Nzema bible

Gyi 24

¹Ɛhye anzi kenle nnu Sɛlɛvolɛ Kpanyinli Ananayase nee mgbanyima ne bie mɔ yɛɛ bɛ kamaavolɛ ko mɔɔ bɛfɛlɛ ye Tɛtɛlɛse la rale Sizalia. Bɛvale ɛzonle mɔɔ bɛvale bɛdole Pɔɔlo anwo zo la bɛradole amɛnlado ne anyunlu.

²Bɛvale Pɔɔlo bɛragyinlanle ɛkɛ, na Tɛtɛlɛse bɔle Pɔɔlo ɛzonledonlɛ ne abo zɛhae. “Nana, ɛle kpanyinli nrɛlɛbɛvolɛ la ati, yɛ nzo nu ɛdwo yɛ toonwo yeradwu ɛnɛ. Na ɔlua zolɛ maanzinli ye ɛnyia anyunluhɔlɛ.

³Yɛ nye sɔ mɔɔ wɔyɛ la amuala, yɛyɛ wɔ mo somaa.

⁴Mengulo kɛ mesɛkye wɔ mekɛ biala, yemɔti mesɛlɛ wɔ, tie yɛ edwɛkɛ sikalɛ ɛhye.

⁵Yɛnwu kɛ sonla ɛhye le agyegyeamra kpalɛ, ɔlɛtwehwe manzonle yeado Dwuuma mɔɔ wɔ aleɛabo la amuala avinli. Ɔli fane ne mɔɔ bɛfɛlɛ ye Nazalin la ati.

⁶Eza noko ɔbɔle mɔdenle kɛ ɔfa evinli yeaha yɛ Ɛzonlenlɛ Sua ne yɛɛ yɛhyele ye a. [Na anrɛɛ yɛkpondɛ kɛ yɛdua yɛdayɛ yɛ mɛla ne azo yɛdi ye edwɛkɛ.

⁷Na sogyama kpanyinli Lesease vale ɛlɔnema razale yɛ liele ye yɛ sa nu,

⁸na ɔhanle kɛ saa yɛlɛ edwɛkɛ bie a ɛnee yɛrɛla ɛ nyunlu.] Saa ɛdawɔ ɛbizebiza sonla ye edwɛkɛ ne anu a ɛkɛnwu kɛ mɔɔ yɛlɛka la le nɔhalɛ.”

⁹Dwuuma ne mɔ amuala nee ye yɛle adwenle na bɛhanle kɛ mɔɔ yeha la amuala le nɔhalɛ.

¹⁰Amɛnlado ne yɛle kɛ Pɔɔlo ɛdendɛ, na Pɔɔlo hanle kɛ, “Meze kɛ ɛvale edwɛkɛlilɛ wɔ maanle ɛhye anu la ɛhyɛ, yemɔti menzulo kɛ menwɔha me edwɛkɛ menwɔhile wɔ.

¹¹Kɛmɔ ɛdawɔ ɛkola ɛnwu ye la, kenle bulu nee nwiɔ ɛne yɛɛ mengɔle Gyɛlusalɛm kɛ mekayɛ nzɛlɛlɛ a.

¹²Dwuuma ye annwu me wɔ Ɛzonlenlɛ Sua ne anu kɛ me nee awie ɛlɛdi butule, anzɛɛ melɛkilehile menli debie ɛtane wɔ bɛ nyianu sua ne anu, anzɛɛ ɛleka biala wɔ suakpole ne azo.

¹³Bɛngola bɛnzi bɛ ɛzonledonlɛ ne pi bɔbɔ.

¹⁴Ko mɔɔ medie meto nu la a le kɛ melua Awulae Adenle ye mɔɔ bɛmɛ bɛse ɔnle nɔhalɛ la azo yɛɛ mesonle yɛ nlenya mɔ Nyamenle ne a. Noko eza medie mɔɔ bɛhɛlɛ ye wɔ Mosisi mɛla ne anu, nee Nyamenle kpɔmanvolɛma mbuluku ne mɔ anu la medi.

¹⁵Me anyelazo mɔɔ melɛ wɔ Nyamenle anu la le kɛ mɔɔ bɛdabɛ bɛlɛ ye ala la, kɛ menli kɔsɔɔti, ɛtanevolɛma nee kpalɛyɛlɛma badwazo ara ngoane nu.

