Read Nzema Gyi 25 Bible Online

Gyi 25 - Nzema bible

Gyi 25

¹Mɔɔ Fɛsetɛse radwule maanzinli ne anu la, ye kenle nsa yɛɛ eza ɔvi Sizalia ɔhɔle Gyɛlusalɛm a.

²Sɛlɛvolɛ mgbanyinli ne mɔ nee Dwuu mgbanyima ne mɔ radonle Pɔɔlo ɛzonle bieko wɔ ɛkɛ ne. Bɛkpale Fɛsetɛse kyɛlɛ kɛ

³ɔli ɔboa bɛ na ɔva Pɔɔlo ɔrɛla Gyɛlusalɛm, ɔluakɛ ɛnee bɛlɛ adwenle kɛ bɛtɛ ye wɔ adenle nu bɛahu ye.

⁴Na Fɛsetɛse buale bɛ kɛ, “Pɔɔlo la efiade wɔ Sizalia, yɛɛ medame mumua ne ɔnrɛhyɛ na meazia meahɔ ɛkɛ.

⁵Yemɔti saa bɛnea na yeyɛ bɛ ɛtane bie a ɛnee bɛmaa bɛ menli mɔɔ li bɛ ti la nee me ɛhɔ Sizalia na bɛhɔha bɛ edwɛkɛ ne.”

⁶Fɛsetɛse lile kenle kɛyɛ mɔtwɛ mɔɔ kɔ bulu la wɔ Gyɛlusalɛm kolaa na yeazia yeahɔ Sizalia. Aleɛ hyenle ala la ɔhɔdɛnlanle ye ebia nu kɛ bɛva Pɔɔlo bɛrɛla ɔ nyunlu.

⁷Mɔɔ Pɔɔlo rale la, Dwuuma mɔɔ vi Gyɛlusalɛm rale la radonle ye ɛzonle mgbole bie mɔɔ akee bɛdabɛ bɔbɔ bɛngola bɛngilehile nu a.

⁸Pɔɔlo zale ɔ ne kɛ, “Metɛyɛle ɛtane biala metɛtiale Dwuuma mɛla ne anzɛɛ Ɛzonlenlɛ Sua ne na yeayɛ Wulomu Maanle Maanle belemgbunli ne.”

⁹Na kɛmɔ Fɛsetɛse kpondɛ ɔ nyunlu wɔ Dwuuma anyunlu la ati, ɔbizale Pɔɔlo kɛ, “Ɛkɛhulo kɛ ɛkɛhɔ Gyɛlusalɛm na ɛkɔhɔye ɛzonledonlɛ ɛhye mɔ anloa wɔ me nyunlu ɔ?”

¹⁰Pɔɔlo buale ye kɛ, “Megyi Wulomu Maanle Maanle belemgbunli ɔdaye ye ndɛnebualɛ ebia nyunlu, yɛɛ ɛke a ɔwɔ kɛ bɛdi me edwɛkɛ a. Metɛyɛle Dwuuma ɛtane biala, kɛmɔ ɛdawɔ wɔnwu ye la.

¹¹Saa medo mɛla bie mɔɔ maa mefɛta ewule a menzulo kɛ bɛkɛhu me. Na saa nɔhalɛ biala ɛnle bɛ ɛzonledonlɛ ne anu ɛdeɛ a, ɛnee noko ɔnle kɛ awie biala ye me maa bɛ. Zɔhane ati medo me edwɛkɛ ne memaa Maanle Maanle belemgbunli ne.”

¹²Fɛsetɛse nee ye mgbanyima ne mɔ hanle bɛ ti kpulale nwolɛ, na Fɛsetɛse buale Pɔɔlo kɛ, “Saa wɔdo wɔ edwɛkɛ ne wɔmaa Maanle Maanle belemgbunli ne a ɛnee ɛkɛ ne ala a ɛkɛhɔ a.”

¹³Mekɛ guale nu la Belemgbunli Agelepa mɔɔ tɔ zo nwiɔ la nee ɔ ye Bɛnaesi rale Sizalia kɛ bɛbakpɔla Fɛsetɛse bɛayɛ ye akoaba.

¹⁴Na nzinlii mɔɔ bɛlile kenle ekyi wɔ ɛkɛ ne la Fɛsetɛse hanle Pɔɔlo edwɛkɛ ne hilele belemgbunli ne kɛ, “Filekese gyakyile awie bie wɔ efiade ɛkɛ.

