Read Nzema Gyi 9 Bible Online

Gyi 9 - Nzema bible

Gyi 9

¹Mekɛ ne anu ɛnee Sɔɔlo lɛ ye kɔdiawu adwenle ne tɛgyegye Awulae ɛdoavolɛma ne. Ɔhɔle Sɛlɛvolɛ Kpanyinli ne ɛkɛ

²na ɔhɔliele tumi ngɛlɛta kɛ ɔkɔ Dɛmasekɛse nyianu azua ne mɔ anu yeahɔhye bɛdabɛ mraalɛ nee mrenya mɔɔ bɛlua Awulae Adenle ne azo la, yeakyekye bɛ, ɔ nee bɛ ara Gyɛlusalɛm.

³Mɔɔ ɔlua adenle zo na ɔka ekyii ɔdwu Dɛmasekɛse la, wienyi kpole bie vi anwomanyunlu rabɔle yiale ye.

⁴Ɔpɛle ɔfinle na ɔdele kɛ ɛnelɛ bie se, “Sɔɔlo! Sɔɔlo! Duzu ati a ɛlɛyɛ me kpɔdekpɔde zɛhae ɛ?”

⁵Na ɔbizale kɛ, “Awulae, ɛdawɔ nwane ɔ?” Ɛnelɛ ne buale ye kɛ, “Medame a mele Gyisɛse mɔɔ ɛlɛyɛ me kpɔdekpɔde la.

⁶Dwazo kɔ suakpole ne azo na bɛbahile wɔ debie mɔɔ ɔwɔ kɛ ɛyɛ la.”

⁷Menli mɔɔ nee Sɔɔlo lua la dɔle mumule, bɛandɛ bɛ nloa anu, ɔluakɛ bɛdele ɛnelɛ ne, na bɛannwu awie biala.

⁸Sɔɔlo vi azɛlɛ ne anwo dwazole la ɛnee ɔ nye ɛzi. Yemɔti bɛsosɔle ɔ sa bɛ nee ye hɔle Dɛmasekɛse.

⁹Kenle nsa, ɛnee ɔnnwu debie, yɛɛ ɔnli debie na yeanlo nzule.

¹⁰Kelaese ɛdoavolɛ bie wɔ Dɛmasekɛse, bɛfɛlɛ ye Ananayase. Wɔ ɛnyelɛzodeɛnwunlɛ nu, ɔdele kɛ Awulae se, “Ananayase!” Ɔliele zolɛ kɛ, “Awulae, medame ɛ.”

¹¹Na Awulae zele ye kɛ, “Kɔ kpalɛ ne mɔɔ bɛfɛlɛ ye ‘Fɔɔnwo’ la azo, na kɔ Dwudase sua nu, na biza awie bie mɔɔ vi Taasɛse na bɛfɛlɛ ye Sɔɔlo la. Ɔgua zolɛ ɔlɛyɛ nzɛlɛlɛ,

¹²na wɔ ɛnyelɛzodeɛnwunlɛ nu yenwu nrenya bie mɔɔ bɛfɛlɛ ye Ananayase la kɛ yera ɔ nwo ɛkɛ yerava ɔ sa yegua ɔ ti zo yemaa yenwu debie bieko.”

¹³Ananayase zele kɛ, “Awulae, menli dɔɔnwo ɛha sonla ɛhye anwo edwɛkɛ nee debie mɔɔ yeva yehile wɔ menli ne mɔɔ wɔ Gyɛlusalɛm la ɛhile me.

¹⁴Na yera ɛke kɛ ɔlɛ tumi ngɛlɛta vi sɛlɛvolɛ mgbanyinli ne mɔ ɛkɛ kɛ ɔbahye bɛdabɛ mɔɔ bɛsonle wɔ la amuala.”

¹⁵Awulae zele ye kɛ, “Wɔmɔ kɔ, na meye ye kɛ ɔrayɛ me sonvolɛ, ɔva me duma ɔhɔ bɛdabɛ mɔɔ bɛnle Dwuuma la anu nee arelemgbunli nee Yizilayɛma kɔsɔɔti anwo zo.

