Read Nzema Wulo 1 Bible Online

Wulo 1 - Nzema bible

Wulo 1

¹Medame Pɔɔlo, mɔɔ mele Kelaese Gyisɛse akɛlɛ, na Nyamenle ɛvɛlɛ me kɛ membanyɛ ɛzoanvolɛ na yeze me kɛ membɔ ye Edwɛkpa ne nolo la a melɛkɛlɛ kɛlata ɛhye a.

²Nyamenle luale ye kpɔmanvolɛma anwo zo vale Edwɛkpa ɛhye bɔle ɛwɔkɛ wɔ mɔmoane kpalɛ ne, kɛmɔ bɛhɛlɛ ye wɔ Nyamenle Edwɛkɛ Nwuanzanwuanza ne mɔ anu la.

³Edwɛkpa ɛhye fane ɔ Ra ne, mɔɔ le yɛ Awulae Gyisɛse Kelaese, mɔɔ saa nwonane nu a ɔle Devidi anlɔnra,

⁴noko wɔ Nyamenle nu nwuanzanwuanzayɛlɛ nu a, bɛva tumi kpole bɛdwazo ye bɛvi ewule nu bɛhile kɛ ɔle Nyamenle Ara la anwo.

⁵Ɔ nwo zo yɛɛ ɔlua mɔɔ Nyamenle ɛlo yɛ ɛmaa merayɛ ɛzoanvolɛ a, amaa menli kɔsɔɔti alie ye duma ne ali na bɛadie ye.

⁶Bɛdabɛ noko mɔɔ bɛwɔ Wulomu la boka ɛhye anwo, ɔluakɛ Nyamenle ɛvɛlɛ bɛ kɛ bɛrayɛ Gyisɛse Kelaese ɛdeɛ.

⁷Zɔhane ati melɛkɛlɛ kɛlata ɛhye mearɛlɛ bɛdabɛ mɔɔ Nyamenle kulo bɛ na yevɛlɛ bɛ kɛ bɛrayɛ ye menli na bɛwɔ Wulomu la amuala. Yɛ Ze Nyamenle ne nee Awulae Gyisɛse Kelaese ɛlo bɛ na ɔmaa bɛ anzonudwolɛ.

⁸Medumua mealua Gyisɛse Kelaese anwo zo meayɛ Nyamenle mo wɔ bɛ kɔsɔɔti bɛ ti, ɔluakɛ bɛ diedi nganeɛ ɛdwu ewiade amra amuala anzo nu.

⁹Nyamenle ne mɔɔ medua ɔ Ra ne anwo Edwɛkɛ Kpalɛ ne nolobɔlɛ zo mefa me ahonle muala mesonle ye la di me daselɛ kɛ mɔɔ melɛka la le nɔhalɛ. Nyamenle ze kɛ dahuu mekakye bɛ

¹⁰wɔ me nzɛlɛlɛ nu. Mesɛlɛ kɛ ɔlua ɔdaye Nyamenle ye ɛhulolɛ zo ɔmaa adenle ɔmaa membamkpɔla bɛ.

¹¹Ɔluakɛ mekulo kɛ mebakpɔla bɛ, amaa yɛanyia Nyamenle Sunsum nu ahyɛlɛdeɛ ne na bɛ nwo ayɛ se.

¹²Mɔɔ mekpondɛ meaha la a le kɛ, saa yɛ muala yɛyia nu a bɛ diedi bamaa me anwosesebɛ, yɛɛ me diedi bamaa bɛ diedi anyi.

¹³ Me mediema, mekpondɛ kɛ bɛnwu kɛ mekɛ dɔɔnwo anu mehyehyɛ kɛ anrɛɛ menwɔrakpɔla bɛ, amaa meahola meahakyi bɛ bie mɔ dɔɔnwo, kɛmɔ meyɛ ye wɔ maanle maanle dɔɔnwo zo la, noko ɔyɛ a ɛnee debie fofolɛ ɛzi me aze.

¹⁴Ɔluakɛ ɛzonlelilɛ la me nwo zo kɛ ɔwɔ kɛ mebɔ edwɛkɛ ne nolo mekile menli ngakyile kɔsɔɔti, bɛdabɛ mɔɔ bɛ nye ɛde nee bɛdabɛ mɔɔ bɛ nye ɛtɛtele, mɔɔ ze bie nee mɔɔ ɛnze bie la amuala.

¹⁵Ɛhye ati yɛɛ mekulo kɛ meka Edwɛkpa ne mekile bɛdabɛ noko mɔɔ bɛwɔ Wulomu la a.

¹⁶ Menze Edwɛkpa ne anwo nyiane. Ɔle Nyamenle tumi mɔɔ ɔfa ɔdie bɛdabɛ mɔɔ bɛdie bɛdi la amuala a, mɔɔ lumua la a le bɛdabɛ Dwuuma yɛɛ akee bɛdabɛ noko mɔɔ bɛnle Dwuuma la.