¹⁶Ɛhye ati yɛɛ mebɔ mɔdenle kɛ menwɔnyia adwenle mɔɔ nuhua te la wɔ Nyamenle nee menli nyunlu a.

¹⁷ “Kɛmɔ menvile Gyɛlusalɛm la ɛvolɛ dɔɔnwo ɛze la ati, mengɔle ɛkɛ ne kɛ melɛ ezukoa nee azubɔlɛ ninyɛne mekamaa me menli ne mɔ.

¹⁸Mɔɔ mewɔ ɛhye azo la yɛɛ bɛnwunle me wɔ Ɛzonlenlɛ Sua ne anu a, mekɛ ne anu ɛnee melɛtu me nwo evinli. Menli dɔɔnwo biala ɛnle ɛkɛ yɛɛ basabasa biala anzi.

¹⁹Na Dwuuma bie mɔ bɔbɔ mɔɔ vi Ehyea maanle nu na bɛwɔ ɛkɛ ne bie la, bɛmɛ yɛɛ saa bɛlɛ edwɛkɛ bɛka bɛtia me a ɛnee ɔwɔ kɛ bɛba ɛ nyunlu na bɛbaka bɛ edwɛkɛ mɔɔ bɛ nee me lɛ ye la a.

²⁰Anzɛɛ maa bɛdabɛ mɔɔ bɛwɔ ɛke kɛkala la bie ɛha ɛtane holɛ ko mɔɔ bɛnwunle ye me nwo wɔ mekɛ mɔɔ megyi bagua ne anyunlu la.

²¹ Bɛannwu ɛhwee kɛ edwɛkɛ kpɔkɛ ko ne ala mɔɔ menganle wɔ mekɛ mɔɔ megyi bɛ nyunlu wɔ bagua ne anu la kɛ, ‘Bɛva me bɛra bɛ nyunlu ɛke, ɔluakɛ medie medi kɛ bɛbadwazo mɔwuamra bɛara ngoane nu bieko.’ ”

²²Filekese ze Awulae Adenle ɛhye anwo bie kpalɛ, yemɔti ɔdule edwɛkɛ ne ɔziele na ɔzele kɛ, “Saa sogyama kpanyinli Lesease ba a mebanwu mɔɔ meka ye wɔ bɛ edwɛkɛ ne anwo a ɔkɛyɛ boɛ la.”

²³Akee ɔzele sogya kpanyinli ne mɔɔ Pɔɔlo wɔ ɔ sa nu la kɛ ɔnlea ye boɛ, na ɔmaa ɔnyia adenle ɔkpundi ɔ nwo, na ɔmaa ɔ gɔnwo mɔ adenle ɔmaa bɛva ninyɛne mɔɔ ɔhyia nwo la bɛrɛlɛ ye.

²⁴Kenle ekyi guale nu la Filekese nee ɔ ye Dulusela mɔɔ le Dwuunli la rale. Ɔzoanle ɔmanle bɛhɔvale Pɔɔlo na ɔmanle ɔhanle diedi wɔ Gyisɛse Kelaese anu anwo edwɛkɛ ɔmanle ɔdiele bie.

²⁵Pɔɔlo noko hɔle zolɛ, na mɔɔ ɔka boɛlilɛ, bɛ nwo zo ɛhomonlɛ, yɛɛ Ndɛnebualɛ Kenle ne mɔɔ bara la anwo edwɛkɛ la, Filekese ahonle dule na ɔzele kɛ, “Yeyɛ boɛ, kɔ. Saa menyia alagye a mebazoa meamaa bɛarava wɔ bieko.”

²⁶Na ɛnee eza ye adwenle ko noko a le kɛ Pɔɔlo kɛmaa ye ezukoa. Ɛhye ati ɔmanle bɛhɔle ye ɛvalɛ wazowazo ɔ nee ye dendɛle.

²⁷Mɔɔ ɛvolɛ nwiɔ pɛle nu la, Pɔseɛse Fɛsetɛse ralile amɛnlado Filekese agyakɛ anu. Na kɛmɔ ɛnee Filekese kulo kɛ ɔnyia ɔ nyunlu wɔ Dwuuma anyunlu la ati, ɔmanle Pɔɔlo hale efiade ne.