¹⁵Na mekɛ mɔɔ mengɔle Gyɛlusalɛm la, Dwuuma sɛlɛvolɛ mgbanyinli nee Dwuu mgbanyima ne mɔ radonle ye ɛzonle hilele me kɛ menli ye edwɛkɛ membua ye ewule fɔlɛ.

¹⁶Na menzele bɛ kɛ ɔnle Wulomu mɛla kɛ bɛkɛye awie biala mɔɔ bɛkɛdo ye ɛzonle kɛ yedo mɛla la bɛkɛmaa kyesɛ ɔ nee menli mɔɔ donle ye ɛzonle ne la yia nu bɛka bɛmaa ɔdaye ɔnyia adenle ɔsa ɔ ne wɔ nwolɛ.

¹⁷Yemɔti bɛ muala bɛrale ɛke, na meanva meando aze. Ye alehyenlɛ nu ala yɛɛ mendɛnlanle aze kɛ medi edwɛkɛ ne a.

¹⁸Menli ne mɔ dwazole la, bɛangola bɛanga edwɛkɛ kpaziwɔkɛ biala bɛando ɔ nwo zo kɛ yedo mɛla kpole bie, kɛmɔ mendwenlenle la.

¹⁹Mɔɔ bɛyɛle ala la a le bɛ nyamenlezonlenlɛ nwo kpolerazulɛ yɛɛ awie bie mɔɔ bɛfɛlɛ ye Gyisɛse, mɔɔ ɛwu, na Pɔɔlo kile kɛ ɔde aze la anwo kpolerazulɛ.

²⁰Kɛmɔ ɛnee mengola mennwu adenle mɔɔ mefa zolɛ a menwɔnwu edwɛkɛ ɛhye anu kpalɛ la, membizale Pɔɔlo saa ɔkɛhulo kɛ ɔkɛhɔ Gyɛlusalɛm na bɛahɔli edwɛkɛ ɛhye wɔ ɛkɛ a.

²¹Na Pɔɔlo buale kɛ memaa bɛva edwɛkɛ ne bɛhɔ Maanle Maanle belemgbunli ne ɔdaye ɔ nyunlu. Yemɔti memaa bɛva ye bɛzie kɔkpula mekɛ mɔɔ bɛ nee ye kɛhɔ la.”

²²Na Belemgbunli Agelepa zele Fɛsetɛse kɛ, “Mekulo kɛ metie sonla ɛhye edwɛkɛ ne bie.” Fɛsetɛse buale kɛ, “Ɛhyema ɛkɛdie ye.”

²³Yemɔti aleɛ hyenle la Agelepa nee Bɛnaesi zieziele bɛ nwo kpalɛ na bɛ nee sogya mgbanyinli nee suakpole ne azo adile adile hɔle ɛleka mɔɔ bɛdi edwɛkɛ la, na Fɛsetɛse manle bɛhɔvale Pɔɔlo bɛrale.

²⁴Fɛsetɛse zele kɛ, “Belemgbunli Agelepa, nee bɛdabɛ mgbanyima mɔɔ bɛ nee yɛ wɔ ɛke la amuala, nrenya ɛhye, Dwuuma amuala mɔɔ wɔ Gyɛlusalɛm nee ɛke la ɛrado ye ɛzonle ɛhile me, na bɛkile kɛ ɔnle kɛ ɔtɛnla ngoane nu bieko.

²⁵Me afoa nu ɛdeɛ, menleɛnlea edwɛkɛ ne anu la menwu kɛ ɔtɛyɛle debie mɔɔ maa ɔfɛta ewule a. Na kɛmɔ ɔdaye mumua ne ɔse ɔfa ye edwɛkɛ ne yeahɔ Maanle Maanle belemgbunli ne anyunlu la, meyɛ kɛ memaa bɛava ye bɛahɔ.

²⁶Noko mennwu edwɛkɛ kpaziwɔkɛ mɔɔ megyinla zolɛ meahɛlɛ meahɔmaa Maanle Maanle belemgbunli ne a. Yemɔti me nee ye ɛra bɛ nyunlu ɛke, bɔbɔ wɔmɔ Belemgbunli Agelepa, amaa wɔanleɛnlea ye edwɛkɛ ne anu boɛ, na meanyia edwɛkɛ kpalɛ meahɛlɛ meahɔ.

²⁷Ɔluakɛ menea a ɔnwie nrɛlɛbɛ yɛ kɛ melɛ pilizanli melɛkɔ na menlɛ ɔ nwo ɛzonledonlɛ kpalɛ biala a.”