Read Nzema Wulo 12 Bible Online

Wulo 12 - Nzema bible

Wulo 12

¹Zɔhane ati me mediema, Nyamenle anwunvɔnezelɛ bebelebe ne mɔɔ ɔse yɛ la ati, mesɛlɛ bɛ, bɛva bɛ sonlabaka ne mɔ bɛbɔ azu mɔɔ anwo te na ɔsɔ ɛnyelɛ la bɛmaa Nyamenle. Ɛhye a le sunsum nu ɛzonlenlɛ kpalɛ mɔɔ ɔwɔ kɛ bɛfa bɛsonle ye a.

²Bɛmmamaa ewiade amaamuo di bɛ adwenle. Bɛmaa Nyamenle ɛhakyi bɛ adwenle bɔkɔɔ, na bɛahola bɛanwu Nyamenle ɛhulolɛdeɛ kpalɛ ne mɔɔ le kpalɛ, ɔsɔ ɛnyelɛ, na ɔdi munli la.

³Melua Nyamenle ɛlolɛ ahyɛlɛdeɛ ne mɔɔ yeva yemaa me la azo mese bɛ muala kɛ bɛmmamemaa bɛ nwo zo. Bɛdwenle kpalɛ na bɛbua bɛ nwo ndɛne ngoko wɔ diedi dodo mɔɔ Nyamenle ɛva ɛmaa bɛ la anu.

⁴ Kɛmɔ sonlabaka lɛ ye nvɛyeba dɔɔnwo na nvɛyeba ko biala lɛ ye gyima mɔɔ ɔdi la,

⁵zɔhane ala yɛɛ saa yɛzonle bɔbɔ a yɛ muala yɛbɔ nu a yɛle sonlabaka ko wɔ Kelaese anu, na yɛsosɔ yɛ nwo ngoko kɛ sonlabaka nvɛyeba ne mɔ sosɔ bɛ nwo la a.

⁶ Ɛhye ati ɔwɔ kɛ yɛfa yɛ ahyɛlɛdeɛ ngakyile ne mɔ mɔɔ Nyamenle ɛlolɛ zo yɛnyia bɛ la yɛyɛ gyima. Saa yɛ bie mɔ ahyɛlɛdeɛ a le Nyamenle anloa azo ɛdendɛlɛ a, ɔwɔ kɛ yɛyɛ ye zɔhane, kɛmɔ yɛ diedi ne de la.

⁷Saa ɛzonlenlɛ nu noko a, ɔwɔ kɛ yɛsonle. Saa ngilehilelɛ nu a, ɔwɔ kɛ yɛkilehile.

⁸Mɔɔ lɛ folɛdulɛ ahyɛlɛdeɛ la ɛva ɛdu ɔ gɔnwo mɔ folɛ. Mɔɔ ɔwɔ kɛ asa dwu awie mɔ anwo zo la, ɛyeye ɔ kunlu ɛyɛ. Mɔɔ yɛ ahunlunyele gyima la, ɔwɔ kɛ yɛ ye anyelielɛ nu; yɛɛ mɔɔ lɛ moalɛ la ɛva fɛlɛkolilɛ ɛboa.

⁹Bɛmaa bɛ ɛhulolɛ ɛyɛ nɔhalɛ ɛhulolɛ; bɛhyi mɔɔ le ɛtane la na bɛzɔ mɔɔ le kpalɛ la anu.

¹⁰Bɛva mediema ɛhulolɛ bɛhulo bɛ nwo ngoko kɛ bɛle Kelaese ɛdoavolɛma, na bɛbɔ mɔdenle bɛpele bɛbu bɛ gɔnwo mɔ kpalɛ kpalɛ.

¹¹Bɛyɛ gyima ɛsesebɛ, bɛmmayɛ mgbovonle, na bɛva bɛ ahonle muala bɛzonle Nyamenle.

¹²Bɛmaa bɛ anyelazo ɛmaa bɛ nye ɛlie, bɛzi abotane wɔ bɛ amaneɛnwunlɛ nu, na bɛyɛ nzɛlɛlɛ dahuu.

¹³Bɛmaa bɛ sa ɛdwu mediema Kelaese ɛdoavolɛma mɔɔ ɛhyia la anwo zo, na bɛlie nyɛvolɛ wɔ bɛ azua nu.

¹⁴ Bɛzɛlɛ Nyamenle nyilalɛ bɛmaa menli mɔɔ yɛ bɛ kpɔdekpɔde la; ɛhɛe, bɛzɛlɛ nyilalɛ bɛmaa bɛ, bɛmmasɛlɛ ndeanlɛ.

¹⁵Bɛ nee mɔɔ di fɛlɛko la ɛli fɛlɛko na bɛ nee mɔ su la ɛzu.

¹⁶ Bɛmaa bɛ muala bɛ adwenle ɛyɛ ko. Bɛmmayɛ mgbanyizonle, bɛ nee ahoahweabane ɛdu. Bɛmmabu bɛ nwo kɛ bɛle nrɛlɛbɛvolɛma.

¹⁷Saa awie yɛ bɛ ɛtane a, bɛmmadi ye nzenralɛ. Bɛbɔ mɔdenle bɛyɛ mɔɔ awie biala nea a ɛnee nwolɛ te la.

¹⁸Bɛbɔ mɔdenle kɛ bɛ nee menli kɔsɔɔti kɛdɛnla anzonudwolɛ nu.

¹⁹ Ayi mɔ, bɛmmafa ɛtane bɛtua ɛtane kakɛ ɛlɛ, bɛgyakyi debie biala anu bɛmaa Nyamenle ɛya ne. Ɔluakɛ Nyamenle Edwɛkɛ ne se, “Nzenralɛ le me ɛdeɛ, mebadua ɛtane kakɛ, Awulae a se a.”

²⁰ Yemɔti, kɛmɔ Nyamenle Edwɛkɛ ne se la, “Saa ɛhɔne ɛlɛku wɔ kpɔvolɛ a, maa ye aleɛ ɔli; saa nzuhɔne ɛlɛku ye a, maa ye nzule ɔnlo; ɔluakɛ saa ɛyɛ ye zɔhane a, ɛnee ɛlɛkuohua senle samɛnlakɛ ɔ ti zo.”

²¹Bɛmmamaa ɛtane fo bɛ nwo zo; bɛva kpalɛyɛlɛ bɛli ɛtane nwo zo konim.