Read Nzema Gyi 6 Bible Online

Gyi 6 - Nzema bible

Gyi 6

¹Nzinlii, mɔɔ ɛnee akee ɛdoavolɛma ne anwo ɛlɛso la, ɛdendɛlɛ radɔle Dwuuma mɔɔ ka Giliki nee Dwuuma mɔɔ wɔ maanle ne anu la avinli. Dwuuma mɔɔ ka Giliki la se bɛbu bɛ nye bɛgua bɛ ahunlanvolɛ mraalɛ ne mɔ anwo zo wɔ dahuu ndɔnielilɛ nu.

²Zɔhane ati ɛzoanvolɛma bulu nee nwiɔ ne vɛlɛle ɛdoavolɛma ne amuala na bɛzele bɛ kɛ, “Ɔnle kpalɛ kɛ ndɔnielilɛ ti yɛkɛbu yɛ nye yɛkɛgua Nyamenle edwɛkɛ ne ɛhanlɛ zo.

³Yemɔti, ayi mɔ, bɛnlea na bɛye bɛ nuhua nsuu mɔɔ menli bu bɛ, mɔɔ Sunsum Nwuanzanwuanza ne wɔ bɛ nwo zo na bɛze nrɛlɛbɛ la bɛmaa yɛ, na yɛva bɛ yɛzie zɛhae gyima ye anloa,

⁴amaa yɛdayɛ noko yɛanyia mekɛ yɛayɛ nzɛlɛlɛ nee Edwɛkpa ne ɛhanlɛ gyima ne.”

⁵Ɛzoanvolɛma ne mɔ nzuzulɛ ne zɔle bɛ kɔsɔɔti bɛ nye, na bɛyele Sitivin, mɔɔ lɛ diedi ne anu kpundii na Sunsum Nwuanzanwuanza ne ɛyi ye tɛkɛɛ la, Felepe, Polɔkɔlɛse, Nekanɔ, Taemɔn, Paamɛnase, yɛɛ Nekɔlɔso mɔɔ vi Anteɔko, mɔɔ ɛnle Dwuunli na yehakyi ɔsonle Dwuuma Nyamenle ne la.

⁶Bɛvale bɛ bɛmanle ɛzoanvolɛma ne, ɛzoanvolɛma ne vale bɛ sa guale bɛ ti zo na bɛyɛle nzɛlɛlɛ bɛmanle bɛ.

⁷Na Nyamenle edwɛkɛ ne akee nyinle kpole manle menli somaa rabokale bɛ nwo, na bɛyɛle dɔɔnwo wɔ Gyɛlusalɛm, yɛɛ eza sɛlɛvolɛma dɔɔnwo liele Edwɛkpa ne lile.

⁸Nyamenle lole Sitivin dɔɔnwo na ɔmanle ye tumi kpole ɔmanle ɔyɛle nwanwane ninyɛne mgbole ɔhilele menli.

⁹Yemɔti menli bie mɔɔ fɛlɛ bɛ nwo “Fanwodi Sukuluma”[4] na bɛvi Saelin nee Alɛzandelea, nee bie mɔ mɔɔ vi Selesea nee Ehyea la bɔle ɔ bo kɛ bɛ nee Sitivin su kpolera.

¹⁰Na Sunsum ne manle Sitivin nrɛlɛbɛ dɔɔnwo, yemɔti bɛangola ye fee.

¹¹Ɛhye ati bɛwulowulale menli bie abo bɛmanle bɛhanle kɛ, “Yɛdele kɛ ɔlɛka munzule edwɛkɛ yeatia Mosisi nee Nyamenle.”

¹²Na bɛluale adenle ɛhye azo bɛmanle maanlema nee asɔne mgbanyima ne nee mɛla kilehilevolɛma ne mɔ vale ɛya na bɛhyele Sitivin bɛ nee ye hɔle ayiama ne anyunlu.

¹³Bɛmanle menli ralile dasewia kɛ, “Nrenya ɛhye, dahuu ɔtendɛ ɔtia yɛ Ɛzonlenlɛ Sua nwuanzanwuanza ye nee Mosisi mɛla ne.

¹⁴Yɛdele kɛ ɔlɛka kɛ Gyisɛse ne mɔɔ vi Nazalɛte la barazɛkye Ɛzonlenlɛ Sua ye, na yeahakyi maamɛla biala mɔɔ Mosisi hyehyɛle manle yɛ la!”

¹⁵Bɛdabɛ mɔɔ bɛwɔ ayia ne abo la amuala anye hale Sitivin anwo, na bɛnwunle kɛ ɛnee ɔ nyunlu ɛyɛ kɛ Nyamenle soanvolɛ nyunlu la.