Read Nzema Wulo 13 Bible Online

Wulo 13 - Nzema bible

Wulo 13

¹Ɔwɔ kɛ awie biala bu mgbanyima mɔɔ ɛlɛbu maanle ne la, ɔboalekɛ tumi biala ɛnle ɛkɛ mɔɔ Nyamenle ɛnze nu a, yɛɛ mgbanyima mɔɔ wɔ zo kɛkala la, Nyamenle a ɛva bɛ ɛzie ɛkɛ a.

²Zɔhane ati mɔɔ kɛtia mgbanyima mɔɔ wɔ zo la, ɛtia menli mɔɔ Nyamenle ɔdaye yeye bɛ kɛ bɛbu maanle ne la, na mɔɔ kɛyɛ ye zɔ noko la twe ndeanlɛ maa ɔ nwo.

³Ɔluakɛ ɔnle kɛ awie biala mɔɔ di boɛ la sulo menli mɔɔ maanlebulɛ ne wɔ bɛ sa nu la kyesɛ menli mɔɔ di ɛtane la ala. Bɛmkpondɛ kɛ bɛsulo sonla mɔɔ tumi wɔ ɔ sa nu la ɔ? Ɛnee bɛbɔ ɛbɛla kpalɛ, na ɔkɛhanvo bɛ.

⁴Ɔluakɛ ɔle Nyamenle sonvolɛ mɔɔ ɛlɛyɛ ye gyima wɔ bɛ kpalɛ ti a. Noko saa ɛdi ɛtane ɛdeɛ a, ɛnee sulo ye, ɔluakɛ ɔlɛ tumi, yɛɛ kɛmɔ ɔle sonvolɛ mɔɔ ɛlɛyɛ ye Nyamenle gyima la, ɔkola ɔtea menli mɔɔ di ɛtane la.

⁵Ɛhye ati ɔwɔ kɛ bɛtie na bɛyɛ mɔɔ menli mɔɔ tumi anzɛɛ maanlebulɛ ne wɔ bɛ sa nu la kɛze bɛ la, tɛ kɛ Nyamenle kɛdea bɛ la ati ɔ, na bɛ adwenle nu te wienyi la ati ɔ.

⁶ Zɔhane ati yɛɛ ɔwɔ kɛ bɛtua bɛ maanle adwule noko a, ɔluakɛ saa mgbanyima ne mɔ mɔɔ di zɛhae gyima la yɛ bɛ gyima ne adenle kpalɛ zo a, ɛnee bɛlɛyɛ bɛ Nyamenle gyima.

⁷Yemɔti, mɔɔ ɔwɔ kɛ bɛtua la, bɛdua; bɛdua bɛ maanle adwule ngakyile ne mɔ amuala, bɛbu mgbanyima ne mɔ na bɛli bɛ muala eni.

⁸Bɛmmadi awie biala anwo ɛzonle, ɛzonle mɔɔ yɛdi la a le kɛ yɛkɛhulo yɛ nwo ngoko ngoko. Mɔɔ kulo ɔ gɔnwo dasanli la ɛli Mosisi mɛla ne azo ɛwie.

⁹ Mɛla ne mɔɔ se, “Mmafa awuvolɛ, mmayɛ kɔdiawu, mmawua, mmayɛ anyebolo” nee mɔɔ ɛha la amuala, bɛbɔ ye kpɔkɛ ko kɛ, “Kulo ɛ gɔnwo kɛ ɛdawɔ ɛ nwo la.”

¹⁰Saa ɛlɛ ɛhulolɛ a, ɛnrɛyɛ ɛ gɔnwo ɛtane. Yemɔti ɛhulolɛ a sɔ Mosisi mɛla ne amuala anloa a.

¹¹Ɛhye mɔ amuala anzi, ɔwɔ kɛ bɛnwu kɛ mekɛ ɛdwu mɔɔ ɔwɔ kɛ bɛfi nafelɛ nu bɛdwazo a. Ɔluakɛ ngoanelielɛ mekɛ ne ɛbikye ɛdɛla kɛmɔ yɛzuzule ye wɔ mekɛ mɔɔ yɛlumuale yɛnyianle diedi ne la.

¹²Aledwolɛ ne asɛɛ ɛze, alehyenlɛ ɛbikye; zɔhane ati bɛmaa yɛgyakyi awozinli nu nyɛleɛ ne mɔ, na yɛva wienyi nu konle tɛladeɛ mɔɔ bamaa yɛahola ko la yɛwula.

¹³Bɛmaa yɛli yɛ nwo eni, na yɛbɔ yɛ ɛbɛla kpalɛ kɛ menli mɔɔ wɔ alehyenlɛ nu la, mɔɔ anwondɛlɛ mgbane mgbane, nzabolɛ, adwɔmanebɔlɛ, anzɛɛ huhunli ɛbɛla ɛbɔlɛ, konle anzɛɛ nungule ɛhwenlɛ biala ɛnle nu a.

¹⁴Na bɛva Awulae Kelaese bɛyɛ konle tɛladeɛ bɛwula, na bɛzi nwonane nu adwenle ɛvalɛ nee ye atiakunluwɔzo aze.