¹⁶Na medame mebahile ye amaneɛ mɔɔ ɔbanwu ye wɔ me duma nu la.”

¹⁷Yemɔti Ananayase hɔle sua nu ɛkɛ, ɔvale ɔ sa ɔguale Sɔɔlo ati zo na ɔzele ye kɛ, “Adiema Sɔɔlo, Awulae Gyisɛse, mɔɔ ɛlua adenle zo ɛlɛba ɛke mɔɔ ɔyele ɔ nwo ɔhilele wɔ la ɛzoa me ɛ nwo ɛke, amaa wɔanwu debie bieko na Sunsum Nwuanzanwuanza ne ara ɛ nwo zo.”

¹⁸Ɛkɛ ne ala debie bie mɔɔ le kɛ fɛlɛ nwo abonle la vi Sɔɔlo anye zo guale aze, na ɔnwunle debie bieko; na ɔdwazole ɔmanle bɛzɔnenle ye.

¹⁹Akee ɔlile debie na ɔ nwo gyinlanle ye. Sɔɔlo nee ɛdoavolɛma ne dɛnlanle mekɛ ekyi wɔ Dɛmasekɛse,

²⁰na ɔhɔle nyianu azua ne mɔ anu ɔhɔbɔle nolo kɛ Gyisɛse, “Yemɔ a ɔle Nyamenle Ara ne a.”

²¹Ɔyɛle bɛdabɛ mɔɔ bɛdele ye edwɛkɛ ne la azibɛnwo kpole na bɛbizale kɛ, “Na tɛ sonla ɛhye a ɛlɛkuhu menli mɔɔ bɔ Gyisɛse duma wɔ Gyɛlusalɛm la ɔ? Anzɛɛ yeamba ɛke kɛ ɔbahye bɛdabɛ mɔɔ bɛbɔ Gyisɛse duma la yeahɔmaa sɛlɛvolɛ mgbanyinli ne mɔ ɔ?”

²²Na Sɔɔlo nyianle anwosesebɛ kpalɛ wɔ ye edwɛkɛhanlɛ nu na ɔholale ɔhilehilele nu kɛ Gyisɛse a le Mɛzaya ne, ɔmanle ɔrale kɛ Dwuuma bɔbɔ mɔɔ wɔ Dɛmasekɛse la dɔle mumule wɔ nwolɛ.

²³ Kenle guale nu ekyii la, Dwuuma ne hɔle akpamo kɛ bɛku ye,

²⁴na Sɔɔlo dele. Dwuuma ne dɛle ye wɔ sua ne azo nlenkɛ mgbole ne mɔ anloa nɔɔzo nee ewiazo kɛ bɛ sa kɛha ye bɛkɛhu ye.

²⁵Na kenle ko nɔɔzo Sɔɔlo ɛdoavolɛma ne vale ye dɛnlanle kɛndɛne nu, vale ye wulale suakpole ne bane ne tokule bie anu, na bɛliele ye bɛtɛɛ bɛdwulale ye aze wɔ suakpole ne bane ne anzi lɔ.

²⁶Sɔɔlo hɔle Gyɛlusalɛm na ɔyɛle kɛ ɔlɛ ɔ nwo ɔkabɔ ɛdoavolɛma ne anwo la bɛanlie ye bɛanli, na bɛzulole ye.

²⁷Zɔhane ati Baanabase raboale ye na ɔ nee ye hɔle ɛzoanvolɛma ne ɛkɛ. Ɔhilehilele kɛ Sɔɔlo zile nwunle Awulae wɔ adevinli ne na Awulae dendɛle hilele ye, nee Sɔɔlo ahonle mɔɔ zile na ɔvale Gyisɛse duma ɔbɔle Edwɛkpa ne nolo wɔ Dɛmasekɛse la amuala ɔhilele bɛ.

²⁸Yemɔti akee bɛmanle Sɔɔlo nee bɛ luale, na ɔyele ɔ nyunlu wienyi ɔvale Awulae duma ɔbɔle Edwɛkpa ne nolo wɔ Gyɛlusalɛm amuala.

²⁹Eza ɔ nee Dwuuma mɔɔ ka Giliki la zule kpolera ɔmanle bɛnyianle adwenle kɛ bɛku ye.