¹⁷ Ɔluakɛ ɔvi mɔlebɛbo ne kɔdwu awieleɛ ne amuala, Nyamenle dua diedi zo a maa menli sɔ ɔ nye a. Nyamenle Edwɛkɛ ne se, “Mɔɔ bɛkɛlua ye diedi zo bɛkɛmaa ɔkɛzɔ Nyamenle anye la banyia ngoane.”[1]

¹⁸Bɛhile bɛmaa yɛnwu kɛ Nyamenle ɛya ne vi anwuma bara bɛdabɛ mɔɔ bɛmbu Nyamenle na bɛfa bɛ ngunziyɛlɛ bɛkeda nɔhalɛ ne azo la anwo zo.

¹⁹Nyamenle badea bɛ, ɔluakɛ bɛze mɔɔ ɔwɔ kɛ sonla nwu ye wɔ Nyamenle anwo la. Nyamenle ɔdaye a ɔyele ɔhilele bɛ a.

²⁰Sumunli kɛ Nyamenle bɔle ewiade la yɛɛ ɔbɔle ɔ bo kɛ ɔye ye su kpalɛ ne mɔɔ yɛ nye ɛnnwu ye la wienyi yeahile sonla a. Ninyɛne ɛhye mɔ a le ye damɛnlangoate tumi ne nee ye nyamenleyɛlɛ ne. Menli nwu ɛhye wɔ ninyɛne mɔɔ Nyamenle ɛbɔ la anu. Yemɔti bɛnlɛ nyelebɛnloa fee!

²¹ Bɛze Nyamenle, noko bɛnva enililɛ mɔɔ fɛta la bɛmmaa ye kɛ ɔle Nyamenle, yɛɛ bɛnva moyɛlɛ bɛmmaa ye. Adwenle mgbane mgbane yɛɛ bɛfa a, yɛɛ awozinli ɛyi bɛ adwenle ne mɔ mɔɔ nrɛlɛbɛ ɛnle nu la tetɛkɛɛ.

²²Bɛse bɛze nrɛlɛbɛ, noko bɛle ahɔnwɔne;

²³ kɛ bɛkɛzonle damɛnlangoate Nyamenle ne la, bɛsonle ninyɛne mɔɔ bɛdabɛ bɛnwo, mɔɔ le kɛ sonla, nloma, nane anzɛɛ nwɔlɛ la.

²⁴Kɛmɔ menli ɛyɛ bɛ nwo ahɔnwɔne zɛhae la ati, Nyamenle ɛye bɛ ɛmaa bɛdabɛ bɛ atiakunluwɔzo mgbane mgbane ne mɔ, na ɔlua zolɛ mraalɛ fa mraalɛ na mrenya fa mrenya.

²⁵Bɛgyakyile kɛ bɛkɛlie nɔhalɛ ne mɔɔ fane Nyamenle anwo la bɛkɛli. Zɔhane ati bɛdie adalɛ ne bɛdi na bɛsonle ninyɛne mɔɔ Nyamenle ɛbɔ bɛ la, na bɛgyakyi Bɔvolɛ Nyamenle mumua ne, yemɔ yɛɛ ayɛlɛyelɛ ɛha ye dahuu a. Amen.

²⁶Kɛmɔ menli yɛ nyɛleɛ ɛhye mɔ la ati, Nyamenle ɛgyakyi bɛ ɛmaa bɛ anyiemgba ɛbɛla ne. Bɔbɔ mraalɛ fa bɛ nwo gyakyi mrenya.

²⁷Zɔhane ala yɛɛ mrenya noko gyakyi mraalɛ na bɛmaa bɛ ti akunlu ba bɛ gɔnwo mɔ mrenya nwo zo na bɛfa bɛ a. Nzinlii bɛnyia bɛ ninyɛndane ɛhye mɔ anwo ndeanlɛ, bɛte ye bɛ nwonane nu kpalɛ kpalɛ kɛmɔ ɔfɛta la.

²⁸Kɛmɔ menli kpole kɛ bɛnrɛnwu Nyamenle la ati, ɔgyakyile bɛ ɔmanle bɛ adwenle ne mɔ mɔɔ ɛkpɔlɔ la, amaa ɔlua zolɛ bɛyɛle ninyɛne mɔɔ ɔnle kɛ bɛyɛ la.

²⁹Ninyɛne mɔɔ le kɛ amumuyɛ, asiayɛ, anyebolo, ngunzi, nungule, kɔdiawu, konle, adalɛ nee nwondomgbɔ la ɛyi bɛ tɛkɛɛ. Bɛye ndɛne,

³⁰bɛka bɛ gɔnwo mɔ anwo edwɛkɛ ɛtane ɛtane, bɛkyi Nyamenle, bɛtu bɛ nwo, bɛyɛ mgbanyizonle, bɛkile bɛ nwo, bɛboɔboa bɛdwenle ɛtane nwo bɛyɛ, yɛɛ bɛndie bɛ awovolɛma;

³¹bɛle ahɔnwɔne, bɛnlɛ diedi, bɛnze ahunlunyele yɛɛ bɛ ti yɛ se kpalɛ kpalɛ.

³²Bɛze noko kɛ Nyamenle mɛla ne kile kɛ bɛdabɛ mɔɔ bɛbɔ ɛbɛla zɛhae mɔ la fɛta ewule, noko bɛyɛ, yɛɛ bɛsi awie mɔ adua bɛmaa bɛyɛ bie.