³⁰Mɔɔ diedima ne bie mɔ dele ɛhye la, bɛvale Sɔɔlo bɛhɔle Sizalia na bɛmanle ɔhɔle Taasɛse.

³¹Ɔlua Sɔɔlo ɛhakyilɛ zo akee Asɔne ne mɔɔ wɔ Dwudiya, Galeli, yɛɛ Samɛlea la nyianle anzonudwolɛ na ɔnyinle. Na ɔlua Sunsum Nwuanzanwuanza ne moalɛ zo Asɔne ne nyianle anwosesebɛ, menli dɔɔnwo rale nu na bɛvale Nyamenlezulolɛ bɛluale.

³²Pita hɔle ɛleka dɔɔnwo, na kenle ko ɔhɔkpɔlale Nyamenle menli ne mɔɔ wɔ Leda la.

³³Ɛkɛ ne yɛɛ ɔhɔnwunle nrenya bie mɔɔ bɛfɛlɛ ye Yiniase la kɛ yedwidwe na yela ɛleka ko toonwo ɛvolɛ mɔtwɛ.

³⁴Na Pita zele ye kɛ, “Yiniase, Gyisɛse Kelaese ɛyɛ wɔ ayile. Dwazo na nyenya wɔ ɛkpa ne.” Na ɛkɛ ne ala Yiniase dwazole.

³⁵Menli mɔɔ wɔ Leda nee Hyɛlɔn la nwunle nrenya ne na bɛhakyile bɛdoale Awulae.

³⁶Dwɔpa noko, raalɛ bie wɔ ɛkɛ, bɛfɛlɛ ye Tabeta. (Ye duma ne Giliki nu a le Dɔkase.)[6] Ɔle ɛdoavolɛ. Raalɛ ɛhye vale ye mekɛ yɛle ahunlunyele gyima na ɔboale ehyianvolɛma.

³⁷Mekɛ ne anu ɔ nwo dole ye na ɔwule. Bɛbiale ye na bɛdedale ye wɔ ɛbolɔnsane zo ekpumgbunli ne mɔ bie anu.

³⁸Dwɔpa nee Leda anwa biala. Yemɔti mɔɔ diedima ne mɔɔ wɔ Dwɔpa la dele kɛ Pita wɔ Leda la, bɛzoanle menli nwiɔ bɛmanle bɛhɔvale nrɛlaleɛ bɛhɔmanle ye kɛ. “Yɛsɛlɛ wɔ, bɔ mɔdenle ka ɛ nwo bɛla.”

³⁹Pita noko anzi aze na ɔ nee bɛ hɔle. Ɔhɔdwule la, bɛ nee ye hɔle ɛbolɔnsane ne azo ɛleka mɔɔ bɛdeda ye la. Ahunlanvolɛ mraalɛ mɔɔ Dɔkase ɛyɛ bɛ nyele ɛlɛ la vale ɛzunlɛ rabɔle yiale Pita na bɛvale adɛladeɛ mɔɔ Dɔkase kpomgbale hyɛle bɛ, wɔ mekɛ mɔɔ ɔde aze la bɛhilele ye.

⁴⁰Pita vindele bɛ, na ɔhotole ɔzɛlɛle; ɔhakyile ɔ nye funli ne anwo na ɔzele kɛ, “Tabeta, dwazo!” Raalɛ ne bukele ɔ nye na ɔnwunle Pita la, ɔmanle ɔ nwo zo ɔdɛnlanle aze.

⁴¹Pita zɔle ye manle ɔdwazole ɔgyinlanle. Akee ɔvɛlɛle diedima ne nee ahunlanvolɛ mraalɛ ne mɔ na ɔvale ye ɔmanle bɛ.

⁴²Edwɛkɛ ɛhye kpondenle Dwɔpa amuala, na menli somaa ne ala liele Awulae lile.

⁴³Pita dɛnlanle Dwɔpa hyɛle dɔɔnwo wɔ nrenya bie mɔɔ yɛ nwoma nwo gyima mɔɔ bɛfɛlɛ ye Saemɔn la sua nu.